30/4/20

30/4/20     THU     WARM

今日又係4日連假的開始, 不過老公返中連夜, 所以主力都係朝早出完去就返屋企! 瞓到9點幾10點先起身, 出去食完早餐過咗荃灣行激安, 上次太多人, 今次都唔少, 但都照行啦, 都買咗嘢呀, 食又有玩具又有咁啦, 行到點幾返去, 老公都差不多返工, 我就同仲爺做功課, 今日做多啲明天唔洗咁辛苦, 不過都做咗好多個鐘, 又要煮吓午餐比佢地食啦, 時間過得好快, 7點幾煮晚飯, 雖然食埋隔夜餸但都可以好豐富! 飯後都係清潔沖涼睇電視, 還要趕仲仲去瞓, 但佢因為琴晚發完惡夢, 最終要出盡九牛二虎之力先搞得掂佢肯去瞓!

29/4/20

29/4/20     WED     WARM

今日本應諗住可以free足全日, 但都係朝早要做嘢, 都好時間易過啲! 買埋大家樂返去食, 報埋更報埋飯, 跟住就一路做嘢到放飯, 邊吃邊睇花姐Error遊, 跟住又打機又睇德魯立酒店等等, 下午基本上都係自由時間, 放工返去開飯食完交收埋個玩具廚櫃, 再買埋雪糕就返去, 今日7-11做特價嘛!

28/4/20

28/4/20     TUE      WARM

今日係自由的日子，朝早見唔夠時間買早餐， 都係拍咗卡先落去買大家樂！返上樓做好基本嘢就開始打吓機睇吓劇，呢幾日真係要好好享受吓！午飯後都係睇viu啦， 然後就過油塘個倉check番啲要碎的文件， 點知阿姐冇比條key Ivy，結果要撘番的士返去攞咗先開到門， 搞咗一大輪分好lot， mark埋邊啲要碎等等， 差不多5點先走，本來可以返去， 但我又未拍卡， 又未攞番個袋， 最終都係返去坐埋嗰9個字先走，反正我都係睇劇， 只係個人臭啲咁解啫！放工返到屋企那馬上清潔吓先，跟住就有飯食！打掃埋就執仲爺間房，因為老公砌好咗條梯啦，都要執好啲嘢執好啲位，今日真係用腰用到好夠，堅攰！

27/4/20

27/4/20。   MON。   COOL

又要返工啦，捱今日啫， 明天可以自己做自己嘢！買埋早餐返去，朝早做好嘢下午就完全做自己嘢，午飯時又要抄番佢地今個星期的功課，真係好累人的事！ 仲爺琴日甩咗門牙啦， 都唔記得咗出post， 今日馬上出番， 佢條友完全唔怕咁， 都算好快手老公就幫佢用牙線拉咗出嚟！下午繼續睇慶餘年的小說， 明天冇皇管先睇劇啦！ 放工回家差不多有飯食，但要係咁管佢地快啲執嘢呀， 叫仲爺做埋啲功課就已經好攰， 食完飯嫲嫲洗埋碗咁我就抺好地，然後咪打吓機囉，趕咗仲爺入房但佢好耐都瞓唔到，啲生理時鐘亂哂呢！

26/4/20

26/4/20     SUN     COOL

4日假期又到尾聲, 好在返3日又放假了, 瞓到9點幾10點先起身, 出去食完早餐, 上咗阿媽到攞埋啲嘢先返屋企, 兩隻豬又唔肯走, 真係比佢地激死! 返到去又係時候溫書執番齊啲功課, 咁都搞咗兩個幾鐘呢! 然後就私人影院開場, 子元話有link可以睇到戲, 咁就即管search番復仇者嚟睇, 仲要駁落電視閂埋燈開哂嘢食嚟睇先似戲院架嘛, 期間老公落咗去買嘢食, 因為睇三個幾鐘都唔少嘢, 我地到8點幾先再出去食晚飯, 本來想去奧海城食food republic, 點知太夜, 唯有轉場去深水涉, 都食得好滿足呢! 回來後沖涼睇電視, 今日都過得幾hea吓!

