30/4/15

30/4/15   THU   HOT
今朝都係一早比柏仲嘈醒啦, 咁又係揍埋佢去送子元校車, 返上嚟搞掂就交柏仲比老公揍入青衣, 我就要收拾吓, 今日要出去開會呢! 買埋早餐返公司, 仲有去埋銀行啦, 朝早都係hea吓做好嘢就出門口, 主力搞掂琴日miss 咗的賀禮! 早D過商會同深哥食埋飯就返商會做嘢, 2點前其實都做好架啦, 等夠鐘開會, 4點左右老細們都肯走啦, 就閃人返屋企啦, 老公揍咗柏仲返嚟啦, 不過我都照做吓家務, 夠鐘就出去揍子元, 食埋晚飯, 等程生返到嚟攞埋淘嗰架單車就回家, K.O.咗柏仲佢兩父子就喺到砌, 但柏仲應該未啱坐, 太高了! 10點多子元瞓埋, 我地hea 吓都瞓啦!

29/4/15

29/4/15   WED   HOT

真係要諗吓辦法點令柏仲瞓晏D先得, 因為佢醒咗之後又爬上床, 我出廳佢又要跟住出嚟, 又成日走入廁所, 好麻煩! 子元都自己醒, 因為急POPO喎, 所以都好早出到門口! 搞掂返上樓個衰豬又要抱住食奶, 然後我就揍佢入嫲嫲到, 因為老公去見工! 好好彩好快有車, 揍咗佢落去我就返工啦! 返到去都係hea吓咁啦, 午飯後老細已經返咗, 又要開sales會咁, 時間都過得好快, 放工馬上返屋企換哂D床單, 難得有時間冇人喺屋企搞住哂, 子元功課班7點先放, 咁我做到6點半就去揍佢, 老公都同嫲嫲及柏仲到咗, 因為冇買餸, 所以出去食, 等緊子元時, 柏仲竟然辦大事, 我地又冇帶片喎, 諗諗吓不如上敏瑩婆婆到換片, 因為有婷婷D片, 唔洗專登買! 搞掂就去番上次游水後食嗰間, 今次食西餐, 估唔到四十幾蚊塊扒都好食喎! 食完回家啦, 撘巴士時子元瞓咗, 落車時又發眼瞓瘟, 我咪又激到死囉, 又鬧餐佢勁! 返到去沖涼後K.O.咗柏仲, 睇子元功課啦, 點知原來佢好多改正又未做等等, 愈做愈火又鬧又喊囉, 佢又眼瞓但都要做哂先得架, 唉…都係要諗吓辦法!

 

28/4/15

28/4/15   TUE   HOT

今日都係如常咁比柏仲嘈醒, 起身齊齊返學啦, 返上樓咪餵奶摺衫等等囉! 見到柏仲想POPO, 馬上的佢去廁所疴, 係成功架, 佢唔怕咁樣疴, 係欠佢未識表達! 跟住老公揍佢入青衣, 我就返工啦! 朝早都係做吓自己嘢, 午飯後老細返咗, 又係過嚟煩住哂你做嘢囉, 吹水吹到4點多, 個阿媽捉佢先走, 咁又可以自由吓啦, 寫吓柏仲的發展記錄! 放工去接子元啦, 明天起阿媽去旅行, 子元就要托去YMCA啦! 返到屋企又開始煮飯等等的忙碌工作! 8點幾做好嘢啦, 可以沖涼, 又叫笨元做吓職業治療D功課囉! 柏仲9點多瞓埋, 叫子元做好埋D嘢, 佢又要睇daddy打陣機, 捉佢先肯瞓! 老公睇完跌打隻腳解開咗又話要等吓先沖涼, 等到10點幾先肯去沖, 我就眼瞓到瞓咗, 但聽到笨元咳得勁, 都係唯有比氣佢聞, 比化痰粉佢食囉! 搞掂完佢都瞓啦, 朝朝6點多就醒真係好攰!

27/4/15

27/4/15   MON   WARM

又要開工啦, 柏仲今朝唔算早起身, 起碼我梳洗完佢先起, 揍咗笨元返學就返上樓hea! 夠鐘就出門口先同老公去食早餐然後再返工, 柏仲明明之前肯自己攞奶樽, 而家又唔肯, 好懶呀! 返到公司都係做吓自己嘢啦, 當然都有做公事啦, 午飯後hea吓囉, 老細返咗後都係做公事啦, 好在佢4點多就走啦, 咁都可以自由吓, 放工即走去接笨元啦, 買埋嘢就返屋企, 先叫笨元沖好涼, 奶奶煮咗D餸啦, 但又未煮得哂, 仲仲瞓咗, 但到我沖緊涼時佢已經醒咗, 到食得飯啦就餵飯啦, 混混亂亂咁啦, 笨元又話食完飯做功課, 但都係要人三催四請, 激死, 一人多撐腰佢就亂嚟! 洗埋碗抺埋地就同笨元做剪報, 都算快手架啦, 半個鐘左右搞掂, 又要解佢知又要佢寫, 期間餵埋柏仲放佢入房, K.O.埋笨元就可以休息, 但已經10點幾, 睇咗陣電視就瞓!

