31/12/25

 31/12/25     WED     VERY COLD

今日係除夕, 繼續瞓到自然醒, 子元已經出咗去, 所以我地自己食啲早餐, 點幾又要再出去啦, 因為約咗Barry佢地, 之前佢地問約出嚟, 咁本身諗住食晚飯, 但因為book唔到枱, 改咗下午去Teki食, 本身諗住食完就算, 但原來佢諗住上嚟我地到, 為咗仲爺個Microsoft安裝, 都係要架啦, 最終佢地坐到6點幾先肯走, 咁我地先可以free吓, 子元又唔返嚟食飯, 咁我地就煮晚飯食雞煲咁, 食完睇埋尋秦記大結局先沖涼, 仲爺話要倒數埋先瞓, 咁就要開youtube先有英國倒數, 加埋現場放唔完的煙花, 都算幾熱鬧!

30/12/25

 30/12/25    TUE     COLD

今日勁hea, 冇出過街, 朝早瞓到好晏, 但知到子元佢地煮早餐同出咗去玩! 起咗身等老公蒸腸粉燒賣等咗好耐, 差不多2點先有得食, 所以等期間我已經做埋清潔! 食完之後就開始hea, 係咁睇尋秦記, 差5集就睇哂, 因為仲爺又要一齊打機喎, 咁就打到食晚餐一品窩麵邊睇波, 子元返嚟之前快手沖咗個涼先, 跟住就喺房hea, 因為又比佢地霸咗個廳, 問清楚佢明天行程, 疑似又要用埋個廳, 老實我想睇電視, 所以唔可以再放個廳比佢!

29/12/25

 29/12/25     MON     COLD

今日終於過番個普通的假期, 朝早老公好忙要做司機, 又車蛋糕又車佢地出去hyde park! 我就瞓到唔知時間, 唔記得咗仲爺要學音樂, 老公打嚟先知, 馬上叫佢起身學音樂, 等佢學完我先煮早餐食呢, 簡單食丁麵, 然後就出去買餸, 買埋午餐, 返到嚟食完摺衫, 都未摺得哂子元就玩完返嚟, 咁我就要搬去樓上, 留番個廳比佢地玩, 仲要煮埋晚餐呢, 不過都係簡單食意粉咋, 之後佢地同個朋友仔慶祝埋生日就繼續玩, 我又要返番上房, 咁又過咗一日啦!

28/12/25

 28/12/25     SUN      COLD

今日都瞓到9點幾先醒, 跟住就hea到葉家話幾點會過嚟先起身, 老公就開始水吧系列, 要煮十個人份早餐都要啲時間, 所以係要等, 我地一家已經快啲食先, 但爐頭唔夠係咁上吓, 所以食到點幾先出到門口, 同張家會合喺龍鳳等, 基本上係各式超市之旅, 搞到我喺龍鳳又買咗好多, 因為見到有啱買嘛, 所以之後喺日韓超就輕輕買少少, 嚟緊都要閉關休息! 返嚟屋企交收埋啲嘢就去Reading食九龍冰室, 我又可以食我嗰個牛肉炒意粉, 正! 食到7點多都要散啦, 又要等幾個月先見到! 

27/12/25

 27/12/25     SAT     COLD

今日係葉家過嚟玩, 不過等佢地過得嚟check in都4點幾! 朝早自然醒再hea吓先起身咁, 食得早餐都已經中午, 要諗埋晚餐點, 佢地話買啲嘢放入焗爐就算, 所以出去買埋嘢, 老公返嚟就睇波, hea住等佢地到, 我都要摺埋啲衫再係咁二吸吓塵! 等葉家嚟到就先去west ealing泊車, 再轉地鐵去central london, 睇燈飾嘛, 好在撘地鐵咋, 因為市中心真係好塞, 不過真係好多人, 又要係咁攞手機出嚟睇路, 真係有啲艱辛, 不過大家都行得開心, 最後仲去埋買蕨餅, 真係好引有三隻味, 返嚟食完晚餐就用嚟做甜品! 返得去都10點多, 馬上焗嘢食, 炮哥同事頭10點九先嚟到, 佢地主要都係吹吓水, 最終吹到點幾先散, 明天繼續!

