19/5/26 TUE WIND
今日一心諗住去GP處理埋個問題, 點知等咗大半個鐘見到個醫生啦, 到檢查後先話佢地都擺唔到, 佢唯有寫轉介信等我星期五去醫院時可以檢查時做埋佢, 因為佢地冇足夠條件做! 唉! 咁我即係要繼續食藥, 所以去藥房攞咗藥先返去, 叫做好彩老公今日請咗假可以車出車入, 唔係我又要行餐死! 返到屋企即刻同AI商量星期五點做, 希望如佢所講到時可以約到埋手術期, 快啲了結咗佢, 仲有放埋個IUS, 咁就唔洗再食口服藥, 可以捱到排期! 跟住都係等食午餐, 老公都係叫外賣, 咁我就照食啦, 食完同佢一齊睇咗套劇, 係幾好笑的, 睇得嚟佢兩兄弟都返哂屋企, 仲要捉仲爺溫書, 自我感覺良好就算, 叫做有做過嘢, 佢都係考得唔好都冇辦法! 8點多開飯, 都係睇波咁啦, 跟住沖涼休息!
15/5/26 FRI COLD
今日都仲係凍, 都唔知係我個人凍定真係凍! 朝早返到去都係唔多想郁, 好在三隻小天使有speech and language section , 咁基本上頭兩堂我都唔係好洗上, 好事! 叫做係咁二上咗20分鐘英文, 又係時候放break啦, 我身體唔係好合作, 所以除咗唔好郁咁多留吓力, 我都冇咩可以做, 失血過多呢樣嘢真係冇咩可以做! 我真係幾經辛苦先捱到放飯時間, 好在咁啱今日食熱嘢, 食完抖吓又好似好咗啲, 不過最尾兩堂都係好攰, 真係靠意志力去支撐住架咋! 返到屋企再食完嘢, 慢慢恢復吓, 等佢地出咗去踢波仲可以做到清潔, 不過之後都係攰架啦, 最後食埋麥當勞就沖涼休息啦!
14/5/26 THU COLD
今日要跟盲妹, 其實都攰架, 不過只要留喺課室, 其實都可以用番我自己個節奏嚟做, 但有時喺大房反而仲煩, 因為有其他人喺到指指點點其實仲煩! 另外就係今日有花生食, 兩條顛妹又打架, 我見佢兩個喺到就梗係閃得就閃, 有咁遠企到咁遠, 有咩都唔關我事啦, 仲企喺遠處同個香港人學生一齊花生! 另外今日都好攰, PE堂又要行圈喎頂, 雖然我已經行得好咗, 但行大半個鐘對我嚟講其實都攰架! 所以之後可以放飯我梗係即刻放啦! 我要休息啦! 跟盲妹好就好在可以早啲閃, 以今日比較攰的狀態係好事, 返到去都係要食嘢, 跟住晾衫摺衫, 然後我要休息打機啦, 今日冇幫仲爺溫書, 真係冇力, 佢又話要做功課! 食完飯睇多陣電視就沖涼休息啦!
13/5/26 WED COLD RAIN
今日天氣真係好得人驚, 天晴落雨落雹無限loop, 真係好痴線, 本來我都以為自己避得過, 但去到放學嗰時都係避唔到! 講番今日先, 個人都係好攰, 好在係跟長留喺大房嗰個, 所以都可以hea, 佢又遲返喎, 所以已經係輕鬆咗! 本來諗住第三堂可以得我地喺房hea, 點知又有其他人喺到喎, 不過其實都唔理得咁多, 佢做好工作紙我都由得佢瞓, 因為我都唔係好想開工! 終於send 咗佢走我就開飯, 第五堂又比人改咗, 上上落落完一大輪, 被安排去二姐嗰堂, 但我真係想去, 同埋都得番半個鐘, 所以我逃走咗去sixth form後面坐, 咁啱有個學生行咗出嚟, 於是就同佢吹咗半個鐘水, 同學生溝通都係我地工作之一嘛! 終於走得, 諗住捱得過可以趕得切返屋企, 點知都係避唔到落雹, 好在啱啱去得切橋底避, 不過之後都係有雨, 返到屋企先出太陽! 返到嚟唔知點解好攰, 食咗嘢先叫做好啲, 今日都有捉仲爺溫書, 不過都好勞氣, 成日駁咀! 老公今日又要負責煮飯, 食埋涼粉就沖涼休息!
10/5/26 SUN COOL
今日主要都係要去買餸, 雖然今日係母親節, 但其實我冇咩話要慶祝, 不過老公琴日問我我就話想去試吓間日式pancake店, 都係喺broadway啫! 所以朝早等仲爺去踢完波回來先可以出發! 不過要講番今朝發咗個惡夢, 真係幾恐怖吓, 係喺一間屋但入面好亂好亂, 我叫極都叫唔出聲又叫唔到佢地執咁, 最終叫得出聲係因為真係喺現實中大叫咗, 又嚇醒咗老公! 講番下午啦, 買埋餸返嚟就一齊出去broadway, 先去食咗雞先再去試間pancake店, 我都係覺得原味好食啲! 食完去天天買埋嘢就回程, 返到嚟又要預備今個星期的午餐雞肉同菜, 差不多又要煮飯, 所以都唔係抖咗好耐! 仲有要洗衫摺衫呢! 咁又一日啦!
8/5/26 FRI COOL
今日都係咁返工啦, 第一堂個學生好遲先返, 其實佢又唔想學嘢, 我又唔想教佢, 所以hea係最好, 不過又唔可以太明顯啦, 其實冇人睇到, 我絕對唔介意比佢用電腦呢! 最唔好係第三堂飯桶無端端走咗嚟大房, 明明可以hea但就變咗要開工囉! 終於捱到放飯, 可以慢慢食, 基本上再返去都唔諗住再搵嘢做, 喺大房hea到夠鐘就收工! 返嚟食完嘢, 仲爺去咗踢波, 我就開始做家務, 收衫清潔同晾衫, 跟住就可以休息, 子元今日last day中學生啦, 下星期一開始考AL啦! 佢地踢完波買嘢返嚟食, 仲爺明明得到MVP禮物, 點知攞到個朱古力奶色返嚟就跌咗喺門口, 唉....佢幾時先長大! 食完嘢等佢沖完涼我都仲涼啦!
7/5/26 THU COLD
今日大致上都係咁開工啦, 學生唔難搞, 可以打機時就打吓機, 唔可以時就上吓堂啦, 準時放飯, 可以hea就hea吓, 放工返到去, 見芷悠媽叫我打比佢, 講申請student finance啲嘢, 其實都幾頭痛, 唯有盡力做, 咁我又盡力做諗住叫子元申請埋入境證明, 點知又好複雜, 咁我一頭煙老公又返嚟, 我唔想佢問我嘢所以一句stop咗佢, 叫佢唔好同我講嘢住, 但最終點都係搞唔到住, 咁我再問番老公係咪去投票, 佢就勁衰語氣啦, 咁就互撞發火啦, 佢又話要揍仲爺去練跑, 咁我梗火啦, 因為琴日講好咗話我等埋佢返嚟先一齊去, 但佢又話我咁, 佢出咗門口開始我就勁emo, 又開始係咁掟嘢, 但我都收哂衫晾哂衫先換衫出去, 先係自己去咗投票, 跟住冇馬上返屋企, 因為覺得好委屈, 唔想返去! 最終先去咗教堂坐, 跟住就去咗Lidi, 係買咗啲嘢, 叫做鬆咗少少, 但返到去煮飯時都仲係黑口黑面架, 因為真係唔好心情! 諗起都想繼續黑面!