25/4/20

25/4/20.    SAT.    COOL

老公今日返早， 所以我又要揍子元去英文， 又要揍仲仲去音樂， 我仲執咗梳化後面同老公床嗰邊啲儲物， 算係冇浪費時間， 但佢地兩個就好鬼浪費囉， 清理好就揍仲爺去學音樂， 又係漫長的旅程， 過到去佢又唔餓喎， 梗係啦今朝食咗個最大的麥記早晨餐！所以過到去只係買個菜肉包比佢食就算，等佢學嘢時我就去食晏睇劇啦， 夠鐘接番仲爺就撘171返去， 條友又話唔眼瞓， 結果幾快瞓著！返到嚟買咗燒賣魚蛋比佢食，然後叫老公煮晚餐啦， 佢同笨元夜啲去踢波， 我就同仲仲喺屋企啦， 今日都有啲攰，喺巴士唔係好瞓到呢！

24/4/20

24/4/20     FRI     COOL

今日都係請咗假的日子, 不過點幾就比仲爺嘈醒咗, 咁咪起身煮早餐食, 再做功課囉! 不過對住仲爺做功課, 其實係好浪費時間, 足足3個幾鐘就係咁督住佢, 先叫做做得哂! 老公都已經放工回來囉, 出去食啲嘢先過Mega Box, 因為要買嗰張床做梳化, 度好哂位架啦真係fit到多少少位都唔得, 不過計過度過最扺係呢個買法, 而家一張梳化cheap極都幾千, 我咁買張床, 再淘吓床墊咁點都唔洗呢個價, 仲可以放哂啲雜物入去, 幾好方法呀! 喺IKEA食埋嘢就去睇吓玩具, 行埋AEON就回家啦, 佢地要睇電視嘛!

23/4/20

23/4/20     THU     WARM

今日係子元12歲生日啦, 時間真係過得好快, 尤其佢進入青春期之後總覺得佢已經好大個咁, 捱多6年, 仲爺都到呢個年紀, 我就真係可以放生! 今日瞓到9點幾10點起身, 整西多士一齊食, 然後就開始做功課, 仲爺有好多功課未做, 佢又做得慢喎, 中文又有更新咗一堆實體功課, 激死人! 做到點幾兩點整午餐, 食完就自由吓先, 等老公放工回來, 換衫出去尖咀行吓, 因為今晚去食煤氣嗰間餐廳, 喺中港城嘛就去海運行吓, 仲爺都要買過對波鞋, 因為已經唔啱著啦, 行埋反斗城就去食嘢, 如老公所講真係唔多好食, 所以食完就走啦, 邊行邊睇吓嘢買埋糖水返屋企沖涼睇電視, 咁就過咗子元的生日啦!

22/4/20

22/4/20     WED     RAIN

返埋今日就放4日假, 真係好開心! 朝早買埋早餐返去食啦, 10點未夠連更都報埋, 好在都找到啲嘢做, 不過時間都過得好慢, 午飯後睇劇, 主要睇番viu未睇嗰啲, 2點又要開工啦, 下午都真係忙, 不過時間真係易過好多喎, 話咁快就放工, 老公嚟接我去apm攞蛋糕, 返得去都7點多, 等它公煮埋雞比同牛柳就開飯, 好滿足一餐, 但個廚房就有排抺! 食埋蛋糕嫲嫲才回家, 呢個蛋糕真係好抵食, 性價比高呢, 90蚊咋喎又好味! 喺仲爺小結他伴奏下唱生日歌呢! 洗埋碗沖涼休息, 明天可以有日假睇吓功課, 等笨元唔洗同仲仲單打咁陰公啦!

21/4/20

21/4/20.    TUE.    WAT

今日自月由自在呢， 不過太快做哂啲嘢，明天點算呢！朝早買咗大家樂做早餐，朝早邊聽收音機邊做嘢， 時間過得快好多呢！午飯同事邀請出去食，咁都要出吓去嘅，順手過amp訂埋蛋糕， 下午返去都做咗陣嘢，就開始可以睇吓機打吓機等放工！本來諗住喺屋企食番公司個飯盒， 但老公下午佢地出咗去玩，Joe佢地約咗去南生圍玩吓，一齊食埋晚飯，喺Aeon買埋嘢先返去， 咁又一日啦！

