31/10/19

31/10/19.   THU.    COOL

今日都係老公揍我地返工返學啦，返到去學校門口，咁啱係Miss Pong睇門口，同佢傾咗幾句關於仲爺的學習啦，都係得意。。。但唔上堂又寫唔到字咁囉，佢係要啲時間架啦！朝早阿姐好快就出咗去，所以一直自由時間，快手食完飯就過咗mega box幫仲仲買手工紙，仲去IKEA食咗杯雪糕，好滿足呢！下午阿姐突然又閃咗，完全放心地吹水找資料，都係中學啲料啦，睇到放工快閃回家，睇好佢地啲功課，有嫲嫲煮飯食好快就食完，沖好涼又要溫書啦，不過今日都唔係溫得好多，尤其子元又係唔肯喺我返嚟前讀熟，真係好激心！

30/10/19

30/10/19.   WED.    COOL

今日都係hea日子，朝早如常叫仔起身返學，老公車我返工，食埋早餐呢！返到去都有嘢做，早上算係難得咁忙，所以時間過得好快，午飯食住飯同catherina佢地吹水，時間又過得好快啦，下午阿姐出咗去，又有一個自由時間，但其實真係冇咁多自己嘢做，所以都覺得有啲浪費咗！放工回來後阿媽就即閃，攞咗公司飯返去食又慳又快手！食完飯捉埋佢地沖涼後就開始睇功課溫習，10點幾己經瞓咗，不過我都好眼瞓口啦！

29/10/19

29/10/19.   TUE.    COOL

今日涼咗好多呀，真係開始入冬了！朝早落樓都幾大風，返到學校都算早，返埋公司樓下都係8點多，可以慢慢食早餐先返工，今日都係超hea的過，加上阿姐下午又出咗去，簡咗放縱人啦！午飯後跟咗ivy佢地出去啟晴買嘢，又買咗啲百力滋比仲仲啦！下午返咗去整相，都係執吓過吓相又做吓嘢咁啦！放工返到去又要變身做工人煮飯，食得嚟洗埋沖埋涼都9點，又要執仲爺啲功課，叫子元溫吓常識啲字佢又溫到瞓咗，明天或者食外賣算啦！咁先夠時間溫習，一個人溫兩個人份，原來真係好難！10點幾比佢地瞓啦，我亦要睇我的電視！

28/10/19

28/10/19.    MON.     COOL

今日都係如常咁返工返學啦，食埋早餐返到去都係hea 吓啦，今朝做好哂啲嘢先，阿姐下午放假嘛，咁下午梗係做自己嘢啦！午飯食完大餐就出咗去，去咗買卡字整英文字卡比仲爺，係咁架啦，點都要用啲方法去補救吓！放工架巴士勁快，返到去準備吓煮飯，睇埋子元啲功課，但就係同唔到佢溫書，平時真係好難溫習到，真係好難搞，唯有之後幾日點都溫啲！等老公佢地同仲爺回來就開飯！仲完涼同仲仲做埋功課，係咁二溫咗少少英文就比佢去瞓！

27/10/19

27/10/19.   SUN.  HOT

今日都係一個被困的星期日，一朝早老公揍咗子元去比賽，我就瞓到差不多11點先起身，仲爺喺個廳又開哂檀咁啦，起身梳洗後叫佢執好嘢，我就煮早餐，都係食個麵同埋啲湯就算！跟住就捉佢入房做埋啲功課，做英文反而仲難做，一來多啦，二來佢睇一個字母寫一個，真係有排搞！做到咁上吓我都要睇埋子元啲功課等等，老金3點幾返到嚟，車我地出去食啲嘢，又差不多時間回來游水，我就買材料整明天帶飯，返來整薯仔沙律比佢地！夠鐘又要去接仲爺，佢條友又話肚痛要休息，搞到我都幫唔到佢溫書，等子元回來後先趕哂兩個入房做！8點幾等佢抄好篇文就叫醒老公出去食飯啦，想食打邊爐，以為9點後有平，點知好多都冇，咁近近地去咗新都會，點都有得食！試咗間叫是馬但，不過不失啦，食得嚟都11點，返去快手沖涼瞓覺啦，明天要返學！