5/5/26 TUE COOL
今日又要開工啦, 本來以為跟顛妹會好攰, 好在佢今日係水飯房, 所以某程度上我係輕鬆! 早咗出門口又出咗返到去, 有啲蝕添, 明天都係慢慢嚟! 由於今日要做AL的oral exam, 但負責人又好似咩都唔知咁, 搞到我要係咁自己上網揾, 好在有AI啫! 另外顛妹放break時要去HOY到, 但個老師又好似咩都唔知咁, 我真係好嬲囉, 啲高層可唔可以有啲系統, 唔好難為我地啲細! 終於完成埋個exam就可以收工啦! 今日都算完成咗好多嘢, 連醫院嗰邊個appointment都完成埋, 佢話可以照做喎, 咁就跟佢指示啦, 希望一切順利, 放工返嚟食嘢時連隻腳個物理治療都book埋啦, 咁就安心睇電視打機, 夠鐘就煮飯食飯, 老公就要睇阿仙奴, 贏咗入到決賽!
1/5/26 FRI WARM
今日好攰, 三隻小天使真係令人好攰, 電話去到放飯都仲有70幾%電就知我根本冇咩機會攞部機出嚟, 所以收到有醫院信都冇時間check, 結果返得屋企咩都已經問唔到, 因為全部都收哂工, 所以靠chat最多係email同喺系統登記咗要改appointment日子! 希望下星期佢地開工就搞得掂啦! 講番喺學校, 除咗攰就係攰, 好似咁多個鐘都不停有人同你講嘢, 我都想唔應但又冇得唔應! 所以放得工我真係急不及待走人, 仲要去埋藥房呢! 返嚟終於搞掂啲嘢我仲要做家務, 清潔摺衫晾衫, 之後我已經攰到唔想郁, 最終老公佢地同仲爺練完波買麥記返嚟, 食完我仲係唔多好心情, 係沖完涼之後好啲啦但都係攰架啦!
29/4/26 WED WIND
今日勁大風囉, 有時行路都行唔到, 好在冇雨仲好好天! 今日全日也在介備狀態, 因為要等GP同health care center的電話, 朝早health care center打咗嚟話佢地唔會做, 因為我個case係medical, 所以佢地做唔到, 咁唯有等GP啦, 所以成朝都好唔專心, 但都要繼續做嘢架嘛, 結果等到1點食緊飯時就打嚟, 都算係順利安排, 不過仲要等到20日先有得做, 咁佢就再開藥比我食到嗰時, 明明係同一個醫生, 點解嗰日睇我嗰時能度衰咁多, 今日喺電話又好好喎, 唔理啦, 總之搞掂咗第一步, 先, 最好都係cut鬼咗佢一了百了! 最尾嗰堂就冇開工啦, 返咗大房吹水扮開工, 夠鐘就收工, 返到去都係要食嘢先啦, 又會睇吓電視, 仲有捉仲爺睇吓究竟幾時考咩科, 要溫吓書啦! 睇電視睇到7點幾先煮飯, 所以食得嚟沖涼都11點幾!
28/4/26 TUE COOL
今日朝早本身都冇咩, 都係咁要返工啦, 不過突然又凍咗好多咁, 好在著夠衫啫! 朝早都係忙碌呀, 跟另一個盲妹, 佢第一堂要出去學過馬路, 有council的人嚟教, 變咗我又要跟住行, 實在係令我對腳負擔增加, 好在之後兩堂都係坐, 跟住就放飯啦, 食完飯我工, 因為GP又話要驗血驗尿health check嘛, 點知去到先話根本冇book到驗嗰啲, 淨係得health check, 我心諗有鬼用咩, 仲有連星期五打過嚟話明天會打嚟傾, 都喺system到睇唔到, 咁叫我點信你, 最終health check 個醫生再幫我book多一次, 不過安全起見我都係自己再打埋去health care center, 靠GP我都死鬼咗! 總之都係明天等消息啦! 咁就開始做吓家務hea吓咁啦, 仲爺要去跑步, 咁我就要煮飯啦!
27/4/26 MON WARM
今日要開工啦, 仲以為自己夠哂力, 但原來踩完單車返去再行就已經覺得好攰! 仲要同阿姐解釋吓我個狀況, 再簽埋張假紙咁, 跟住就要開工啦, 好在今日都係跟盲妹, 除咗有PE堂要找人頂外, 其他時間都OK, 不過因為攰所以都係hea吓就算, 夠鐘就放工, 返到屋企子元就第一時間話我知佢收到個email好似批咗, 估唔到課金真係快咁多, 叫佢再double check一次個status, 真係搞掂哂, 好開心呀! 咁佢就accept埋大學個offer同埋申請埋student finance, 所以都好忙, 搞掂又要煮飯, 所以我今日真係冇咩休息過咁! 食完飯洗埋碗沖涼就休息啦!
25/4/26 SAT WARM
今日重要環節就係填表申請ILR, 不過朝早仲爺要比賽, 所以我都係慢慢先起身, 煮早餐食完, 仲諗緊幾時開始, 因為都想老公返咗嚟先, 不過先check咗我地幾個UKVI的資料, 先發現仲爺個passport未update, 但佢個login又係用老公架喎, 咁都係要等佢返嚟先update埋佢, 跟住就開始申請馬拉松, 第一個填老公嗰個, 一定會喺用最長時間, 我又係開住個youtube嚟睇住填, 要慢慢填之餘有啲嘢又怕填錯, 所以唔覺唔覺都填咗兩個鐘, 終於完成! 最搞笑係scan passport時原來電話有case套住係唔得, 好在最終都成功搞掂! 跟住到我啦, 都順利! 到子元時, 因為舊login同新login crash咗, 第一次scan完passport時返唔到去張form, 最終再搞多次用番新login先掂, 嚇死! 到細佬時又好唔同的form, 都填到好緊張! 最終6點幾真係搞掂哂有哂號碼, 我可以休息啦, 攰到好似跑完真馬拉松咁! 所以攤咗喺床到睇機whatsapps吹水, 等老公煮好晚餐就可以食嘢睇電視, 洗埋碗就沖涼休息啦!
23/4/26 THU WARM
今日子元真係足18歲啦, 星期六慶祝咗, 所以今日都係正常過! 我就繼續休息, 反正都係要去照嘢, 請假算啦, 話得入院又咁快返工係唔似樣, 記住唔好奴性咁強! 朝早就睇咗套新鮮出爐影后電影, 跟住唔覺意睇個apps話檢查時間係11點半, 但封信明明話係1點, 不過反正都冇咩做, 就早啲過去又有得照喎, 所以可能係11點半, 呢到啲人真係好難明! 跟住照完嗰個醫生話叫我返去A&E個reception問下一步係點, 但原來個reception都唔知, 不過佢都幫我問, 問完都係話等收信! 返到屋企先食咗嘢先, 跟住再問埋GP都係等, 頂! 咁等一個星期先啦, 再睇吓佢地點安排! 之後就開始hea吓啦, 預算明天都唔返工架啦, 仲爺要去跑步, 咁我就要煮飯啦, so far今日暫時都可以, 希望啲藥暫時起到作用, 等我可以趕得切做手術!