26/12/25

 26/12/25     FRI     COLD

今朝真係9點幾先醒, 都正常, 琴晚咁夜先瞓, 所以又早餐午餐一齊食, 食完老公要整埋個豬皮魚蛋, 我就睇吓電視咁啦, 因為真係好遲先食早餐, 所以3點多先出門口, 不過真係唔塞車, 所以好快去到winnie屋企, 咁就開始係咁整嘢食同食嘢吹水, 仲爺繼續同兩個女仔玩, 我地又唔記得影相, 淨係影咗幾張食物相, 睇埋波10點幾就走啦, 佢地都好鍾意食我啲雲吞, 都幾開心! 

25/12/25

 25/12/25     THU     VERY COLD

聖誕快樂呀! 今朝瞓到7點幾8點已經醒咗, hea到咁上吓上起身, 等老公煮沙哆牛肉做早餐, 好味! 食飽飽就開始hea, 老公就要整碗仔翅今日party, 睇電視睇到咁上吓, 又轉打吓機咁, 到3點幾先出門口去bonnie屋企開party, 我地最早到, 都係吹吓水食吓嘢, 邊等其他嚟, 又係準備吓嘢食咁啦, 然後有人開枱又打咗陣牌, 等letty嚟到有人接手, 我又可以過番去吹水, 等齊人搞掂就可以食嘢啦, 今年啲食物遇得幾好, 基本上冇淨! 食完嘢差不多又要抽bingo, 啲細路選禮物, 今年仲爺冇因為攞到啲咩禮物而唔開心, 佢話今年啲禮物冇咩好嘢! 之後一路吹水吹到12點幾, 先開始收拾走人, 好在明天party係下午, 明天先再算!

24/12/25

 24/12/25     WED     VERY COLD

平安夜, 冇特別去咩地方食咩聖誕大餐, 基本上全日都喺屋企, 如果唔係去mass都唔會出去, 老公今日都係要返工, 咁我地瞓到自然醒就煮早餐, 跟住我就要包埋琴日未包完的雲吞, 老公返到嚟都未包完, 咁就唔出去食, 叫外賣算, 不過早餐食得好夠所以都唔太餓! 子元就霸住個電視打機, 不過都冇咩所謂啦, 結果佢打到我地出去mass都未打完! 未去過平安夜mass, 原來兒童場有小BB做劇場, 好可愛! 完成咗就去咗食麥記, 簡簡單單! 返嚟等沖涼時睇埋今個星期的模範的士3, 就沖涼了! 仲要等仲爺瞓咗老公就砌埋聖誕老人份禮物!

23/12/25

 23/12/25     TUE     COLD

今朝仲仲要去踢波, 所以我要同平時一樣咁早起身, 撘巴士過去球場, 教練竟然話要著平底波boot, 如果唔係以赤腳踢, 最終我撘番巴士返去, 再踩單車攞番對鞋比佢, 第一次試車行咁遠, 都要試吓先知有咩要改善! 大致上都可以, 不過車頭掛唔到太多嘢, 因為要踩個位會撞到腳! 最終順利送完貨返屋企, 跟住就係整雲吞, 基本上又要煮粥又要整雲吞料, 都幾忙碌! 但最後都係唔夠皮包, 所以都係要等老公返嚟再去買, 返嚟再煮飯, 食得嚟已經9點幾, 老公繼續睇波, 我就沖涼了!

22/12/25

 22/12/25     MON     COLD

今日假期呀, 但係都好忙架, 起身已經要換咗床單先, 又要做清潔, 仲要快手煮埋早餐等仲仲學音樂前食咗先, 等佢學緊時食完早餐仲要吸埋塵抹埋地, 12又要出門口啦, 因為仲爺要去驗眼, 都要配番深少少跟番眼鏡的con, 跟住就係行broadway囉, 睇吓買吓咁, 我又買咗條牛仔褲, 半價嘛, 仲有買開party交換禮物啲嘢, 跟住仲食埋炸雞, 換埋特價麥當勞, 就撘巴士返去, 仲爺又急不及侍咁set聖誕樹, 咁就整埋先啦, 仲有兩機衫等我摺呢! 還要煮晚飯, 好忙!