20/4/20

20/4/20     MON     WARM

有嘢做的日子, 時間都過得快啲! 早上都係買埋早餐返去啦, 食完就做嘢, 慢慢做唔洗急, 做到放飯食完就約咗Joey媽媽, 一齊出去行吓, 去咗apm睇咗蛋糕款, 睇吓笨元要邊個, 然後去咗祥華入吓貨, 下午返去都係咁嘢啦, 中途過咗美羅寫水樽, 我今次真係冇行過街架, 做完就返來, 因為仲要寫埋兩隻豬仔今個星期啲功課表呢, 今個星期啲老師整到好亂咁又冇寫清楚做邊啲, 所以都用咗啲時間先寫得哂, 再放埋上group開心share! 放工老公嚟接咗我, 順便車埋炮哥返去! 嫲嫲今晚唔煮飯想去食粥, 咁就梗係去食啦, 笨元本來好唔願架, 但粥鋪有丁麵喎仲要好食嗰隻邊到搵呀! 食完返屋企做咗運動先, 忍唔住地下太髒要吸塵抺地先沖涼, 之後睇吓老公今日找到的梳化床, 又找到更平更好的選擇呢!

19/4/20

19/4/20     SUN     WARM

今日是個平常悶的星期日, 未夠8點就唔知比咩聲嘈醒, 所以9點幾都起咗身梳洗打吓機咁, 老公11點先肯起身, 過到長沙灣都唔知食咩好, 最終去咗元朗冰室食, 食完就返屋企, 同仲爺溫吓書做埋啲功課, 都做到兩點幾, 午飯就唔洗食架啦, 所以都係無所事事咁打吓機睇吓劇換埋床單等等, 6點幾出咗去行陣食啲嘢, 近近地又方便都係去荃灣, 夠多嘢行又有嘢食, 見到有撒利亞就食呢間啦, 之後真係閒逛嗰隻, 係喺超市買咗啲調味料咁啦! 行到8點幾去換埋個雪糕就回程返去沖涼睇電視休息!

18/4/20

18/4/20     SAT     WARM

今日, 我真係有少少唔知開始寫好, 因為實在係太令人傷感的一天! 今日除咗兩隻豬仔要補習學音樂等活動外, 還有是梓朗的安息禮! 做咗幾十年人, 送別親人算是有幾次, 但都係年老過世的人, 但一個小孩的離開, 我真係接受唔到, 所以我今日都喊咗幾次, 我知子元都有, 仲爺就未了解係咩! 早上老公車Joe佢地去兒童醫院, 今次係最一次了! 回來和我們食完早餐, 等我同仲爺返去換埋衫等等接埋子元就過大窩口, 泊好車上到去教堂, 還可以控制, 但當陳校長開始分享時, 我真係忍唔到, 但又唔敢太表露出來, 怕仲爺係咁問, 我見子元同老公都有感觸, 中途仲爺話要飲水等等我才有機會去車攞時透一透氣, 原來真係咁難過! 儀式完了, 大家排隊等離開時, 撞著幼稚園同學老師, 傾咗幾句等等, 人生就係咁, 紅事白事總係最齊人! 我地跟埋車上火葬場送最後一程, 我真係忍唔住喊咗出嚟, 其實都真係要舒發, 眼見唔少人都流淚又點忍得住! 回程上其實都有所想, 這兩三年同黎家算係相處多咗, 4隻仔齊齊踢波食飯, 有唔少回億, 點會唔痛心, 好難想像冇咗個仔的傷痛, 所以今日真係好感觸! 唯有等自己有嘢做住咁就好少少, 返到嚟對咗佢地啲功課, 煮午餐食, 睇吓Error遊, 同子元打吓機等等, 晚上買咗外賣返嚟食, 睇慶餘年, 今日都算完結, 好好整理一吓思緒吧!

17/4/20

17/4/20     FRI     WARM

終於到星期五啦, 今日仲要得我一個, 輕鬆自在好多, 只要唔好太過份就得啦, 買埋早餐返去食, 然後做好基本嘢, 聽住收音機做時間好似過得快好多, 除咗聽嘢仲可以睇吓劇咁, 真係好! 飯後又去咗APM行, 今次唔行一田, 上咗樓上行咗無印同睇吓衫咁, 真係睇吓至在行吓咁解啫! 下午返去都係打吓機聽吓收音機等等, 至衰冇得行街, 唔係我真係去咗行街都得! 放工老公嚟接我, 順手車埋炮哥返嚟, 嫲嫲喺到煮好飯, 趕佢地執埋嘢就開飯啦, 食飽唔洗洗碗仲好呢, 只係抺吓地等等, 沖埋涼睇電視, 兩條友仔沖涼沖到求奇咁, 比我閂咗電視做好哂嘢先可以再睇!