26/10/19

26/10/19     SAT.    HOT

今日係一個忙碌的星期六，8點多叫老公起身揍子元返去補課，然後我地就去食早餐，10點接番子元就去畫班，然後返屋企做功課，做到12點多又要換衫去踢波，先接咗子元就過石門，都有啲遲架啦，上半場出咗一分鐘就完場，要等下半場，仲爺係走位走得太遠啫，其實都可以！睇完就閃，又要趕去海怡學音樂，3點多去到可以食埋嘢先，我就去撒利亞食到夠鐘先去接番，點知上咗巴士先見到仲爺冇攞ukulele ，局住落番車，勁火！又要比多次錢再撘嘛⋯⋯但我好痴咁徰番去總站同司機講，佢又比喎！咁坐到6點幾返去，子元已經返到，嫲嫲上咗嚟包雲吞比我地食，咁晚餐就唔洗煩，專心同仲爺做功課，7點幾食完就睇電視休息，10點要仲爺去瞓啦，咁我先做到嘢！

25/10/19

25/10/19.   FRI.    WARM

終於捱到星期五啦，都係咁返工啦，同老公食埋早餐就返工啦，今日都係冇咩做，朝早襯阿姐唔喺到馬上scan哂子元啲cert，然後做CV，今日主力都係做呢項工作同埋吹水啦，午飯喺位食咋，跟住都係打吓機咁啦，下午繼續悶，但阿姐喺到冇得咁自由冇得玩！放工撘巴士返去，點知寛車塞到爆，7點多先返到屋企，仲要趕7點半去睇仲爺合唱團小小音樂會，仲爺例牌聲又冇動作又慢半拍，唱完就同子元會合去麥記食安格司包包，冇同程家去食因為一早應承咗食麥記嘛！不過等咗半個鐘先有，真係好耐！回家沖涼趕佢地去瞓，我就摺衫囉！

24/10/19

24/10/19.   THU.    WARM

今日真係好唔順利，由早到晚都係咁唔順利！返呢份工以來第一次遲到，其實只係食咗早餐先渣車過去啫，都唔係遇得好少時間，但真係塞到呢，條條路都係咁，佢又唔係撞車喎，就係慢同停囉，因為車多嘛！唉。。。真係好唔開心！返到去又要send番email去同阿姐講聲，總之就係煩囉！今日真係冇咩做，hea住咁過！午飯出咗去食，因為今日個飯聽個名已經覺得唔掂！下午悶到個人好呆，打機都打唔到咁耐，嗰4個鐘真係難過！終於捱到放工，完全冇諗過補番遲咗嗰9分鐘，借啲二快閃，話咪話囉，平時早番嗰啲時間又唔見有得早啲放！快衝過去九龍塘接手仲仲，今日條友踢波又唔專心，玩多個踢，仲要比人點名話， 唉！撘車返去時諗住試吓撘到去紅磡轉，但原來都係唔work，仲遲咗添！返到去嫲嫲諗住等埋我地返來先炒菜，但整得嚟都9:45啦，仲爺啲功課又出哂事，又要刷過哂去做，結果之後就算快做快沖涼等等，都搞到11點幾，我真係會痴線！

23/10/19

23/10/19.    WED.    WARM

今朝老公揍我地返工返學，食埋早餐返上樓開工！不過今日都冇咩特別趕做，遇到嘢做就做啦！午飯同咗catherine佢地入房邊食邊吹水邊打機咁！下午都係做吓公事做吓自己嘢，放工返去又要去過錢比老公，返到去阿媽就即刻走啦，都唔知係咪仲爺激親佢！子元去咗踢波，我可以慢慢煮飯，搞好哂仲爺的功課，就煮好飯等笨元返嚟食飯清潔等等，叫做同佢兩個搞掂哂就可以摺衫休息了！