21/12/25

 21/12/25     SUN     COLD

今日又出咗去買餸, 因為今日冬至嘛, 點都要煮吓蝦煮吓魚, 所以除咗去超市買番琴日未買到的, 又幫子元睇吓佢想買嗰部pad, 再去買埋海鮮, 返得屋企都差不多四點, 所以又開始要煮晚餐, 今晚冬至飯都算簡單, 只係蒸魚, 蝦, 雞煲, 冬菇鮑魚生菜, 比較簡單都要煮的, 然後就係係咁睇造星, 差嗰兩集冇咗就算, 照跳咗嚟睇, 10點幾先沖涼呢!

20/12/25

 20/12/25     SAT     COLD

今日都係瞓到自然醒啦, 食完早餐等老公寄完件, 就揍仲爺去正正屋企玩, 然後去超市買餸, 又中超又西超, 不過龍鳳隔離嗰間真係冇咁齊嘢賣! 明天可能都要再買! 返到屋企老公又要整炒米粉做午餐, 再整埋叉燒, 因為今晚去正正屋企做冬嘛, 所以要整好多嘢食攞埋過去, 整得嚟6點幾先過去, 都係食飯吹吓水咁啦, 11點多要走啦, 佢地都玩咗好耐! 返到嚟就快手沖涼休息啦!

19/12/25

 19/12/25     FRI     COLD

今日點都要返工, 又唔可以踩車, 所以要慢慢行出去撘巴士, 我諗住只轉一次就撘92轉483, 點知明明寫住轉車嗰個站有483都好, 佢又可以飛呢個站而去咗前一個站, 總之迫到我小宇宙識得跑, 順利9點前返到去, 今日其實點都係hea架啦, 我仲可以飛埋跟三隻小天使tresure hunt, 因為唔行得咁快嘛! 最尾兩part都係喺課室, 12點佢地就放學啦, staff聚埋吹水食啲嘢, 因為校長不在, 所以未夠1點已經散哂, 我都唔等老公啦, 因為見佢仲喺公司嗰頭, 不如慢慢行去撘巴士, 同佢差不多時間返到, 咁就出發去食嘢, 去咗榮業食茶餐廳, 跟住就車阿哥去踢波, 佢約咗啲同學去玩呢, 我都就返屋企, 老公仲要去買羊腩牛腩, 明天仲爺去正正屋企玩, 咁就要帶埋嘢食一齊去做冬啦! 晚飯食麥記咋, 反正個廚房都唔得閒煮嘢!

18/12/25

 18/12/25     THU     RAIN

今日請咗日假呀, 冇辦法啦, 琴日隻腳咁傷, 都返唔到工架啦, 不過都係要一早起身, 搞掂仲爺出門口, 我就開始hea, 同子元講咁樣喺屋企好悶, 但佢就叫我好好休息吓, 於是就開住咗個慶餘年嚟陪自己, 每兩個鐘就敷冰再搽藥膏, 不停重複好似到下午時慢慢好咗啲! 中午時用琴晚隻雞腿整咗粥食, 一個人食飯時我就最鍾意食粥, 仲炒咗個麵, 好正! 食飽就想瞓, 迷糊間瞓吓又醒吓咁啦, 三點幾醒見仲爺仲未返, 冇幾耐就聽到聲, 原來條友過咗站落唔到車要行多一個站返嚟陰公! 又落雨咁濕哂! 快啲沖涼換衫啦, 因為今晚disco night有得返學校玩, 好在有同學仔個阿媽包接送, 幾好呀, 咁我地又煩少好多嘢! 老公今日生日但要自己去買刺身返嚟, 一買完返嚟我地都冇等埋仲爺就開餐, 因為真係好肚餓咁, 不過當然有留番比佢啦, 食完仲要砌埋新嚟的單車, 不過舊嗰架仲喺到要送走咗先可以叉電, 都唔緊要啦, 反正嚟緊都放假囉唔影響!

