31/1/21

 31/1/21     SUN.    COLD

今朝發夢發到亂晒籠，搞到我都瞓得唔好。等老公上完慕道班，就出去荃灣同佢哋兩個剪頭髮，去到可以放低佢哋我哋自己去食早餐，但食完早餐返到去都仲未有得剪住，所以我哋去咗千色店行，咁行完返去佢哋就剪好啦！同佢地去麥記食過嘢就返屋企，老公又趕住出去教會領堅震，所以我做喺屋企做家務，又換床單又洗衫其實都幾忙，叫子元做得幾多功課就做咗佢，唔好再拖，不過應該都冇做晒㗎啦！仲爺就自high玩開舖，有Cafe有餐廳有音樂舖，越玩越亂一房都係又比我鬧啦！期間阿媽打過嚟，話自己喺地鐵站暈倒撞到個頭又問我去唔去睇醫生，我覺得星期日去邊都冇得照，不如星期一先去，但其實佢自己都想去睇，咁唔使問我啦最終我哋搭緊巴士過去食飯嘅時候先收到通知話阿妹同左佢去醫院睇，結果咪又係喺醫院瞓一晚明天先有得做，咁我哋唯有自己落車買啲嘢食返屋企食就算啦。

30/1/21

 30/1/21     SAT     COLD

今日都係如常的星期六, 不過今朝出去食埋早餐之後, cube cube就比我地賣咗啦, 算啦都要準備走, 反正牌費保險都到期, 賣到咪賣咗佢算囉! 食完早餐買咗啲餸回來, 老公就執埋車啲嘢攞去賣, 我就喺屋企吽吓先, 等老公搞掂啲嘢就出去學音樂, 本來我唔出去都得, 但又唔想再吽喺屋企, 咁就一齊出吓去啦, 仲爺學嘢我地就食嘢, 順手訂埋蒸焗爐個架, 咁接埋仲爺就回家! 返到嚟老公整起啲餸就去瞓, 仲爺就自娛啦, 我就只係摺咗啲衫咋, 差不多煮緊飯時接到子元個班主任打嚟, 講番子元個學習狀況, 關於冇交功課嗰啲囉, 查實個衰仔有時係冇交或者遲交, 但我對香港個教育真係已經唔想再上心, 所以有時都有啲放鬆咗! 盡量補救吓啦, 好頭好尾嘛! 食完飯都係清潔休息啦!

29/1/21

 29/1/21     FRI     COOL

星期五啦, 終於返埋今日就有得抖吓啦! 返到去就食早餐啦, 然後都要扮吓工, 因為真係冇咩要做, 午飯本來諗住食雲吞就算, 點知Ivy蒸糯米雞, 我又蒸埋一份, 食得飽得滯啦! 食完就去德福買餸啦, 今晚都要煮飯嘛! 下午返到去都係吹吓水啦, happy friday嘛係應該咁架喎, 放工返去就煮飯啦, 阿媽好似好攰咁, 快啲煮好等佢食完可以返去休息! 仲爺呢又冇人管住之下功課甩漏哂啦, 罰佢要做哂先,冇得睇電視住, 佢就喺到喊囉, 但喊都冇用都人要做! 

28/1/21

 28/1/21     THU.    WARM

今日終於有機會Work from Home，但係一日要鬧仔其實仲攰，朝早瞓到九點起身，仲爺竟然冇上堂喺度睇機，我即刻鬧咗佢一大餐，真係好可惡，本來想瞓多陣先起身都唔得！起身整早餐食，順手一路望住仲爺有冇偷雞唔上堂，11點幾阿媽無端端走咗過嚟，原來佢記錯咗今日係星期五要過嚟睇住佢哋，最終等子元上完堂我哋就車番佢返長沙灣。仲爺呢啲功課其實都唔係咁難做囉，點解佢可以做咁耐有咁好心機做，又激到我發晒老皮真係好辛苦。食完午飯，老公趕時間返工，所以佢就走先，我湊住佢兩個去買埋今晚嘅餸，因為諗唔到食乜所以決定咗整雲吞，買材料就搭巴士返屋企。返到去都係等佢兩個快啲做好功課，我就喺度包雲吞啦，之後都係吽下。晚飯我都係星期五做運動沖涼休息，明明今日唔使返工唔知點解都係好攰！