22/4/26 WED WARM
喺醫院瞓到5點幾醒都算係咁架啦, 我都要梳洗吓自己, 琴晚冇沖涼瞓已經係底線, 所以今朝點要洗面刷牙! 然後都係睇吓機打吓機, 又未有得食嘢, 因為話要scan嘛, 點知到9點幾有兩個醫生的物體嚟同我講話冇得照住要再安排, 亦都可以放我出院, 呢個印度醫生就有少少耐性同我講啦, 大佬呀醫學名詞轉哂英文版點咁易明! 最終我係可以食番早餐, 然後等出齊藥, 老公嚟接我就走得, 我仲可以食埋午餐! 呢到三餐係有餐牌, main course, 飲品甜品, 真係幾特別! 出咗院返去先沖涼, 仲有食藥啦, 但食完藥都仲係出血, 其實有啲驚, 明明喺醫院冇事, 可能係因為吊住啲藥直接啲, 但食藥就要啲時間, 同埋食完藥勁攰, 所以喺咁瞓, 瞓到老公話開飯, 然後都係要洗碗, 跟住再食藥, 希望今晚可以瞓番覺好!
21/4/26 TUE COOL
今日上半部都冇咩, 但之後就精彩! 先講早上, 都係咁返工學啦, 老公去咗見工所以請咗假, 咁返到去都係咁開工, 但開始愈來愈唔對路, 因為開始係失血, 可以去到廁所我都盡量去, 不過失血過多我已經開始冇力, 但都頂到放工, 叫個同事幫手, 我早少少走慢慢去攞車, 仲要踩單車返去, 我都覺得自己勁, 好在老公喺到, 咁就車我去醫院, 咁情況去醫院安全啲, 反正琴日GP都幫唔到我! 咁去到就等啦, 我個case我覺得已經算快, 唔洗一個鐘已經見到醫生, 開始要抽血種豆, 唔痛就呃人, 仲要喺個脈門位, 跟住就開始漫長的等待, 由差不多5點, 我坐喺嗰到坐到差不多12點先上到病房, 話預算明天scan, 咁就住一晚啦, 喺急症已經有嘢食, 係三文治嗰啲, 不過我吊住鹽水其實又唔太餓, 最終叫老公攞嘢嚟時順手買個魚柳包, 仲爺當然跟埋嚟睇吓佢阿媽, 上到房見到其實都幾近似香港私家醫院, 咁安頓好都要瞓啦, 睇手機睇到點幾都瞓得著!
20/4/26 MON COOL
今日原來都有啲凍, 真係估唔到啲天氣! 返去見到要跟嗰個都唔係+, 已經係好事, 本來中途以為可以返大房做電腦嘢, 點知最終都係冇, 咁繼續囉, 反正我點半就要走, 要去睇GP, 都有啲激氣, 首先去到個機又down咗, 唔可以自己register, 諗住喺reception嗰到問啦, 但又冇人喎, 最終係打咗電話去同佢講等佢個hotline幫我Register, 然後等咗好耐, 差不多3點先有得睇, 但我明明係book咗2:20架喎, 其實都幾過份, 仲要個醫生又勁衰, 我好心唔講...比我同chat傾好咗我個症狀比佢睇, 但佢係勁重印度口音囉, 我聽唔明都好正常呀, 佢竟然串我係咪唔識英文, 激死! 最終佢係幫我book咗blook test, health check等等, 但轉介真係唔知幾時, 佢話會4-6星期囉最少, 我係咁chur佢, 佢勁嫌棄我, 只係想趕我走咁囉, 同埋佢叫我食藥, 我問多兩句佢又cut 我咁, 真係幾難受, 下次去睇一定要避開呢條印度婆! 幾經辛苦約埋blood test就可以走, 但都差不多3點9, 痴線! 返到嚟就食咗嘢先, 餓啦! 然後都係hea吓打吓機咁啦, 仲爺去咗踢波, 到咁上吓就煮飯啦, 然後都係食飯洗碗沖涼囉, 冇咩特別!
18/4/26 SAT WARM
今日朝早唔忙碌, 因為仲爺去咗比賽, 咁我就喺屋企睇舊嘢, 又睇番造星囉! 等佢地返到嚟就準備出去, 先要去broadway買蛋糕, 子元下星期四正日生日, 所以提早今日慶祝, 試咗個新蛋糕店, 主要都係食千層蛋糕, 子元唔想買一整個, 所以就各自買件裝可以拼埋, 其實都幾好! 佢地一人買咗兩件, 我就主力買咗榴槤味, 好期待! 跟住就去食午餐, 然後去買埋生日汽球等等! 先揍咗佢地返屋企, 我地就再去買餸, 仲要買牛扒, 今晚食牛扒, 不過老公又係好似我咁未習慣個爐先以整得熟得滯! 洗埋碗就今日重頭戲 -- 送生日禮物! 老公買咗部電腦比子元, 咁佢大學都要用架啦, 所以就買咗比佢, 之前我地收埋咗喺樓上, 襯佢喺房就set up 哂啲蛋糕抬埋部機call 佢出嚟, 仲要拍住佢見到禮物個樣, 條友呆咗, 佢真係好開心呀, 咁佢開心大家都開心, 一家人嘛! 然後齊齊影相食蛋糕啦!
16/4/26 THU COOL
今日同琴日一樣都係返去做嗰啲嘢, 都有少少upgrade咗的感覺, 但有個同事真係超煩, 係咁阻住我, 但又喺到講啲無謂嘢, 我都已經勁冷對待架啦, 佢都好似唔明咁, 同埋佢係嗰啲盡可能咩都唔好做, 然後有嘢要做就慢慢做, 有咁少做咁少嗰隻, 老實我係勁討厭佢呢啲人, 真係唔想同佢有交流囉! 另外今日做埋aprisal, 得到唔錯的評語, 都係二姐好, 佢都好識得管理部門, 係好事! 咁今日都有啲忙啦, 仲要去埋EAL嗰到商議埋下星期oral exam啲嘢, 因為係新人負責, 佢都頭痕架啦, 不過我都幫唔到佢好多! 最後準時收工, 踩車返到嚟抖陣食嘢就休息吓啦, 都有捉仲爺做吓數, 但佢就係唔肯睇英文書! 但兩條友突然又話換床單喎, 做佢地唔到! 晚上無聊開咗造星二嚟睇, 間中就想睇番吓啲綜藝嘢!
13/4/26 MON WARM
今日終於要開工, 今日係坐巴士好啲, 明天先試單車啦, 應該冇問題的! 返到去都有少少遲咗, 因為巴士行行吓又要停等時間, 可惡! 估唔到今日training嚟真, 之前都未試過train足咁耐, 所以今日咁都有啲攰, 不過可以準時收工就算啦! 但撘巴士返嚟仲耐, 等極都未有車, 差不多4點先返到嚟, 馬上整嘢食, 餓啦! 然後就係hea啦, 仲爺又要去練波啦, 咁我到7點幾就煮飯啦, 不過仲未掌握好個新爐的火力, 所以個無水雞有啲失手, 好似今朝雞蛋咁, 因為好快就水滾所以3分鐘係唔夠, 明天要再試試加長少少如何! 食完飯食埋西瓜涼粉就沖涼休息啦!
12/4/26 SUN WARM
今日最後一日假期啦, 明天又要返工啦, 所以要把握時間去玩, 因為老公要幫大包買jellycat個袋喎, 咁咪出去囉, 朝早仲爺要比賽就比埋先啦, 我都慢慢hea吓先所以佢地返嚟我仲先煮緊早餐, 咁仲要洗埋衫, 蒸埋雞肉先出得門口! 渣到去broadway搵咗好耐先有位泊, 仲要有少少遠, 跟住撘tube去到先去買咗嘢先, 跟住就去食嘢, 仲爺搵到間coco, 咁連香港冇得食, 就喺呢到食吓啦! 食完去埋買蕨餅, 仲試埋焙茶, 好味! 跟住我又想去行吓無印, 但原來都冇咩好買! 所以最終都回程, 返到嚟抖咗都要煮飯, 因為子元唔知我地冇買嘢返嚟比佢食! 食完飯一齊食埋個蕨餅就沖涼休息啦, 明天撘多日巴士先啦, 扮吓嘢睇吓可唔可以早多一星期放工先!
