31/5/16

31/5/16   TUE   HOT

5月又結束了, 過埋考試心理上大家都輕鬆D啦, 不過今次我都冇咩好激咁同子元溫書, 一來交咗比婆婆溫咗部份, 二來每日食完飯其實已經冇咩時間, 溫咩鬼呀! 朝早如常咁揍仔返學啦, 仲要接埋婷婷! 然後我就返工啦, 今日D高層要員全部唔喺到, 心情都特別輕鬆, 所以都係hea爆咁過啦, 我係浪費時間架啦, 總之每個月有糧出我話知佢呀! 午飯後都係睇吓電視吹吓水咁啦! 下午又係hea過! 放工去買餸, 今日睇咗食譜諗住煮D特別嘢, 有炸魚柳, 蜜桃豬柳, 銀魚煎茄子, 有成功有失敗啦, 不過佢地都清哂, 我最鐘意咁! 仲仲仍然有咳但又唔係太嚴重, 不過嘔番D粥出嚟囉仲嘔喺我身咁解啫, 可能見慣子元的狀況, 仲仲呢D相對真係好少事, 都係繼續比藥佢食咁囉! 晚飯後K.O.咗細GE就睇大GE功課, 之前叫咗佢自己溫常識, 要mark邊D字自己唔識寫, 重溫時可以留意等等, 方法就跟咗, 識唔識就未知! 9點幾搞掂埋佢就要佢瞓啦, 我就沖涼啦, 摺衫啦睇電視等等, 12點就啦!

30/5/16

30/5/16   MON   HOT

今日仲仲竟然冇一早起身, 難得! 所以都好輕鬆咁煮埋飯比子元, 返上樓叫醒仲仲, 見佢片乾就帶佢去VV, 試吓今日唔著片返學, 反正返到去都除, 咁唔好浪費! 今日要揍埋婷婷返學, 因為程生架車攞咗去驗, 出得門口都遲遲地, 不過都唔洗咁趕啦, 開咗門先慢慢入去囉! 老公今日要出去買嘢, 咪車埋我返工囉! 今日超冇嘢做, 要找嘢hea都幾攞命! 終於等到放工了, 買餸揍子元啦, 返到去快手煮飯, 因為老公今晚去踢波想快食, 但7點幾都未返, 原來佢今日唔踢啦, 加上仲仲臨走先嚟POPO, 咪疴埋先囉! 食完飯去咗超市shopping, 結果返得上樓都9點多, 沖完涼都冇叫佢溫書! 明天再溫啦應該趕得切GE! 沖好涼摺衫睇電視瞓覺!

29/5/16

29/5/16   SUN   HOT SUNNY

今日真係好熱呀, 出一出街已經一身汗! 朝早又比仲仲嘈醒, 咁都要起身去畫班架啦, 快手食咗早餐捉咗佢地上去啦, 然後我地就去食啦, 仲仲例牌唔合作, 好麻煩! 食完就去咗睇泳衣, 係平但唔多啱, 剛買咗件新GE啫! 畫班完返屋企, 開波溫陣書先, 老公捉咗仲仲去瞓, 佢自己都要瞓啦, 咁子元夠鐘去踢波我咪揍佢過球場囉, 又唔洗留低睇住佢GE! 點知返去時架巴士又飛站, 真係好乞人憎, 返到站頭咪同個站長講囉, 不過都知冇用架啦, 早知爆吓佢啦! 返到屋企老公醒咗, 咁佢夠鐘就去接番子元, 仲仲都瞓到3點到, 等老公買得KFC回來食都4點多, 食完本來應該繼續溫書, 但我真係又攰又頭痛, 最終冇溫哂常識, 叫子元自己做數學卷算, 老公就揍咗仲仲出去, 等我抖吓! 7點前嚟接我地過程生到食飯, 因為出咗去食, 所以都冇咩喺屋企搗亂, 落去邊玩卡邊等位, 食完食埋雪糕就走啦, 返到去都9點幾, 沖涼瞓覺! 老公踢完波11點到返到嚟, 一齊睇埋電視12點幾瞓啦!

