30/9/26

 30/9/26     WED     WARM

今日最後一日返9點, 不過我見話會落雨, 所以都冇拖到最後先出門口, 間中都有少少雨, 但都順利到達! 今日都知跟邊個, 所以都做好準備, 有水有餅係冇咩腳骨力咁啦! 佢除咗正常發揮地搞事外, option support嗰堂時, 又冇老師又冇代課嚟, 我call咗又冇, 最終要另一個公司call咗終於有人嚟, 仲要嚟咗個都幾好的叫做靜咗陣啦! 基本上都係日常咁, 最後一次彈閘埋先, 明天要等到3:30先走得啦! 返到嚟做完運動, 煮埋嘢食, 仲仲學音樂我就可以攞番電視個掌控權, 但之後要摺衫晾衫! 同子元chat咗幾句啦, 條友又漏咗水樽, 好在喺博文嗰邊, 今晚可以去攞番! 差不多時間煮埋飯食, 沖涼休息, 臨瞓前同子元傾咗陣啦, 問吓近況, 今個星期四五都唔洗上堂, 幾開心! 不過可能天氣有分別, 攝親吓, 叫咗佢明天去藥房架啦, 都要學識照顧自己! 

29/9/26

 29/9/26     TUE     WARM

今日冇特別早起身, 但原來都可以8點前已經食哂早餐等等, 所以後日返8:30應該都唔洗早太多起身, 只要仲爺合作就可以! 返到去都係開工啦, 今日都行得企得有啲耐, 所以隻腳都痛痛地, 仲有班year 7都係搞事, 佢地班主任想努力都係有啲難度, 我都係盡吓人事有啲堂幫吓啲老師, 啲新老師真係陰公! 跟住就係夠鐘放飯放工等等, 唔洗放個心喺學生到, 做齊嘢就得! 返到嚟做咗運動先, 跟住整嘢食, 然後休息睇電視, 仲爺出去踢波, 我就預番時間慢慢煮飯! 

28/9/26

 28/9/26     MON     COOL

今朝都係咁返工返學啦, 仲爺今朝寫咗張字條比老公, 叫佢喺車攞定支水比佢, 但佢啲中文真係好奇怪, "枱面留樽水比我唔該"啲主語錯哂, 不過佢係怕daddy睇唔明英文嗰吓先最好笑! 今日唔係跟死一個學生時比較難搞, 又要做cover, 重點係我要cover嗰個喺嗰堂比飯筒叫咗去睇另一個, 然後我去到又焗住留喺嗰到但又係做cover, 浪費哂我啲時間, 本來可以有個長lunch架嘛! 結果又搞到我好趕咁, 可惡! 最尾嗰堂個學生有個小test, 咁又要去大房做, science我真係唔識呀, 好在呢個世界有AI, 又好在我睇咗答案又明可以解釋吓! 夠鐘就收工, 不過早收埋呢幾日咋, 校長approve咗10月1就可以返8:30-3:30, 好啦11月份糧可以多啲! 返屋企前去幫仲爺訂咗con先, 因為平時星期一會喺麥記等, 但今日已經冇特惠餐, 所以叫老公返屋企接仲爺算! 跟住都係預時間煮飯啦, 今晚預的餸量終於比較合適唔洗淨! 

27/9/26

 27/9/26     SUN     WARM

今朝本來佢地出咗去踢波, 咁我就繼續hea, 點知老公打嚟話仲爺要番套波衫踢下一次, 本來唔洗踢突然又要踢番, 咁我就要起身攞過去, 順路就不如去埋Lidl買埋啲平時買到的, 返到去只係hea同睇電視, 真係想hea吓! 到老公返嚟就出去再買嘢, 本來諗住去完Ealing Broadway老公買完褸再去Tesco睇下有冇芒果糯米飯, 但原來收4點唔係收5點, 所以去唔到, 所以去Janet屋企攞埋牛腩就返屋企, 又係睇電視, 唔洗煮飯可以簡單啲! 反而係唔記得煮雞胸, 洗完碗先嚟整, 9點幾先沖涼休息!