17/12/25

 17/12/25     WED     COLD

今朝出門口見到得番一架車可以用, 好過冇, 有得返工已經好好, 仲要今日勁大霧, 都辛苦先返到去, 不過今日我喺大房幫手, 加上啲學生又late start, 所以係有啲hea, 執文具櫃時順手攞哂需的文具, 又可以扮吓工咁! 中場就做吓飯更, 最後就返大房坐埋嗰個鐘, 由於琴日車我個同事今日冇返, 我唯有靠自己返屋企, 行出去ealing broadway, 順手去WA買埋蛋糕同老公慶生日, 雖然明天先係正日, 但今晚切咗蛋糕先都得, 跟住就撘E1啦, 喺Lidl落車再買啲基本嘢就返屋企, 因為冇車都係要行, 但行咗一陣發現左腳好痛, 但點都要行到返去, 真係愈行愈痛, 痛到好唔正常, 用咗冰都係唔得, 應該係扭親啦, 但唔係平時扭到外邊而係腳踝位, 明天應該都返唔到工, 仲可以等埋我架新車明天送嚟! 結果今日我就只係盡力冷凍吓隻腳, 因為星期五點都要死返去!

16/12/25

 16/12/25     TUE     COLD

今日都係要靠租單車返學, 但點都好過等巴士, 我只係早咗10分鐘出門口! 然後9點前都返咗去啦, 都算順利, 亦都比琴日快, 不過明天我會再快啲, 掌握好應該可以再快啲! 返到去可以直接返大房, 等我個學生返嚟, 大致上今日都幾hea, 因為學生Early leave, 等佢地走咗我地就開party, 實在係太多嘢食, 多到食多一日都得, 仲要啲阿姐全部都走哂, 得番我地啲supporting staff, 所以更加輕鬆! 我最終叫埋DT部香港人過嚟一齊食, 幾開心, 基本上好多老師都有過嚟痴啲食吓, 我地實在係太強大的部門! 本來準時走得, 但有得痴車撘, 同事可以車我去到greenford broadway, 咁點都等到3點半啦, 所以行埋返嚟都係4點3左右, 真係快過撘巴士好多! 快手倒埋垃圾就可以休息, 因為仲爺明天才練波, 所以先倒得切垃圾! 晚飯簡單炸雞腿, 連埋我帶返嚟的餸尾, 但真係好好食, 基本上唔係同事整係唔會食到的其他國家食物! 

15/12/25

 15/12/25     MON     COLD

今朝真係夠哂刺激, 照常咁諗住出門口, 點知一出車架車error喎, 再開再閂都唔得, 唯有放棄! 咁可以點返工呢, 仲喺到迷茫緊時, 見到有人踩緊E-bike, 咁可以點呢, 我竟然stop嗰個人問佢可以點租, 咁經過一輪努力登記, 終於開到車, 最終9點半前返到去, 算係咁啦, 但今個星期點呢, 好難搞喎, 叫子元再幫我search吓有冇機會整到, 但出嚟個結果係摩打壞, 咁真係冇得救, 所以最終老公幫我買過部新! 其實呢部都捱咗好耐, 放過佢啦! 不過今個星期都係要解決, 所以只可以係巴士放學, e-bike返學, 唯有係咁先, 有兩星期我習慣吓新車先開工都好啦! 放學撘483真係搞唔到, 近Felix road嗰到塞到痴線, 我落咗車行, 但真係行唔到咁耐, 返得嚟已經4點半, 腳痛呀! 明天試番上路睇吓好唔好啲! 休息吓咁, 因為食咗個double cheese burger, 所以唔洗再煮嘢食, 老公返嚟仲爺就去練波, 我要煮飯啦, 今日試咗個用春雞煲湯, 但我覺得都係唔夠好味! 洗完碗都沖涼啦, 今晚要早啲瞓, 我好攰!

