29/9/16

29/9/16   THU   HOT

今日要去開會, 琴晚襯好衫今朝唔洗煩! 揍咗佢地返學就返公司先啦, 點都浦吓頭先GE! 做吓嘢咁11點幾先出發過商會, 食完飯慢慢行返去, 捉吓精靈咁, 今日唔係好多嘢做, 因為票之前已經開咗啦! 等齊人開會, 老細又快手開完喎, 都好! 咁我可以早D放工, 今日好想再去按腳, 但去過嗰間冇位, 咪唯有試另一間, 都唔係唔好GE, 但我可能唔係咁受得力, 都係有D痛! 按完就要快手去接笨元啦, 買少少嘢返去煮意粉, 因為老公今晚踢波, 喺迴旋處接埋仲仲才上樓, 叫佢兩兄弟沖涼先, 我就煮意粉啦, 都要時間架嘛, 仲爺又成日搞搞震, 都煩架! 最終7點幾8點食得啦, 仲爺食得一半又開始玩嘢要餵, 佢都唔係鐘意食嘢GE人! 洗碗抺地後比佢地玩陣就捉仲仲瞓啦, 我就要對功課, 再沖涼溫書, 叫做10點幾完成, 老公買咗糖水回來, 比咗少少子元食啦, 點知食完又咳, 麻鬼煩! 我趕得切10點半邊摺衫邊睇埋芉月就瞓得啦!

28/9/16

28/9/16   WED   HOT

每朝仲仲都好早起身, 但又會嘈住我地, 可以點樣解決呢! 揍咗子元上校車就返上樓準備到仲仲啦! 返到公司食少少早餐, 都唔係太多公事做, 於是就繼續睇酒店等等, 琴晚睇到嗰間真係好正, 好想快D做決定, 了咗件心事! 午飯後去咗買甜品, 大家見到電視廣告賣麥記的芝士tat, 咁就開公數當TEA買嚟試啦! 下午sales要開吓會, 大老闆娘又返咗, 點都要做吓嘢先GE! 完成咗就繼續睇酒店, 見到hotels.com有得平之餘仲要酒店到付, 最重要係免費取消, 咁最終決定唔等晴晴, 我地訂咗先, 佢可以自己再訂, 真係去唔到咪取消囉! 咁定埋酒店我又再可以諗清楚行程啦! 放工去接笨元, 飲埋湯先走, 返到去煮飯食埋洗碗抺地都8點幾, 照落去打陣波跑吓步, 不過返上嚟沖好涼再要睇功課溫默書, 都搞到10點幾, 阻住我睇laughing sir呢! 邊睇邊做埋D家務啦, 又食咗宵夜, 真係跑幾多都死!

27/9/16

27/9/16   TUE   HOT

今朝都係咁返學啦, 但出咗門口子元先發現冇帶小息食物, 又攞唔切, 唯有問炮哥借$5返學校買! 揍埋仲仲返學, 就買早餐返工啦! 今日老細唔返, 所以做好公事都開始hea, 都係睇酒店行程咁啦! 午飯後都係打吓機咁啦, 下午又係做自己嘢, 另外的同事都各自plan緊旅行, 但大家都煩煩地GE, 我都不例外啦, 不過個個都睇旅行嘢好搞笑囉! 放工老公嚟接我, 因為婆婆請咗假, 所以老公又要請半日揍仔! 佢好搞笑囉, 以為放3點, 3:15就落咗樓接, 但個仔係放3:30架, 真係比佢笑死! 入到嫲嫲到食飯啦, 仲爺梗係唔合作架, 我唔理佢啦! 食完點幾走, 返到去我換對鞋就帶子元落樓跑步, 佢話今日體育堂老師選咗佢接力喎, 我心諗你嗰班冇人肯郁咋嘛…選你! 咁就更加要捉佢去跑啦, 但佢D基本功真係好差, 連氣都唔夠, 來回3轉我都未到頂, 佢已經死死吓! 跟住教佢後蹬, 做到一pat屎咁, 但我都真係太耐冇做…做完條partpat根都抽呀, 唉…年紀大啦! 返上樓先沖好涼再睇功課, 溫吓默書都10點啦, 快手趕埋佢去瞓, 我又要摺衫等等, 老公就幫手睇吓高雄酒店嗰D囉, 終於找到一間又平又靚! 不過點都要等埋晴晴, 下星期應該可以定案!

