31/3/26

 31/3/26     TUE     COOL

今日冇出街啦, 但老公同仲爺就出咗去一日, 又去踢波再去wembley睇日本對英格蘭, 我同阿哥就一日喺屋企, 除咗睇電視我都有做嘢架, 一來今日要倒垃圾啦, 咁就處理埋個單車的紙箱, 叫阿哥cut細佢我就掉, 又要再倉庫番樓上啲位, 然後已經點幾, 但又唔係好肚餓, 所以煮得個粥食都3點幾, 之後都係hea, 跟住又走去清潔咗廁所個天花板! 7點幾簡單煮咗烏冬撈番琴日的咖哩就係, 之後就沖涼休息!

30/3/26

 30/3/26     MON     COLD

今日老公繼續要返工, 但臨天光都係咁發夢, 所以都係好早醒咗! hea到9點幾10點先起身啦, 煮早餐食埋就同佢地出去剪頭髮, 出得去都11點幾, 好在冇人排緊, 所以等一陣都有得剪, 今次兩個都剪得唔錯喎, 咁剪完就去行吓街啦, 結果我喺primark買咗睡衣同床單, 然後就去食午餐, 一路都想試嗰間韓國嘢, 原來有堂食, 咁都幾好食喎, 我又食到我想食的飯卷! 食完就返屋企啦, 仲爺話打機咁難得子元又肯一齊打over cook就梗係玩啦, 基本上係玩開飯, 即係玩咗4個幾鐘, 但真係完全唔覺, 勁好玩! 咁食完飯就沖涼休息囉!

29/3/26

 29/3/26     SUN     COLD

今日轉番夏令啦, 所以少咗一個鐘, 醒嗰時已經8點, hea到10點多先起身, 都係叫老公去煮早餐, 我就晾埋啲衫, 食完早餐差不多就要出去買餸啦, 今日超市真係勁少人囉, 慢慢買完返去, 老公就整碗仔翅食, 食完佢睇劇, 咁我就上房睇吓其他嘢, 咁又一日啦! 6點幾開枱繼續打邊爐, 一爐食兩日, 勁! 洗埋碗排隊沖涼啦!

28/3/26

 28/3/26     SAT     COLD*

今日好忙咁, 朝早仲爺跑完步返嚟, 食埋早餐, 因為兩場比賽都取消咗, 咁就可以去買嘢, 今次勁呀去咗3個場, 先係中超, 買嘢打邊爐, 跟住去ikea本來主力買定個電磁爐, 但又點會只係買一樣, 結果佢兩個又買咗條足球場毛巾, 最係貴囉! 之後就去埋Costco啦, 又係勁多人, 所以分頭行事, 仲爺等食物, 我地入去買嘢, 如果唔係都唔知要搞幾耐, 咁樣去咗三個場, 返得屋企都4點幾, 食埋熱狗又要準備打邊爐, 好忙呀, 但個肥腸湯底勁正, 反正未食得哂, 明天繼續!

27/3/26

 27/3/26     FRI     COLD

終於end term啦, 所以今日都係返去hea, 照常咁撘巴士返去啦, 我個學生冇返, 咁我就堅係喺大房hea, 都係幾個鐘啫, 都好快過, 大姐今日last day啦, 但其實我冇咩感覺, 平時都好少見架啦, 另外今日有雪糕車, 個個都有免費雪糕食, 梗係要打吓卡! 等校長吹水時間後, 要等啲老師走哂, 我地啲supporting staff先可以走, 叫咗個同事車咗我去broadway, 係想幫仲爺攞眼鏡, 但佢搵咗好耐話因為冇貨未送到嚟, 頂...都唔知夠唔夠用! 咁同佢地會合咗就去榮業食嘢行個圈先返屋企, 我就做家務, 佢地就去教波踢波, 做完家務沖埋涼等食麥記!