26/4/15

26/4/15   SUN   WARM

今日是平常的星期日啦, 朝早我發咗一陣顛, 應起身嗰D唔郁, 應瞓晏D嗰D就早早就醒, 做咩都唔順咁我難唔顛架喎! 叫做趕得切撘8:40班車去畫班啦, 揍咗佢地上去我地就去食早餐, 然後我揍埋柏仲去惠康買嘢, 老公就等夠鐘揍子元去珠心算! 買好嘢就撘小巴返去, 其實柏仲都攰架, 但放咗佢落地後又唔願瞓, 我唔理得佢咁多住, 執好放好嘢打掃埋先, 佢開始真係頂唔住啦, 咁咪哄吓佢囉, 原來平時daddy抱住到瞓咗先放落床, 唔怪得我放佢落床唔肯啦, 最終照用crying control program K.O.咗佢, 我只係夠時間整起D餸, 佢就醒咗, 不過應該係咳醒, 噯番佢好在又瞓番, 可以摺埋D衫! 醒咗就餵佢食飯仔啦, 我同佢齊齊食飯仔, 食完就去玩啦, 叫老公回來時買個將軍漢堡我再食吓, 柏仲又搶我D薯條食, 等子元沖好涼就要佢做功課, 不過佢又要睇running man, 我咪要佢做廣告時即刻入去做吓囉, 一睇完就要即刻做啦, 算佢都好快做起啦! 4點幾老公就出門口去踢波喎, 我地3個就你眼望我眼都唔知玩咩好, 又廢事落街玩, 最終prepare吓嘢食, 早D餵咗柏仲, 再煮埋晚飯食, 食完都係7點幾咋, hea到8點就同佢地沖涼, 再叫子元照顧住柏仲, 我去沖埋涼就餵奶啦, 一飲完就嘔, 不過嘔得出都好, 嘔咗好多痰出嚟, 但就有排執手尾, 好在老公剛返到, 我搞隻仔佢搞塊地, 嘔乾淨瞓得好囉, 我地就食吓甜品咁, 但子元臨瞓都要激吓我, 執書包校服茶點袋執到亂哂龍, 又唔見咗個餐盒, 淨係呆喺到, 唔識諗吓點去解決, 係要爆吓佢先得架, 吓吓我幫你善後有幾難, 但你自己就冇咗個解難能力嘛, 不過都係激到我死架啦! 搞掂佢地咪打吓機囉, 老公就掛住睇波, 但我陪到咁上吓頂唔住, 睇哂步步驚情就瞓先, 一上床就瞓著!

25/4/15

 

25/4/15   SAT   WARM

今日主要活動係柏仲interview, 可惜子元又要踢波又要乒乓波, 陪唔到柏仲去in! 朝早我揍子元去畫班補課, 老公揍柏仲入嫲嫲到, 等佢可以瞓一覺先! 我就照常返工啦, 放工就直接入青衣, 食咗飯先落去, 不過柏仲又開始多鼻水, 真係麻煩, 唯有食住藥尾先, 但都係咁流鼻水同咳, 唉! 差不多夠鐘就同柏仲撘巴士落去康傑啦, 去到都係2點左右, 大家要喺出面排住隊先, 咁我地都照排啦, 柏仲算係好合作, 冇周圍走, 只係間中搞吓其他小朋友D衫呀咁, 不過天氣好熱吓都幾辛苦! 終於入到去, 柏仲已經即刻比龍校長捽面仔, 貼好名紙就先入房睇校園同課程介紹! 不過邊睇得到呀, 小朋友又唔肯坐定, 柏仲都唔例外啦! 終於睇完就出去玩車等叫名入去in, 我地都唔玩得幾耐, 因為第二個就叫柏仲啦, 望入2號課室見到莫老師, 仲以為佢in添, 原來去3號房, 周老師都認得我地, 先安頓好柏仲比嘢佢玩, 周老師先問我嘢, 佢都問得好搞笑, 係巡例問吓我點解要選康傑, 咁我都巡例答吓啦, 答完問題到柏仲啦, 叫佢將青蛙仔放入另一個碟, 冇咩難度啦, 但之後比車同波佢, 佢淨係想搶, 好在免強都講到車同波個音! 跟住係木板玩具上, 將唔同動物放番原位, 簡直係不可能的任務, 佢只係將D動物疊起咋! 最後係聽指令, 叫佢去遠處攞個包比媽媽, 都做到啦, 但問佢你比個包邊個呀, 佢死都唔出聲! 咁周老師都冇佢辦法, 咪放佢走囉! 出到去仲有禮物攞添, 不過都係奶一支啫! 喺出面同龍校長佢吹咗陣水啦, 都係套吓佢口風, 佢都話舊生一定要留番個位比你, 但都係嗰句啦, 一日未交留位費一日都未安心! 吹完水就返上去嫲嫲到啦, 放低柏仲後出去同老公會合, 接子元放乒乓球, 返屋企沖個身又要出門口, 因為6:10要去荃灣睇復仇者2呀, 好在趕得切! 其實節奏都幾快, 都睇得吃力架, 我都唔知子元睇唔睇得明! 睇完都8點幾, 嫲嫲打嚟話出咗荃灣, 交收番柏仲比我地喎! 仲諗住輕鬆食個晚飯添, 最終打的返去屋企, 老公買米線, 我返去同兩隻嘢沖涼, K.O.埋柏仲就邊睇電視邊食, 食完抖陣都瞓, 已經勁眼瞓!