31/7/19

31/7/19.   WED.    RAIN 3號8號風球

今日本來如常咁返咗工， 因為子元踢波取消，所以我自己搞掂出門口，如常返到去食早餐，點知9點幾10點話中午會改發8號風球，咁就開始逐步放工，放到11點幾全部人都可以走啦，本來想等埋啲飯嚟到先走，但等極都未有就唔等啦，未夠12點我都回家，去埋街市迫吓買埋嘢返屋企，買埋燒味飯返去一齊食，老公兩點多要出門返工，我就同仲仲做功課，處理吓佢啲書等等，打吓機好開心咁hea住過，8號風球就係要咁架啦！5點幾開始準備煮飯，7點未夠就有得食，睇完愛回家就同佢地出咗去買奶，回來沖涼休息了！

30/7/19

30/7/19.   TUE.    WARM

今日子元同我都要自己出門口返工同踢波，子元都真係大個仔架啦，又到學放手時候了！買埋早餐返公司，今日基本上真係冇咩做，所以時間真係過得好慢！朝早主要睇吓澳門的資料，但發覺真係冇咩地方好去好食咁，要平得嚟又有特色，真係好難諗啦！午飯後都係打吓機，下午時間過得更慢，打吓機上吓網咁，但上上吓都諗唔到上咩！終於捱到放工， 又係好快返到屋企，嫲嫲煮飯，咁我就捉仲爺入房做數學及英文，得番一個月咋！晚飯後都係清潔啦，仲爺又激到我趕佢出門口！終於K.O.咗佢地，我仲換埋床單添！

29/7/19

29/7/19.   MON.   HOT

今日真係好Blue Monday，勁唔想返工囉！朝早又係趕頭趕命咁催佢地出門口先返到工囉！返去食埋早餐再hea吓咁，都有嘢做吓嘅！好好享受埋呢幾日又開工啦！午飯同咗Joey入去房食，最終連Catherina佢地都入埋嚟食，吹水時間過得特別快，又到下午開工時間，係咁睇去澳門啲嘢，唔係之後就冇時間架啦！放工快腳行去巴士站，都算早返到去，發現老公射咗波，唉。。。都唔緊要啦，仲要係之前扣分扣滿咗要停牌3個月，咁唯有盡量少渣囉，唔係可以點呢！今日好攰，嫲嫲來咗煮飯，平時我都會自己洗番碗，但今日真係唔想，偷吓懶啦！終於KO.咗佢地可以自由吓！

28/7/19

28/7/19.   SUN.    HOT RAIN

今日都是戶外活動，但我而家真係唔多曬得，好易頭痛！8點多起身，老公佢地都係，因為今日要分開行事，佢揍子元去足球比賽，我揍仲仲去跟契爺玩馬！喺屋企快食杯麵就出發，有人車我地入去屯門，但真係估唔到原來係去一個咁偏的馬房，應該係私人開的！去到先要去聽馬房主人講解，不過老人家比較長氣，小朋友都冇咩心機聽！終於等到有得餵馬，不過仲爺好驚，一定要有人陪，咁都係嘅咁近喎！餵完就等影相，先同馬仔影，再影南瓜車，最後係騎馬，我都係負責影相啦，玩到12點多就散啦，去咗附近的酒樓飲茶，不過唔係叫咗好多嘢，老實係有啲唔夠，最後等食完可以走啦，去到荃灣諗住同老公會合，但子元仲未踢完，唯有先送我地返屋企先，沖個涼休息吓，食埋頭痛藥都頭痛呀，6點多老公來接我過番荃灣食晚飯，聽到食CoCo本來都唔like，但呢間有拉麵又幾好食喎，食完返去阿媽到淋埋花就回家，大家都好攰要瞓啦！

27/7/19

27/7/19.   SUN.    HOT

今日瞓到10點先起身，真係好正！煮早餐同仲爺食，老公揍咗子元去比賽嘛，咁食完都係繼續執嘢，不過仲爺喺到搞住哂都唔係執到好多，等老公返來，佢又整吓淘寶來貨，不過攀石未整得住！夠鐘仲爺去學音樂，今次我唔揍啦， 留喺屋企摺好哂啲衫，放好哂佢先，仲要吸塵抺地，終於乾淨哂！仲仲回來後老公又瞓覺，我就執好啲嘢捉佢入房做功課，環境係好啲呀，我都教得舒服啲！叫醒老公，入青衣接埋嫲嫲佢地，出咗又一城食飯，不過間嘢好貴咁呀！食完就去影Snoopy啦，好大隻呢！不過啲精品就好貴呀，得個睇字！去食埋雪糕就返去啦，睇埋toy story個尾尾就沖涼瞓覺，我仲要執明天去睇馬馬啲嘢！