26/9/26

 26/9/26     SAT     COOL

今日主要只係出去買餸, 仲爺今朝要踢波, 咁我就hea到10點起身煮早餐食, 又睇吓子元點, 呢幾日佢都好忙, 琴晚又玩到3點先到宿舍呢, 今日又要買餸又要踢波咁, 真係開心! 咁等佢地踢完波返嚟, 我地都差不多要出去買餸! 而家寫咗要買咩先好似易預算啲呢! 返到屋企都係放好啲嘢再食吓嘢咁啦, 之後就係開吓戲嚟睇, 跟住就係煮晚飯食睇波, 等子元試埋腳返去沖好涼打比我地, 傾吓呢幾日如何, 然後我都沖涼瞓覺啦! 

25/9/26

 25/9/26      FRI     WARM

今日都仲係好攰咁, 真係忙一日要抖三日! 加埋今日成日要行嚟行去, 真係夠哂運動! 今日都冇咩留過喺大房, 都唔理咁多是是非非啦! 今日係中秋但真係冇咩永慶祝, 呢啲節日都少咗理好多, 初初嚟都會多啲搞作, 而家真係少咗! 今日真係冇咩特別嘢好講, 都係關心吓子元情況吹幾句水咁啦! 終於捱到放工, 返到去都仲係好多嘢做, 先做咗運動, 再吸一吸塵, 不過要等佢地出咗去踢波我先再做埋下半場清潔! 所以襯老公煮緊飯時我就先執咗阿哥間房先, 因為之前佢太多嘢喺到我都清唔到, 而家搬咗啲嘢走, 終於可以吸吓塵! 晚餐食肉醬意粉咋, 之後我就要做埋清潔啦, 又食吓雪糕咁先再沖涼! 

24/9/26

 24/9/26     THU     WARM

今朝好攰呀但都係要返工架, 照樣整早餐叫仲爺起身啦, 習慣緊子元唔喺屋企的日子, 所以今日成日都check住子元有冇起身去上堂, 之後去唔去到主題樂園玩, 所以都幾分心! 講番返工先, 原來今日頭兩堂我要喺hub, 但冇為意跟住又有啲亂咁啦, 重點係蠢同事覺得解佢要cover我而唔可以佢喺hub, 答案咪就係因為你蠢囉, 你估真係咩都唔洗做咩, 有時真係勁忙架! 唔理得咁多啦, 佢都係煩架啦, 不過我keep住不屬於任何派別, 我唔想煩! 另外就係今日成日同人講個仔琴日住咗入大學, 做唔到我最終都忍唔住眼淚, 因為其實真係會好掛住我個大BB呢! 食飯時又同另一個數學老公同事吹咗好耐水, 唉...一到吹水我就覺得仲係好多英文都唔識用咁! 夠鐘放工, 今日要去攞咗藥先, 又等咗勁耐! 返到嚟食咗啲嘢仲要快啲預備晚飯, 因為仲爺今晚要踢波, 所以要早食飯! 跟住我就慢慢hea啦! 又繼續睇住子元喺樂園玩點, 幾時會返hall! 