26/3/26

 26/3/26     THU     COLD

今日凍咗好多呀, 唔係春天啦咩, 點解突然又咁凍! 我就照常返工啦, 冇咩特別, 而且今日都幾輕鬆吓, 因為跟盲妹, 咁頭兩堂又係代課, 所以都係咗大房, 搵啲相關video佢聽吓, 我又可以開其他嘢嚟睇, 搵咗啲電磁爐, 可想而知幾hea! 第三堂繼續喺大房, 第四堂因為PE, 咁就個同事頂我更我再替佢個飯更, 都係唔難做, 最後食埋飯, 留lunch club睇吓小說咁, 上埋尾堂又放工啦! 返到嚟食咗藥食咗嘢, 睇吓電視咁, 今日食完藥又係好眼瞓喎, 都好, 唔係今晚又瞓得唔好! 晚飯後係沖涼休息啦, 返埋明天又放假啦!

25/3/26

 25/3/26     WED     COLD

今日天氣真係變幻莫測, 又雨又太陽又落雹咩都有! 朝早要返番9點, 不過我都係早咗10分鐘出門口啫! 今日係咩鬼induction day, 基本上頭3堂都係坐, 真係悶到呢! 到食完飯第4堂, 嗰個老師都係hea, 所以都係睇戲, 咁我就坐埋一邊睇機, 到差不多落堂前, 突然間落雹喎, 係勁大嗰隻加埋啲風打橫吹, 真係好顛! 到落堂前都差不多完啦, 之後仲出勁太陽, 真係好難做! 夠鐘我就走人, 某程度上係借啲二早啲架, 返到去都係食完嘢就食藥然後瞓咗, 瞓到7點多就煮晚飯, 食完洗埋就食糖水再沖涼休息!

24/3/26

 24/3/26     TUE     COLD

今日好似又凍番啲咁, 返到去都係咁開工啦, 今日跟另一個盲的, 所以都唔係好chur, 仲有啲hea添, 所以又乘機打吓機咁啦, 我都唔想架但真係勁悶囉! 仲有就係見咗副校, 明天要返番9點, 是但啦都好難再話遲架啦, 不過真係遲佢地又唔會嘈又唔會要補鐘, 都係為做樣而做樣啫! 放飯放夠45分鐘, 最尾嗰堂去埋history坐吓, 未夠3點都走人啦! 返到去倒埋垃圾食咗嘢再食咗藥, 都係比佢地傳染咗啲感冒架啦, 到仲爺出咗去踢波時, 我就瞓咗喺梳化啦, 到7點多點都要煮飯, 食完仲自己整埋西瓜涼粉食先沖涼!

23/3/26

 23/3/26     MON     COOL

今日又要開工啦, 返埋又放復活節啦! 估唔到今日跟嗰個雖然係普通, 但都要行架嘛, 但就係唔洗點跟實, 都可以輕鬆啲, 加上佢啲課堂又係hea, 堅係無聊! 係喺英文堂二姐嗰堂, 阿媽又打嚟, 子元學校又打嚟, 因為佢舒服早走咗又冇同學校講, 人地打嚟尋人啦, 真係比佢激死! 放工放飯自我放飛吓先, 唔洗趕! 返到屋企都係食吓嘢咁啦, 跟住就係睇電視同打機咁, 又係超勁hea! 仲爺今日又唔洗踢波, 我同老公一人煮一半啦, 食完就沖涼休息啦, 有啲攰!

22/3/26

 22/3/26     SUN     WARM

今日本身係可以完全留喺屋企的, 但諗起點都要同仲訂隱形眼鏡, 所以都係要出去, 不過仲仲又要去比賽, 咁就不如先我出去broadway就算, 買好嘢我就自己返嚟, 反正而家都熟點撘巴士啦, 自己慢慢買, 買完都要坐一坐先可以再行, 訂埋con就撘巴士返嚟, 睇吓電視咁, 先要整咗雞胸, 跟住就要煮涼粉, 所以都未整嘢食, 老公返嚟佢先一次過整咗麵咋, 之後就要睇波啦, 阿仙奴都係輸比曼城攞唔到盃, 可惜! 煮飯食埋就沖涼先, 老公整埋西米露咁就有西瓜西米涼粉食啦!