26/7/19

26/7/19.   FRI.    HOT

今日真係Happy Frday，一來真係冇咩做，二來阿姐下午後來出埋去，簡直放監咁！早上老公車我返去又係好趕，塞車真係好煩！返去拍咗卡先買早餐慢慢食，然後都有做吓嘢又吹吓水咁囉，午飯本來諗住快食完去街，但Jackey同Peggy整咗好好味的咖哩同拍青瓜返來，係咁加餸呢，食到唔停口！ 食完都照去街，上咗Uniquo買衫，買咗件Snoopy比自己又買咗條短褲比子元！下午做咗陣嘢就開始自由活動，吹水上網search澳門酒店啲嘢咁好快又放工，老公嚟接我返屋企，我又開始執嘢，點知仲爺喺到戴住耳筒聽住歌嚟唱，唱到超級無敵估歌仔咁， 好好笑！執到咁上吓煮烏東一齊食然後去小童合唱團！回來後砌埋個櫃就可以放番啲衫入去，慢慢回復好個房！

25/7/19

25/7/19.    THU.    HOT

今日雖然老公揍到我返工，但時間都係有啲趕！返到去食早餐吹吓水做吓嘢咁，上午都過得好快，午飯快食完去街街，今日去咗買零食，下午就做嘢囉，真係有嘢做架，時間都過得快！放工快腳趕去巴士站，剛追到車又唔再有位比客上，所以快到6：30未夠就落車，返到去老公整仲爺張床都算整得七七八八，用咗個吊環咁方法吊住張床就冇問題啦，但都仲有啲後期要跟進，所以去接子元放游水就去AEON食Coco，再買埋需要嘅嘢就回程，返嚟佢地就沖好涼喺我房玩，我地就抺啦貼嘢啦等等，整到10點幾終於可以開光放埋床墊上去，放埋仲爺上去瞓覺，抺好嘢叫做完成得九九十十，還要砌埋個衣櫃的櫃筒，明天可以放埋啲衫啦！

24/7/19

24/7/19.   WED.    HOT+

今朝要自己返工，老公要做司機，都冇咩所謂嘅！買埋早餐返去食啦，但只係食咗個包唔多夠飽！由於下午要出去training，所以朝早都要趕吓工，但又要吹吓水，真係好充實！1點閃人，同OSO的幾位女生出去旺角食，試咗間米線唔錯，但話題真係唔多，始終生活唔同冇咩共同話題！training 堅悶，所以都有打吓機打發下時間！撘地鐵買啲餸返去，以為老公完成到，但張床都係未得，櫃都係未得，真係幾灰，成日流流長好想知喺到做咩！可惜今晚都未成功，因為cut短咗張床但又未支撐得實，始終都係未瞓得， 仲爺又要過嚟瞓多晚！

23/7/19

23/7/19.    TUE.    HOT

今朝都係老公車我返工，但都係唔夠早買麥當當。返到去食完早餐就做，點解呢幾個月都係咁忙！不過都有機會吹吓水咁，午飯後都係吹水，阿姨唔喺到，阿la即刻一齊食！下午都忙，又要聽Mandy講番佢放產假時期啲嘢！放工如常撘巴士，點知塞車塞到顛，捱到去鑽石山我頂唔住轉地鐵，返去食得晚餐都8點幾，又要過去淋花，回來我摺衫老公同子元砌櫃，結果今日都係完成唔到，明天要同張床大執，老公話得就得啦！今晚又要同仲爺一張床！

22/7/19

22/7/19.   MON.    HOT

今日心情真係唔多好，都係因為琴晚的事，根本未瞓得夠！今朝不論睇Facebook定收音機都係嗰啲嘢，聽到心都痛埋！做個撘車的市民都會比人打，咩道理！趕頭趕命買埋早餐返公司食，然後就做嘢，真係好多嘢要做咁，今日都未停過！又要做schedule又要寫樽，下午仲要跟番Mandy放產假期間啲工作！放工返去都估到老公未整掂，因為遲咗才送到，好灰！又要出去食嘢，食完返到去都8點幾，仲爺就沖涼玩玩具， 我同子元就砌咗張書枱，但張床都係太大，未想到可以點再好啲！見步行步啦！切到12點幾先沖涼，仲爺就瞓咗我地張床！