23/9/26

 23/9/26     WED     WARM

今日係子元入hall大日子, 全家總動員! 首先...佢琴晚pack嘢殺咗個mon, 今日唯有馬上買, 好在loughborough間Curry有貨, 咪訂咗中午去攞囉! 起身快手煮早餐啦, 因為預算9點要出門口, 都算ontime架啦, 9 點真係開始攞嘢上車, 始終有四對手係好啲, 上上落落一輪好快搬哂上車, 跟住睇地圖真係2個鐘多啲就到, 可能真係夠早呀! 先去攞咗個mon, 跟住就泊去Tesco, 然後去食咗午餐先, 之前search陣意大利嘢, 還好啦! 食完去tesco買咗少少嘢比佢呢幾日食, 就可以正式渣去學校啦! 早咗但照可以攞key同攞學生證! 攞齊嘢我地先去影咗相, 睇左紀念品店先, 跟住就返房幫佢執嘢, 我地幾隻手咁都可以好快, 老公就去咗搵博文爸吹水, 合作下最尾要set埋電腦上網, 5點多我地都要走啦, 仲爺摟住哥哥唔肯放手呢! 攞埋車去接埋博文爸就去食晚飯, 去番上次嗰間食, 不過嗰間真係要食spice先正! 食完8點多走啦, 返到嚟都差不多11點啦, 還算順暢! 明天繼續要返工, 希望子元今晚玩得開心唔好太夜瞓, 明天知醒啦!

22/9/26

 22/9/26     TUE     WARM

今朝返到去馬上搵阿姐簽咗個假紙先, 馬上去交埋, 安樂哂! 呢度請假最好, 真係唔會問你呢樣嗰樣! 然後就開工啦, 今日跟顛妹, 佢都係打口炮多, 其實你唔理佢咁多佢冇癮佢就冇咩, 不過反而係啲學生成日挑釁佢, 其實我覺得佢已經好克制, 比我成日咁比人挑機可能仲大反應! 咁今日有一堂空堂佢又唔可以留喺嗰個房, 所以去咗隔離DT房, 我就可以同ellen吹咗半堂水, 跟住半堂放咗飯! 有啲眼瞓咁捱埋啲堂, 可以放工了! 返到嚟都好忙咁, 睇吓子元執嘢執成點, 仲爺洗咗衫未, 我都要食啲嘢, 5點幾又要去仲爺學校聽嘢, 一句講哂都係叫你地幫佢地要溫書囉, 7點到返到去, 整咗個西芹食咗先, 因為今晚都係食番琴晚做節啲餸! 等仲爺踢完波返嚟先食呢! 

21/9/26

 21/9/26     MON     WARM

今朝實在係太攰, 可能琴晚都係夜瞓, 今朝勁唔想起身, 不過都要起架啦, 返到去仲要跟嗰個都要全神灌注, 不過我盡量都唔理佢多, 佢同我都輕鬆啲! 只係放break要係咁周圍行, 第一堂又PE有啲攰! 跟住都係夠鐘放飯吹吓水咁, 夠鐘我放工啦, 個學生根本就係反社會嗰啲, 講咩都係冇用! 返到嚟好餓, 因為午餐只係食咗個蕃薯! 快啲做埋運動食少少麵, 仲爺今日要踢波, 去麥記同老公集合, 食啲嘢咁, 跟住我去埋買魚先去, 今晚食做節飯, 雖然星期五先係正日但阿哥已經喺大學啦嘛! 所以返到嚟又要煲湯整魚等等, 都係好攰! 最後基本上係食唔哂, 都好留番明天, 因為要去仲爺家長會都煮切飯! 

20/9/26

 20/9/26     SUN     COOL**

今朝仲爺都係要比賽, 所以9點幾佢地就出咗去, 我都起身梳洗整早餐, 仲要整埋啲雞翼下午BBQ用, 然後佢地返嚟又要沖涼呀等等, 打埋電話比阿媽, 要出門口了, 先去broadway買蛋糕, 跟住就想去幫子元買埋拖鞋, 點知發覺拖鞋都係季節性, 而家得番啲毛毛拖, 咁真係幫佢唔到! 買齊嘢就過winnie屋企, 今日BBQ, 估唔到食得哂啲嘢, 仲有蛋糕同Janet慶祝番生日, 玩到9點幾都返去啦, 明天要返工返學呢!