21/3/26

 21/3/26     SAT     WARM

今日仲爺係減肥日咁, 練跑...踢兩場比賽, 再personal training, 所以係佢自己頂唔住就去瞓覺, 真係好難得! 而我除咗出去買餸之外, 就喺屋企睇電視, 仲有換咗床單洗衫等等, 因為開咗倚天嚟睇, 到食完飯諗住沖涼架啦, 嗰兩個又話想繼續睇圍攻光明頂, 結果睇到12點幾, 真係估佢地唔到!

20/3/26

 20/3/26     FRI     WARM

今日包頭嗰啲過年, 學校冇咗大半人, 勁寧靜囉! 我都估到今日跟Maki架啦, 而且基本上啲堂都唔洗上, 唔係冇學生就冇老師, 所以都係喺大房過咁滯, 其實都幾無聊! 不過無聊咪好囉, 即係輕輕鬆又放工, 今日仲要老公嚟接我唔洗行, 返到去就食埋嘢先, 然後佢地出哂去踢波教波時我就做埋清潔, 咁星期六日就唔洗做啦, 然後就係沖涼同摺衫, 再等外賣M記返嚟食, 咁又一日啦!

19/3/26

 19/3/26     THU     WARM

今日又係朝早凍凍地, 但中午之後又好熱喎, 所以都唔知點著衫咁! 朝早算係啱啱好趕得切返到工, 跟住就係照開工啦, 不過今日要跟個新學生, 咁都做咗咁多年, 都叫做睇得到點搞架啦, 同埋佢都唔係好願去課室, 所以對我嚟講喺好事, 佢最終只係最尾嗰堂去咗課室, 咁我又早咗放學架嘛, 所以今日都係算舒服, 同埋又有機會喺二姐面前表現吓咁啦, 香港人係咁架啦, 都係鍾意要表現! 返到嚟都係要勞氣, 仲爺又係放縱式, 食嘢食勁耐, 食得嚟已經又要去踢波, 但都仲係要趕喎, 因為應該要準備時佢又喺到hea, 搞到我都情緒唔好, 對住佢真係好攰, 可能我都真係要放手由得佢撞吓皮算, 佢實在係太冇呢個心, 咩都老奉咁! 要比啲顏色佢睇! 

18/3/26

 18/3/26     WED     WARM

今日繼續照常返工, 有得返9點半啦, 大致上都係咁上吓出門口, 朝早反而唔人多, 但放學時要放3點, 其實都唔係好夠時間避人潮, 所以都冇咩著數! 咁返到去都係咁做嘢啦, 又係跟嗰件, 其實係頭兩堂要做吓樣, 第三堂基本上得我喺到, 只要大姐二姐唔喺office, 基本上我係唔理佢地, 我樂得自在! 食埋飯做埋飯更, 本身跟另一個, 但大房太忙, 所以都係留喺到幫手, 夠鐘就放工! 返到嚟都係食啲嘢, 仲爺學音樂, 我繼續休息吓, 仲要摺埋衫等等, 煮埋飯食睇吓波咁, 又係沖涼瞓覺啦!

17/3/26

 17/3/26     TUE     COOL

今日都係咁返工啦, 返9點半可以唔洗咁早出門口嘛, 暫時朝早巴士都順, 希望之後都係, 我仲要捱一輪巴士呀! 咁今日又係困喺大房, 都好的唔洗行咁多, 我仲有時間book咗GP, 因為book GP真係好艱辛! 做埋飯更先有得食飯, 再同副校見傾嚟緊幾日時間點轉, 冇得再返咁晏啦, 要9:15返, 3:00走, 好過冇啦! 不過今日繼續可以早走, 返到去仲要倒埋垃圾, 仲爺又係慢吞吞食嘢, 我地仲整埋牛角包佢先出去練波, 我就做吓復健操咁啦! 差不多時間就煮飯, 食完就沖涼, 老公繼續睇波等等!

