31/8/20

 31/8/20.    MON.    HOT

明明係暑假最後一日，但今年嗰種開學無期，邊會有開學的感覺呢！所以今日都係一個返工日而已！買埋早餐返工，食完就開工啦，一朝早都真係忙忙碌碌，做咗幾個鐘先叫做閒少少，午飯後去咗德福買包，明天早餐嘛，仲執到平嘢，子元話要買個袋，見minisogood有平就買比佢！下午返去冇咩做啦，要等時間過最難捱呢，打機都打唔到咁耐啦！終於頂到放工返去就有飯食，然後都係hea，睇電視變咗主要想做嘅嘢，嚟緊9月中開始真係開到學啦，冇得再hea!

30/8/20

 30/8/20.      SUN.    HOT

今朝瞓到10點幾仲爺叫我先醒，原來老公同子元出咗去踢波呢，咁就起身整早餐佢食啦， 然後hea咗好耐，老公揍咗子元回來，佢就出咗去同舊同事食飯，我地喺屋企冇咩做，都係睇吓英國資料，老公回來咪一齊望吓啲屋，5點幾出門口去嫲嫲到食晚飯，食完仲要去燒街衣，不過都係老公去啫，我地繼續喺屋睇電視等等！回來發現樓下又抄咗牌，走得甩！返去就沖涼休息睇電視，明大要返工啦，今個星期放得一日咋，好過冇啦！

29/8/20

 29/8/20.   SAT.    HOT

今日差不多冇出過街， 早上hea到10點幾起身煮早餐， 都係整抄蛋麵包咋，食完又係無所事事， 今日下午仲爺要學音樂， 咁老公揍佢出去， 我又更加冇咩好做， 係摺咗啲衫， 跟住就找找英國啲資料囉， 琴日聽完炮哥講， 真係要好有決心，冇得回頭嗰隻， 因為又要一舊錢先， 要錢就要賣樓，賣咗就買唔番，咁唔走仲可以點呢！所以必需仔細計劃！老公揍咗仲爺回來就去踢波， 仲仲自己撘lift上來呢！佢有佢睇機， 我有我找資料咁啦！老公回來就出去食晚餐，回來就休息啦，今日唔知點解好攰呢！

28/8/20

 28/8/20    FRI     SUN*

今日放假,可以明正言順唔理公司任何嘢, 瞓到10點幾起身煮早餐, 都係食上次煮嗰個包包, 仲爺好鍾意, 食完都係休息吓, 然後教吓仲仲做功課, 跟住等子元上完堂就出去食嘢, 又要整番好部電腦的咪, 因為開學兩個都用電腦zoom, 要搞番掂先可以! 出去食完嘢又返去啦, 子元要補習, 我地要整電腦, 之後又找吓英國啲資料, 因為老公又要做司機, 車子元踢波, 車嫲嫲去買餸! 最後先回來車我地入去食飯, 食完去may may到攞埋啲書就回家, 沖好涼趕咗仲爺去瞓, 就同炮哥佢地傾移民啲嘢啦, 傾咗差不多3個鐘, 算係有咗個方向! 

27/8/20

 27/8/20       THU.    HOT

返埋今日又放假啦，今朝老公去咗買麥當勞比佢哋食所以遲咗返嚟，喺樓下先見到佢，我就帶咗啲白麵包返去食麥皮，好大反差。食完早餐就開工啦，都係做吓嘢吹吓水咁啦，食完午飯見仲有時間就出去行吓，好過喺Office又要聽電話又要開門，咁咪食咗好似冇放過lunch！唔想熱唔想行所以搭shuttle上德福，去咗A1買麵包明天做早餐，仲買咗隻小丸子甜品試吓，又幾好味喎！下午返去做埋啲job cert，所以都忙忙碌碌咁，話咁快又放工，老公來接我去買埋飯再返屋企。子元下午去咗蘇sir屋企玩，佢就開心啦打咗成日機。返嚟食完飯都係休息吓Hea下咁，九點幾老公就返工！

26/8/20

 26/8/20     WED     HOT

今日又係work from home的日子啦, 瞓到9點多起身煮早餐啦, 老公就食咗早餐先返嚟架啦, 我就整蛋治同仲仲食, 之後都係做吓家務咁啦, 等子元上完網課就出去, 先去幫阿媽整番好兩個櫃輪, 然後就去食嘢, 老公帶咗我地去食間新嘢, 都係小店嗰類啦, 好好食又唔係, 但都唔算話太貴! 食完就去荃灣, 子元的校服要車校章, 又話要買短褲咁, 真係大得快, 又高咗咁! 買完返去開始捉仲爺做功課, 我就又開moveright個網嚟睇英國啲樓, 比老公一齊睇吓! 晚飯老公煮, 我覺得真係煮得好味過我呢! 飯後都係睇吓電視休息吓咁啦, 9點幾老公又返工啦!

