31/5/23

 31/5/23     WED     WARM

今朝一早就要出門口，仲爺要去牛津比賽，又要一個鐘車，食咗個包就行，去到先買咖啡飲，踢波時就陰天，踢完先出太陽，輸就遇咗，仲爺咩位都踢吓咁都幾好！差不多12點先走得，又凍又餓，快啲去搵食，結果去咗商場，求奇食咗food court行咗陣買咗件T shirt比子元，回程又再去買吓餸先返去，返去整好6嘢又打two point hospital ，因為真係好好玩！

30/5/23

 30/5/23     TUE     WARM

今朝唔係老公出咗門口，而送貨條友8點未夠就送啲木板嚟，我都唔會咁早起身，話哂term break嘛梗係瞓耐啲！起身先搬哂啲板落後花園先再煮早餐，食完就hea，同小王子媽吹咗陣講整麵包，12點幾又要煮午餐，廚餘系列有咩食咩！拖到3點幾4點都要去買餸，返嚟摺埋衫就打機，一開個two point hospital又停唔到！不過都知道要煮飯溉嘅！

29/5/23

 29/5/23     MON     WARM

今日bank holiday，點會留喺屋企就算，一早約咗May Koon 去佢嗰到，又要揸兩個鐘，先去市中心玩吓先，影吓相參觀吓，估唔到我諗都唔諗就買咗個背囊，重點係紫色，仲要袋內有分格，好好！雖然要£65但難得啱就買了！行去人地介紹的燒味鋪食午餐，回程返去攞車就去may屋企！美其名幫佢執漏吓，實際搵個借口去玩吓，都真係有整吓，吹水居多，吹到6點幾煮飯，我地整咗肉骨茶過去做餸，8點幾一定要走啦，老公回程車係咁想瞓，好驚呀！

28/5/23

 28/5/23     SUN     HOT

今日出去都係要揍子元去補習啫，順手去咗轉中超買多份雲吞料，因為細佬好想食，仲要預埋明天攞比May，都係要再買！然後諗諗吓過兩星期阿媽嚟，細佬就要瞓地下，都要買埋張墊，咁都比我地預到特價，但要入會，好在網上一搞就得，即慳£15！搞掂終於返屋企，食埋嘢開始包雲吞，老公又整雞札，仲有西米露，個廚房好忙！

27/5/23

 27/5/23     SAT     WARM

今日都係超市購物日，仲仲朝早可以自已煮麪食，叻仔！佢練波時我地就去買嘢，主要買番廁所板，坐得穩陣啲好！返去接番仲仲先再去龍鳳同超市，又放血！回來煮麵食廚餘，之後就開始hea，老公要整花園，子元就自己去練波！最終我悶到提早今日做清潔，差不多8點先煮飯，反正明天可自然醒，唔急瞓！

26/5/23

 26/5/23     FRI     WARM

終於到term break啦, 返埋今日就放假! 今日要跟Aisha, 其實佢冇嘢, 我上堂又有啲嘢做唔洗咁悶, 加上今日都唔係好教書架啦, Business堂又有Holly佢地陪, 過得幾開心添! 我差不多1:30先放飯, 所以忍唔住買咗個fish and chip加餸! 上埋最尾一堂走得, 好準時! 今日要接仲爺, 諗住比老公多啲時間整後花園, 點知返嚟見到佢又係到睇戲, 差不多5點先做, 是但啦我唔理啦! 我就上咗去用電腦, 難得開電腦就係咁用! 7點幾先煮飯, 反正放學返嚟又食咗嘢啦! 食飯都係開造星嚟睇, 然後都係沖涼休息啦!

25/5/23

 25/5/23     THU    WARM

今日都算係輕鬆嘅一日， 我仲用兩堂時間，整咗張生日卡畀Bella，我放飯時比咗佢就去食飯，但之後佢又因為要測驗又發顛，不過都唔關我事，我繼續hea過就可以！放學就去接仲仲，返屋企大家就係咁食嘢，老公返嚟抖陣就帶佢哋去踢波，我就搵咗套戲嚟邊睇邊摺衫，就係毒舌大狀！佢地返嚟我冇得再貝，又要開飯食，洗碗沖涼！

24/5/23

 24/5/23     WED     WARM

今日都係輕工作啦，不過係飯更有啲亂，你替我時我又替佢唔知做咩咁，重點係我又冇人嚟頂更，有同事叫我email二姐，咁佢都安排到嘅，人係要食飯架嘛，重點係我要去廁所囉，忍唔到咁耐！好在有半個鐘要頂Bella嗰轉時佢好正咁做嘢，唔係都唔知要點寫！準時收工走人，然後超市入吓貨先返屋企，等仲爺after school club完先去揍佢，返嚟食吓嘢睇睇吓電視就瞓咗，嗰吓真係好攰！照常老公煮飯摺埋啲衫，開飯睇全民造星然後洗碗沖涼休息！