19/9/26

 19/9/26     SAT     COOL

今日好忙碌! 朝早仲爺要踢波, 咁我仲可以hea到9點幾先起身食早餐, 等佢地返嚟都沖好涼食好早餐都12點幾先出到門口, 今日要去4個地方, 先去中超, 今日我擬哂所以買嘢名單, 算係跟住嚟買就唔會over, 今個月子元好多支出, 唔可以作準, 下個月再睇吓點! 然後去costco, 因為有event得90分鐘, 仲要去埋outlet, 真係要勁目標為本, 好在子元買衫好有效率, 所以算係完成, costco都係只跟名單買, 只係排等食物好耐! 返嚟處理完嘢食埋午餐就再出去超市買埋餸, 仲有子元啲日常用品咁啦! 返嚟已經好攰, 但仲要洗衫晾衫, 我已經冇力煮飯, 都係交番比老公!

18/9/26

 18/9/26     FRI     COOL

今日好攰呀, 可能真係星期五啦, 其實今日學生返遲, 但因為啲時間亂哂, 我地啲飯更都好亂, 要自己諗點搞, 我又要留係hub又要3個飯更, 仲要帶學生去SALT, 簡直係時間安排大考驗! 又有新學生year 7要新認識吓, 所以放得學時都真攰啦, 返到去仲要做運動啦, 然後摺埋啲衫, 跟住先食啲嘢再做清潔, 不過我都要抖一抖先, 好攰, 清潔完仲要預備晚飯, 不過煮真係要等老公返嚟煮, 我已經冇哂電啦! 等老公煮完飯食, 食完洗碗沖涼休息啦!

17/9/26

 17/9/26     THU     COOL

今朝返工有啲雨, 好在之後都唔落啫, 最怕! 今日學生早放, 所以都係輕鬆, 仲要我唔洗負責學生, 只係帶每個section的去speech and language section, 絕對係舒服, 1點食埋個飯, 同另外個數學老師吹水吹得幾開心, 因為佢姪女嚟緊同子元同一間學校呢, 不過就唔同科, 但就可以吹吓唔同的事, 幾好! 可能係因為話哂佢喺香港讀過書! 跟住就要返大房啦, 有人嚟做咗部門少少training主要係講盲的兩位準GCSE生, 所以其實唔係個個同事關事, 咁夠鐘就放工啦! 返到嚟全部人都喺到, 又忙忙亂亂咁, 我都唔理啦, 去做咗運動先, 再要洗衫啦, 因為今日仲爺踢波夜, 所以要早食飯, 要早啲整咗飯先, 然後6點就食咗飯啦, 慢慢打吓機先再晾埋衫再沖涼等等!

16/9/26

 16/9/26     WED     COOL

今日都係咁返工啦, 都幾悶我冇咩可以講, 個學生又唔會喺大房, 我又要周圍行, 仲可以點呢, 咪自己搵啲嘢做吓, 諗定下星期個餐單, 睇吓星期六買餸要買咩, 因為嗰日都好多地方要去, 咁啲時間又易過啲, 放飯得半個鐘咋冇得偷雞! 仲有就係今日阿妹生咗啦, 我就做咗大姨媽啦! 放工返嚟做運動, 煮嘢食, 洗衫晾衫, 跟住可以hea吓, 老公就煮飯, 佢煮得好食嘛! 子元想買飛玩welcome week的活動, 跟住我又同chat吹一輪水要知道吓佢嗰幾日究竟係點, 我仲係一個未放到手的媽媽!

15/9/26

 15/9/26     TUE     COOL

今朝老公明明出咗門口但又返番轉頭, 因為佢覺得自己感冒, 又冇藥喺手, 都係請日假穩陣! 跟住返工都係輕輕鬆咁啦, 唔知點解安排今日跟唔同的人, 實在係有啲奇怪, 阿姐仲要排得有啲錯, 所以我都自己改番啱佢, 咁hea吓又一日啦! 另外仲見到holly啦, 吹咗陣水咁啦! 放番個靚飯上埋最尾嗰堂又收得工! 返嚟又要再出去, 因為今日出咗糧要去買餸, 仲去睇吓starbucks仲有冇snoopy啲周邊賣, 結果得番一個杯, 好在仲有我想要的pin, 好想整喺頸帶, 真係好可愛! 買完餸返嚟冇話有得抖, 先整啲嘢食, 跟住仲有幫阿哥執吓衫, 仲有要摺衫晾衫, 跟住又要煮飯啦, 真係好攰!