25/8/20

 25/8/20     TUE.    HOT

今日又要返工啦，老公放工返嚟就同我交更，買埋早餐返工，食飽就開始做做做，兩日做五日嘅嘢，真係要摩打手先掂。12點幾開始已經肚餓，真係又有啲暈有啲手軟，快啲整好個飯開飯睇電視，然後過咗EMax行咗陣759買咗少少零食，下晝返到去都係做嘢啦，都要打吓動心。放工老公來接我，佢又賴低兩個仔喺屋企，我哋去買埋煮好嗰啲餸就返屋企開飯。之後都係掛住打機休息過得好開心，九點幾老公就返工啦！明天又可以休息啦yeah！

24/8/20

 24/8/20     MON.    HOT

今個星期只返二四，有好有唔好，真係有嘢未做哂，嗰兩日實忙死！今日好早就醒咗，但因為子元要上堂，所以冇出去食早餐。到11點多先至出去食lunch，順手買埋餸，老公就同仲爺上咗阿媽度幫佢整櫃，買賣午飯返去比子元，老公到咁上下時間就出門口返工啦。我哋喺屋企都係無所事事啦，仲爺又喺度整Ironman，我仲喺度睇吓英國啲資料，佢冇可能走得甩。晚飯時間煮好就食啦清潔休息啦，老公今晚返埋夜，明早先見到佢喎但我又要返工啦喎。明早先見到佢喎但我又要返工啦喎

23/8/20

 23/8/20     SUN     HOT

今朝竟然瞓到11點幾先知醒，鬼叫琴晚睇電視睇到3點幾咩！起身後就出去食嘢，只係食完嘢就返屋企，因為琴晚食淨咗pizza可以當晚餐，咁就唔洗買餸！返去不久老公就要出門口返工，我地就吽足一個下午，晚餸時間就煮菜同整番熱啲pizza，咁又一餐，飯後清潔完就做運動沖涼休息打吓機！今個星期返二四咋，諗起都開心！

22/8/20

 22/8/20.   SAT.    HOT

今日仲爺7點幾就走咗入嚟想救番佢隻被扣留的跳跳虎，但就搞到我醒咗，之後雖然瞓番但都係瞓得唔好！10點幾起身後，老公因為要上堂， 上足一日，所以冇得出去食早餐，咁我又想去惠康入貨，所以捉埋兩隻嘢落去就幫手，買得好狠，用咗現金卷都要補三百幾，真係好誇張，不過幾個星期冇入貨，就係糧盡架啦！返到去放番好啲貨都放咗好耐，等老公落堂就出去食午飯，順手去攞番cube cube！之後就直接回家吽咗一個下午，咩都唔想做唔想郁！係摺咗啲衫咁大把，等老公落堂，就出去買pizza回來食，等緊攞pizza時去咗萬寧又入貨！回家食完嘢就又係吽囉，呢啲日子除咗吽仲可以做咩！

21/8/20

 21/8/20     FRI.    HOT

今日都係要返工啦，如常起身出門口買早餐返去食！食完早餐就開工啦，都係做吓嘢咁囉，今日都忙架，好多更表要做，都忙到食飯時間架！下晝都係打下機做吓嘢咁，時間都過得好快！冇咩特別咁又放工啦，返去都係做返煮飯嘅工作，日常生活咁囉！其實日子真係幾無聊，根本冇咩好寫咁！

20/8/20

 20/8/20     TUE.    HOT

又去work from home的日子了，今日又係冇出過門口，朝早瞓到八點幾醒咗，全部豬入嚟玩左一大輪終於肯起身，子元上完堂就煮早餐食，出去食又係嘥錢，食完早餐老公攞架車去整順手返工，我哋就繼續係屋企發霉，都係打我嘅機又煮嘢食又打機又煮嘢食做吓家務咁，仲捉仲爺執好間房，晚飯後都係清潔做運動沖涼休息！