7/4/26 TUE WARM
今日係忙忙碌碌的一日, 算係好多嘢做呀! 朝早老公就要揍仲爺去足球訓練營, 我同子元就快手煮早餐倒垃圾洗衫做好哂, 因為Holly10點話嚟, 佢地就睇吓電視打吓機咁, 我11點多都出門口去剪頭髮, 不過等唔到巴士, 見老公又差不多返到, 咁我就叫佢去巴士站接我, 車我去髮型屋, 日式髮型屋真係唔同啲呀, 呢幾年都未試過可以洗剪吹呢, 所以65鎊喺抵架啦, 跟住就去咗食taka, 食當日特假餐就算, 最後去埋ealing broadway, 本來想買染髮但又冇紫色, 所以都係冇買到! 咁就返屋企啦, 雖然子元班friend喺到, 咁我就上房囉, 都係睇吓youtube打吓機咁, 5點幾6點就出門, 去咗食間新嘢, 打邊爐加韓燒咁, 不過我地而家食得唔多可能都蝕架, 但整體嚟講呢間都好食的, 主要都係好玩囉, 咁食物又算有水準, 算唔錯架啦, 仲有埋甜品食, 下次可以帶埋黑熊同lulu嚟食就回番本啦! 食到好飽呀! 返到去得番我地二人世界呀, 子元同小施子去holly屋企瞓呢, 仲爺又去咗宿營呢!
2/4/26 THU COOL
今日主要活動係出central london, 因為約咗舅父仔佢地飲茶, 基本上係10點幾出咗門口, 因為先去麥記食咗早餐, 跟住我要去攞藥, 然後仲爺要去攞con, 喺ealing broadway泊好車, 再撘tube出去, 咁其實都算快, 總之準時去到酒樓, 坐吓傾吓吹吓水, 其實都食咗幾耐, 期間仲爺仲打比阿媽, 等佢睇到我地一齊飲茶呢! 最尾已經比埋錢, 但係個經理都問我地食唔食糖水, free咗楊枝金露比我地食埋先, 最後我地一齊去咗一間日式麵包店買麵包先分道揚鑣, 佢地仲比咗利是我地, 估唔到嚟到英國都仲有利是收, 佢地又專登由南部撘火車過嚟搵我地! 本身老公想再去買闕餅, 但一來我覺得有啲遠, 二來子元又話想去間figuer鋪, 咁就去咗睇啦, 之後先去撘車, 路過咗條街買咖啡, 行番出去車站嗰條街, 竟然好多間賣結他, 仲爺馬上兩眼發光, 唔洗我地陪都夠膽入去睇, 幾鬼high呀佢! 撘車返到去broadway攞埋車就回家, 由於太飽啦, 都唔洗煮晚飯, 我都係煮咗個麵就算!
27/3/26 FRI COLD
終於end term啦, 所以今日都係返去hea, 照常咁撘巴士返去啦, 我個學生冇返, 咁我就堅係喺大房hea, 都係幾個鐘啫, 都好快過, 大姐今日last day啦, 但其實我冇咩感覺, 平時都好少見架啦, 另外今日有雪糕車, 個個都有免費雪糕食, 梗係要打吓卡! 等校長吹水時間後, 要等啲老師走哂, 我地啲supporting staff先可以走, 叫咗個同事車咗我去broadway, 係想幫仲爺攞眼鏡, 但佢搵咗好耐話因為冇貨未送到嚟, 頂...都唔知夠唔夠用! 咁同佢地會合咗就去榮業食嘢行個圈先返屋企, 我就做家務, 佢地就去教波踢波, 做完家務沖埋涼等食麥記!
19/3/26 THU WARM
今日又係朝早凍凍地, 但中午之後又好熱喎, 所以都唔知點著衫咁! 朝早算係啱啱好趕得切返到工, 跟住就係照開工啦, 不過今日要跟個新學生, 咁都做咗咁多年, 都叫做睇得到點搞架啦, 同埋佢都唔係好願去課室, 所以對我嚟講喺好事, 佢最終只係最尾嗰堂去咗課室, 咁我又早咗放學架嘛, 所以今日都係算舒服, 同埋又有機會喺二姐面前表現吓咁啦, 香港人係咁架啦, 都係鍾意要表現! 返到嚟都係要勞氣, 仲爺又係放縱式, 食嘢食勁耐, 食得嚟已經又要去踢波, 但都仲係要趕喎, 因為應該要準備時佢又喺到hea, 搞到我都情緒唔好, 對住佢真係好攰, 可能我都真係要放手由得佢撞吓皮算, 佢實在係太冇呢個心, 咩都老奉咁! 要比啲顏色佢睇!
10/3/26 TUE COOL
今日終於返工啦, 奴性重嘛唔返咁耐真係有啲唔慣, 好在今個星期老公可以車我返工, 咁朝早就唔洗等巴士, 返到去先搵咗副校, 傾掂咗暫時都係留喺大房等大姐明天返工先再決定今個星期詳情點安排, 又安排咗我今個星期可以遲半個鐘返, 放工又可以早九個字走, 避咗啲人朝, 呢樣我就真係冇諗過會被考慮埋, 咁都好, 唔洗同人迫同塞車, 好重要呀! 咁今日就主力留喺大房, 扮吓工同埋同啲同事見番吓面啦, 有人講嘢吹水真係好, 悶咗太耐啦我! 今日又有教育局啲人嚟睇場, 搞到我地都要扮工呀, 好在嗰時客仔啫! 到點幾鐘先食飯, 兩點幾就可以返去啦, 好事, 真係唔塞車! 返到嚟都真係有啲攰, 係要休息吓, 仲爺去咗踢波我又要煮飯咁啦, 食完飯仲有糖水食, 椰沖西米露, 好好味!
9/3/26 MON COOL
今日同老公一齊病假囉, 佢琴日剪親手指嘛, 都係去睇一睇醫生好啲, 本來佢打去GP, 點知GP都係叫佢去UTC, 咁就直接去醫院啦, 叫佢唔好渣車啦, 撘巴士仲方便, 咁近! 又唔洗泊車嘛! 結果真係好快就返嚟, 打咗破傷風針, 重新包紮過傷口, 又真係包得靚仔好多! 咁返嚟之後就係咁睇電視囉, 兩個都冇咩好做, 睇咗套電影, 但都真係比較深, 所以睇完都要啲力先明白! 跟住就開咗綜藝嚟睇, 之前見個韓綜係講術數, 咁就睇咗四五集啦, 午餐就各自整想食的, 然後繼續hea, 兩隻豬陸續放學返嚟, 仲爺就要去踢波, 我就要煮飯! 明天開始返番工啦, 加油!
26/2/26 THU COOL
困咗咁多日, 有時都唔知天氣係凍定暖啦, 今日當然係繼續被困的一天, 找到新劇睇已經令到個人好少少, 不過又要搞架車啲嘢又繼續令我擔心啦, 唯有就係吸引力法則, 相信就做到架啦, 加上而家有chatGPT已經幫輕唔少, 如果買樓嗰時有就肯定當輕鬆好多! 所以我而家都懶咗好多去睇, 有時upload上去叫佢睇就算! 就咁整吓整吓時間又好快過咗, 子元仲爺都放學返嚟, 叫做有人講吓嘢咁啦, 不過佢地成日喺房, 仲爺又去踢波, 所以到咁上吓我又係要去煮飯, 企得耐咗又係痛同曲唔得好, 沖完涼坐下又好啲! 晚上老公終於收到保險公司的保金, 咁就可以落訂, 又可以嚟緊用啲錢嚟搞ILR, Jeep Jeep的犧牲係值得架! 只係辛苦每個月又要供樓供車, 但我深信我地捱到架!