23/5/23

 23/5/23     TUE     WARM

今朝笨元都係唔太舒服，又頭痛又喉嚨痛，所以同佢請咗病假，但做咗嘢就變得好趕！返到去第一堂要跟Jazzy，都好攰吓，估唔到Aisha竟然返，但相對地佢已經唔難跟，定時定候就做嘢，原來佢地都唔鐘意大姐，話佢煩！捱到放學快手閃人，接番我仲仲就返屋企，因為要快手整好嘢就出門口，揍仲仲去踢波，子元休息一天，等老公嚟接手我就上車等，返去快手煮飯睇電視又一日！

22/5/23

 22/5/23     MON   COOL

今日冇咩精神，上堂時都好想瞓，跟Daisy某程度上係閒，但有啲扮哂嘢同事同大姐都好煩！第一堂上咗一陣，比大姐捉咗去問Bella之前嘅狀況，其實大姐都自行決定咗答案，洗咩問我，搞我成個鐘，小息之後繼續跟Daisy，查實悶到嘔，放飯又要快食，不過放學亦可以早走就算！接咗仲爺返屋企就hea，老公回來整花園我就煮飯，食飯就睇造星，飯後又睇膠劇咁啦！

21/5/23

 21/5/23     SUN     WARM

星期日梗係瞓到自然醒，所以早午餐一次過，去咗日本鋪買飯團，買埋咖啡車笨元去補習，我地就去超市入貨，又洗錢！回來仲要收拾一輪，摺完衫做清潔已經夠攰！休息吓咁，老公接子元返嚟後就煮晚餐，今晚係黑椒汁牛排飯炒底，正！開飯繼續睇膠劇，咁搞法30集好快追哂！

20/5/23

 20/5/23     SAT     WARM

今朝都要鬧鐘叫起身，因為仲仲要練波，揍咗佢去球場我地就去costco入貨，點知行到唔知時候，遲咗走接唔切，叫咗哥哥快手去揍，下次都係要留意番！入完貨諗住唔出去，點知子元又話腳仲痛唔練波，所以出去食午餐，再去boardway行吓買新個過濾水壺，飲吓嘢咁！回家後老公要切豬，之後又要整花園，8點幾先開飯，之後又要睇劇，所以又好夜瞓！

19/5/23

 19/5/23     FRI     WARM

又到星期五啦，本來以為今日同Daisy輕輕鬆鬆，點知返到去先話跟另一個低B妹，都冇咩所謂啦都係咁做，不過佢講嘢又唔清，我都幾怕，因為我聽到佢6成左右，所以都盡力就算！大致上都冇問題，反而又係冇咗二姐嘅星期五，一調哂啲人手時飯更又亂哂，大家私下搞掂就算！放工準走人，返到去等老公接埋仲爺買埋fish and chip返嚟，繼續hea過星期五，煲電視煲飯咁又一晚！

18/5/23

 18/5/23     THU     WARM

今日可以輕鬆開工，但某程度上都悶，所以冇咩寫！可能year 9去哂trip，所以都唔係太忙！總之順利收工接仔就算！仲仲話佢放break時打籃球個波飛咗去草地，佢走咗入去攞，但原來唔可以入去，比人罰咗黃牌，要簽番張嘢，其實佢都唔知唔入得，又唔識講傻仔！等佢踢完波返嚟就8點幾先開飯！

17/5/23

 17/5/23     WED     WARM

今朝再睇更表唔洗跟Bella，就知有得炒散，都好嘅輕鬆好多！第一堂跟日本妹food technology 測驗，自己整一樣嘢食，咁我咪又幫手囉，好在平時有上過呢個老師堂知佢要求，順利完成，第二堂就跟個啞妹，佢又冇咩喎，啲老師話佢會唔肯去上，佢最終咪做好哂，小息就放佢走，之後都係跟jazzy囉，佢好時我又好，準時放飯準時收2工，買埋餸買埋燈泡先接仲爺，返去都係咁啦，食吓攤吓夠鐘就煮飯！

16/5/23

 16/5/23     TUE     WARM

今日知道要跟Bella，其實本身冇咩難度，只係要用大姐嘅方法揍就好煩囉！淨係佢講冇人講，連同我夾嗰個人講咁，一啲都冇偏見！其實今日Bella都好合作，但佢想睇書又話唔比，但其實又冇嘢比佢做，真係好白痴！2點佢放學，我地就要打番哂入電腦交比阿姐，好在我同個agency都合作無間，3點就走番出reception等收工，接埋仲爺放學返去又係咁食，子元就4點幾同埋仲爺去球場！我就hea吓做少少家務咁啦，等仲仲返嚟就開飯先！