14/12/25

 14/12/25     SAT      COLD

今日本來係諗住唔出街架啦, 老公一早揍咗仲爺去比賽, 我hea到咁上吓起身食早餐, 老公返嚟話去B&M, 咁子元又一齊去, 條友想飲咖啡呢! 快行完買完佢要買的就返去啦, 因為佢地又要去踢波, 咁我就可以自己喺屋企自由活動! 都係要洗衫同摺衫咁啦, 跟住就要同兩隻鴨解體, 用咗少少鴨肉嚟煲粥, 真係好好食, 勁甜但唔係好夠飽, 所以好早我都已經食晚飯, 因為得我一個人食, 佢地踢完波去九龍冰室食埋先返, 我又唔想去咁耐為咗食一餐所以喺屋企自己煮西芹就算, 因為太早食完所以早啲沖埋涼, 但早為大戈早食就10點幾已經又餓, 可惡!

13/12/25

 13/12/25     SAT     COLD

今朝8點幾九點醒咗身, 就梳洗食早餐啦, 因仲爺1點要練跑, 所以早啲買咗餸返嚟, 仲要買埋下星期二我地同事玩secret santa的禮物, 我都係買啲食物嘢飲同杯咁啦, 最穩陣! 買完返嚟佢地出去我就要做清潔啦, 因為要清埋廚房啲發毛位, 所以仲爺練完跑返嚟我都仲係拖緊地, 做好家務就好肚餓, 老公話整腸粉燒賣, 都好啦, 食完睇埋電視, 老公先要睇波再沖涼, 晚飯食豬手麵, 真係好正!

12/12/25

 12/12/25     FRI     COOL

終於又到星期五啦, 本來以為要跟條顛狗, 點知一嚟佢冇返, 二來配咗我比另一個, 好就好在嗰個係轉堂會走咗去, 咁我係第一堂轉堂試過捉佢但係捉唔到, 咁我之後每次都放棄啦, 直接去課室等算, 飯又可以放長啲, 然後又可以係咁打機, 正! 準時收工走人, 攞埋藥先返屋企, 好肚餓要食嘢, 然後咪做蟲蟲囉, 反正星期五都係外賣日, 真係冇動力煮! 睇咗造星同模範的士, 睇到11點先沖涼呢, 實在係太hea!

11/12/25

 11/12/25     THU     COOL

今朝返到去先知要監考, 咁時間緊迫我都快手攞咗份卷就行, 點知去到開咗場先發現自己唔記得攞Exam Pack, 但我又已經比咗份卷個學生, 冇理由叫停佢再去攞嘢架, 問大房又冇人得閒, 好在我見到香港人同事, 咁就打比佢叫佢幫手攞比我, 成日都麻煩佢救我! 兩個半鐘考試係要忍吓冇得去廁所, 然後就係要點打發時間, 因為個房喺正校長隔離, 所以都要小心啲, 用啲小方法cover自己打吓機, 跟住就頂吓飯更, 又跟吓盲盲地嗰個, 佢有test咁又要幫手啦, 到我放完個長飯, 又要返去上數學堂, 完全冇為意冇早走, 可惜! 另外今日收到肥比text我, 話發現giv仔個FB有異樣, 唔知佢同Sun仔係咪有咩問題, 但我返緊工又長傾唔到, 放工返到嚟細佬又話想食麥當勞, 咁咪行落去買完今日特價再轉巴士囉! 返到嚟淨係煮飯, 因為老公琴晚已經煮咗鴨腿, 超正! 同老公講過giv仔同sun仔件事, 最終佢直接問咗giv仔先知佢地離咗婚半年, 撞鬼囉點解會咁架, 真係咁兒嬉, 唉...真係唔知講咩, 一家唔知一家事!

10/12/25

 10/12/25     WED     COOL

今日揍三個又真係好忙, 第一堂PE仲要行圈, 又要揍住佢地三個, 我已經好攰, 之後一日其實都冇咩停過, 所以返到屋企已經冇哂力, 食完嘢開始只係hea, 但我都有做work out架, 所以煮埋飯之後更攰, 食完飯就沖涼休息啦! 