16/3/26

 16/3/26     MON     COLD

今日終於要自己返放工, 預早咗好多, 仲爺未出門口我就出, 50分鐘就返到, 係咪都算好快呢, 計埋我慢慢行喎! 所以明天可以的話都係遲番啲出門口, 唔好蝕! 咁返到去都要開工啦, 主力都係Maki, 要教佢其實好攰, 我都仲掌握緊點教盲人, 真係要啲力! 同埋今日都好似因為行多咗, 對腳有啲攰, 都要睇吓點樣可以改善吓! 仲爺放學返到嚟先食嘢又食好耐咁, 啲嘢又成日未執, 真係頂佢唔順, 跟住踢完波返嚟食飯啦又叫唔到佢做啲咩咁, 唔溫書點會記得住啲嘢呀!

15/3/26

 15/3/26     SUN     COLD

今日淨係仲爺要去踢波, 所以我同子元都係喺屋企, 冇咩好做, 食咗早餐佢地就出去, 咁我都係做埋洗衫摺衫等就冇咩做, 繼續睇埋電視啦, 最終今日睇哂天機試練場, 最終睇埋邊個贏! 午餐都係差不過佢地踢完波返嚟先食, 求奇食埋琴日啲雞同煮粉, 繼續hea! 佢地嚟又要睇波, 但之後我都趕咗細佬入房做功課! 晚飯食牛扒, 因為老公見costco做特價, 不過都好食的! 最後要預備埋明天的雞胸沙律, 咁就沖涼休息啦!

14/3/26

 14/3/26     SAT     WARM

星期六平時就冇咩做, 今日約咗人嘛, 所以朝早仲爺跑完步返嚟就沖完涼, 食埋嘢就等佢地嚟, 約咗仲爺康傑的同學, 會同佢有聯絡都係因為佢都係姜糖, 琴日睇完show佢地就留咗一晚, 今日就約見一陣啦, 難得南下嘛佢地! 吹吓水飲吓奶茶, 到點幾佢地都差不多要走架啦, 因為佢地仲plan咗去westfield, 我地都要去買餸啦! 唔知做咩今日勁塞車囉, 車程仲耐過買餸時間! 跟住老公就要揍仲仲去比賽, 咁我就要預備晚餐雞煲啲料, 起骨都起到腳軟, 企得太耐又腳痛! 食埋飯都係沖涼咁啦!

13/3/26

 13/3/26     FRI     COLD

今日突然又凍番, 搞到我都好似吹親咁! 諗住今日返到去都係跟maki, 點知照樣跟IK, 因為佢都係唔可以去課室又早放架嘛, 啱哂我啦, 一齊困喺大房! 所以都係咁照常開工, 替吓飯更咁, 到兩點幾就準時放工, 不過今日唔好彩, 兩次都走咗架車又要等一餐, 所以都三點幾先返得去到! 一路都冇咩嘢, 講到我話陣間做埋清潔先, 唔想明天nikie佢地嚟仲dirty, 老公先醒起佢又同仲爺報咗明天比賽, 根本就係佢唔記得要, 最終總係要嘈, 好地地講聲話咁明天唔踢咪得囉, 攞嚟搞! 搞到我又唔高興啦! 

12/3/26

 12/3/26     THU     WIND

今日繼續有老公車我返工, 不過下星期真係要睇吓點, 若果可以繼續返9點半都OK! 今日返到去安排咗我跟Maki, 咁都好因為一定唔會要行好多路同埋唔會迫人, 不過課堂上就都唔係好輕鬆, 都係要講解都攰架, 但可以慢慢食吓飯等等又可以早放工係開心的, 返到嚟都未夠3點半! 又可以繼續hea吓, 仲爺去踢波, 子元就返嚟, 跟住都係煮飯啦, 但今日真係唔係好洗煮, 因為食埋琴日的粟米肉粒飯, 所以只係要整熱佢同埋煮個菜就得! 然後又掛住睇電視, 9點幾先沖涼呢, HOY電視有新音樂目好睇呢!