14/9/26

 14/9/26     MON     WARM

今日都係要返工返學啦, 工作上都算輕鬆, 唔洗跟plus又做吓飯更咁啦, 所以都冇咩特別, 不過今日啲天氣真係唔多好, 室外就有風但一入室內又熱, 好在我著咗背心, 係咁又著又除! 基本上夠鐘就放工, 返到屋企就做埋運動摺埋衫, 又要同仲爺去M記同老公會合, 順手食埋99P的麥樂雞, 跟住返嚟晾埋衫, 休息一吓又要煮飯, 星期一有啲攰呢!

13/9/26

 13/9/26     SUN     WARM

今日又係冇出過去, 仲爺就去咗比賽, 返到嚟就黑哂面, 又比人片啦, 其實踢吓波啫洗唔洗片到人地面黑咁陰公, 又唔係踢職業, 玩吓啫! 咁我食完早就打埋比阿媽先, 可能今日打比佢已經夜, 佢又有啲呢樣又唔記得嗰樣又唔記得咁! 明早再打比佢睇吓好唔好啲啦, 然後就同仲爺溫習, 啱啱開學都算易, 希望每個星期溫吓會好啲啦! 然後就係要做吓運動食午餐同洗埋晾埋啲衫啦, 跟住就睇曼市打比, 好睇吓, 明明曼聯打多人一個都可以輸, 勁! 晚飯預備好等老公煮, 食完洗碗沖涼!

12/9/26

 12/9/26     SAT     WARM

今朝仲爺有波踢, 但唔關我事, 所以繼續睇吓膠劇10點幾先起身, 換咗床單先, 再慢慢煮早餐食, 食完就諗埋仲要買咩餸, 買完返嚟就睇波, 再諗吓子元入hall仲有咩要帶, 叫極條友都唔諗, 唔寫低真係會攞漏架! 午餐都4點先食, 焗咗個pizza大家食就算, 冇咩郁唔係好餓! 到六點幾準備晚餐, 今晚有麻婆豆腐, 正! 然都係洗碗沖涼息啦!

11/9/26

 11/9/26     FRI     WARM

終於星期五啦, 今日要跟咩學生都唔算咩, 重點係本身有飯桶堂但唔洗上, 因為朝早到10點係training, 我都唔係好關事, 坐咗喺到就得, 仲可以同香港人同事坐, 吹吓水咁啦! 然後準備開工啦, 一向都係獨家村咁架啦, 我都唔係太想吹水的, 因為今日得第四五堂真係上堂, 所以10點幾開始都係喺課室坐吓就得, 係放Break放飯要行吓囉! 上埋啲堂就放工, 都冇咩啦! 返到去做咗運動做埋家務, 仲爺佢地好快就出咗去踢波, 做完清潔仲要晾衫, 抖一抖又要整餸, 好在老公返嚟可以煮一個咁我就可以坐坐! 食完飯沖涼休息!

10/9/26

 10/9/26     THU     COOL

今日都係咁啦, 照常開工, 照常做跑腿, 所以今日都行到有啲攰! 加上今日加Y7, 係要用啲力, 佢地energy太強, 我跟嗰班本身要做嗰個學生呢兩日都冇返, 反而有另一個冇care plan的更需要關注, 所以我都補充番啲資料比阿姐! 中間仲要去做埋飯更, 坐番一個鐘咁啦! 放完飯仲要PE堂, 我竟然都唔知要放工, 打咗鐘先走, 蝕咗! 返到嚟今日因為仲要踢波夜, 所以要早食飯, 咁大家都唔食tea, 6點多就食飯, 子元約咗朋友出去, 所以7點幾返到嚟先自己食, 我就hea到8點幾先沖涼呢!