22/10/19

22/10/19.      TUE.    WARM

今朝要自己揍仔返學，但就處於琴晚未完的精神狀態，想仲爺睇多幾睇啲數，但原來佢個頭腦都係睡夢中，又要趕出門口咁，又鬧又拉咁嚟行，其實真係好辛苦！我覺得自己最顛嗰吓係，行到荔枝角出咗閘時，見到啲「狗」經過，嗰吓真係無名火起，反正都顛緊，嗰個勢應該連狗都驚咗我，所以我一嘢撞咗埋去，但當然似係行得太快撞咗埋去，烈火中的老母都不應該惹！揍咗佢地返去就撘車返工，食埋早餐開吓工咁啦，朝早都有做嘢，午飯時食完就開始做埋個power point，因為阿姐下午放假，梗係全個下午都罷工啦，係咁做自己嘢，放工返去又要做工人做補習咁啦，今日功課冇咁多，但仲爺都係唔識合作咁，不過阿媽功夫足，叫做做得八八九九，我執埋手尾，食完飯沖埋涼先同佢對一對功課，溫埋明天中進，盡人事咁就算，因為迫佢都冇用啦，佢仲未夠能力！

21/10/19

21/10/19.   MON.    COOL

今日都係如常返工返學啦，食埋早餐就返工啦，blue monday真係冇咩mood做嘢，但點都要搵啲嘢做吓先易啲過日神，但阿姐喺到又做唔到啲咩真係可惜！午飯時間有餸加，當然有我整嘅紅燒肉啦，係唔夠軟啫，大家都話味道ok！食完飯跟咗ivy佢地上去德福，因為有張健康工房的卷未用呢！下午時間過得仲慢咁，雖然有做嘢但時間都係過得好慢！捱到放工行過去九龍仔會合，中途買咗個袋比仲爺，因為佢欠個啱size的背包！過到球場接埋子元，老公都差不多接咗仲仲過到嚟，去長沙灣快食完晚飯，返去先係戲肉，因為仲爺啲功課根本一團亂咁，最大穫係有10句重組句子，結果做到12點多，都唔知打咗佢幾多巴，根本就係要迫！但咁樣教咗兩個鐘結果咩家務都做唔到，一堆衫係到等我摺，老公完全幫唔到手！

20/10/19

20/10/19.   SUN.    WARM

今日都是一個被困的星期日，都是要困獸鬥！朝早8點幾9點起身揍子元去補英文，然後同仲仲去大家樂食早餐，撞到個中學同學一家呢，仲爺又要同人地坐隔離又要吹水咁，本來食完平時都可以去遊樂場下已玩，但因為仲爺的英默未溫過，都係要買埋餸早啲返去，笨元就補完自己返嚟，然後我就補英默玩了一日，又係地獄無限中，直至佢地游水，我仲係處於好恐佈的狀態，係咁恐嚇仲爺，因為咁先平衡番我之前幾個鐘的心態！佢地去游水時我就整個東玻肉，應讓人有七八成似掛！6點又要接番哂兩個返嚟，因為泳池突然關閉！咁我就邊煮飯邊迫仲爺繼溫書囉！最後仲捉佢做埋啲數先得，因為星期二數進呢！

19/10/19

19/10/19.   SAT.    WARM

今日子元要補課，未夠8點就叫老公起身揍仔過去，我都差不多要起身梳洗，本來諗住食埋早餐上阿媽到幫佢鑽牆，但佢又話未得咁早，所以我同仲仲返屋企做功課溫書先，12點仲爺又要出發去踢波，我就過去畫室接番子元，順手食埋午飯先返嚟溫習！今日進度都算ok，中英文都溫到，一對一係好好多！等老公揍仲仲學完音樂回來，收拾吓又出吓街，因為仲仲要買新波boot，出咗新世紀睇，順手食埋嘢，跟住就回家睇電視，有雷神第3集睇嘛！

18/10/19

18/10/19.   FRI.    WARM

今朝喺長沙灣食埋早餐先返工，搞到好緊張，因為慢咗，57分先返到去呢！今日想做自己嘢都冇咩機會！因為阿姐全日都喺到呢，唯有做吓工事啦，午飯又逃咗去同catherine佢地食！食完吹水吹得好開心呢1下2午都真係做嘢，出哂啲noticer呢，放工快手返屋企接手仲爺，夠鐘就帶佢出去合唱團，然後出咗去行咗個圈諗緊好唔好買嘢煮飯，但最終都係返去煮，但煮 得嚟都夜啦，快泊戈搞掂瞓覺啦，但笨元又唔做好功課，咪局佢入去做埋先淮瞓囉！