21/7/19

21/7/19.   SUN.    HOT

今日老公返早，我就瞓到9點多起身，叫子元煮埋早餐，夠鐘就自己去畫班，我同仲仲喺屋企，差不多時間先去畫室接番佢，交埋錢就去球場， 到仲仲去球場踢波，我地好殘忍咁夠1點就閃了去食嘢，差不多夠鐘先返去睇吓，佢地比賽時有個爸爸同小朋友相撞，真係好慘，臨走執緊嘢時，又有小朋友嘔，真係辛苦哂啲阿sir， 我地就返屋企沖涼休息，等老公放工返來！叫子元做暑期功課佢竟然唔願，因為佢唔想做咗就冇時間玩！5點又要游水，跟住就出去食飯，回來沖完涼咪有得同個細佬玩囉！明天老公開始放大假，佢就好啦可以放足一個星期，我都想呀！

20/7/19

20/7/19.   SAT.    RAIN

今朝子元要去到黃竹坑踢波，老公要佢自己過去，本來我都想揍佢過去，但仲爺又未起身，所以都係算數啦，由得佢自己過去囉，煮好早餐比佢食，就送佢出門口，最終佢都順利過到去，叻仔！我就同仲仲喺屋企，食早餐執吓嘢等等，夠鐘就過去學音樂，等仲爺食埋嘢就去球場同子元老公佢地會合，已經完結頒埋獎，就同佢地影吓相，但因為落大雨要快啲去食嘢地方，食個tea就走啦，因為子元啲鞋唔啱啦，要找地方買，琴日記得喺油塘大本營都幾好行又有運動嘢買，所以決定過去行吓，但去到先被一個食錢樂園放咗血！跟住去埋睇玩具食埋晚飯就走啦！返去佢地要睇toys story呢！

19/7/19

19/7/19.    FRI.    HOT

今日返工都要扮哂射波後咁，好在早上被派了出去做嘢，輕鬆好多！朝早都冇等嫲嫲嚟到就出門，不過都係好趕囉，8:57先返到！返去都係食早餐做啲嘢，十點幾過油塘倉點嘢，都係好差事，點到11點幾就閃，跟同事去行油塘大本營行，又幾多嘢睇喎，去食埋譚仔就返公司了，返去都係吹水啦，下午基本上都半收工，但之後都發現有嘢未做，要快啲做埋！放工直接返屋企，6:45已經返到，返去接更，嫲嫲睇埋電視就揍仲仲出去合唱團，我就做埋清潔再煮飯，等佢地上哂嚟已經9點幾十點，食吓吹吓今日又有埋Gloria，吹到12點才散，所以好夜先瞓。

18/7/19

18/7/19.   THU.    HOT

今日請咗病假，仲仲最後一日返幼稚園啦，隻豬仔梗係緊要啦！返去影完一輪相先返入學校，然後就喺門口吹水等入去睇早會操同表演，仲爺跳舞成日都慢半拍，唱歌又細聲，唔怪得成日比人放側邊啦，不過睇住佢傻吓傻吓咁都好正！點都係一個好回憶！10點多要走啦，佢地繼續生日會，老公回來接我們出咗去深水涉食豬潤麵做早餐，再喺玩具街買咗貼紙陣間放學派，啲同學仔實在係買左太多禮物，係咁二都回一回禮！買完返去等開門接仔派禮物影相，同老師say goodbye， 影夠相就返屋企啦，沖個涼就開始執屋，因為要預備下星期仲仲個房重新編排呢！3點幾落去食tea，順手攞埋射波紙，返上樓後繼續執，子元去咗游水時，仲爺就試埋啲衫，唔啱的要送比人，我實書包等都已經掉埋，向前看嘛為小一做準備！7點落去接埋子元就入青衣找嫲嫲，一齊去荃灣買床墊比仲仲張新床呢，然後去埋打邊爐，返得屋企都差不多11點，沖完涼仲要收拾埋衣櫃個位放番好啲嘢先，等新衣櫃就可以放番入去，好期待！

