27/7/26 MON WARM
今朝要去GP睇物理治療師, 遲咗3分鐘到啫, 佢可能已經叫咗名所以又要等到佢9:45先再出嚟叫名, 同佢傾咗幾句, 我忍唔住問佢係咪講廣東話, 果然冇估錯, 咁之後我地都係用廣東話溝通啦, 真係順暢好多, 唔知係因為趕下個客定佢唔太吹水, 都唔算傾咗好多閒話! 睇完就返屋企, 仲爺都食咗早餐, 咁到11點就同佢做功課, 做完就做運動, 然後預備午餐, 今日比較簡單pizza沙律, 食完同佢做埋下半場學習, 又做埋sparx, 佢再打咗陣機又要去踢波, 我就邊打機邊睇電視, 差不多時間就煮飯, 都算啱時間返到嚟就開飯, 食完快啲去沖涼, 又好熱咁啦!
23/7/26 THU HOT
今朝仲爺10點要學音樂, 所以要早啲煮早餐佢食, 學完音樂又到學習時間, 今日係Geo科咁學校本身有功課就做啦, 下午的數學時段都供埋出嚟做啦, 咁今日都做哂, 其實重點係我琴日已經問咗AI, 佢開番嚟睇就有個大概, 本來想佢自己用AI search, 但佢個AI冇咩train過, 完全答唔出要的答案, 所以都係用我嗰個啦, 佢係要寫番出嚟做吓排版咁, 不過佢呢方面都好差, 我又唔係好可以幫佢, 所以都係由佢自己嚟啦! 午餐都係同琴日差不多, 因為買咗啲料返嚟唔會一餐食得哂, 所以成日都係會重覆, 5點多要揍佢去麥記同老公會合佢去跑步, 咁我又要返去預備晚餐料等老公返嚟煮雞煲, 今次嗰個夠spicy, 食到出哂汗!跟住都係沖涼休息啦!
22/7/26 WED HOT
今日要揍仲爺去牙科檢查, 所以早啲食咗早餐就溫習, 咁11點就出門口, 撘巴士過去原來都仲係好熱, 好在車程都唔算太耐! 去到又要等一輪先到啦, 好在仲爺都好合作, 同埋佢啲牙都好靚仔, 係大牙出緊, 幫佢整咗啲強化法朗質上去, 咁跟住又撘番巴士返去, 去咗 Lidi買咗啲嘢再行返去, 又繼續宅在家, 整咗午餐先, 今日食冷麵, 都有版有眼架! 然後就係下半場溫習, 今次到英文, 輕鬆地睇吓嘢就算啦! 跟住就係休息啦, 我都好攰咁! 仲咗吓work out, 又繼續二刷我套逐玉, 晚飯叫子元學吓點切雞翼等等, 要佢學吓點煮嘢架啦! 老公沖完涼就煮埋下半場, 食完飯就洗碗沖涼休息!
21/7/26 TUE WARM
今日正式咁做開始暑假啦, 老公返咗工, 我已經醒咗但都喺床hea到8點幾先梳洗, 因為要煮早餐嘛, 跟同AI相討出嚟的餐單煮, 其實都只係想冇咁悶啫, 就整咗個好有儀式感的早餐出嚟, 食完差不多就要開始仲爺的學習時間, 都順利完成, 到我抖吓又要整午餐, 不過今餐係食pizza同沙律菜, 然後就係繼續下午時段學習, 今日咁啱都係數呢, 做完就自由時間, 佢又想出去玩, 咁就陪佢去咗球場, 都有一齊打咗陣, 但我唔會發力, 怕未好哂, 所以都係輕度咁玩, 然後都係佢主力自己射波! 到4點幾就返去啦, 佢晏啲又要踢波, 子元又要踢波, 所以晚飯又比較難遇, 碟頭模式多! 洗埋碗我都沖涼啦!
20/7/26 MON HOT
今日喺酒店都瞓到8點幾先醒算係咁, 琴晚實在係太夜了! 起身梳洗就過去葉家屋企食早餐, 都係我地帶咗沙嗲牛嚟佢地出丁麵咁啦, 11點幾我地都要走, 一來想去一轉偉義行, 二來2點半要返GP覆診, 都係要早啲走, 所以快去行完中超買咗要買的後就回程, 返嚟放低嘢去個廁就要出門口, 去到GP檢查個環, 又話條線頭搵唔到, 會再安排去照ultrasound睇清楚個環仲喺唔喺入面, 不過超過6星期了我都冇正常M嚟, 所以應該只係線頭走咗入去, 唔係甩咗, 但都係要再約去照, 冇咩可以做! 但我心理感覺上就唔多好囉, 沒完沒了咁! 返屋企之後因為唔想煮, 就去咗路口食波蘭餐廳, 食完返去仲爺又要預番時間去踢波, 咁我就摺衫晾衫休息吓, 仲有寫埋佢暑假個時間表, 明天開始要學習, 已經比佢偷懶咗一日! 返到嚟就開飯食完沖涼休息, 今日好攰, 琴晚實在太夜瞓!