16/4/20

16/4/20     THU     WARM

又係悶到一個點的日子, 多嘢做時間都唔難過, 冇嘢做又唔可以做自己嘢, 嗰啲時間先難過! 返到去買埋早餐, 又係時候慢慢做嘢, 已經慢慢做架啦, 點解啲時間過得好慢咁呢! 好辛苦先捱到放飯, 食完真係要比自己放吓風, 一條友出去行吓, 算係自由自在, 行到過apm去一田行個圈都好! 下午返去又困獸之鬥, 期待明天得自己一個可以完全自由自在呢! 放工返去見到間屋都唔算太亂, 清潔完自己就捉笨元一齊做運動, 又係時候食飯啦, 老公整好好味晚餐, 正! 食完都係洗碗清潔沖涼睇電視, 還要睇仲爺開演唱會, 條友唔比人錄影喎, 佢真係好好笑架, 會喺床上降落嚟, set好哂場地, 夾好埋歌, 用埋擴音器, 好pro咁, 比佢笑死!

15/4/20

15/4/20     WED     COOL+

今日先星期三, 今個星期幾時完呀! 又要一早起身返工, 有嘢做吓都好, 不過拖慢嚟做朝早都已經做哂, 午飯後就要自娛, 但又不能揚, 咁先係最慘! 食完個飯都係睇小說啦, 不過真係用眼用到攰! 下午邊做吓嘢邊自由吓啦, 時間真係過得好慢, 之前有得聽住收音機, 時間易過啲! 終於捱到放工, 返到去見到一枱一屋都係嘢就火, 叫住仲爺執嘢又冇做運動啦, 食得飯嚟做得清潔又唔夠人爭廁所沖涼, 結果睇少咗一part慶餘年呀! 仲爺有時係幾貼心, 但佢啲自理真係有待改善, 教極都做唔好!

14/4/20

14/4/20。   TUE。   WARM

今日又要返工啦，我做嘢真係太有效率，又比預期快咗做好哂啲囉野，所以返去食完個早餐慢慢做， 未夠11點已經完成，但又唔可以咁揚做自己嘢喎，時間真係好難過，朝早4個鐘過得好慢先到食晏，食完就同個同事出去行咗個圈，下午都係做吓嘢但大部份時間都係等時間過啦，真係好辛苦先捱到放工呀！返到去老公已經煮好飯，做埋運動就開飯，跟住都係睇電視啦！

13/4/20

13/4/20     MON     COOL

又到最後一日假期, 呢個與別不同的復活節假都冇咩好寫, 今日都係盡量留在家中, 只係出咗去食早餐同喺樓下同佢地練吓波郁動吓咁咋! 11點多老公都未肯起身, 真係想餓死我地咩, 終於出去食埋嘢就返去換衫去樓下做運動, 玩咗兩個鐘左右去超市買埋嘢就回來, 收拾吓沖吓涼, 打吓機預備吓晚飯啲嘢, 我又煮啲老公又煮啲咁啦, 食完清潔埋沖涼睇電視, 明天又要正常返工啦!

12/4/20

12/4/20     SUN     COOL

今日都算活動較多的一天, 朝早老公放工回來上埋堂瞓到10點幾就出去食早午餐, 然後去埋實惠望吓啲地台同櫃, 睇吓實物先知係點! 睇完就返去同仲爺溫書, 中英數常點都要睇吓先架嘛, 然後就自由吓, 我係到睇花姐Error遊, 真係好好笑! 差不多4點叫老公起身, 因為要去IKEA睇吓嘢就直接入沙田, 可以睇多啲款! 最終攞咗啲單張返來, 研究吓可以點砌! 行完IKEA梗係要食埋熱狗嗰啲先啦, 然後返長沙灣食KFC才回家, 老公今晚又要返工呢!