17/7/19

17/7/19.    WED.    HOT

今日仲爺唔洗返咁早，所以老公放工返來先，我就自己返工，買埋早餐返去食，然後都係做吓嘢打吓機啦，難得悠閒嘛！午飯快食完就過E-max做偵探，因為仲爺今日睇戲飲茶，喺正E-max喎仲唔係為我而設，咁我就做吓傻婆去偷睇佢地，當然都有偷影啦，但又比班小朋友發現咗，龍校長最終出來捉咗我，講咗兩句又比我睇吓仲仲，咁我都做完直播，要返公司啦！下午咪做吓嘢吹吓水囉，但時間過得好慢，放工老公嚟接我，去到九龍仔仲爺仲瞓緊，咁就我喺車睇住佢啦，瞓到子元踢完先醒，同啲隊友們食埋晚飯就回家了！

16/7/19

16/7/19.   TUE.    HOT

今日都係返工hea啦，阿姐不在的日子真係好正！仲爺還要返學， 仲係最後一日著康傑的西服，梗係要影下出post啦！買埋早餐返工，食完吹咗一大輪水先捨得做嘢，結果都係喺電話繼續吹！除咗基本嘢係咩都冇做！午飯喺位食完就齊齊出街買嘢，幾開心呀！下午好努力咁整仲爺啲工作紙呀等等，希望佢真係有用啦！今晚公司movie night，去奧海城睇spider man，跟胡經理車，去到佢地先去OC1買嘢，然後就過food court食嘢，準時入場！真係好好睇呀，我地呢啲Marvel fans梗係明哂佢每個舉動代表咩，佢地只等咗一個彩蛋，第二個又唔等，好在見到柱仔Tommy仔佢地喺到，知道有第二個彩蛋，邊等邊同佢地吹電影，好快就等到啦！本來諗住同柱仔一齊撘車，點知老公嚟咗接我，咁就唔洗行啦！車咗我地返去佢就返工，我就搞掂兩隻沖涼瞓覺！

15/7/19

15/7/19.    MON.    HOT

今日又要返工啦，不過冇咩壓力咁幾輕鬆！朝早老公放工就返來揍仔返學，我就買早餐返工啦， 本來見早咗諗住去麥記買吓，但佢話要等10分鍾喎，唔試啦遲到點算！返去都係要開工，朝早都未停過手架，放飯今日同番阿姨佢地食囉，今日又冇咩喎！下午做埋啲相又係放鬆的時候，因為大人物都過哂去開監督會，3點幾後我完全做自己嘢，過番謝師宴啲相啦，又預備練習的書單啦，放工返屋企老公煮晚餐，食完洗碗抺地沖涼，老公夠鐘就返工啦，我咪摺衫囉， 還有要download番仲爺早幾個月前拍的打木箱鼓片，終於在think big天地播啦！

14/7/19

14/7/19.   SUN.    HOT

今日好熱呀，但就係出咗好多室外！朝早8點幾9點已經起咗身，諗住今日去買埋仲爺房的床，書枱同衣櫃，食埋早餐11點前就過到mega Box， 所以人好少，可以快手睇完落埋單，試埋個D24雪糕先走！之後分頭行事啦，買埋子元條泳褲就走人，去球場仲爺踢波，我就上阿媽到處理啲盆栽先去球場找佢地，快啲返屋企沖個涼，執咗子元個書枱，差不多6點幾才出去食晚飯，去咗行新世紀，睇吓買結嗰。9點幾回家啦， 老公要返工，快啲沖涼瞓覺！