25/2/26 WED COOL
今日都係繼續被困中, 好無奈同無聊! 所以有時都唔知寫咩好啦, 今日都冇開電腦不過都喺電話做咗啲嘢, 就係book咗下星期一做學校安排的檢查, 睇吓我幾時先適合返工同埋有咩工作上安排要改動先, 跟住都係望住個電視, 痴線到2日半我就睇完30集的劇, 咁即係又要找新嘢睇但又搵唔到住喎, 所以開住youtube睇先, 反正波子仲有好多直播我未睇哂, 同老公揍咗仲爺出去踢波我先找到新劇睇, 但都要煮飯, 都勁簡單就算, 我真係到晚上就企唔到咁耐, 日頭又好地地架喎, 莫非真係用咗一日就特別攰, 我真係想快啲好番快啲返工呀, 真係好悶呀, 雖則係有糧出但其實悶喺屋企唔知點咁, 雖然我應該襯呢啲時間做吓有用嘢但又冇咩動力, 勁矛盾囉!
23/2/26 MON COOL
其實我真係想快啲好番可以返工, 有時候我真係太奴性, 但hea喺屋企真係唔知點咁, 不過今日除咗找到套新劇睇, 都要做吓嘢, call GP, 搞吓老公嗰到保險啲嘢, 不過今日有啲唔願郁咁, 可能係套劇太好睇啦, 所以好想繼續睇, 搞到個人情緒麻麻咁, 仲爺放學返嚟就係要將啲嘢周圍放, 係激死人的, 我都係要積極啲管理佢呢部份先得! 跟住又係跟買車啲嘢, 不過真係令人好攰, 我只係想快啲搞掂! 到仲爺出咗去踢波我又繼續睇, 當然都會準確嘢煮飯, 今晚簡單粟米肉粒, 今日等唔到張假紙, 要明天先出得email, 即係我又要打轉電話先, 可惡!
21/2/26 SAT COOL
今日又係辛苦的一天, 因為今日主要活動係去子元大學體驗日, 兩個幾鐘車程唔係講笑, 老公渣辛苦, 我做乘客都要提醒其實都好攰, 終於按時到達, 老公drop off咗我地就同仲爺去二人世界, 我同子元登記完就先食少少嘢, 然後就開始行程, 其實有3部份都係聽嘢, 但第1part係去行site, 我真係高估咗自己, 結果有少少要帶隊等埋我先得咁幾唔好意思, 終於行完, 返番去總部聽吓嘢咁, 其實都幾好有啲嘢知道要點問, 唔可以話冇收穫, 老公嚟咗接埋我地, 去到services食啲嘢先, 老公都要再停一次services先掂, 剛轉天黑係好令人眼瞓! 返到嚟都未肚餓, 等大家沖哂涼先煮嘢食, 都係餃子同菜, 食少少嘢都夠, 係時候休息了!
20/2/26 FRI COLD
今日真係好攰! 為咗車嗰件事, 老公請咗半日假, 今日主要去睇吓車, 知道咩狀況, 仲有就係要還番架車再自己比錢租多一星期, 勁無奈囉但都要比架, 然後再去視察埋想買嗰間車行, 老公仲抄咗人地車牌去睇吓想買的二手車咩料! 好在仲爺今日去咗比賽又有人幫手揍住唔洗煩! 接埋子元去broadway諗住攞埋藥同仲爺con, 點知下路塞到顛, 浪費咗好多時間, 激死! 食埋嘢做齊嘢就走人啦, 返屋企攞埋料就去朋友屋企, 仲爺已經去咗玩, 跟住今晚我地就係去打邊爐, 嘢食又係多到食唔哂, 玩到10點要走, 大家明天都要早起, 我地返去仲要處理車啲嘢, 真係好攰呀!
18/2/26 WED COLD
今日好忙碌呀! 朝早自然醒係過咗8點, 完全唔知老公出咗門口, 咁hea到9點幾10點要起身, 快手煮早餐, 再預備子元要出去試腳, 因為我地要做攝影師, 佢要片交AL計分用, 所以都要同佢做, 今日勁大風, 我都算著夠衫啦, 但根本完全冇用, 去到先等咗一輪先報到, 咁未開始比賽我地就梗係入番去室內, 先食啲嘢先有力做嘢, 到要拍片時, 喺室外一陣隻手已經凍哂, 幾經辛苦拍咗啲, 半時我入室內暖一暖, 再出去再要拍, 仲爺都頂唔住凍, 最終拍到第二節之後, 子元跌倒要出場, 冇得拍我地馬上收嘢入去, 我覺得我差啲凍死咁, 靠意志力先支持得住! 知道子元冇咩事之後都放心啲, 再等Janet嚟接我地, 車咗返屋企放低子元, 先再攞埋嘢去佢地屋企party, 都係食吓嘢吹吓水咁啦, 今次算係食得哂啲嘢架啦, 冇浪費咁多, 10點多要走啦, 就咁行出去上車都已經凍!
16/2/26 MON COLD
今日算係年三十晚, 要食團年飯啦, 所以今日主力都係處理過年前的工作! 老公繼續要返工, 我雖然瞓到8點幾, 但都係瞓得一般! 起身自己煮早餐, 仲爺又話唔餓, 咁我自己顧自己算, 食完都要做家務, 又要捉子元清潔埋佢間房, 貼埋揮春就開始plan餐飯點煮, 因為邀請咗Barry一家嚟食嘛, 所以要plan好點煮先得, 雖然原來真係要煮好幾個鐘, 但出嚟好食又真係有滿足感的! 因為學咗三個新菜色, 一定要plan好哂先煮得到! 佢地7點幾嚟到就食飯啦, 食完都係吹吓水咁, 不過老公好似冇咩參與咁, 到10點多佢都返咗上房, 咁客人都醒目提出走人啦, 都係時候散席, 我都攰啦!
9/2/26 MON COOL
今日都係冇出過門口啦, 繼續請假, 雖然行平路已經穩咗好多, 但樓梯仲係行唔到, 睇怕都要連埋term break放架啦, 傷手都仲開到工, 傷腳真係有心冇力! 今日主要係打比GP攞醫生紙, 已經8點就打電話, 但都排到第29, 個電話話可以登記e-consultent 咁就不如同步啦, 最終得一個電話打比我, 我要求開的假期佢又真係開哂喎, 其實我都係想搵個醫生問吓究竟我應該仲要休息幾多日, 搞到我而家都唔知點算, 攞就攞咗假啦, 我諗緊係咪總之日日打返去就算, 唔洗再email阿姐呢, 好亂! by the way今日只係hea, 一來要等電話, 唔知幾時打嚟, 二來都唔係好想郁太多, 有啲位都仲係痛! 晚飯都係要煮的, 都係簡單整無水雞, 食完都沖涼休息啦!
8/2/26 SUN COOL
今日係冇出過門口的, 呢個星期我真係好深閏呀, 慢慢隻腳係好咗啲, 但真係只係好咗少少, 叫做曲多咗少少, 但都係唔足以上落樓梯, 即係仲未可以正常工作, 今晚都係要作文請假架啦! 朝早老公要車子元去帶波, 咁我同細佬就自己喺屋企煮早餐食, 睇電視咁啦, 食完嘢就要做嘢, 要解剖埋啲雞腿蒸熟帶飯用, 然後佢地返嚟啦, 又要開始整蘿蔔糕, 當然又係整咗一整個下午啦, 有一半都係子元幫做, 唔係佢話幫手我都唔會再整, 要咁企一日我隻腳真係唔掂! 因為咁整法所以午餐冇咩食嘢, 所以晚飯都早啲食, 簡單食咗炒蛋叉燒飯, 仲加咗條菜添, 食完都係hea到咁上吓先沖涼休息!