27/1/21

 27/1/21     WED     WARM

返埋今日終於可以放一日假啦! 朝早如常咁返工整早餐食啦, 跟住都係冇咩做, 咪同Ivy吹水囉, 阿姐又好似唔抵得我地吹得咁開心咁,總之佢就係佢多嘢做發脾係係應該的咁! 都唔理得咁多啦, 自己做自己嘢, 放飯就食飯, 然後出去買餸咁囉! 下午回來本來都冇咩做, 點知KIKI咁啱找我問嘢, 就喺電話吹咗大半個鐘水囉, 好快又放工, 返去慢慢休息吓再煮晚餐, 今晚食西餐, 因為M&S的牛肉等價好抵食呢, 之後好眼瞓呀, 睇睇吓太平紋身店瞓鬼咗, 今日真係好眼瞓!

26/1/21

 26/1/21     TUE     WARM

今日才星期二, 不過時間都過得快, 朝早有啲趕返到去, 整早餐食啦, 今日Ivy終於返嚟啦, 咁我就可以悠閒好多, 又可以有人講吓嘢, 之前真係好多個鐘都冇講嘢! 朝早都係hea住過, 食完飯上德福行吓買埋麵包, 下午返去做苦力, 又要分前線啲小禮品呢! 做到放工呀, 攰死我! 回家後又要做, 唔係煮飯係分好仲爺啲功課呀書呀等等, 嫲嫲煮好飯食得, 洗埋碗做埋運動就沖涼睇電視, 太平紋身店真係好好睇!

25/1/21

 25/1/21     MON     WARM

今個星期要返四日, 休得嗰一日星期四但都好過冇啦! 朝早如常起身返工啦, 今日其實都冇咩做, 所以咁時間先難捱, 打機都打到唔係好想打, 因為其實都幾浪費時間架嘛, 但上網又好難喎, 阿姐成日都喺到, 都睇唔到啲咩! 午飯食烏冬加雞胸肉咋, 所以上到德福買餸後又忍唔住買咗個tat囉! 下午時間始終過得快好多, 得嗰兩個半鐘啫! 放工返去就煮飯食囉, 子元去咗練波, 阿媽喺到食埋先走, 所以都冇等笨元回來, 佢條友又撘過龍去咗荃灣西, 叫咗佢唔好瞓架啦! 今晚做唔到運動啦我, 琴日陪跑完其實都周身痛, 真係年紀大啦, 半個鐘跑咗4K已經攞我命! 所以做完家務就沖涼睇電視埋啲衫休息!

24/1/21

 24/1/21     SUN.    WARM

今日應該瞓到自然醒架嘛，點知老公個鬧鐘聲又嘈醒我呢，等佢上完慕道班就出去食早餐，出咗荃灣行，點知收到阿姐通知又要去驗，因為office曾經有密切接觸者！咁梗係行完街街買完嘢先去驗，點知點半去到放飯喎，又要遲啲再來過！返去捉仲爺抄一次生字，子元要去跑步，跟住就去嫲嫲到，先去食咗下午茶，跟住老要做工程，但整咗好耐，不過都係未搞掂，一句講哂當初唔買樓就冇事！7點幾買埋晚餐回來食完先返屋企。老公要子元重新跑過，因為唔及格，子元梗係西哂面啦，最終我陪佢落去跑，卷個鐘我跑咗4K都算係咁啦！返到嚟仲爺好乖咁係要幫手摺衫，咁我咪去沖涼囉，真係要休息吓！

23/1/21

 23/1/21     SAT.    WARM

星期六都係要8點起身，因為要揍子元補習，跟住就到我地去食早餐，買吓嘢，交埋學費返屋企，子元做功課上zoom學「大號」喎，局你要學咩學校呀！仲爺都係做功課，下星期二要交嗰啲嘢要執齊！一點幾出門口，到仲仲學音樂，買個麥當勞喺車食，揍咗佢去就到我哋食午飯，等仲爺學完嘢就去街街，去咗油塘大本營，睇吓嘢買埋晚餐返去食呢！