17/10/19

17/10/19.   THU.    WARM

今日繼續都係老公車我地返工返學，食埋早餐就返工啦，今日要做嘢啦冇得咁悠閒了因為阿姐返番嚟！朝早都係咁過啦，做吓嘢咁，捱到午飯就食完喺位做功課，本來諗住只係lunch做，但之後都係偷偷摸摸咁做埋個power point，因為阿姐今日好好火，一日都係IA唔好啦，查到人地都唔知點答佢好，放工前叫做做好哂啦，等組員們睇埋先！放工撘巴士回來時睇埋FBI，已經miss 咗兩集啦！回來只係煮飯，老公今日off嘛佢負責，咁襯佢揍咗仲仲去踢波就睇埋佢地啲功課先，差不多9點先返到嚟，我襯老公煮嗰時教埋仲爺做功課先，飯後又係要清潔啦，其實佢地真係要自動自覺啲先掂，踢幾踢都唔郁真係唔知仲可以用咩方法！

16/10/19

16/10/19.    WED.    WARM+

今朝如常咁返工返學啦，同老公食埋早餐就返去，阿姐今日全日都出咗去，我地就超放縱啦，基本嘢做齊就算，跟住係咁做自己嘢，我主力係同仲仲啲卷做後期加工，真係做咗一日呀陰公！食飯前收到學校電話，笨元去咗醫療室，話個腹痛喎，其實應該都係上次個波餅未好番，但冇諗過佢要去醫療室囉！午飯同咗Catherine佢地食，吹住水咁幾開心呀！下午繼續做啦，手指都軟！放工馬上返去煮飯揍仔，但時間永遠都唔夠用咁，對得呢個功課又對唔切嗰個，總之就令人好困擾啦！

15/10/19

15/10/19.    TUE.    WARM

今日真係未停過手，呢兩個月人手少咗嘢就自然做多咗，咁就真係少咗好多時間做自己嘢！朝早老公車我地返工返學啦，然後就車我返工食早餐，返到去開始冇停過手，做到午飯快手食完就去咗mega box買練習，好多阿媽喺到選購呢，本來我要嗰本係冇喺書架，咁咪問吓職員囉，原來今日返咗貨，佢仲馬上幫我打埋價錢，真係好好！買完仲去咗ikea買咗杯雪糕食，好吸引呢！下午返去又係未停過手做到放工，幾時先有時間做自己嘢呀！放工馬上返屋企，快手煮飯啦，笨元又話肚餓啦，飯後又係冇停手，功課家務全部冇停過，兩個啲功課又要對，連書都冇機會溫，點搞！

14/10/19

14/10/19.   MON.    WARM *

今日嘛， 係13週年結婚紀念日，但因為老公要返工，連食餐晚餐嘅機會都冇，咁就食宵夜啦！朝早如常咁返工，同老公一齊食早餐咁啦！返到公司都係開工啦，放咗日假又要清嘢都清一輪！午飯又有得加餸，不過出得嚟行遇咗要還，都要輪到我整嘢返去食架啦！飯後去咗德福買今晚配冰酒的火腿同三文魚！下午都係做吓私事多啦，放工馬上去交收仲爺，入石門踢波，我就去買埋麵包先返球場，都係對吓功課咁啦，踢完沖埋身返得屋企都差不多9點，還要食飯趕功課沖涼，笨元夠膽話未做好嘢，仲要覺得冇問題喎梗係片佢啦！好在有嫲嫲煮飯，食完就教仲爺做埋啲功課，其實唔難但想佢寫好生字簿，唔洗浪費時間改正，但條友仔又眼瞓啦，好在最後都完成哂所有嘢先瞓但都已經11點幾，老公放工回來我都未沖涼！等佢好努力咁開埋支冰酒就可以慶祝我地結婚13週年啦！話咁快就13年，細水長流也是一種相處！