7/2/26 SAT COOL
今日都係要出去買餸, 雖然只係可以慢行, 但都仲行到的, 都係要去買, 因為老公唔可能自己一個去超市! 先去咗中超, 主力係想買白蘿蔔, 但最終唔止啦, 不過見18鎊就可以抽一次獎, 咁就梗係分單啦, 起碼可以抽兩次, 咁就抽咗包餃子同埋水晶李, 都係食物, 唔錯! 跟住就去埋對面超市快買, 老公想返嚟睇波, 我就做埋家務, 都廢鬼事叫人幫手, 反正都係唔會幫, 或者黑口黑面, 所以都係自己慢慢做就算! 做完就可以食嘢, 老公炒咗米粉, 好味! 跟住就開始hea吓, 因為隻腳真係要休息吓啦! 再等老公煮一品窩食, 又係好好味, 再睇吓電視先沖涼休息!
6/2/26 FRI RAIN
今日要考B1英文試啦, 真係令人好不安, 明明知道自己handle到, 但都係好驚咁! 朝早照常起身, 仲爺出咗門口之後做少少家務就開始hea, 分散吓自己, 睇電視時都係唔安心, 搵chapGPT睇吓有啲說話應該點講, 到12點幾肚餓, 整啲嘢自己食吓先, 等老公回來先再等佢叫嘢食, 食完基本上都要出門口去考試, 期間一路都好緊張, 泊完車都要行過去, 我隻腳始於只係可以行, 但唔可以正常行, 所以都要啲時間仲要有人扶住先行得穩, 所以行到去都要啲時間, 而且我咁驚, 個人震哂, 反而入咗去坐底好似慢慢平靜番! 真係等到夠鐘先輪到我考, 跟指引去做啦, 我就完全冇問題, 反而怕自己吹得太行, 考完等埋老公, 佢話佢都講得到, 最搞笑係講講吓佢斷線, 同埋個考官趕收工咁, 所以都順利完成! 咁就回程啦, 行咗一陣我先發現唔記得攞番把遮, 又要渣番轉頭攞, 返到嚟就係hea同埋等開飯啦, 今日我想食意粉就叫咗老公公煮意粉, 仲配咗牛同雞, 好好食!
3/2/26 TUE RAIN
今日冇咩好講, 因為我真炒車, 撞咗落架車到, 去咗醫院照x光, 骨冇事但膝頭腫哂, 撞到我嗰架車先驚, 我呢啲路權L嘛, 我都冇心架! 係咁二記錄吓去醫院個過程啦, 對家call咗的士車我去醫院, 登記咗幾經辛苦先行到去坐低, 先睇咗護士, 再去照X光, 呢個過程大約個幾鐘啦, 我覺得已經算快架啦, 之後就係等見醫生囉, 佢好似見怪不怪, 睇咗X光見我啲骨冇事就洗傷口貼膠布, 開咗止痛藥比我食, 我就等老公嚟接我, 先去攞番架單車再返屋企休息, 真係好痛架其實, 我只係忍得囉, 一路都係敷冰同休息, 不過我都係要煮飯同洗碗囉, 呢幾日都要請假架啦, 又要寫email!
29/1/26 THU COLD
今日都係幾凍吓, 但都冇咩衫可以加, 出門口發現仲爺同conor折返, 原來佢話見到琴日個學生喺路口, 怕所以唔敢行, 咁我唯有陪佢地行到出路口先出車囉! by the way, 最後得知嗰條友仔係比人收咗監架啦, 不過應該唔會好多日囉! 跟住就係如常返工, 以為係跟嗰個又轉咗, 咁又被困大房一日, 有時都唔知好定好, 因為都叫做可以做吓自己嘢, 但又好似好多嘢做咁, 所以都係會好攰, 另外都係要跟個學生架嘛, 雖然只係三堂但都已經夠! 最好就係可以自己準時收工, 但返到去已經攰到咩都唔想做, 攤咗喺梳化, 連嘢食都冇煮, 夠鐘就同仲爺去球場, 因為巴士改道, 所以都唔洗特別追一架巴士, 去到邊架就邊架! 返到嚟又要摺衫又要煮飯, 同埋要仲爺再溫書囉, 因為今日print咗好多嘢比佢臨尾再衝刺, 去到球場未開始之前已經溫過吓, 好過冇啦!
28/1/26 WED COLD
原來今日都幾凍吓, 好在都頂得住! 返到去知道今日跟邊個, 因為佢基本上係行得, 所以除咗佢把口都係控制唔到住, 起碼佢唔會周圍走先, 同埋佢只係返3堂, 好事! 不過有另一個顛妹喺到, 某程度上佢地又喺到發顛, 搞到我要出去call人嚟救, 因為已經開始失控! 真係好麻煩! 另外又要替飯更又要run lunch club, 所以都好忙, 但就完全冇去過課室, 因為全日都喺大房運作, 然後就準時收工! 返到去本來諗住同仲爺溫書, 點知又出事, 其實可以係好小事, 但我覺得點都要report, 因為我返到嚟見到有兩個仲爺學校學生喺到同佢地吹水, 同埋neighbour, 本身佢地喺屋入面都可以, 吹水都可以, 但原來嗰個學生係naughty嗰類, 走去knock neighbout門, 人地阿婆返到嚟比人趕先走! 本身都算架啦, 點知4點幾佢地返轉頭, 仲要拖馬帶多咗兩條女, 話叫仲爺出嚟, 我勁同佢地講話唔得先肯收聲, 咁我就覺得咁做令我覺得唔安全啦, 所以我又要叫AI幫我寫email比學校囉, 正所謂報咗案先有著數, 但就搞著我完全冇時間再幫仲爺溫書, 星期五science test都唔知點算啦! 唯有明天再諗吓撘車時同佢溫!
27/1/26 TUE COLD
今日返到去hea咗一堂就要開工啦, 因為第一堂個學生唔見佢返, 就喺大房等住先啦, 但都唔可以係咁等, 唯有去另一個學生到, 不過佢都係唔係好洗理, 所以只好搵個位坐埋一邊做吓自己嘢, 但又唔係堂堂都可以, 所以都係幾無所事事! 都有自己搵嘢做吓, 可以慢慢放吓break同lunch等, 放學準時返到嚟, 又要倒垃圾又要揍仲爺出去踢波, 點知架巴士去到southall station就話唔去到我地要落車嗰個站, 咁唯有行過去啦, 因為等車同行都係一樣, 不過行對我隻腳踭嚟講都好辛苦, 愈來愈痛唔多掂, 可惡! 終於返到屋企, 先要休息吓先再整嘢煮飯, 咁又一日啦!
26/1/26 MON COLD
又到好悶的week A, 不過悶都好, 即係冇咩做啦, 好事! 原來今朝都有啲凍, 唔係好著得夠衫咁, 好在今日主要都室內! 悶悶地所以我幫個學生做好咗嘢之後就搵啲嘢自己做吓, 睇吓慶餘年小說, 因為暫時諗唔到有咩可以做! 咁就捱到放飯啦, 都有啲餓架, 食完仲要上第五堂, 本身都係諗住去坐吓, 上到去先發現係代課, 重點係好煩嗰個代課, 淨係識得叫啲學生唔好講嘢, 我最終頂唔住3點就走人, 慢慢行去攞車閃人! 返到去就第一時間著火, 因為仲爺啲衫褲鞋襪一屋都係, 然後佢仲淨係掛住整嘢食, 又要整到個廚房好亂, 我換好衫開埋機洗衫佢都好似未掂咁, 阻住我今日個plan整蘿蔔糕, 不過我最終都照開始整, 連埋煮飯時間, 又喺個廚房企咗4個鐘, 好攰!