15/5/23

 15/5/23     MON     WARM**

今日又要返工啦，朝早都趕趕地，成日都叫唔起身，好難搞！返到去本來跟跟吓Jazzy，都未有半堂，二姐嚟搵我叫我去幫個year8做試卷，咁就做到差不多放break，送番佢比阿媽我又功德完滿，其實小息後都唔係太想跟jazzy，但相對地算好做就算！佢放飯我都放，staff room好多人，想靜吓都唔得！本來諗住返去開工，點知二姐叫頂飯更咁我又去囉，反正替更冇咩要負責，跟實佢就得！最後順利上埋堂放工接仲，但今日情好差，係咁發火！

14/5/23

 14/5/23      SUN     WARM

今日回歸平靜，10點仲仲就要去同學生日會，揍咗佢去保齡球場老公就要去B&Q買嘢，然後返去放低就接埋子元去補習，跟住就去接番仲爺，不過都未完，要等佢玩埋食埋蛋糕咁！返屋企食埋嘢就開始做家務，我又開始燥底，又攰又要做，仲要換埋床單，總算做完可以休息！晚飯就等老公揍埋子元返嚟煮，明天又要開工！

13/5/23

 13/5/23     SAT     WARM

今日即興曼城之旅一早開始，老公季初一早買咗英賽飛所以都上嚟睇，因為3點場，我就想跟埋出吓去，打個卡都好，琴晚仲約到家寶家姐，去佢屋企打搞，咁就一家人上去行個圈！可惜因為塞車，搞到1點9先到食嘢嗰到，咁有蝦餃燒賣食都幾好，只係食完都2點幾，仲要揸去Carmen 到泊咗車再行去奧脫福，都遲哂到架啦，但老公又冇咩所謂，咁我地影張相打個卡，連禮品店都冇得入就要走，行返番去carmen屋企，咪參觀吓，吹吓水咁，等老公睇完波過嚟就準備食飯，吹到7點幾叫仲爺沖埋涼，8點要走，返得去都差不多12點，咁又玩咗一日！

12/5/23

 12/5/23     FRI     COOL

今日happy friday啦，難得又可以炒散，都冇跟bella咁耐其實都輕鬆慣咗，佢啱啱返3學嘅日子都唔易搞，唔洗跟仲好，逃學威龍最終都冇返，我地又互相替吓飯更，我差不多1點9先開飯，同唔到letty佢哋吹水，好在小息吹夠！放學準時收工，返去繼續hea，因為食飽嘢晚飯食好少要隔夜！明天老公上曼聯睇波，我地又跟埋去，仲約咗phoebe家姐去探佢！

11/5/23

 11/5/23     THU     WARM

今朝照常返工返學啦，本來跟Bella，但返到去又轉咗跟逃學威龍，點知等咗兩堂佢都冇返，咁又轉咗跟Jazzy，都好嘅係嘈啲啫，起碼準時又可以放個長飯！準時放學接細佬買埋餸返去，佢哋今晚踢波可以做私人嘢，例如追劇，但8點幾9點先開飯呢！

10/5/23

 10/5/23     WED     WARM

今朝一早見到個更表我喺Bella 嗰欄，佢終於返嚟，不過只係返第二至四堂，仲要兩個人跟佢，因為一個負責記錄，一個負責跟佢，其車車8我覺得係佢地太緊張，基本上佢返得嚟基本上都冇事，大家放鬆啲啦，返嚟3堂其實得一堂上到，某程度上得個hea字！仲要頭尾兩堂都要跟Jazzy，加上臨放學前被委託捉成日逃學個學生，但發現得嚟追佢，佢已經走甩咗，但跑一跑用哂我啲力，好攰！返嚟買埋餸接仲爺就開始hea，咁又要一日！

9/5/23

 9/5/23     TUE     WARM RAIN

今日又要返工啦，一切都正常，返到去個學生冇返，轉咗跟Jazzy，遇咗冇時間做自己嘢，不過year 7有活動日，好在小息之後我做替更唔洗跟佢可以休息吓！放飯放耐啲休息夠先開工，因為跟住佢真係好嘈！夠鐘放工接仲爺，快手買埋餸返去，佢哋4點幾出門口去練波，我就整咗啫喱先煮飯，因為啲啫喱粉到期！子元因為落雨冇得踢，仲爺就見到賓仔啲英超球員好興奮！

8/5/23

 8/5/23     MON     WARM

多出來的一日bank holiday，完全hea住過，瞓到自然醒，又唔想又唔知煮咩早餐，老公就話出去食，等得嚟我都摺咗機衫，跟住就出咗broadway食咗burger，好味但有啲貴！然後再行咗陣街，去買咗啲衫就返屋企！下午返去老公整佢個燒味飯，我hea過，咩都唔想做！