11/3/26

 11/3/26     WED     WARM

第二日再次開工啦, 今日可以9點半先返到去, 所以更加唔洗趕, 非常好! 車咗我返去老公就再車埋子元去球場, 今日有比賽喎! 咁我返到去都係要開工啦, 頭兩堂要跟個學生, 不過都係好易的學生, 所以都算輕鬆, 小息之後第三堂就替咗一個飯更, 然後先到我放飯, 食完返去都係再睇lunch club, 基本上啲學生上第5堂我就等收工, 因為今日又要幫仲爺買埋PE褲, 然後我又要攞藥, 所以都係3點幾先返到去, 又開始hea, 由於今晚食粟米肉粒飯, 所以主力都係老公煮! 今日都真係覺得有啲攰呀, 好有嗰種做完嘢的攰! 

10/3/26

 10/3/26     TUE     COOL

今日終於返工啦, 奴性重嘛唔返咁耐真係有啲唔慣, 好在今個星期老公可以車我返工, 咁朝早就唔洗等巴士, 返到去先搵咗副校, 傾掂咗暫時都係留喺大房等大姐明天返工先再決定今個星期詳情點安排, 又安排咗我今個星期可以遲半個鐘返, 放工又可以早九個字走, 避咗啲人朝, 呢樣我就真係冇諗過會被考慮埋, 咁都好, 唔洗同人迫同塞車, 好重要呀! 咁今日就主力留喺大房, 扮吓工同埋同啲同事見番吓面啦, 有人講嘢吹水真係好, 悶咗太耐啦我! 今日又有教育局啲人嚟睇場, 搞到我地都要扮工呀, 好在嗰時客仔啫! 到點幾鐘先食飯, 兩點幾就可以返去啦, 好事, 真係唔塞車! 返到嚟都真係有啲攰, 係要休息吓, 仲爺去咗踢波我又要煮飯咁啦, 食完飯仲有糖水食, 椰沖西米露, 好好味!

9/3/26

 9/3/26     MON     COOL

今日同老公一齊病假囉, 佢琴日剪親手指嘛, 都係去睇一睇醫生好啲, 本來佢打去GP, 點知GP都係叫佢去UTC, 咁就直接去醫院啦, 叫佢唔好渣車啦, 撘巴士仲方便, 咁近! 又唔洗泊車嘛! 結果真係好快就返嚟, 打咗破傷風針, 重新包紮過傷口, 又真係包得靚仔好多! 咁返嚟之後就係咁睇電視囉, 兩個都冇咩好做, 睇咗套電影, 但都真係比較深, 所以睇完都要啲力先明白! 跟住就開咗綜藝嚟睇, 之前見個韓綜係講術數, 咁就睇咗四五集啦, 午餐就各自整想食的, 然後繼續hea, 兩隻豬陸續放學返嚟, 仲爺就要去踢波, 我就要煮飯! 明天開始返番工啦, 加油!

8/3/26

 8/3/26     SUN     COOL

今日主要去costco同IKEA買嘢, 所以食完早餐就出去, 仲爺一聽到去IKEA又話要一齊去, 咁就去啦, 不過行兩個場對我嚟講隻腳都攰, 我地都非常目標為本咁去買, 係仲爺見到有個床邊儲物袋想買, 就買埋啦! 買齊嘢就回家啦, 仲要買埋午餐, 老公話不如去買飯團, 咁又要去埋acton啦! 返屋企又要分貨擺嘢食嘢咁都好忙碌咁, 老公諗住整埋架車啲地墊, 點知cut嗰時界損手指, 都好深, 都返唔到工, 冇咗隻左手去做嘢點做呢, 跟住今晚煮飯我又冇得偷懶要做哂啦! 呢個病假放埋明天就試吓返工啦, 有啲唔知點咁添!

7/3/26

 7/3/26     SAT     COOL

今日有出吓去啦, 都係去買餸囉, 可以去邊呢! 不過朝早一次過郁動咗太多次, 結果隻腳今日都唔多順咁! 朝早仲爺去咗練跑, 咁我都9點起身食咗早餐就做埋啲家務清潔, 等佢地返嚟食埋早餐仲爺沖埋涼, 再要出去練波, 就襯嗰個時間去埋買餸, 跟住就返屋企啦, 佢地又睇波, 我又要蒸埋啲雞胸, 老公又要整午餐又要整新菜色, 好忙咁! 晚飯好好味有燒牛肉同龍蝦湯意粉, 食完就睇陣波再沖涼!