9/12/25

 9/12/25     TUE     COLD

今日如常返工啦, 冇咩驚喜都係跟顛妹, 佢都係一如以往, 但到放飯尾聲時, 佢話要去廁所咁咪同佢過去, 用咗year 11嗰個, 本來都冇嘢, 佢有佢用我有我睇手機, SMSA都係講電話中, 突然佢又喺到大叫, 我地都係例牌咁叫佢快啲出嚟, 點知佢冇理之餘過咗一陣就聽到佢嗰格有整爛嘢聲, 我地叫足佢一分鐘出嚟佢都唔出, 終於肯出嚟時, 極快速走咗, 咁我同個SMSA一睇爛咗塊廁所板, 咁十成係佢企咗上去啦, 到我返到去捉佢去見大姐時, 佢唔認架, 咁大姐最終send咗佢去HOY到, 咁佢同佢個friend都要寫文講自己做咗咩, 最終比人小完再返大房過埋嗰堂, 我就可以自由自在吓囉, 然後準時放工! 今晚仲爺唔踢波, 所以可以倒完垃圾就慢慢煮嘢食休息! 個天真係勁快黑, 我回程時加埋啲黑雲, 真係唔夠睇得清楚條路! 今晚老公煮飯, 咁我又可以hea吓啦, 洗埋碗都10點, 因為同may吹咗半個鐘水呢!

8/12/25

 8/12/25     MON     COLD

今日預咗係輕鬆日, 返到去有監考做, 都係兩個鐘內, 跟住就要照常飯更, 今日仲要多咗一更, 所以點半先有飯開, 可以食個長飯已經好好, 上埋最尾嗰堂又收得工, 返嚟途中架車都冼軚, 好在我都控制到冇事! 返到屋企就好多嘢要做咁, 又要洗衫又要整嘢食咁, 總之要四點幾先可以坐下, 仲爺出咗去踢波我都要煮飯, 但就局咗子元瞓醒起身時摺埋啲衫, 因為條友叫佢做呢樣又話唔識咁, 最終叫佢摺佢都肯, 算佢啦, 食晚飯時都係睇波啦, 洗埋碗我都沖涼休息啦!

7/12/25

 7/12/25     SUN     RAIN

琴晚都係瞓得唔係咁好, 所以今日都係好攰咁! 朝早老公整腸粉燒賣, 仲要落豬潤, 咁都真係好食, 因為仲爺12點要踢波, 所以早啲打咗比阿媽先, 阿媽又問可以打埋比阿妹, 仲爺又真係識用喎, 所以都傾咗一陣! 佢地出咗去我就休息吓先, 仲要摺埋啲衫, 等比賽完返嚟就要出去ealing broadway, 因為仲爺話要買christmas jumper下星期返學著, 所以順手食埋嘢, 買齊嘢就返去, 本來諗住車埋阿哥反正佢都喺嗰頭溫書但佢又未走咁就由得佢啦! 返到嚟都係開始要煮飯同埋都係要摺埋啲衫, 有冇咁多衫要摺呀! 本來都好唔想煮飯但都要煮架啦, 真係有啲攰, 之後仲要處理埋阿may佢地改日子過嚟, 好在最終都搞得掂! 

6/12/25

 6/12/25     SAT     COLD

今日都係好似平時星期六咁, 起身食完早餐就出去買餸, 仲爺唔洗買jumper咁就直接去中超加超市, 老公返嚟睇阿仙奴, 不過睇咗半場就要帶仲爺出去踢波, 咁我就做清潔啦, 試吓個新的地拖, 感筧上真係乾淨啲, 又唔洗成日用手洗幾好! 3點幾煮埋嘢食, 因為仲爺佢地應該冇咁早返, 子元就一早已經出咗去溫書, 晚飯時間先返嚟, 今晚又係打邊爐, 真係抵玩! 之後本來係想睇埋模範的士, 但睇到第二集真係眼瞓啦, 都係沖涼休息啦!