9/9/26

 9/9/26     WED     COOL

今日照常返工啦, 子元都要起身去驗血, 返到去原來跟year 7, 仲要做飯更, 其實唔洗跟+已經唔錯, 不過未熟個學生又唔知嗰班係點, 所以都係試探性咁跟, 兩個飯更喺哂一個堂做, 方便輕鬆! 跟住到我自己放飯, 其實好快就食完, 但今日都仲係有啲餓, 去咗圖書館睇吓有冇嘢啱食, 勁好彩個飯堂姐姐Free咗個三文治比我, 我都留咗半份比仲爺架! 上埋最尾嗰堂可以收工, 返去都係先運動再煮嘢食, 然後到咁上吓就晾衫摺衫, 準備好晚餐料等老公煮, 食完睇埋波先沖涼休息!

8/9/26

 8/9/26     TUE     RAIN

今日落咗一日雨, 搞到我返工放工要full gier, 係有啲樣衰但唔濕緊要! 今日跟顛妹, 其實冇咩所謂, 因為熟佢基本上佢同我都合作, 喺我手上都做唔到啲咩, 跟住啲堂又唔算太難頂! 只係太早放飯, 返到屋企之後就好肚餓啫! 另外今日再知道咗一樣嘢就係除咗二姐, 原來大姐都有咗, 仲要差不多時間生, 今次我地真係神龍無首! 放工返到嚟仲要做埋運動先食嘢, 勁肚餓, 因為今晚遲食飯所以食番個麵先! 等仲爺踢埋波返嚟先開飯, 所以洗埋碗沖涼都10點多!

7/9/26

 7/9/26     MON     WARM

今日照常咁返工啦, 返到去見都係要跟嗰個冇跟過的year 8, 咁都要做架啦, 保持距離係好, 佢又唔知我係咩料, 我又唔太熟佢, 咁照常咁開工啦! 遇番時間諗住放break前去咗廁所先, 點知佢中場有appointment, 咁我叫做hea咗一個鐘, 可以幫仲爺整埋個時間表! 然後就跟番佢囉, 好在lunch time 都過咗一半, 咁我都冇咁辛苦, 同埋我今日又早走, 要去覆診隻腳! 物理治療師話其實都唔洗再覆, 不過都話8星期內再冇咩進展先再book, 佢都比咗佢whatsapps 我, 佢話一向都唔會留電話比人, 但見大家係香港人咪互相幫助吓, 其實都係, ealing區其實都唔多香港人, 識多幾個人係好! 返到嚟都冇停過, 先趕仲爺預備好去踢波, 再去買埋個特價魚柳包, 返到嚟仲要摺衫晾衫等, 再預備好啲餸先休息吓, 到咁上吓又要開始煮飯, 不過用咗物堙治療師的膠貼住膝頭又真係好似襟企啲! 9點多沖涼休息!

6/9/26

 6/9/26     SUN     COOL

今朝又睇咗套膠劇先起身, 仲爺出咗去踢波, 不過我食緊早餐佢已經返咗, 之後仲爺話想打機, 咁開波前就打一陣啦, 2點有波睇就交番個電視出嚟, 咁洗咗衫我又上房晾埋衫摺埋衫, 再用吓電腦咁, 問吓chat子元啲嘢, 升大學啲無聊嘢, 怕佢陣間有咩漏都可以提吓! 4點幾又落番去睇阿仙奴, 仲有要整埋今個星期的帶飯雞胸, 仲有晚飯啲材料, 又去janet屋企攞佢地食唔切的燒賣, 返嚟就叫老公煮飯, 我又用吓電腦咁, 開飯食完洗埋碗就沖涼休息, 明天繼續開工!