6/3/26

 6/3/26     FRI     COOL RAIN

日日都好太陽, 我今日有機會出去, 佢就落雨, 可惡! 朝早都係喺屋企hea, 同埋收到副校電話, 星期二可以返工, 會商討番工作上點安排, 都好, 我都真係想慢慢復工, 再呆喺屋企真係唔掂! 中午太餓啦, 食咗啲嘢等老公返到嚟, 去埋broadway入埋票, 先再去食拉麵, 再買埋飯團返嚟比仲仲食! 子元就約咗friend出去玩, 再直接去教波, 咁唔洗理佢啦! 跟住就到仲爺再出去踢波啦, 我就hea到咁上吓沖咗涼先, 再等外賣囉, 又開始食番麥記, 食完仲要食埋個榴槤, 好味!

5/3/26

 5/3/26     THU     COOL

今日繼續在家hea, 今日好似真係冇咩做嘢, 有洗咗幾件外褸咁啦, 天氣好似冇咁凍, 可以收番啲厚褸, 然後做吓復健咁啦, 到細佬返嚟, 又要睇電視, 咁我冇得睇就唯有返房用電腦, 都好做吓正經嘢, 到佢去咗踢波, 我就繼續睇劇, 7點多要煮飯啦, 不過今日都係簡單餸, 食完都早啲沖涼啦!

4/3/26

 4/3/26     TUE    SUNNY

天氣好好但我都冇咩機會曬太陽, 真係會唔夠維他命D! 照樣都係只能在家hea睇視做復健運動, 係無聊架但可以點呢, 不過今日都做咗啲好有用的事, 終於除咗passport之外已經scan好哂其他文件, 進度唔錯! 下午佢地陸續返嚟, 都係如常咁做嘢, 仲爺學完音樂又踢波, 所以8點幾先返到嚟食飯, 都有啲夜!

3/3/26

 3/3/26     TUE     COOL

今日繼續困在家, 冇咩目標, 所以搞掂仲爺出門口, 就開始開新劇睇, 起碼有新劇, 跟住到咁上吓餓就煮午餐, 然後倒埋垃圾, 就做樣無謂得嚟又有啲意義的事, 就係用lego砌啲實用用得的東西, 砌到細佬返嚟仲砌緊, 佢又喺到玩埋一份, 又係樣樣嘢都拖其實都幾令人困擾! 因為老公返嚟就馬上要出去練波啦嘛都係慢吞吞! 6點幾就開始煮飯, 知道老公冇食tea實肚餓, 所以快啲煮好返嚟就食得, 煮都要一個鐘, 但食就10分鐘, 真係太快! 食埋湯圓跟住都好早就沖涼休息啦!

2/3/26

 2/3/26     MON     COOL

今朝一心一朝早就有車收, 點知等到8點幾都未見有聲氣, 老公就先去還咗車先, 慳得少少得少少, 跟住返到嚟話收到資訊要2點先交到車, 頂...咁我地咪出唔到去買嘢囉, 可惡! 因為我3點又要網上評估我傷勢, 睇吓學校比唔比我復工, 跟住仲爺5點幾又要去踢波, 所以冇得出去啦, 咁就全日喺屋企囉, 同老公一齊睇埋九重紫大結局, 咁都真係幾好睇的! 佢地返嚟之後都係各自喺房架啦, 晚飯今晚有啲心機就煮好啲啦, 其實都係雞翼只係分開又油鹽水同煎, 食完洗埋碗都沖涼休息啦!

1/3/26

 1/3/26     SUN     COOL

今日齊齊冇出過門口, 本來係諗住去costco, 但老公都係決定明天請假收車, 咁就不如明天先去買, 結果今日除咗食就係hea, 仲有就係睇波, 不過我冇咩睇, 仲爺又要激我, 我又要發火, 又比人話番轉頭, 咁咪返房自己做吓自己嘢, 總之就係唔理佢地, 仲爺成日都係叫親佢做咩都係拖, 佢啲拖延症真係要正視, 唔係會好影響佢! 晚上食咗牛肉蘑菇飯, 真係好好食!