13/10/19

13/10/19     SUN.     HOT

今日瞓到九點幾， 快手起身叫醒啲大爺，反而我個仲爺就起咗身梳洗好換哂衫喺到等，好可愛呀！揍整子元去畫班就去食早餐，然後返屋企溫書，仲爺都算叻仔喎，中默溫得好快，真係大個仔咗啦！跟住休息吓又叫佢練吓uklili啦，之後hea咗陣，老公返公了，子元 又話要食嘢，咁就煮午餐啦，書櫃有咩就食咩，好在嫲嫲有留糧响比我地啫！食完再係溫書啦，4點幾出去游水啦，跟住我去買餸，接番仲爺回家就煮飯，子元就自己游完返來！之後都係食飯清潔睇電視咁啦，明天又要返工了！

12/10/19

12/10/19.    SAT.    HOT

今日都係一個忙忙碌碌的星期六啦，8點幾叫老公起身揍子元去補英文，我就瞓多陣先，等佢回程先梳洗出去食早餐，不過咁就全部嘢拖延咗啦，食完早餐都未洗好車，我就要行返去接子元順手交埋學費啦！回家後梗係做功課，預計都有3個鐘，兩位都算做好對好功課，子元就由daddy帶去踢波，我就帶仲仲去學音樂，今次真係學樂器啦，係學小結他呢！等佢時去咗食撒利亞，真係又扺又好食！放咗學就揍仲仲去尖咀，老公等子元踢完波都過來回合，先去睇玩具，跟住就去咗city super買壽司返企食，晚餐後老公去踢波，我就K.O.仲爺再要摺好多衫！

11/10/19

11/10/19.   FRI.    HOT

今日射波，因為要水運會，7點起身梳洗啦，雖然勁近喺隔離個泳池啫但都要行落去架，放低佢地我同老公就去食早餐，然後先返泳池，好在有程太阿may佢地幫我地霸咗位，不過今年呢個場又迫又熱又曬，真係攞命！睇咗熱身先啦，仲爺游咗3米左右啦就郁唔到，大黃Sir用浮板拉佢地上嚟，真係好好笑！終於到子元游25米自由啦，得第二咋但其實已經好好，後來先知快過佢嗰個係校隊，不過都冇辦法啦！襯有時間睇吓我隻仲爺，原來喺看台乾煎緊，陰公囉！我即刻出去同佢買寶礦力，借埋遮比佢遮太陽，一口氣飲哂支寶礦力之後已經好好多，都冇咩幫到佢，各有各等啦！終於等到佢游啦，都知仲爺實游唔到，要波sir拉住佢塊浮板返嚟！睇埋子元游蝶式，就叫老公帶仲仲去換衫！子元50嗰兩項都係差不多包尾，但對住咁多校隊冇辦法啦！1點到終於放哂可以回家沖涼，快食埋個飯老公返工，我攰到支持唔住喺梳化瞓，但又電話又message又有人聲咁嘈醒咗我幾次，3點幾咪起身囉，本來諗住去睇完醫生攞射对紙可以返一轉康傑探老師，但因為5點先有得睇，所以同仲爺去行埋圖書館再返屋企睇吓有咩功課要做，5點落去睇完，揍埋子元出去球場，同仲仲行吓759咁，又早啲返小童比佢玩吓，然得合唱團，完咗老公揍埋子元回來，去咗長沙灣食晚飯就回家了！

10/10/19

10/10/19.    THU.    HOT

今朝要整午餐盒，真係有啲趕！揍咗佢地返學我同老公就去公司樓下食早餐啦，返到去都係吹吓水先咁啦，跟住就要做嘢啦，午飯後食多咗嘢，因為又有尖椒皮蛋食！跟住同埋catherine出咗去德福行，想睇吓有冇泳褲仔買比仲爺，著住條沙灘褲游泳比賽好似怪怪地，但最終都係買唔到，因為就嚟冬天嘛，冇泳褲買係正常！下午啲時間過得好慢，等好耐都未放工咁，覺得已經做咗好多嘢咁！放工接埋仲仲去踢波，好在今日石門站開番啫！但平日個出口封咗要行另一方邊！等仲爺踢完要快走，因為9點又冇車啦，唔走都唔得！返到嚟都係即時有得開飯啦，食完嫲嫲就洗埋碗，等我有時間做吓嘢