5/12/25

 5/12/25     FRI     VERY COLD

今朝體感又得番0度, 真係要著夠衫先得! 返到去係原本跟嗰啲冇改, 咁就照開工啦, 好好彩得番兩隻小天使, 老實真係輕鬆好多, 加上佢地又冇再反面, 今日相對地真係舒咗好多, 和平啲咪幾好囉! PE堂喺redgrd踢波時, 有兩隻無人機停喺到唔知做咩, 然後幾件SLT就過哂嚟, 但都唔知佢地睇咩! 今日總之就過得好舒服啦, 老公話今晚打邊爐, 佢就嚟接我放工再去broadway買餸, 順手幫仲爺攞埋con! 返到嚟準備打邊爐啲嘢, 等阿哥教埋波返嚟就開爐, 邊打邊睇造星, 咁就到9點幾啦!

4/12/25

 4/12/25     THU     COLD

今日又凍又落雨咁真係陰公, 返到去先又改咗跟第二個, 是但啦, 比咩我都要做架啦, 唔學得呢到啲人咁選客! 其實都冇咩咁難, 都係咁做啫, 我仲打咗幾轉數獨, 唔係時間都唔知點過, 午飯仲要唔洗人替更, 自己放耐啲都仲得! 放學又準時喎, 返到去食埋嘢就揍仲去踢波, 返嚟就摺衫煮飯, 一日又咁過咗, 真係快到呢! 仲有兩星期一日又放聖誕假啦, 幾快!

3/12/25

 3/12/25     WED     COLD

今朝出門口之後先覺得咁凍, 但都要頂住啦冇辦法! 今日已經趕唔切考試更咁唯有繼續跟嗰條麻煩友, 今日啲堂都唔算太難搞, 所以我都係喺適當時候交吓差就算, 算係無驚無險又收工! 返到嚟都有啲忙, 又要睇吓老公話訂咗我個洗地神器, 又話琴日送咗但又冇, 但突然又送咗嚟, 好亂呀! 之後又要煮嘢食, 老公又叫我地打比嫲嫲, 到仲爺學音樂時我先可以輕鬆吓, 但都係睇住電視摺衫同埋打機, 最後就係今日老公煮哂飯我唔洗煮, 難得!

2/12/25

 2/12/25     TUE     COLD

今日係仲爺正日生日, 但又要返工學又要練波咁, 都冇咩可以做! 朝早返到去學校, 都未行返大房, 我個同事就截住我, 要我監考個學生, 老實冇試過全程得自己一個做哂全程, 實在係都唔知點做, 唯有諗番之前啲同事做時係點, 就照辦, 咁so far都做得唔錯, 中途有人入嚟檢查吓, 仲有可以放我去廁所, 中午飯就喺兩個考試之間食咗佢, 下午又嚟一場試, 基本上個學生都唔係好識英文, 所以大家都係盡吓力就算, 咁我又可以輕鬆咁過咗呢日! 放學試住去睇吓魚柳包係咪真係特價, 但原來要係用會員, 最終為咗魚柳包你可以去到幾盡, 我地提早出門口去球場前就先去咗一轉買, 又要轉車咁, 真係幾顛, 不過99P一個實在太抵! 晚飯後叫咗waffle外賣, 話哂今日係仲爺正日生日嘛! 都係嗰句啦, 希望佢聽聽話話開開心心!

1/12/25

 1/12/25     MON     RAIN

今日又落雨啦, 又唔太凍又落雨有時唔知點著衫先好! 今朝都有啲趕, 只可以快手啲! 返到去過埋冇學生的一日, 都有做吓嘢, 要交吓差架嘛, 準時12點半就食午飯, 下午主要幫吓手整聖誕裝飾, 夠鐘就放工啦, 返去整嘢食hea吓休息, 當然要洗衫摺衫啦, 子元又話溫埋書先返, 仲爺本來要練波, 但去到球場先話因為球場有人用刀疑似刺人, 所以封咗冇得練, 咁就返嚟囉, 我煮得飯嚟都8點幾先開飯, 洗完碗都有啲攰呢, 快啲沖涼休息!