22/1/21

22/1/21     FRI.    WARM

星期五啦，終於返埋今就放假啦，返到去食埋早餐就打陣機，然後做嘢啦！今日都算有嘢做，所以時間係過得快啲，不過收風話今日有花紅出，但都唔見，唯有再去收吓，又話跟月尾糧，總之有就得啦！午飯掛住睇仔仔，mirror go真係好好笑！見仲有時間就出去EMax行咗轉，但都冇買嘢！返去咪做嘢囉，喺呢到最緊要唔好做多，仲有做嘢要大大聲比人知咁囉！放工本來諗住老公可以過來接我，但睇番佢好似趕唔切，都係自己撘巴士穩陣，回來還要教仲爺功課呢！之後都係食飯啦，嫲嫲煮好飯又洗埋碗咁，我就專心教埋仲爺功課囉，夠嘔血！

21/1/21

 21/1/21    THU.    WARM

終於捱到星期四啦，今日只係遲咗少少出門口啫，竟然變得咁趕，臨尾要跑返一個街口先至講得切3分鐘前返到去打卡。返去食埋早餐，仲要扮工啦！因為今日真係冇咩趕要做，所以我竟然打咗一朝機，仲要放返時間可以睇吓電視節目！然後就上德福買餸啦！下午返去其實都係冇咩做㗎，點都搵啲嘢扮吓樣啦，放工準時返去煮飯食，咁早返到嚟就可以早啲煮飯，七點幾已經食完，個人都有啲精神做好埋清潔，做好埋運動先沖涼休息。

20/1/22

 20/1/21     WED.    WARM

只係星期三咋，今個星期幾時完，幾時先放假，我好想瞓晏啲！返去食完早餐就開工啦，好在阿姐今日出貨冇叫任何人support，加上的都留番啲嘢今日慢慢做，點都要做吓樣好忙嘛！午飯就咁食個牛骨麵唔掂，但又要買餸咁，出咗去先算，回程時先買個飯團，仲有7-11的今日限定$1咖啡，但上到去已經好忙，食都食得唔enjoy！做嘢做到4點幾真係做完，好好等收工，撘咗地鐵返去，見到話九龍灣炒車嘛，唔博啦！返到去休息吓就煮飯，老公同咗兩隻豬去跟操，7點幾先返到，食完都係要洗碗等等，但啲男人係咪應該幫吓手呢，嗟都我做咁！今日又好攰，唔想做運動啦！

19/1/21

 19/1/21.    TUE.    COLD

今日都係努力工作啦，都叫做on schedule做好應該做嘅嘢！返到去食咗個早餐諗住開工，點知部電腦改完密碼就開唔到outlook，係咪罷工先，唔好玩嘢喎！開予幾次終於得番就做啦，用盡個朝早終於做哂會議紀錄，但諗住放工先send比條pk！午飯後都係上德福行，想起要買襪比子元，又比我搵到喎，真係好抵買呢！下午時間過得好快，做好嘢仲有半個鐘自由吓，放工入大窩口，因為老公話要去嫲嫲到整嘢，咁就過去買埋外賣食囉，7點幾回程，返去做咗運動沖涼，趕仲爺做埋功課可以休息，

18/1/21

 18/1/21     MON.    COLD

又到星期一要返工喎，真係好攰好唔想起身，但都要死返去做嘢㗎 ！返去食埋個輕量早餐早開工啦，真係做足一日架，當然期間有打咗陣機但係都係一路打一路做，聽住收音機其實時間都過得幾快，食完午飯上德福買埋麵包又返嚟做過啦！下午啲時間其實已過好多因為兩個幾鐘又放工啦，但係返到屋企對住做嘢又要交功課仲要係英文，其實仲慘過返工，跟住心情都唔係幾好，個人又開始攰，脾氣變得異常差總之就係冇晒心情個人好down好唔開心！

17/1/21

 17/1/21     SUN.   WARM

今朝8點幾就比老公個鬧鐘聲嘈醒，所以等佢上完慕道班就出去食早餐，然後去買餸，今晚要煮生日飯比阿媽同阿妹，買完返屋企，捉埋仲爺做功課，都做咗好耐，期間子元同老公都落去跑完卜步，回來食咗啲嘢先咁囉！老公就喺廚房玩咗一日呢，7點多佢地來到就準備開飯，食到8點幾切埋蛋糕啦，今次蛋糕係柚子味，我就覺得好啱！清潔完都休息打機洗白白，明天又要返工啦！