11/4/20

11/4/20     SAT     WARM

星期六都係要早起身呢, 因為要叫子元補習, 不過有老公車咗佢過去再回來接我們去食早餐, 食完早餐就返屋企, 又係時候做功課, 教仲爺做功課真係好辛苦! 做得嚟佢都唔玩得幾耐又要出門口去學音樂, 我就同笨元煮午餐食呢, 跟住就同佢教番今個星期教啲嘢! 之後就睇吓地台梳化啲資料, 睇吓先啦未有錢呀! 老公4點幾就返到嚟, 各有各自由, 然後就開始煮飯食, 快手清潔完要睇慶餘年!

10/4/20

10/4/20.   FRI.    COOL

復活節假的第一天， 今個假期都算特別，完全唔洗諗去做咩， 因為都冇咩地方可以去，係今晚入嫲嫲到食飯囉，因為子元舊曆生日喎，我都唔記得！朝早瞓到10點幾先起身，出得去食早午餐，回家做功課，又係教到嘔哂血啦！3點多就出咗去，因為要放滅曱甴噴霧，所以要長啲時間不在家，唯有去咗青衣找個地方踢波，踢到差不多時間才返嫲嫲到食飯，不過要沖個涼先，然後就係食住等正式開飯！食完用即即有影吓相8點幾就差不多走啦，返去又要沖涼又要睇慶餘年咁，老公就要返工啦！

9/4/20

9/4/20.    THU.    WARM

今個星期雖然只返3日，但都好似好難過咁，會唔會某程度上呢份工真係唔適合我呢，做咗差不多2年啦， 都真係冇咩歸屬感！好就好在今日得一個人，可以自由啲， 買咗早餐返去食，做好嘢本來諗住自由吓，但下午竟然忙，真係好無奈！不過都唔係好開心，因為收到啲裁員風，其實除咗錢嘅問題外， 其實都冇咩所謂，因為我都係貪福利好啫， 其他真係冇咩吸引！放工老公嚟接我，順手車埋炮哥返去呢！車上都係講大抽獎啲嘢，返到去已經有晚飯食啦，之後都係清潔沖涼睇電視！

8/4/20

8/4/20     THU     COOL

今日又變番正常心情的日子啦, 買早餐返工, 乖乖做好啲嘢明天就可以自由! 所以其實今日都無嘢好寫, 做嘢食飯做嘢等收工! 老公嚟接我, 直接去Aeon, 因為嫲嫲話喺出面食埋行埋超市, 所以就去咗coco食, 真係要分開兩張枱食囉, 好搞笑, 因為我地有6個人嘛! 超市行完入哂貨就回家啦, 又要放番好啲貨又要做埋運動又要快啲沖好涼睇慶餘年, 真係好忙!

7/4/20

7/4/20     TUE     COOL

今朝除咗用 "來回地獄又折返人間" 嚟形容外, 真係諗唔到有咩更適合! 5點幾我已經醒咗一次, 好辛苦先瞓番, 但都係咁發夢, 當然係惡夢啦, 真係好攰! 一路返工都盡量忘記, 但最終返到去都係好緊張啦, 等到10點都仲未有消息, 灰咗一大半, 因為九華有人收到電郵, 咁我睇哂一個電郵都冇,咁十成冇啦, 得番長天可以期望吓, 就同phoebe講到應該都冇可能時, 收到個電話號碼好似樣, 一聽問我係咪陸子元家長時, 我已經激動到踢哂腳, 佢話收咗子元做正取生, 我即刻想喊, 雖然只係自二的選擇, 但免除咗大抽獎的等待, 已經係好幸運的人, 學校仲問我有冇其他直資收咗, 我話冇, 佢就話咁就簡單好多, 問埋我係自幾選長天, 其實我本來想唔講, 但咁亂情況下都照講係自二, 但講明自一嗰邊應該唔收架啦, 咁佢就解釋為咗順利接軌, 會喺5月比啲資料佢地班仔自學吓先, 嗰吓我淨係覺得你講咩都得架啦, 我已經開心到顛咗! 不過一日未收到封信一日都係未夠安心, 或者佢係昨天寄但過咗寄政時間, 所以要星期三先收到掛! 今日餘下時間都係努力工作等放工, 期間當然報吓喜咁啦, 放工老公嚟接, 去咗元州食拉麵, 當係慶祝吓啦!