5/9/26

 5/9/26     SAT     WARM

今朝仲爺要踢波, 所以老公8點幾就起身出門口, 我就hea到10點多, 醒起有903足球賽睇所以梳洗完開電視睇, 食埋早餐繼續hea, 我都做好嘢囉, 之後諗埋要買咩餸就出去買餸, 買完返嚟都3點幾, 仲諗住叫子元幫手攞嘢, 原來佢已經出咗去wet! 我仲要做埋運動同摺衫晾衫先至食嘢, 因為煮咗粥比自己食, 食完繼續hea, 係預備吓晚餐咁啦, 8點幾9點食完洗埋碗沖涼休息!

4/9/26

 4/9/26     FRI     RAIN

今日終於星期五, 其實都check咗今朝會落雨, 諗住已經戴番頭盔撞到雨, 但臨尾一段實在係太大, 係濕到透囉, 好在我有spare褲同襪但衫冇嘛, 所以全日都得番件背心著, 好在今日大風但唔太凍啫! 換好衫就開工啦, 今日都唔算太難, 我仲可以繼續做吓自己嘢, 處理好啲時間表等等, 等放飯等放工, 去攞單車時又跌車又跌袋等等, 又凍咗咁踩車返去個人都好燥囉, 不過都做埋運動先煮嘢食, 煮完仲爺佢都出咗去踢波, 咁我食完嘢就做埋清潔, 仲要洗衫晾衫摺衫, 基本上做嘢我真係好攰啦! 仲要預備晚餐料等老公返嚟煮! 食完就沖涼休息啦!

3/9/26

 3/9/26     THU     WARM

今日算係都足一日返工時間, 不過未係跟實一個所以都未算入局! 朝早叫咗仲爺起身先, 佢返10點放11點, 所以要確保佢起咗身先可以! 忙忙碌碌咁又一朝, 放完飯本來諗住返去print埋啲嘢, 但一返到去又有啲同事問呢樣問嗰樣, 實在係完全冇時間做自己嘢, 都冇法啦! 本來上番課室hea緊, 跟住同事叫我返大房, 原來二姐有嘢叫人幫手, 都係做啲手版眼見嘢, 我都唔明有幾難, 呢到啲人真係咩都唔想做, 好奇怪! 做好嘢準時放工, 返到嚟都係做運動做家務啦, 食埋嘢又hea吓咁, 下星期正式要仲爺跟時間表, 如果唔係我都會變得好hea! 煮埋晚餐食完, 睇埋日落下的彩虹大結果就沖涼休息!

2/9/26

 2/9/26     WED     WARM

今朝要去覆診, 但再睇清封信原來係再要照啲嘢, 好在我早餐唔係食咗好多啫, 所以都照得到, 繼續等醫生通知! 老公車番我返去開工, 早咗返到去有啲蝕添, 但都冇得扣番時間, 唯有照開工啦, 好在今日先係跟小天使, 跟住食完飯, 再跟一班year 7到放工, 基本上係輕鬆做的! 放工老公嚟接我, 我今日冇車渣嘛! 返到去都係做運動, 洗衫晾衫摺衫睇吓機, 轉頭又煮飯啦, 如咁食飯睇電視沖涼休息, 明天繼續開工!

1/9/26

 1/9/26     TUE     WARM

今日要開工啦, 要7點起身係有啲要適應, 順利梳洗食早餐出門口, 返到去就要training, 好在今日都唔係一炮過好長時間, 成日又放吓break咁, 所以都好易過, 我仲要啲時間適應番見住咁多人, 好似成日都自閉中咁! 今日仲要比阿姐簽埋請假, 明天又有下星期又有, 不過阿姐自己都有appointment, 其實佢地都冇咩所謂, 你估香港啲上司咩! 準時又收得工, 返到屋企要做咗運動先,換埋衫洗衫食嘢hea, 原來冇做啲咩今日都有啲攰, 行行企企咁都夠! 煮晚餐食飯時睇咗夜王, 終於等到要一次過睇哂先得!