19/8/20

 19/8/20     WED.    RAIN 9號風球

今朝諗住8號風球都落波，要返工㗎啦，點知竟然掛到9號風球，又醒咗瞓唔番，都起身打下機算數。反正子元都要上網課，同埋天文台都話11點左右又會過返3號，所以都要準備下午返工。等子元上完堂就出去食嘢，點知真係11點嗰啲就轉返3號，食完又要快快手手返去換衫返工。兩個鐘內準時返到公司，幾個鐘都係做吓嘢咁啦，最尾就打下機休息吓，放工快快手手返屋企，怕咗兩隻野搞搞震冇幫襯。返去馬上煮晚飯食，都係簡單煮雞肉意粉，食完清潔、打機、休息、睇電視、做運動、沖涼⋯⋯明天又可以work from home！

18/8/20

 18/8/20.    TUE.    RAIN 1、3、8號風球

又係一個work from home的日子，瞓到九點幾起身因為我想食麥當勞，揸車去美居嗰邊食，食完買埋餸就屋企，老公喺度整豬皮凍，我哋就喺度打動森，玩到3:00諗住整嘢食，突然想起子元要補英文，馬上叫子元出門口，再打俾Miss Yu同佢講聲。等子元補習完返來就整埋嗰少少雲吞食咗佢。之後都係慢慢煮晚餐啲嘢，六點幾七點開飯食完就繼續打下機，清潔完就做埋運動睇電視。10點幾走去掛個8號凰球，明天落咗波咪又係要返工，唉！

17/8/20

 17/8/20     MON.    HOT

又係要返工的星期一啦，如咁買埋早餐返去食完就開工，做好嘢就開始忍唔住玩動森啦！時間過得都好快，食午飯時都係睇 viu啦！下午都係打機多過做嘢，真係幾開心，放工好快返到嚟，老公煮好晚餐，食埋佢先上堂！我地就梗係打機啦，好好玩呀！

16/8/20

 16/8/20     SUN     HOT

星期日都唔係瞓得咁晏,8點幾就醒咗瞓唔返, hea到9點幾都起身啦, 老公整多士比我地食, 之後都係上吓網先, 老公話要瞓覺嘛, 比佢瞓到12點幾就出去食晏, 去咗君日食午餐後就去埋ICON酒店換埋兩個榴槤雪糕食, 去街市買埋嘢就返屋企, 抱埋餘下的雲吞, 跟住就同兩隻嘢打機, 動森出咗個手機露營車版, 又好似幾好玩咁喎! 就玩到7點幾先叫醒又瞓咗個老公煮晚餐, 都係整番之前的牛腩加河粉又一餐! 

15/8/20

 15/8/20     SAT.    HOT

星期六日可以瞓到自然醒，老公放工返嚟瞓到10點幾先至起身，要出去食早餐買糧食啦，先去瑞士咖啡室食咗個早餐，等架車洗好玩埋軚，就去街市買嘢，本來諗住買啲河粉今晚食埋啲牛腩，心血來潮見到有雲吞皮，就買咗半斤返去試吓包雲吞，當然仲要買菜買肉啦。返得去都點幾鐘，老公揍仲仲去學音樂，我同子元就喺屋企，兩點幾開始就整雲吞，最大工程係切菜，切細菜切碎再渣乾水再要撈肉加味，都包好再落水煮熟埋，原來都要幾個鐘，真係好費時的食物，不過喺疫情時候呢個就係最好消磨時間嘅活動。食晒啲雲吞，仲有老公買咗火腿返嚟配哈密瓜，嘩就當晚餐啦！睇吓電視做吓運動，沖涼後趕埋啲仔去瞓，又係時候休息，又過咗一日啦！

14/8/20

 14/8/20     FRI.    HOT

今日又係Work from Home，其實都冇咩work過，瞓到10點幾先起身，梳洗完收拾下計劃今日出去幫子元買埋啲書，所以都要準備定啲文件，仲要過長天交埋啲通告。不過首先去咗食早餐先，食飽先有力做嘢，去到佐敦排隊等買書，折咗之後千幾蚊啫，識人攞二手書真係好重要。本來買完書諗住返屋企，但醒起子元真係冇校服，就去咗奧海城望吓，最終都只係買到條西褲，可能白恤衫真係要去校服公司先至買得到。喺奧海城行左一輪，三點幾就返屋企啦。之後都係休息吓準備吓晚飯，今晚整蘿蔔枝竹牛腩、仲有蘑菇焗薯仔。食飽都係清潔睇電視做運動沖涼休息，老公今晚都要返夜，九點幾就出咗門口啦。

