7/1/26

 7/1/26     WED     ICE!

仆街, 我今日真係仆咗街, 估唔到我幾小心都係成為咗冰地的其中一個跌到的人! 我已經知道今日地下好滑, 亦已經好小心, 奈何上斜嗰到小車行, 又見到有人過馬路, 我就收油啦, 點知架車一滑就向後反, 我就向後跌, 手踭落地又係右手, 單車壓住我, 路人過嚟扶我都差啲跌, 不幸中之大幸後面架車仲好遠, 咁我仲可以慢慢運車同人去路邊先, 路人確保咗我冇大礙佢先走, 我仲回緊魂, 其實我都唔知自己停咗幾耐, check緊自己手踭郁唔郁到先, 再檢查吓架車, 跟住對面馬路有個女人過嚟, 原來佢喺對面屋, 見到我跌到後過嚟, 好心到問我洗唔洗去佢屋企休息吓先, 但我呢啲社畜只係知道要返工, 都冇接受佢好意, 慢慢再上路, 之後個同事話我做咩唔請假, 嗰吓我真係冇諗到, 咁都出咗門口行咗一半, 其實都好唔抵! 所以返到去同阿姐講咗, 佢地都係叫我去搵first aid睇吓先, 亦都係敷冰先, 都冇咩可以做, 咁今日我就基本上全日都喺大房, 扮吓工咁啦, 放工時其實都好驚架, 但都冇辦法一定要靠自己, 點知已經好艱辛的路上仲要收到仲爺電話原來冇帶key, 但我真係救佢唔到, 最終叫佢自己撘巴士返嚟, 阿哥咪喺屋企囉! 返到嚟settle咗自己食咗嘢, 除咗坐冇咩可以做, 就係慢慢放鬆咗個人之後, 身體其他部位的痛開始浮現, 睇嚟我明日都係請日假穩陣啲! 又要寫email...唉! 今晚完全唔洗煮飯同洗碗, 原來係幾好Feel! 慢慢沖埋涼就休息啦!