6/4/20

6/4/20.   MON.    COOL

今個星期得今日home office 咋陰公！瞓到9點多就起身，今日整西多做早餐， 然後就做咗輪私人嘢，然後就做番琴日冇做嗰轉運動！夠1點又要上google classroom睇功課，要做好個表等子元幫手跟呢，做到2點先做起一個， 要煮咗午餐先，飯後踢佢地快啲做，仲爺一個都做咗兩個幾鐘！期間我又同咗舊同事傾電話， 老公買咗啲餸回來，但淨係得煮麻婆豆腐啲料呢， 所以等仲爺做好嘢我地都出多次街市買埋明天啲餸，回來都係做運動煮飯，食完飯就清潔沖涼睇電視！

5/4/20

5/4/20.    SUN.    COOL

今日基本上又係冇出過街啦， 係晚飯後諗起明天又work from home又冇早餐， 都係買定方包可以做西多，仲要買埋咖啡，今日冇飲己經好慘！朝早整咗一丁做早餐， 笨元喺到多多事實嘛我就叫佢入嚟幫手煮， 咁大個仔唔洗做呀！食完洗埋碗都11點幾， 又要趕仲爺開始溫書，一溫就個幾鐘先完成，下午除咗煮午飯食就係打機， 今日真係咩都唔想做，連運動都唔想做！晚飯後清潔完落去買埋明天早餐，沖好涼就睇電視囉！

4/4/20

4/4/20     SAT     COOL

星期六嘛都係要早起身, 子元要去補習嘛, 我地就去食早餐, 然後返去接佢, 點知條友仔比人留堂, 完全未做好功課, 結果我去買埋餸佢都未得, 等到11點有多呢! 返去迫子元睇吓中文科查吓字, 仲爺就練吓琴, 我就睇升中啲嘢, 真係愈睇愈心煩, 睇到兩點多要煮午餐, 老公就揍仲仲去學音樂, 食飽就同子元溫番今個星期啲嘢, 然後就開始hea, 6點幾做好運動就煮飯, 本來係叫老公煮, 條友又瞓鬼咗! 之後快手食完洗碗沖涼睇電視啦, 星期六就有好多節目要睇呢!

3/4/20

3/4/20     FRI     WARM

終於捱到星期五啦, 都係如常咁買麥記早餐返去開工, 今日都忙架啦, 但好似唔知做過咩咁, 完全冇時間做自己嘢, 午飯時終於可以睇陣小說, 但又同另一個同事講升中啲嘢, 聽吓過來人啲意見都係好! 下午忙忙碌碌咁, 放工前其實都未做得哂,不過都冇得趕, 下星期先做啦! 放工返去梗係做咗運動先啦, 真係唔可以再肥落去! 食完飯都係咁做家務啦, 呢啲都係沒完沒了的事, 然後就係兩隻仔好嘈, 真係想打暈佢地算!

2/4/20

2/4/20     THU     COOL

又係work from home 的一天, 都係有啲電話要聽吓咁啦, 瞓到10點幾起身, 見到仲爺個房咁亂我又燥底啦, 迫佢執好哂, 叫到老公起身出去食早餐, 或者係早午餐啦, 食完去買埋餸先回家, 都已經點幾兩點, 快啲捉佢地做功課, 仲爺一要做實體功課就好慢, 唔覺唔覺做咗兩個幾鐘, 真係好攰, 所以之後我都要自由吓! 6點幾又要準備煮飯, 然後都係如常做嗰啲嘢, 而家啲日子真係好悶, 日日都一樣咁, 不過仲爺就成日都多多花款, 對佢嚟講好似最冇影響咁!

1/4/20

1/4/20.    WED.    WARM

今日又要返工啦，不過有嘢做時間真係過得快好多囉，買埋麥記早餐返去食，跟住就開始做嘢，今日主要工作係做相同job cert，午飯時間食飽同咗兩個同事出去行，當然唔會買嘢啦，下午返去快手做好嘢，今日聽足一日收音機，取仔都攰埋！放工返去做咗運動先有得食飯，老公返埋今晚夜，食完飯清潔完就沖涼睇電視啦！