9/10/19

9/10/19.    WED.    WARM

今日都係老公車我地返工返學啦，食埋早餐就開工啦，不過都係吹水多過做嘢，冇法啦，唔算趕個人就放鬆架啦，跟住就係等開飯啦，今日有尖椒皮蛋加餸，食完咪做專題囉，做到食完飯都照做，阿姐好忙咁都唔得閒理我地！今日又係放5點，約咗阿媽喺長沙灣站等，交收仲爺，因為笨元自己過咗去練波，但我又唔放心佢一個返，所以都係揍住仲仲過去接佢，順手同仲爺喺球場做功課，冇辦法啦佢做得咁慢，唔咁搞點掂！走嗰時有車車我地返到美孚，兩隻豬話要食麥記，咁都好嘅快靚正，回家後沖涼做埋啲功課，同仲爺再溫默書，救得幾多得幾多啦！10點幾放生我可以自由了！

8/10/19

8/10/19.   TUE.    WARM

今日返工都塞咗半個鐘車，地鐵死咗1/3嘛遇咗架啦，東九龍先係重災區，我仲趕得切同老公食埋早餐算唔錯！返到去都係做嘢啦，時間都算過得快，午飯後係咁做功課，好過打機浪費時間嘅！做吓嘢又做吓功課咁，4點幾阿姐突然話5點走得， 梗係好事啦，有得早走喎，但諗番走早的原因其實又唔係咩好事，真係好矛盾！唔理得咁多啦，去到巴士站迫到上車就迫，快啲返到去阿媽就可以返屋企，都係又教功課又要煮飯咁啦，最慘係仲爺做功課係遊雲咁，但冇可能企喺佢隔離望住佢做架嘛，真係好難搞！終於食得飯，洗碗抺地沖涼再溫吓默書，又要同笨元睇功課，好在10點半起得切睇911！

7/10/19

7/10/19.   MON.    HOT

今朝瞓到10點多先起身，11點多先出去食早餐，唔想再困喺屋企，於是買埋餸跟住去咗青衣城行吓都好，其實都冇買嘢， 係睇吓嘢囉，2點多要走啦， 因為老公要返工，車咗我地返屋企佢就返工！返到去有咩做，梗係溫書啦，咁成個下午流流長，溫吓停吓又整啲嘢食咁啦，時間都過到嘅，7點幾先煮晚飯食，跟住都係日常咁洗碗清潔沖涼休息啦，明天要返工返學啦，唔知市面情況點呢！

6/10/19

6/10/19.   SUN.    WARM

今日除咗去畫班食早餐，就只係困喺屋企，真係好難捱！朝早問咗畫室有開，但都趕唔切9點嗰堂，所以慢慢等佢地起身梳洗食早餐才過去，我就喺萬寧買埋嘢先，返到去要同仲仲溫默書啦，老公差不多時間就去接番子元返嚟，齊齊困獸鬥啦，到兩點多老公煮咗嘢食，食完都係叫佢地做吓呢樣叫佢地做吓嗰樣，我都唔知自己做咩咁，老公就走咗去瞓，其實佢喺屋企除咗煮咗餐晏之外就係瞓同打機，搞到我同子元溫書時仲仲喺咁走入嚟，加上子元極其心散，完全溫唔到咁！晚飯都係我煮好叫佢起身先起身食，食完又係坐埋一邊囉，跟住我就開始燥底啦，啲嘢全部run得唔順暢，人為嗰隻呀，成日叫我要控制自己，咁邊個去執手尾？咪又係我，正仆街！玩你就識得玩，話我同個仔溫書時鬧，到你同佢溫時你咪一模一樣，咁有咩資格話我先！真係好火好燥呀，叫人唔好做嗰啲佢就做哂！