7/5/23

 7/5/23     SUN     WARM+

今朝仲爺一早就比賽，仲要比兩場，咁一個朝早就喺球場過，仲有要車子元去補習，買埋飯團做午餐，返到屋企睇chill club頒獎典禮，又同阿媽講吓電話！睇完頒獎禮同仲爺去吓學校搞嘅慶祝King登基的攤位，但其實冇咩玩，所以hea咗陣就返屋企，開始要做家務，好攰！好在仲爺肯自己做功課！晚飯老公整蟹肉炒飯，好味！

6/5/23

 6/5/23     SAT     RAIN

今朝子元幫手揍仲爺去練波，我地就去IKEA買仲仲個衣櫃，因為上網睇得番3個，唯有早啲去買，順利執齊嘢就埋單，點知收錢時收多咗，我覺得唔對路，最終去CS問，最慘等咗20分鐘先有人理，好在佢對清楚係do多咗一塊板，咁就退番錢！返去搬哂啲嘢上樓再去接番兩隻豬仔，買埋咖啡飲先返屋企！跟住我就冇街去，老公又要炸豬皮，又要拆咗個衣櫃放去街花園，然後就砌衣櫃砌咗一個下午，終於有個新衣櫃比佢，唔洗咁慘！晚飯有豬皮魚蛋食呢！

5/5/23

 5/5/23     FRI     COOL

終於到星期五啦, 今日都有啲忙啦, 見到要跟Jazzy就攰啦! 好在英文堂時段我係去放飯, 唔係要上飯桶嗰堂就煩! 每次轉堂都可以早啲閃走去移動Samia都係好事! 唔洗閃喺課堂! 放break諗住搵Letty佢地吹水又唔見人喎, 可惡! 捱到放飯就可以輕鬆吓, 因為都可以放到最尾嗰堂開始先去, 3點多就準備閃人, 返屋企會合再出去boradway仲仲攞運動眼鏡, 明天練波可以用, 最後去食埋雞買埋嘢再飲埋珍珠奶茶就返屋企, 因為食得太飽, 晚餐整蕃薯仔湯就算!

4/5/23

 4/5/23     THU     COOL

今日揍緊仲仲返學時撞到個同事，佢仲喺車叫住我！如常返工返學，冇咩特別咁悶咗一日，因為跟Daisy其實冇咩要做，夠鐘就2放飯，夠鐘就放工，接完仲爺買埋餸，返到去hea到夠鐘就要揍仲仲去踢波，因為老公要揍子元，唯有我揍仲仲！喺球場聽到有家長講開學校請假，可能要同council報，不過都係要經學校，起碼又知多少少咁！返嚟煮意粉食簡單啲！

3/5/23

 3/5/23     WED      WARM

今朝4點幾又唔舒服，去元廁所又痛就知道又尿道炎，唯有照樣去打去GP booking，佢就叫我先去留小人便，但返工前根本趕唔切，於是襯中午放飯先趕過5去留！因為朝早要做廣東話GCSE oral的口試幫手，又係一個好經驗！中午仆完過去返嚟冇時間食飯，我等到個學生3點閃咗先食，然後仲要去GP睇吓有冇得攞藥，好好彩有藥囉，攞埋返去仲要接仲爺，返嚟食咗藥好過一陣，晏啲又痛過，希望食完哂藥就快啲好！

2/5/23

 2/5/23     TUE     COOL*

今日要返工，但佢兩個又唔洗返學，所以我唔洗咁早起身！同之前罷工日一樣都係點吓名做吓無聊嘢，不過時間都算過得快，食完飯咪繼續做嘢，2點9就放工，買埋餸返去，諗住返去再試一次整蛋糕，點知又係失敗咗，都唔知點解！夠鐘就煮飯，快手沖埋涼就唔洗洗碗！

1/5/23

 1/5/23     MON     WARM

今日又到最後一日long weekend, 不過下星期又有得放過, 因為國皇登基大典! 朝早瞓到自然醒, 差不多10點先起身, 幾開心呀! 之後慢慢食完個早餐再同老公出咗去超市shopping , 又買咗好多嘢, 又洗咗好多錢咁, 但都係食嘢多! 下午返嚟諗住整麵包, 點知整咗一大餐都係失敗咗, 因為發粉比例唔啱, 唔緊要啦下次再嚟過! 老公就整佢個後花園, 咁又一日啦, 兩隻嘢咪淨係打機睇電視囉, 明天應該係要做番啲嘢架啦, 因為我又要返學啦嘛, 佢地就罷工可以hea多日!