13/7/19

13/7/19.    SAT.    HOT

今晚係仲爺謝師宴，都係一個大日子呢，不過朝早都係如常，瞓到9點幾要起身，因為笨元要去畫班，食埋早餐我先去荔天幫佢攞書，對清楚就得啦，等老公回來接埋我就返屋企，去咗惠康入吓貨先，返去執得嘢嚟又差不多要出去接子元放畫班，然後直接過海怡到仲爺學音樂，我地就去咗鴨利州食午飯，夠鐘接仲仲就返屋企又轉裝，因為要出發去謝師宴！子元就自己去游水，游完返去沖去涼有Barry保姆睇住！我地就安心去謝師宴，5點多過到去先要綵排，其實都冇咩要綵，我地都算係咁，有班好勁又好人的媽媽做咗好多前期，我呢啲龜縮的才可以享受到咁好的成果！綵排完頒獎唱歌等環節，就周圍影吓相，等老師都齊人了就進場開始，估唔到學校都準備咗特別環節比我地，係叫班小朋友唱歌，估唔到係呢個環節令到我有啲眼濕濕，但都忍住咗架！等龍校長講完嘢，就係下午班表演，我地就食咗先，因為之後到我地啦嘛，食味就點都係麻麻架啦，好過冇啦！等到了下午班環節，仲爺只係負責頒獎，因為叫佢講嘢就死梗！影埋相可以返位又再食吓嘢， 等到唱歌時間，家長都要出埋去啦，幫手一齊唱，仲爺都算係可以，之前都冇咩比佢聽過，都跟到吓！唱完歌仲有估BB相啦，蔣老師好勁估中哂咁滯！基本上要表演的都做好，佢地班細路周圍走，仲爺都濕哂！玩到9點9老公要返工啦唔可以車我地返去，因為仲爺係勁唔捨得走！10點多真係要捉佢啦，撘得地鐵返去都10點幾，還要接回子元呢，沖完涼我要休息了，聲都沙埋呀！

12/7/19

12/7/19.    FRI.    HOT

話咁快又到星期五啦，可以happy Friday ，朝早都係揍仲仲入去青衣比嫲嫲啦，然後就返工啊。朝早都係好忙碌咁做嘢啦，午飯時間冇同阿姨一齊食，同Ivy走咗去另一間房同Catherine佢哋食，吹住水笑住咁樣食飯先至開心㗎嘛。下午都係做吓嘢啦，淨係整相都有排我整，不過都好嘅時間易過啲。放工直接返屋企，因為老公已經揍咗仲仲去合唱團，又抽左子元去球場，我就返屋企自己煮啲嘢食， 8:00出去小童睇仲仲合唱團表演，佢又真係唱得幾投入記得而家喎，子元踢完波就自己搭地鐵返嚟，然後返屋企沖涼煮麵比佢食，睇埋白色強人大結局。

11/7/19

11/7/19.   THU.    WARM

今日都係如常咁返工返學！朝早揍仲仲入青衣，然後返工囉，今日都好似冇咩停手嘅，不過都可以吹吓水！午飯後出返去吹水，好過喺房坐！下午都係做相啦，做到咁上吓又係時候放工，老公嚟接我，返美孚接子元佢放游水，入青衣食嫲嫲雲吞，真係冇得比，冇一到好食過佢！食完返屋企沖涼休息，睇番子元今日的成績表，都滿意架啦咁當然可以再好啲啦，不過全年計有頭30名內其實已經唔錯！

10/7/19

10/7/19.    WED.    HOT

今日又要返工啦，真係要啲時間回吓魂先得！朝早揍咗仲仲去比嫲嫲就返工啦，買埋早餐返去都係做吓做未停過手咁啦，近呢幾個月真係忙咗好多，都唔明點解愈來愈多嘢做！同埋都要吹吓水咁啦，近日公司都多事非，真係好煩！午飯食完就去咗同Catherine吹水啦，下午邊做吓邊傾吓咁，話咁快又放工，老公嚟接我去球場，但因為喺球場hea真係唔想，所以帶埋仲爺去樂富商場行，行行吓老公話今日阿sir講錯地點，應該去九龍仔踢，所以喺樂富行完就同仲爺行過去，都係攞條車KEY上車等好啲，實在太熱了！晚飯去長沙灣食雲吞，係好食但味精多，都係冇得同嫲嫲嗰啲比！返屋企快手沖涼K.O.佢地休息了！

9/7/19

9/7/19.   TUE.    VERY HOT

為咗仲仲的畢業禮，今日請咗一日假，其實下午才是，但朝早實在係唔想返，所以請足一日可以hea吓！朝早如常叫仔起身返學，先揍子元再入青衣食個早餐，才到仲仲集合！佢要9點才上車過BU會堂，佢同同學仔未上車前玩得好興奮呢！完成任務就返屋企hea啦，真係咩都冇做架，等老公回來，佢車梓朗去醫院呢！入青衣接咗嫲嫲才去接子元放學，然後直接去BU嗰頭食晏，點幾已經過到會堂門口，但又未有得入，正校啲老師話2：05先入得嘛，咁咪等囉，但等到夠鐘佢又唔放我地入，最終要老公入去爆佢先得，果然係學校一向作風，亂！入到去坐下咗就等啦，又影吓相咁！老實講我睇完全個畢業禮真係覺得冇子元嗰年咁精彩，表演環節太少，講嘢的太多，基本係得領證書和表演環節我才見到仲仲，加上佢又成日喺後面，我係咩都睇唔到咁！影咗唔算太多相但都可以呢！5點多散啦，接咗仲仲想找地點影多啲相都唔得，因為BU個Hall出面係車路根本唔適合影相，所以都係求奇影咗啲就走啦，我自己都冇同仲爺影過呢！返屋企執好嘢沖吓身，實在係太熱了！近近地晚飯去長沙灣試咗間越南嘢，食埋松記就返屋企啦，快啲沖涼瞓覺，明天都係要返學架！