28/5/16

28/5/16   SAT   HOT

星期六又係返工但做自己嘢GE日子! 朝早仲仲當然又一早醒, 其實我瞓到8點都得架, 唔洗咁早囉! 車咗我返工老公就揍佢地入去嫲嫲到然後去銀行, 我就做自己嘢啦, 出吓卷比子元呀等等, 話咁快又放工, 老公嚟接我但仲仲又瞓咗, 想車佢返去瞓, 返到去佢又醒咗, 咁不如一齊出去食飯先, 接咗子元放足球, 佢食個包就去乒乓球, 本來仲有場波要踢但因為下大雨, 乒乓球完就返嚟, 改好功課又出去, 約咗嫲嫲晚飯! 仲仲冇再瞓覺啦, 但叫做肯喺房, 我可以做吓家務! 因為落雨都係去咗愉景新城, 食咗間拉麵, 我就買咗對拖鞋涼鞋嗰D, $99抵啦! 返到屋企都係捉佢地快D瞓啦, 我都攰啦! 老公今晚出去睇波, 歐聯喎! 我又冇得去, 早D瞓啦!

 

 

27/5/16

27/5/16   FRI   HOT  3號風球

今朝起身突然話3號風球, 仲仲冇得返學啦, 今日仲要係生日會, 好在唔洗特別預備D咩, 唔係就慘啦! 咁搞掂子元返學咪call嫲嫲OT囉, 揍咗仲仲入去順手攞番兩星期的便服入去! 跟住就返工啦, 朝早都係做自己嘢, 但不一會又要做清潔工, 因為嚟咗新櫃要執嘢, 清呀清都掉咗好多嘢, 搞得嚟都食晏, 午飯後都係做自己嘢先GE, 跟住要開會啦, 唉…總之老細返咗嚟開會就令人覺得煩惱! 首先開會東扯西拉咁, 講十世都埋唔到欄, 之後就係對人唔對事啦, 係咁喺人地背後踩人, 講到地底泥都不如咁, 佢喺人地背後可以咁講人, 喺我背後都係咁踩架啦, 真係令人好氣憤! 不過返到屋企忙忙碌碌咁, 又諗番嗰句「你只是公司的草, 卻是家裏的天」, 返工都只係為錢, 唔洗咁苦惱! 有時都諗我要傾訴其實都有好多途徑, 呻吓的又有, 專業的社工又有, 唔洗煩架! 去到小童接佢地游水, 又交收埋婷婷, 就返上樓煮飯沖涼, 今日比唔切仲仲食先, 所以一齊食, 但佢都食得好少! 食完吹陣水啦, 今日我都攰想早D搞掂D嘢, 所以抺好地我咩都冇做啦, 陪子元睇電視, 但瞓鬼咗, 等子元瞓我就醒番睇J2套劇然後瞓覺!

26/5/16

26/5/16   THU   HOT 1號風球

今日都係如常咁返工啦, 揍咗佢地返學我就返工啦, 朝早做好自己嘢, 11點多就出門口過商會, 今日要開會呢! 先食咗個靚飯, 然後再開始做嘢, 都估到老細會帶埋低B妹過嚟架啦, 咁我都完全冇理過佢, 等齊人開會都晏咗, 又多嘢傾喎, 人多口雜咁都差不多4點先開完, 又有會員問大陸上網郵購單嘢, 又吹一輪啦, 咁老細呢個時候就問低B妹嘢, 佢竟然遊緊雲, 要另一個會員出聲話: 阿咩咩, 你老細叫你呀! 嘩! 核突到呢, 你發夢還發夢呀, 唔好老細叫你都冇反應仲要人叫你先識應呀! 之後佢地行開咗, 另一個熟絡的老細講, 都唔知我老細點請人, 請個呆GE, 仲話走大陸線, 比人溶咗都唔知咩事呀! 到4點幾老細仲未捨得走, Nicho都叫我一齊走啦, 唔洗理佢啦! 咁就閃人囉, 返咗長沙灣買咗餸先, 然後再去接子元! 已經攰到死, 唔理咁多啦休息吓先, 差不多7點先煮飯, 老公回來沖完涼食咗飯再K.O.仲仲, 佢瞓懶覺心情唔好, 所以早D捉佢去瞓算! 我就要睇吓功課咁啦, 等佢搞掂先去沖涼等等, 不過都算早架啦, 仲可以睇住琅琊榜咁摺衫! 老公就眼瞓瞓先, 我就睇埋J2套劇先瞓!