13/8/20

 13/8/20     THU     HOT

返埋今日又放假啦，真係幾好！朝早如常咁趕住返去啦，慢慢食埋個早餐就開工，都有啲忙忙地，諗清楚有咩要做等等，時間都算過得快，跟住就係放飯時間啦，睇住電視咁食飯幾好呀！下午又係時間開工啦，得我一個喺位呢邊都係好事，因為可以聽住收音機開工，感覺時間係過得快啲！終於到放工啦， 返到去好攰咁只係想攤喺到唔郁，老公煮飯我可以等食真係幾開心，不過食完都要洗碗清潔，所以都係要做！做埋運動沖涼休息，老公就返工啦！

12/8/20

 12/8/20     WED     RAIN

今日又要返工啦，今日全個部門都要返啦， 因為要交深喉測試呢，所以阿姐安排咗個個都要返，都好嘅人齊啲做少啲！返到去食早餐，試咗用蒸飯機蒸蛋食呢，又行得通喎！ 跟住成朝都係做嘢啦，真係都忙架！終於捱到1點幾可以食飯睇劇啦，最開心的時間呢！下午都係做吓嘢吹吓水咁，話咁快又放工走得，老公嚟車我，去長沙灣買餸，有今晚即時食得嘅，有之後幾日食的，買完就返去，好在老公發現長沙灣廣場塞車識運路走，唔係都唔知幾時先返得去！食完飯都係hea吓輕鬆吓，做埋運動就沖涼休息，老公今晚要返工呢！

11/8/20

11/8/20     TUE     HOT

今日又係WFH, 又可以瞓到10點多先起身, 仲爺入嚟房痴住一輪先起, 梳洗後煮早餐, 今日整咗熱狗同麵, 佢地都好欣賞呢! 到12點多趕佢地入去做功課, 兩個又激我啦, 叫極都唔郁要我發脾氣先肯郁, 其實好攰架! 唔係要仲爺做好多功課, 但每日都要寫吓字咁囉, 點幾兩點煮午餐, 簡單地煮烏冬咋, 下午都係無聊過啦, 做過吓家務換咗床單咁啦! 老公回來就瞓覺, 6點多叫佢起身煮晚餐, 食完清潔完都要諗埋明天帶飯, 其實都真係幾煩吓! 老公飯後出咗去, 佢同事個冷氣好似我地上次咁又嘔水, 要去幫佢處理呢!

10/8/20

 10/8/20     MON.    HOT 

Happy birthday to me! 三字頭的最後一個生日，都係好平凡咁過！蛋糕又食咗大餐又食咗， 都預祝哂啦，所以今日如常咁返工，買早餐返去食完就開工， 聽住收音機做嘢， facebook好多人同我講生日快樂呢！時間都過得好快， 終於到放飯，今日唔洗蒸飯因為我食冷麵同青瓜咋，健康到呢！食完飯去咗759買吓嘢，補吓糧咁啦，下午都係做嘢囉，時間都過得好快！放工勁快返到去有飯開， 今日係食好充實的叉燒腸仔煎蛋飯！飯後老公上堂，我地就悠閑吓！

9/8/20

 9/8/20     SUN.    HOT

今日又係困在家啦，早上瞓到10點多起身，梳洗完煮早餐，食完就趕佢地去做功課，笨元又拖冇做嘛，又要比我鬧！佢地喺房做嘢我就可以靜吓，打吓機咁！兩三點先去煮午餐，都係煮咗個麵加啲蒸餃咋，食完一陣老公就回來啦，佢話買嘢回來同我慶祝生日，原來係買咗icon酒店的high tea套裝，榴槤嗰隻呢，等我去惠康入埋貨， 回來就影埋相咁就食得啦！ 仲爺影相時影得好唔自然呢，搞到影咗好耐先影得好！食完老公就整海鮮晚餐，有象拔，聖子等等， 仲有海膽呀！食得好滿足呢！

8/8/20

 8/8/20     SAT.    HOT

由於疫情嘅關係，今日真係冇出過門口。朝早瞓到九點幾，仲爺都未起身，10點幾起身煮早餐比佢哋食，然後就喺睇空間改造王到12點幾，開始捉仲爺執房，但執極都執唔好，但我都係要煮咗午餐先有力做嘢，真係執咗一大袋垃圾呢，老公放工去接埋嫲嫲過來，佢掛住啲孫呢，所以買咗蛋糕來順手提早同我慶祝生日呢！

7/8/20

 7/8/20     FRI     HOT

今日又要返工啦, 買好早餐返去食, 食完就做嘢啦, 都有嘢做都忙忙地架! 時間過得好快, 差不多又係時候叮飯, 有自己個蒸飯機好重要, 可以好好咁慢慢整好慢慢食! 邊食邊睇番電視劇, 下午又要開工啦, 做好嘢已經差不多放工, 又唔知下星期返咩啦, 不過都冇所謂啦都係咁返! 撘巴士返到去就同老公會合出去買kfc外賣啦, 老公仲要買埋咖啡! 晚上又係好多電視要追啦, 好忙碌!