5/10/19

5/10/19.    SAT.    HOT

今日起身就要馬上叫醒佢地出門口去補英文，除咗去補英文都冇咩地方可以去，揍咗子元過去我就同仲仲食早餐，然後去遊樂場玩咗陣就接番子元回家，期間去咗買餸，本來想去圖書館借書先，但笨元又話要便便，都係返屋企啦，收拾好再出過去，先去郵局攞封掛號，再去圖書館借書，但竟然1點話要閂門，泳池又閂，即係局人地喺屋企啫，因為全線港鐵都停哂嘛，大家好似返咗40年前咁，得番巴士囉！返屋企後都係hea過，睇吓功課先，跟住煮午飯，食完再同仲爺溫書，老公話出去食晚飯咁咪出去囉，又冇咩喎，但真係百佳惠康7仔都閂哂，完全不合理，打風都唔會啦！食完老公就同子元去咗踢波，我同仲爺返屋企，都係嗰句啦，得番我同佢喺屋企時佢係合作架，仲睇今日喺圖書館借回來的書呢！打暈咗佢摺哂啲衫都11點多，老公佢地都未返呢，但知佢地12點都會趕返嚟睇足球小將囉！

4/10/19

4/10/19.    FRI.    HOT

今日-真係唔識形容！早上還是一個正正常常的香港，下午開始，瘋狂了！
一早我仲係揍仔返學，自己買早餐返工，快啲返去做好嘢，趕咗一朝做好哂，食埋個飯就走，去學校聽小一家長會嘛，點知期間已經不斷收到message，講到好似要落閘放狗咁啦，明明2個幾鐘的家長會，大半個鐘都冇就要我地走，冇得入課室見班主任等等，大家都話請半日假聽嗰半個鐘， 唉！喺操場搵番子元同仲爺，就去Aeon等老公嚟車我地，又要買餸又要食tea 咁，差不多5點多先返到屋企，捉佢地做功課先，我還要落去超市買嘢，真係買咗好多，所以要叫子元落嚟幫手拿！返上樓要開始煮飯等等，Gloria同程家佢地都上嚟食飯，咁就煮一大餐同吹水咁啦！還要傾吓project 咁先得，11點多佢地就走啦，沖埋涼就抖吓啦，今日個腦好亂！

3/10/19

3/10/19.   THU.    WARM

今日都係忙碌到一個點，朝早老公車我地返工返學，但笨元都係咁話遲真係好令人心煩！食埋早餐返去開工，都係一邊吹吓水一邊做嘢！午飯同咗Catherine佢地食，吹水時間過得特別快，下午又係狂入嘢囉，所以又係轉個眼就放工！月頭的時間最易過！放工即閃回家，督住笨元做功課同埋煮飯，食住等佢地返！飯後要趕沖涼做功課對功課等等， 做到11點多呢，要兩邊走咁真係好攰！

2/10/19

2/10/19.   WED.    WARM

今朝老公返早，我要揍兩個返學，子元又係趕頭趕命啦，所以去到荔枝角站我就叫佢自己行先，我買早餐比仲仲慢慢行住食！揍咗佢返去我就返工啦，今日要自己買包返公司食啦，朝早都係自己做吓嘢，做埋個專題先，下星期一要交初稿！午飯後快食完出咗去書局睇吓有冇專題想要嗰本書，都係冇！下午返去努力工作，有好多嘢要做呢！放工馬上返屋企，邊同仲仲做功課邊煮飯，等老公回來都9點多，快手煮飯回家等佢地返嚟食，飯後做埋家務，睇埋功課可以瞓覺！

1/10/19

1/10/19.    TUE.    HOT

今日係一日假期，但香港人已經冇咗假期，因為你已經冇地方可以去，商場閂了，路面是防暴和TG，你話我知可以去邊！10點幾終於比佢地嘈醒，都係時候趕番佢地入房做功課，然後叫老公起身煮早餐，等仲爺溫埋中默就出咗去，本來想去深水涉但又封了，最後選擇咗荃灣，見到愉景明明冇封架，但去到都係封了，所以只係隔離商場食咗午飯，順手去攞埋舊書同校服，喺橋面望左一陣都係要返去，因為防暴真係過緊嚟！返番屋企又好似咩事都冇出現過咁！返去溫完書5點幾出咗去球場踢波郁吓，然後返去沖個涼，本來諗住去長沙灣食飯，但都係唔去咁遠，近近地美孚食算數，大家都只能留在本區，地鐵閂哂咁想點！食咗餐貴嘢就回家休息，明天又要開工了！