8/7/19

8/7/19.   MON.    HOT

今日都係返工返學啦，朝早子元自己返啦，我就揍仲仲入青衣！然後買早餐返工，返到去都係做嘢，放咗日假其實都好多嘢要做番，係咁架啦出得嚟行遇咗要還！轉個眼已經放飯，入房食飯打機，但其實都幾唔想，冇法啦開始有離心，唔係好想同姑姐佢地食，因為開始多咗唔妥，睇吓之後點啦！下午都係做囉，又係做到放工先停架！快手快腳彈閘返屋企都係等開飯，子元就游完水返嚟，食完飯都係清潔沖涼休息啦，仲爺明天畢業禮啦，唔知我會唔會好感動呢！

7/7/19

7/7/19.   SUN.    VERY HOT

今日瞓到10點幾先起身，但因為發好多夢，所以都係瞓得喎好！起身梳洗揍仲仲去踢波，還有食個午飯，其實熱住咁喺球場都幾辛苦架，但都要陪吓佢架嘛， 踢完換好衫就找地方去，諗住去荃灣的南豐紗廠睇吓，原來活化完係似商場嗰隻，但都有打卡位，再買吓嘢食嘢飲咁，打完卡就返屋企啦，老公話好攰要休息，我都好攰了，返去休息吓都好，但老公瞓到咁上吓又嘔又疴咁，好在嘔完都冇咩，等佢兩兄弟砌完LEGO，近近地去咗譚仔食完就返去沖涼睇電視！

6/7/19

6/7/19.   SAT.    HOT

今日又係好忙碌好勞動的一天！老公返早，我就8點要起身，搞掂兩隻出得門口都已經8點幾，唯有邊行邊食包，因為仲仲要去荔天分班試呢！去到安頓好佢，都冇講聲bye bye 就閃咗有啲衰，不過小寶都要學習長大架啦，上咗禮堂要聽嘢啦，子元就要攞番佢喺課室份功課，要打番份作文交比老師呢！不過都要等，因為陳副校話佢可以幫手搞！入去聽talk，其實內容都知道哂架啦，咪又係嗰啲嘢，11點左右有break，但我都要落去見專注力小組個社工啦，但上手仲見緊我就先去咗買書，唔洗到時同人迫！最後見完都係唔夠細心，個腦太快個口跟唔到等問題，其實都係嗰啲嘢！搞掂返上去接番仲爺先，再等子元攞埋份作文，咁就走得啦！直接過海怡，食咗食意大利嘢，再揍仲仲上去學音樂，回程喺巴士瞓得唔夠呢！返到美孚又要轉裝，仲爺就踢波因為要去傑智試腳，子元就游水！睇完仲仲試腳就返去接子元再出咗旺角食晚飯，daddy球隊的聯賽單位有得食呢，可惜抽唔到獎呢！回來沖涼洗衫等等，還要接番3機衫要摺呢！