25/1/26 SUN COLD
今日都要出去買嘢, 所以都好忙! 子元朝早要帶波, 所以車完佢去咗球場先再去broadway, 先去食咗早餐先, 係有啲貴但一年都食唔到兩次就算啦, 因為都搵唔到有啲咩好食! 等啲鋪頭開門就去買要買的, 因為之後仲要去中超同costco, 一日行幾個場真係唔掂, 好攰! 中超要買料準備整蘿蔔糕, costco又有好多嘢好吸引, 已經好忍手去買架啦, 嚟緊過年都要入吓貨! 等埋costco熱狗等就回程, 返得去都3點多, 仲要分裝先再食嘢, 咁老公之後要睇波我又唔係好想睇, 所以就搬埋啲衫去樓上自己睇youtube摺! 晚飯都幾豐富, 食飽飽洗埋碗就沖涼休息, 明天繼續努力, 仲有三星期又term break架啦!
23/1/26 FRI COLD
今日好攰呀, 都唔明點解咁攰, 可能今個星期都瞓得唔係好好咁! 照常返到去都係睇吓跟邊個啦, 點知話IK有可能返, 心諗唔好啦我唔想呀, 好在最尾佢都冇返, 咁我就炒吓散, 替吓飯更係可以的, 仲可以準時收工好重要, 去攞埋藥行下路返去先發現啲行人路都封咗好多, 搞到我好辛苦先返到嚟咁, 中途仲要收到GP電話, 明明book 咗 4點幾, 但佢4點未夠就打嚟囉! 搞到我勁狼狽佢又串喎, 火都嚟埋! 返到去老公又係買咗炸雞, 但我唔鍾意食囉! 好在佢晚餐叫咗意粉, 仲要係好好食嗰間, 正! 因為我追緊DO姐介紹的新劇, 超正, 得6集一口氣追哂, 堅好睇!
21/1/26 WED RAIN
今日啲雨又追住我嚟落, 我真係連底褲都衫哂, 單車同scotter真係唔同, 坐喺到咩水都吸哂, 搞唔掂! 加上又有啲暈又有啲想嘔, 好在今日三隻小天使返得一隻, 仲要係相對地易搞嗰隻, 已經好好! 第一堂PE我只係坐喺到, 真係冇咩可以做, 同埋我都要休息吓! 之後都係照上堂啦, 相對地今日已經算易過, 只係因為我今日身子弱, 所以都係有啲辛苦, 加上個人實在太濕, 心情都唔好! 放學返到嚟又要快手換衫抺一抺乾自己就要揍仲爺去睇牙醫, 又要行又要撘巴士, 回程又要等, 返得嚟已經6點幾, 我真係好攰呀, 但都要做埋啲嘢先, 買咗嘢又要擺, 最後煮咗啲嘢食但又唔係太想食, 可能因為一返到嚟太餓食咗啲即食嘢先跟住就飽咗啦! 最後攤咗喺梳化個幾鐘叫做回番少少血, 等老公煮晚飯就可以食得, 洗埋碗就沖涼啦, 今晚都係早啲休息啦!
17/1/26 SAT COOL
難得今日都唔算太凍, 仲有太陽, 不過主力都係出去買嘢啫, 今日只係去咗中超同IKEA, 仲爺一聽到IKEA梗係跟埋嚟啦, 咁就先去中超買完嘢先, 尾聲時喺凍櫃嗰到發現有人跌咗現金, 都40鎊架, 咁梗係要路不拾遺啦, 所以叫仲爺攞去交比收銀嗰邊, 買完就去行IKEA, 主要係買衫架同床單, 都目標達成, 喺IKEA食埋午餐先返去, 塞得車嚟都3點幾, 快啲開始做清潔, 仲要換埋床單, 7點幾就食得晚餐, 今晚有一品窩食, 新買的鴛鴦煲就係攞嚟整新食品毛血旺, 真係好好食, 今次試咗, 下次配埋薯粉食仲正! 最後睇埋模範的士, 原來已經大結局啦, 可惜又冇得追啦!
16/6/26 FRI COLD
今日終於冇落雨, 不過都係小心啲好! 返到去以為要跟3隻小天使, 點知又轉咗喎, 我今日第一次全日跟Maki呢, 都有少少新挑戰架, 不過老實係有啲攰, 因為不停要寫呀講呀咁, 係冇得hea! 不過充實得嚟又學到嘢咁囉, 大佬你要幫個盲人上art上數學其實都唔知應該用咩字眼等等, 不過每堂都唔算太難過, 忙呀嘛, 而且會遲到早走, 所以每堂都淨唔到幾多時間, 放學時間同佢阿媽講咗幾句咁啦, 準時我都走啦, 返到都係食吓嘢先跟住休息吓, 食完飯諗起仲爺都係完全冇做過溫習啲嘢, 但叫佢郁時佢又話自己要拍片呀等等, 又激到我走咗落樓, 落去吹吓風都好, 我真係堅燥! 又同佢訓話咗一餐, 希望佢合作啦!
15/1/26 THU RAIN
今日又係落足一日雨, 真係令人好煩悶, 又周圍都又淨又浸, 勁難返工囉, 要好小心! 返到去又轉咗跟咩人, 然後嗰條友又可能會遲啲返, 完全掌握唔到, 所以都係幫吓手做吓啲大房事務, 最鍾意係咁! 不過之後都要去上堂, 然後放飯後條友又返咗嚟, 但佢都係keep住反叛中, 搞完一輪留咗喺大房, 我就成機做埋B1 Test張紙仔! 夠鐘就放學啦, 又要冒雨返嚟, 濕到呢, 然後快手食啲嘢又要出門口揍仲爺去踢波, 又要去子元家長日, 但老實講都唔係要同家講嘢咩, 可能係怕學生唔會同父母講佢地讀成點, 要我地去坐吓聽吓掛, 有啲無聊! 又要自己撘番車返去, 不過係唔洗煮晚飯囉, 因為一來冇嘢煮, 二來我地返到嚟都咁上吓時間, 咁就不如叫外賣算! 食完沖涼休息!
14/1/26 WED COLD
今日原來都幾凍, 地下又濕, 好在都唔算太滑! 返到去先知今日Y11 mock派成績, 咁其他級就第二堂先返, 所以本身今日都輕鬆, 起碼上少一堂, 跟住好好彩咁今日本身嗰個學生係仲未再返學, 所以基本上跟佢的日子都係可以hea! 大房in charge個同事今日就同大姐安排我喺大房幫手, 再cover吓飯更咁, OK啦! 午飯時仲有得加餸, 因為招呼完客啲食物有淨, 咁又益我地啦, 我直情攞多份返去比啲仔食! 最尾嗰堂都係喺大房, 幫手做吓啲文件嘢, 雖然有啲攰但都開心過跟住啲學生hea, 原來我都係鍾意做文職嘢! 放工返到去都好忙, 又要掉垃圾又要處理其他嘢, 5點幾先有時間食嘢, 所以基本上係冇咩休息時間, 跟住又要準備煮飯摺埋啲衫等等, 今日真係攰!