6/8/20

6/8/20     THU     HOT

今日又係work from home啦, 其實咪即係放假咁! 瞓到10點多要起身梳洗出去食早餐啦, 因為約咗12:30要去交收啲書, 要出到尖沙咀呢! 攞完返去再買餸等等, 要喺長沙灣又買美孚又買先買齊, 因為老公話要整火鴨絲炆米呢! 買齊返屋企可以抖吓啦, 捉佢兩個做吓功課先, 我又做吓啲私務咁, 時間都過得好快! 跟住就幫子元search吓子元啲書有冇二手貨, 新書真係好貴, 又未必用到喎, 都唔知開唔開到學! 晚飯後老公見我仲找緊書, 就主動洗碗呢幾難得! 最後都安排好明天交收呢! 做好運動沖埋涼趕埋仲爺瞓覺, 就可以好好睇電視!

5/8/20

5/8/20     WED     RAIN

今日又要返工啦, 朝早架shuttle玩嘢呀, 又遲又慢, 好在趕到28分返到咋! 食埋早餐開工, 今日都忙碌架, 所以時間都過得快, 聽住收音機做嘢, 都係好事嚟! 差不多1點又係時候蒸飯, 邊食邊追劇, 其實都幾自在, 下午又係聽住do姐, 所以時間又係過得快, 做好嘢等放工, 好快返到去, 仲要落住雨添, 好在有帶遮啫! 返去好快有飯食, 食飽都係清潔睇電視做運動沖涼啦!

4/8/20

4/8/20     TUE     HOT

今日真係冇出過街，悶到有啲發顛！瞓到9點幾10點起身，然後咪煮早餐請兩位少爺食囉，食完抖咗陣就趕佢地入去做功課，仲爺又做到點幾啦，跟住我就煮少少嘢做午餐，食完有啲唔知做咩好，咪執吓櫃咁囉，老公回來又瞓覺！我5點幾開始慢慢煮晚餐，邊睇番viu的劇邊煮飯，食完飯都係睇電視做運動沖涼休息啦！仲爺一日個口講唔停，真係怕咗佢！

3/8/20

3/8/20.    MON.    HOT

今日又要返工啦，7點又要起身，返到去食埋個早餐又開工，可能多嘢做，所以早上的時間好快過，啲嘢都做得七七八八，午飯個重點係蒸飯，因為以後都唔會有飯供應，大家都要食自己，不過有番$50飯津叫做好過冇，所以我今日第一個用蒸飯機，就變咗做示範單位，個個都來睇來問，好搞笑囉！咁個蒸飯器都唔失禮幾好用，係用完又要洗好多嘢啫！下午都係努力工作，做做吓冷氣機突然漏水，嚇死人呀，好在昨晚試咗一次，知道要點做，再call埋工程部來處理！準時5:30放工，返到去其實都幾攰吓，但都要煮埋個晚餐，老公要搖距上堂嘛！飯後突然想起子元中學嗰邊啲嘢都未填，星期五又要去考分班試呢！

2/8/20

2/8/20     SUN.    RAIN

今日都係一般的星期日，9點幾就起身啦，可以早啲出去食早餐，食到君日啦！跟住就係要去買吓嘢，嚟緊一星期的食材又要入貨！仲要帶子元影埋長天附近影相，因為GEO要做功課！回家後就收捨好再捉佢地做功課，然後我要煮定明天帶飯的東西，有飯盒的日子唔知要捱幾耐！然後就點吓口罩咁啦，7點多出去買埋晚餐，今晚食米線呢！9點多時個冷氣突然出水，嚇死人呀！好在老公今晚在，都係佢太耐冇清潔過啦！

1/8/20

1/8/2020.    SAT.    RAIN

星期六梗係瞓到自然醒啦！結果又食唔到君日啦，咁就喺長沙灣食早餐再買嘢，去買河粉時撞到阿媽，佢又叫我去A1幫佢買包呢！結果喺長沙灣來來回回好多次，差不多點幾先返去，老公又帶仲爺去學音樂，我就同笨元喺屋企，摺衫打機做功課，笨元又呃我話做咗，比我check到，又話啲數係唔識做，但英文冇得賴啦，真係好想片佢！晚飯老公煮蘿蔔牛腩河，好正！