5/7/19

5/7/19.    FRI.    HOT

今日請咗日假，因為要去支持我個笨元的水運會！6點半就起身因為7：45就要去到泳池集合，老公車咗我地過去先揍仲仲返學，都係剛剛好買埋當當快食！佢入咗去準備我就搵番啲腳先，喺看台找個靚位坐，就開始睇寶寶們！子元參加咗25同50米自由式，我目標係完成，估唔到佢超額完成，竟然攞到冠軍喎，真係估佢唔到但我係真心開心，終於有啲成績！仆過去睇佢領獎又影埋相，但都影得唔靚， 好在有邦 sir喺到幫手影到靚相呢！返回看台繼續睇，50米賽事好睇好多！子元的50米自由雖然小組第3，但因為佢嗰組都唔快，所以都係冇名次，但游到42秒幾都算唔錯啦！老公見完工返去攞車來接我地，我都早啲接子元去門口等，但要12：30先行得，老公剛好來到，快手飛過去灣仔，戲劇節面試，但過到去先話選中你的話，上堂唔缺得席，香港的小朋友邊有可能做到，所以見咗先算啦，24個位百幾二百人見！見完就返九龍才吃飯，去咗油麻地食，食完去咗果欄買水果，真係平一半呢！買完揍子元去畫班後就上阿媽到幫佢洗埋啲碗，跟住就入青衣接番仲仲，返屋企沖個涼，再接番子元買埋餸返去，老公要小睡，佢兩個就玩到一地玩具！仲仲8點又要小童合唱團，今日真係好忙！晚飯當然都係程家上來食啦，不過今晚食豬扒腸蛋出前一丁啫！差不多11點佢地先走，快手沖涼打暈佢地又要執明天啲嘢！

4/7/19

4/7/19.   THU.    RAIN

返埋今日又自制3日假期，所以要努力做好啲嘢！朝早要自己揍仔返學，不過都幾開心架喎！然後就買早餐返工啦，食完就好好開工啦，其實都真係幾忙吓，係咁做係咁做，午飯都係同佢地入房食囉，但其實都只係打機咁，幾悶架！正午繼續忙啦，又有啲唔順氣事發生啦，都知我地月頭忙架啦，竟然叫切生果，我都提出咗就咁放櫃面等啲人攞囉，又係唔聽，我話要4點半先入去幫手，咁佢唔等得咪算囉，我梗係要做好job cert先啦！Joyce都覺得啱，姑姐係咪想玩嘢，最終係佢玩到自己咋！放工又係即閃，老公嚟接我去球場等埋子元踢完波，就去食KFC，回家沖涼後先搞掂仲仲功課，還有子元要執好明天的行裝呢！

3/7/19

3/7/19.    WED.    RAIN

今日好多時都落大雨，但我都係室內，算係咁啦！早上如常揍仔返學，跟住就買早餐返工！今日都係忙架啦， 不過忙都好時間過得快啲！午飯前有拜神儀式，就跟住去，只求小人唔好埋身！午飯後咪打機囉，但其實有比較過，同佢地食係幾悶架！下午又係未停過手，差不多放工前叫做好啲啦，做得七七八八，準時6點閃人，返到去接更老公出街，佢約咗人食飯！我就煮定晚餐等子元游完水返嚟，今晚食淨餘物資，其實都可以好好味！之後都係清潔沖涼休息！

2/7/19

2/7/19.   TUE.    HOT

今日啲時間過得好快，因為有嘢做嘛！朝早叫仔起身返學啦，返公司食早餐開工，一朝早就比條PK激親，其實佢知唔知自己返工做咩嘅呢！話咁快又放lunch，今日cross dept lunch，局住同另一組開飯，好在都有joey媽媽一齊，食完返去下午全力做job cert，轉個眼就放工啦，今日放6點呀，大家都早咗去廁所呢！老公嚟接我，返阿媽到攞埋嘢，佢明天飛加拿大嘛，回家煮飯等子元踢完波回來食飯，所以9點幾先嚟洗碗清潔，還有好多嘢執，喺子元床下底又大轉換一大輪，還要幫仲仲對埋啲書邊啲要買，睇埋啲校服等等，12點先嚟沖涼呢！

1/7/19

1/7/19.   SUN.    VERY HOT

今日又10點多先起身，梳洗後都冇煮早餐，因為老公又瞓緊，咁我又好想執咗仲爺個櫃頂，所以都係係咁做，等老公起身後先出去，直接食個早午餐，然後要找地方去啦，子元黃昏時又要踢波，咁就去球場附近，行咗荷李活廣場，又行到兩個鐘喎！不過佢兩個行街真係好煩，睇住佢地又睇唔到嘢，唔睇住又成日搞事， 真係好煩！差不多夠鐘，老公帶佢地去球場我就喺樂富的商場涼冷氣，不過其實都冇咩行，又要唔比自己買嘢，都幾辛苦！不過都去咗759買咗少少嘢啦，已經好忍手！去球場等佢地，終於踢完一齊去咗食晚飯，佢地吹到8點幾先散場呢，快啲返去沖涼瞓覺啦，明天又要返工返學！