26/9/16

26/9/16   MON   HOT**

又到星期一要返工返學啦, 今朝都趕趕地呀, 揍哂佢地返學老公就車我返公司, 因為佢要出旺角買嘢, 咁我今朝都趕忙有嘢做, 又要幫總監整文件, 佢又話要一早返嚟攞, 之後又要過衛生署攞嘢, 總之一朝都係忙啦! 回來都差不多午飯, 食飽就返咗位找吓資料, 下午老細返咗, 好在我都有嘢扮吓忙, 咁都可以做吓樣, 放工就閃人返去接子元, 佢做好哂功課, 又溫咗書, 咁返去咪比佢自由吓, 食完飯就落樓打波, 不過球場9點閂燈, 所以只係打咗一陣, 咁咪去後街跑吓步囉, 子元D步姿真係好核突, 跑嗰10分鐘都冇氣冇力! 返上樓沖涼瞓覺, 不過子元仲要對功課, 其實係有D我都唔肯定啱唔啱, 所以要對咁耐囉, 10點多先沖涼, 好在趕到睇laughing sir! 睇電視睇到12點幾先瞓!

25/9/16

25/9/16   SUN   HOT

今朝就好似Uber咁, 其實都係去畫班啫, 但首先又要揍咗子慧, 然後就要去接埋程家, 跟住就同D細去食早餐, 上咗畫室又要過小童接番程太, 再趕過北海道食早餐, 因為Gloria攞咗位, 食完又趕番去長沙灣接畫班! 然後就返屋企先, 子元要做好視藝啦, 跟住要溫中默啦, 老公就瞓住咁嚟揍仔, 鬼叫佢琴晚睇波睇得夜呀, 但都要睇住個仔我先溫到書架! 點知仲仲叫我幫佢整玩具時, 佢攞咗我隻戒指唔知收咗去邊! 老公比我咁叫一叫醒咗啦, 問仲爺收咗去邊…梗係答你唔到架, 老公仲話我嚇一嚇到佢想問都問唔到喎, 頂! 最終咩櫃都揾哂, 都冇!! 已經打定輸數, 好傷心緊! 呢個時候老公就喺其中一個玩具箱找到了, 洗唔洗收得咁密呀仲爺! 終於relax番! 落去食午飯, 然後子元返去換衫踢波, 本來仲仲應該瞓覺, 但佢條友又唔肯瞓, 搞到我都冇得休息! 到6點多又到程生做Uber, 先車咗敏瑩嚟泳池, 我帶佢入去游水, 然後就入青衣要接番子元放足球, 阿sir好長氣, 6:30都未講完, 但我地都要早走啦, 因為要返去沖個涼再接番敏瑩放游水! 直返西九等佢地沖好涼就去晚飯, 老公7:45踢完, 趕得切出嚟一齊晚飯, 去咗食札幌拉麵, 都幾好食, 但仲爺唔好老脾搞到我好攰, 所以老公一嚟到就叫佢同仲仲坐, 我已經冇電! 食完回家啦, 沖好涼小朋友們唔該瞓覺, 我真係要休息, 悠閒吓睇電視就最舒服!

24/9/16

24/9/16   SAT   HOT

今日長周, 老細又返, 又話話嚟攞嘢, 所以都想早D返, 咁問老公係咪車我返去, 佢話係但我趕架喎佢又唔趕咁, 唉…激死我! 都叫做9點左右返到去, 點知老細又唔返咁早喎, 真PK! 之前講到一落機就返咁, 頂! 總之佢返來簽好嘢我就唔洗煩啦, 放工就閃了, 老公過來接我, 去附近食完同埋買番隻錶, 終於找到係防水之餘又唔貴的! 跟住就車我返去啦, 佢要同子元踢波, 我就同仲仲返去瞓, 不過喺車佢已經瞓咗, 咁我就忙忙碌碌咁做嘢啦, 到4點幾仲仲醒咗, 都肯自己玩GE, 老公回來後先要子元溫咗書先可以出街, 都係出去食飯咋, 本來諗住去奧海城, 但冇車位, 咁就出咗朗豪坊, 係想幫子元買過對涼鞋啫, 但竟然冇咩童裝囉! 朗豪坊都幾多嘢食, 我地一上就上咗頂樓, 見到有間skybar好似OK就試吓, 都幾有氣氛架喎, 啱飲嘢囉, 食物亦好好! 食完去睇吓間所謂lego專門店就閃了, 仲以為好大間, 原來都係流流地! 返到去都係沖涼瞓覺囉!