30/11/22

 30/11/22     WED     COLD

今日又冇琴日咁凍, 等我仲著多咗衫添! 返到去如常做嘢啦, 都算正常冇咩特別嘢, 上堂就上堂, 冇咩特別咁照樣吹水時吹水, 做嘢時做嘢, 放飯時放飯! 做好嘢收得工, Bella都有發吓顛, 唔入課室同衝出課室嗰啲囉, 都係日常! 放學返去接咗仲爺就返屋企, 過好數交埋council tax咁就揍仲去學最後一堂結他, 期間我仲要去買餸, 問結他阿sir 攞埋contact必要時可以再搵佢教! 揍埋德德就返去煮飯忙碌! 仲有就係要睇波啦!

29/11/22

 29/11/22.    TUE.    VERY COLD

今天睇天氣報告唔明都冇話到咁凍，但返學途中真係覺得好凍，好在今日都唔係成日要去室外，叫做放飯嘅時候仲辛苦！朝早工作如常，唔算有咩特別事情，順利到放工，接埋仲爺返屋企就開始忙，首先廚房燈燒咗要馬上去買，返嚟換完快手食少少嘢就準備晚餐，然後出去接德，返嚟時佢地已經出哂去踢波，搞掂德之後就煮飯，仲要set定嘢睇波，之後車在太攰又喺梳化瞓到佢地返嚟，等佢地開咗飯我洗埋啲嘢就沖涼休息！

28/11/22

 28/11/22     MON     COLD

明明天文台話唔係咁凍, 但一路踩車一路好似結冰咁, 真係唔掂! 返到去照常開工囉, Bella第二堂先返到, 仲要勁唔開心咁, 行到去課室又唔肯入去仲要想跳樓梯, 比佢嚇死! 總算勸服到佢先去輔導主任嗰到, 但因為佢唔喺到, 我地去咗AL1坐, 咁啱大姐又喺到, 又喺到講廢話啦, 我都廢事理佢, 小息我地就返出去操場, 我又繼續同張小姐佢地吹水, 然後咪返去上堂囉! 上Soc時個老師都矇架, 都話咗Bella要坐原位, 係要我講幾次先掉, 唔掉佢係唔會坐式低架! 好邪咁上RE時個課室啲枱又轉哂, 最終要郁番佢坐開嗰兩張佢先肯坐, 我就夠鐘去食飯先! 之後都算順利等收工, 接咗仲爺就返屋企, 又好忙咁但明明有咁多個鐘架喎, 出去買餸預備晚飯, 老公7點未夠就返嚟準備睇波呢! 食完飯沖完涼仲有好多公務要處理, 加油呀! Settle咗就得架啦!

27/11/22

 27/11/22     SUN     COLD

今日真係太忙, 朝早出咗去到天黑先返到屋企! 早上佢地出去踢波, 又要煮早餐比佢地食, 揍咗佢地去球場我地先去餐廳食, 本來去IKEA行買埋餘下的, 但又login唔到, 加上唔多夠時間, 陣間返唔切去接佢地又煩! 所以都係唔去住, 喺附近行吓market, 跟住去球場等佢地, 踢完仲爺又一身都係泥, 叫咗佢唔好做多餘嘢架啦, 係要落哂地咁, 激死! 跟住就買埋嘢比子元食然後去補習, 我地就去B&Q買埋料整衣帽間, 搬咗啲料返去就接番子元再去球場, 我地又要去hobbycarf買仲仲生日要整比小朋友啲禮物袋! 襯閂門前趕得切買到! 終於返到屋企, 又要預備晚飯等等, 食完飯我已經攰到瞓咗, 所以沖完涼都係早啲瞓算!

26/11/22

 26/11/22.    SAT.    COLD

星期六都係揍佢地踢波啦，因為要去Costco買嘢，所以揍埋子元去球場睇住細佬，我同老公想去Costco買嘢，然後返嚟接佢哋，點知重重留咗件褸喺球場，搞到我哋揸車去阿Sir屋企攞，撞正又塞車喎，搞咗半個鐘先返到嚟，諗住去茶餐廳食午飯，點知嗰邊又封路，兜咗好耐先至去到，食完嘢車埋志遠去球場，車咗我哋返屋企，老公就去新屋整夜，我就捉住仲仲做功課，然後做埋清潔，終於可以休息吓啦！然後又要煮晚飯，不過都係準備功夫，老公返嚟等佢煮，晚飯之後洗完碗仲要將Costco買返嚟嘅肉分裝，結果沖完涼已經11點幾！

25/11/22

 25/11/22.    FRI.    COLD

今日需要返工，但係冇學生喺度嘅日子，真係平好多，而且只係教師發展日，去Hall嗰度坐到夠鐘就可以自由，都係好事！不過今朝出門口嘅時候先至醒起我琴日唔記得咗叉電，好彩架板車仲可以捱到返學校，咁就返到去先再叉電啦！要返大房聽阿姐吹水先，9:30就去Hung聽講座，都係啲無聊經費講咗啦，捱到break time就可以去下廁所休息吓，幾點鐘到12點半終於聽完廢噏，可以放飯，今次食飯係任食，我當然唔客氣啦，基本上食飽就可以收工走人，去食嗰陣時有啲慘，因為大姐無端端走咗嚟我同個同事坐緊嗰張枱，我又唔好意思趕佢走，唯有默默咁等佢識做離開，不過佢都唔係好識做，坐咗好耐！1:30左右我真係放工先返屋企休息吓，同哥哥打咗陣over cook然後去接細佬放學，返到屋企就做埋啲家務，今日細佬唔去踢波，真係好想睇英格蘭場波老公就順利等晒啲門窗同埋送電器嚟，其中細佬係冇去練波，喺屋企睇電視！

24/11/22

 24/11/22     THU     COLD

今日7點半先起身, 因為請咗日假去子元學校家長日, 朝早淨係主理仲爺返學就得, 今年開咗學都未試過揍佢返學呢! 回家後煮完早餐hea一陣又差不多要出門口去子元學校, 最好笑係我有我踩滑板車, 佢有佢撘巴士, 去到見老師咪又係講嗰啲嘢囉, 條友成績science係進步咗, 但英文都係唔掂, 今次又衰埋Geo, 都要谷吓佢架啦, 條友太鬆散啦! 見完家長去買埋餸就返屋企, 買埋明天的攞到我隻嘢咁! 回來後食埋午餐就開始執細佬間房, 諗住清哂啲垃圾到時入箱簡單啲! 咁就執到差不多3點, 又要出去接佢放學啦, 返嚟有波睇, 但我又要預備啲餸同出去揍德, 條友今日食食吓飯就已經想瞓, 食完直情瞓到豬咁, 所以佢阿媽嚟接時要嘈醒佢先掂, 咪又喊到隻嘢咁囉! 本來老公話今晚過新屋整嘢先, 但因為嗰邊大塞車, 佢唔過去啦, 明天先再做! 所以可以一齊食飯睇波!