18/7/26 SAT HOT
今日主要都係買餸啦, 朝早瞓到8點幾先醒算好好啦, 跟住就老公煮早餐食啦, 食完差不多時間先要車子元去球場, 都係好近的, 跟住就去咗中超, 諗住買少少又買左七十幾, 然後返咗屋企先, 老公就去接番子元, 再車我去超市買餸, 今次要買埋午餐料, 嚟緊又係煮完早餐又到午餐咁, 好忙! 喺超市時, 仲爺打嚟話想同同學出去公園玩, 咁老公就比咗佢去, 但我叫佢記得帶埋airtag, 但就唔好帶電話, 陣間怕佢比人搶, 咁有個airtag我都知佢去咗邊, 買完去佢airtag個位望一望佢, 咁之後就等佢自己返嚟啦, 因為我返去仲要處理啲雞心雞腎, 做到手腳都軟, 跟住就到老公煮嘢食, 食完又差不多要預備晚餐, 仲要洗衫摺衫, 其實都忙忙碌碌咁, 洗完碗諗住掉埋垃圾, 點知個垃圾桶又有蟲蟲, 又要清潔一輪, 搞亂哂我個計劃! 睇少咗英格蘭一球, 上場又唔見佢咁勁, 半場入四球, 季軍賽有鬼用!
17/7/26 FRI HOT SUNNY
返埋今日終於放暑假啦, yeah! 其實今日返去都係hea, 咁都要返嘛! 今日真係跟番個表我係跟兩隻小使, 因為一隻冇返, 都好做少啲! 老實講嗰幾個鐘都幾悶, 但點都會過完, 食吓嘢睇吓嘢咁, Ms Lim又放佢地去草地放風放吓電, 捱埋最尾個鐘就到我地準備, 今日End year冇喺6th form嗰邊反而喺草地, 到我地放風呢! 一開始梗係搵靚位食嘢先, 今次食burger, 然後我地department仲有支香檳就開埋嚟飲, 我都飲咗半杯仔, 終於快手地校長講完嘢就走得, 嗰時先1:15, 咁我又唔急住走, 老公都未返到, 我又想同香港人講吓嘢, 因為佢冇update我佢批咗ILR未, 天氣太熱入咗佢房等佢邊執埋嘢邊傾, 所以都1:30先走, 返到去等老公返嚟, 佢去咗洗車, 所以3點多先返到嚟, 其實我都好忙呀, 阿媽無端端又message子元, 搞到佢又問番我咩事, 咁我都照打比阿媽睇吓佢做咩, 佢啲記性近來都係差咗, 年紀大咗都冇法, 我自己都記情差咗啦! 等老公返到嚟就出門口去榮業食嘢, 真係只係為咗食佢個茶餐廳, 然後仲爺就要去踢波, 我地就去咗行街, 都係唔行得好耐, 試咗幾條褲但都係唔啱, 同埋我真係好肥囉! 接番仲爺就回家, 佢地沖好涼先, 因為子元一早出咗去同Holly街街同打機, 所以都唔洗理佢! 最終煎咗啲豬扒配麵食, 食埋就沖涼休息啦!
16/7/26 THU HOT
今日叫做最後有課堂的日子, 明天都係返半日, 已經差不多架啦, 頂住! 不過今日都係勁hea, 基本上冇人比我跟, 叫我執咗個櫃, 但其實唔難執, 所以拖咗一堂半就做完, 叫我去跟學生, 但其實今日都冇咩好跟, 我見得番20分鐘, 就上去還番本書就走咗, 喺樓梯口企到咁上吓先去staff room, 去吓廁所hea啦! 跟住都係要飯更吓, 然後捱埋嗰兩堂囉! 放工走人返去沖涼食嘢, 由於出面塞車, 老公叫仲爺去麥記會合先去跑步, 咁我就要帶佢落去, 唯有佢行路我慢踩車, 返到嚟反正冇咩做, 不如就做埋家務, 因為明天有得早放不如出吓去, 星期六又要去買餸, 星期日又過阿may到啦!
14/7/26 TUE HOT
今朝阿妹text 我話佢有咗, 仲要9月就生得, 估佢唔到呀! 仲要係囡呢, 阿媽又有男孫又有女孫呢! 跟住都係咁返工啦, 不過朝早係涼咗好多, 我著番長褲架啦, 不過去到中午之後都係熱, 今日跟半盲嗰個, 所以都係輕鬆的, 不過第一堂都唔洗跟佢住, 第二堂佢又PE, 所以都係去hea吓就係, 係數學忙啲啦, 上埋SCI就放個慢飯, 最尾嗰堂個學生又唔洗上堂, 只係跟佢地去咗hall聽嘢, 所以我去坐到夠鐘就放工, 返去都係沖涼食嘢啦, 兩隻豬今日都有波踢, 搞到我煮飯啲時間都唔知點遇好, 最終留飯比子元啦, 我都係如常咁做少少運動做埋家務煮吓飯咁啦! 睇咗半場法國對西班牙我都沖涼啦, 最終係西班牙win呢!
13/7/26 MON HOT
今朝竟然有啲覺得凍, 難得渣車都好大風! 返到去就開工啦, 又係跟盲妹, 所以都係好輕鬆, 加上都冇書教其實都冇咩好做, 12點幾有得放飯, 然後又係做KS4睇飯場, 更加冇咩做, 播吓歌咁其實都幾悶! 不過今日盲妹阿媽遲咗嚟接佢, 好在都係遲咗5分鐘, 我都算蝕咗少少! 返到去先沖咗涼先再煮嘢食, 老公就帶咗仲爺去踢波, 我整起哂啲餸先, 返上去晾衫之後再做吓運動, 雖然唔算做得好勁但主力做腹部希望會幫到個core同隻腳! 差不多時間就要煮飯啦, 等緊嗰時就寫吓仲爺暑假個時間表, 寫到咁清晰我真係想佢跟住做, 佢地踢到8點返得嚟都9點先開得飯, 食完就食埋雪糕沖涼休息!