13/1/26 TUE COLD RAIN
今日繼續都係正常咁返工, 繼續努力同架車合作, 係要慢慢適應! 返到去除咗英文堂冇電腦用, 其他時間都係可以上網, 所以唔好浪費時間, 做吓啲有益自己的事, search吓ILR啲嘢, 好在而家真係有AI, 雖然冈時佢都可能會錯, 但search多幾次再confirm吓, 又了解多啲! 準時放到飯, 咁飯後返大房睇吓有咩要幫手, 最終可以喺大房hea到放學, 繼續搵我要找的資料咁! 放工返到去仲又搵唔到佢件保暖衣, 又搞咗一排仲要煮埋嘢食先出到門口去球場, 繼續落住雨咁, 巴士又人多喎! 去完球場等老公嚟接我, 返到屋企咪做家務囉, 又要摺衫又要煮飯咁, 好在我套劇集睇得番, 咁正常開飯啦, 食到尾疑似唔知魚柳入面係咪有骨, 搞到我嘔番一半嘢出嚟都好似仲有嘢喺喉嚨咁, 最終食咗雪糕之好似好番, 真係嚇死我!
12/1/26 MON RAIN
今日出師不利, 舊雲追住我嚟落雨, 可惡! 我又完全冇預計過會有大雨, 結果濕到透哂, 到第三堂先叫做乾得哂, 要用個人體溫去烘乾佢! Week A的星期一都係一個悶字, 不過只可以話悶好過忙, 但學生家長遲咗差不多半個鐘先到, 我真係等到餓鬼死, 不過有樣好就係勁唔想上最尾嗰堂都叫做冇上到, 因為個學生去咗大房, 咁我行完上去咪又行番去咁, 加上食飯慢慢食已經遲咗3個字, 最終hea多半個鐘就收工啦! 返到去處理吓自己先, 然後仲爺話整tea我食, 係碎蛋沙律包, 都算係佢第一樣要開爐整比我的食物, 點都要post吓嘛! 老公返嚟揍佢去踢波, 我就要摺埋啲衫同埋煮飯啦, 可惜今日個電視收得唔好, 我都冇得睇我想睇的電視, 唯有開youtube就算!
7/1/26 WED ICE!
仆街, 我今日真係仆咗街, 估唔到我幾小心都係成為咗冰地的其中一個跌到的人! 我已經知道今日地下好滑, 亦已經好小心, 奈何上斜嗰到小車行, 又見到有人過馬路, 我就收油啦, 點知架車一滑就向後反, 我就向後跌, 手踭落地又係右手, 單車壓住我, 路人過嚟扶我都差啲跌, 不幸中之大幸後面架車仲好遠, 咁我仲可以慢慢運車同人去路邊先, 路人確保咗我冇大礙佢先走, 我仲回緊魂, 其實我都唔知自己停咗幾耐, check緊自己手踭郁唔郁到先, 再檢查吓架車, 跟住對面馬路有個女人過嚟, 原來佢喺對面屋, 見到我跌到後過嚟, 好心到問我洗唔洗去佢屋企休息吓先, 但我呢啲社畜只係知道要返工, 都冇接受佢好意, 慢慢再上路, 之後個同事話我做咩唔請假, 嗰吓我真係冇諗到, 咁都出咗門口行咗一半, 其實都好唔抵! 所以返到去同阿姐講咗, 佢地都係叫我去搵first aid睇吓先, 亦都係敷冰先, 都冇咩可以做, 咁今日我就基本上全日都喺大房, 扮吓工咁啦, 放工時其實都好驚架, 但都冇辦法一定要靠自己, 點知已經好艱辛的路上仲要收到仲爺電話原來冇帶key, 但我真係救佢唔到, 最終叫佢自己撘巴士返嚟, 阿哥咪喺屋企囉! 返到嚟settle咗自己食咗嘢, 除咗坐冇咩可以做, 就係慢慢放鬆咗個人之後, 身體其他部位的痛開始浮現, 睇嚟我明日都係請日假穩陣啲! 又要寫email...唉! 今晚完全唔洗煮飯同洗碗, 原來係幾好Feel! 慢慢沖埋涼就休息啦!
6/1/26 TUE VERY COLD SNOW
今日終於係要開工啦, 真正有學生的開工, 都係如常啦, 冇事發生就已經係好事! 可能今日有雪落所以心情好好, 始終難得落一次雪嘛! 可惜係最大雪時喺課室冇機會出去玩, 不過放飯時都影到少少雪地可以出吓post! 點知去到staff room冇電喎, 用唔到微波爐, 醒起sixth form building都有就攞去加熱, 費事又攞返去staff room食, 就去大房食就算, 然後又要開工囉, 因為係大姐嗰堂, 交差咁都要努力! 原來學校局部停電, 飯堂用唔到電腦, 變番哂人手寫名, 好痴線! 第五堂好似回復到正常, 不過我就坐咗成堂, 因為學生自己喺電腦做嘢, 好在我個位可以收好部手機打啫! 放學小心地踩車返去, 好怕black ice! 因為太凍仲爺冇波踢, 所以又可以hea喺屋企啦, 仲爺玩咗好耐lego, 估佢唔到! 所以都係hea完就煮飯, 睇到個新菜色一窩雞脾, 又真係幾好喎, 夠哂方便! 食完洗埋碗睇陣電視就沖涼啦, 不過hea到咁上吓又差不多12點!
5/1/26 MON VERY COLD
今日又要開工啦, 放完個長假, 又零下溫度, 又用新車, 真係好多變數咁, 所以好早我就出門口, 以防萬一慢慢行, 差不多半個鐘先返到去, 今日飯前基本上係全training, 第一轉都可以, 因為坐最後, 但小休後要被分配坐邊, 都唔知為咩, 其實諗番係幾唔專重, 我知佢都係想大家唔同friend 坐留心聽又討論吓, 但大家都知為train 而train架啦, 邊係真心想聽, 仲要差不多兩個幾鐘, 攰死人, 因為我坐最前枱呢! 終於捱到放飯啦, 今日飯堂有飯, 不過只係焗薯, 一杯仔湯同麵包, 查實都幾唔開胃, 但餓到咁上吓係唔會理有咩食架啦! 下午叫做department開一轉會就自由時間, 本來都冇咩, 點知有個同事拆聖誕掛飾時跌到落地撞到個頭, 應該都冇咩的, 但都幾嚇人! 準時收工, 明天先再對住班生番! 返到去先食嘢, 餓! 我又冇同仲爺溫書, 真係試一次唔理佢睇吓會點, y7啫仲有時間! 夠鐘佢就去踢波, 我就要摺衫同煮飯, 今晚應該都會早眼瞓架啦!
3/1/26 SAT VERY COLD
今朝瞓到10點起身諗住都趕得切giv仔嚟到, 點知佢手車真係好快, 未夠10點半已經到, 快手換好衫招呼人, 買咗飛去睇戲, 食埋嘢都要預備出門口, 佢地話食炸雞脾, 咁就整好比佢地食, 我地都食埋早餐先, 都係簡單食丁麵, 然後就渣車出去商場, 期間佢就講番佢同sun仔件事, 係有啲可惜但人的緣份冇就係冇! 去到商場真係只係直接去戲院, 坐到差不多夠鐘就入場, 仲要完全冇人睇飛, 真係懷疑有冇入錯, 不過見到全部都係香港人就知冇錯, 等咗差不多25分鐘廣告, 終於開場, 咁都真係好好睇, 只係室內愈坐愈熱, 空氣冇咁流通差啲! 可惜係睇完都係搵唔到poster影相, 唯有喺戲院門口影就算, 返到去因為大家都冇食lunch, 就早啲食邊爐, 反正都係煮起比啲細路食, 佢地又唔可以太夜走, 玩到7點都要走, 咁我地又hea吓沖涼休息!