16/1/21

 16/1/21     SAT     COLD

都係一個正正常常的星期六, 子元自己去補習, 我地就瞓到9點幾, 等老公都肯起身都已冇早餐食, 唯有去荃灣食一間12點前都仲有早餐的, 跟住返長沙灣買餸, 然後買埋飯比子元, 因為佢要上咩鬼管樂喎, 都唔明點解要迫人上啲唔知咩, 暫時未話要交錢, 但我真係好唔想子元浪費呢啲時間囉! 返屋企要仲爺做多陣功課先出去學音樂, 一去就幾個鐘, 返到嚟就錄影, 因為見google classroom黃老師話可以交才藝表演, 咁今次咪打鼓囉, 又搞咗成個鐘! 6點幾又要煮飯, 笨元叫肚餓啦! 簡單煮咗焗三文魚飯咋, 清潔完做埋運動沖涼, 就捉仲爺去瞓覺囉!

15/1/21

 15/1/21     FRI     COLD

終於捱到星期五啦, 今個星期真係過得好慢, 我都開始精神唔夠啦, 冇法啦返咗咁耐一半日子, 突然間返足5日真係頂唔住! 返到整好早餐食, 然後咪開吓工囉, 其實都叫做冇咩停過, 因為要做埋Ivy嗰份嘛, 咁都好阿姐唔會又話我地得閒囉! 其實個個都係咁架啦, 邊會8個鐘都唔停手喎! 午飯後上去德福行咗轉, 幫芳芳姐買咗啲嘢咁啦, 下午返去都係聽住收音機做嘢咁囉, 放工老公嚟接我, 又去咗Mega Box行咗陣, 去埋KFC先返去食, 之後都係睇吓電視啦, 我真係好攰呀, 放番兩日假好好抖吓先!

14/1/21

 14/1/21     THU.    COLD

終於到星期四啦，今個星期真係過得好慢， 太耐無返足一個禮拜，真係唔多習慣！今日都係忙架啦，食完個早餐就好開工，啲嘢做極都唔完咁呢！終於都放飯，快啲食完快啲出去買餸，真係諗到頭爆！下午返去都冇咩停手，做到放工快啲閃，有巴士好快返到去，早啲都好飯早啲食，咁阿媽可以早啲返屋企！還要捉仲爺功課，成日借啲二唔做哂，好可惡！

13/1/21

 13/1/21     WED     COLD

今日一朝早就整喊我, 條仆街真係正仆街, 明明講咗叫佢做啲嘢, 借啲二又射比我做, 講咗阿姐都同意咗, 都係要咁, 迫我同Ivy合力, Ivy同阿姐爆佢, 我就委屈地眼淚攻勢, 而家明開拖架啦, 點呀!

火完啦, 講番朝早先, 悠閒地食個早餐嘛, 工作我係會做, 今日最主要係下午要監督會take minutes, 真係好大壓力, 我都習慣咗唔洗錄音, 抄only 去take minutes原來都難唔到我, 話哂都做咗13年秘書, 你估真係流咩, 只係想唔想做咁解啫! 蝕咗咁遲咗15分鐘放工架啦, 返得嚟都6點多, 阿媽唔喺到食, 咁就等子元踢完波差不多回來先煮, 食完清潔時間拖得好長呢, 因為又想睇劇又要洗! 10點幾趕仲爺入去瞓我先去沖涼!

12/1/21

 12/1/21     TUE.     VERY COLD+

又要返工啦！為錢為錢，記住呢點！返去食埋早餐咪開工囉，做呀使，又係時係放飯，食飽就出去行吓，又買咗少少零食咁啦！下午返去都要做架啦，成日support人，又要relocated 過啲job，又唔見有人接收吓的啲嘢，講起都火！放工閃人，返去執埋仲爺功課啲手尾，就準備開飯，有人煮埋飯飯係好，但有時都係想靜下咁，咩都唔想理！不過都要洗碗清潔等等工作要做，又同炮哥佢地吹吓，新裝番啲社交媒體咁囉！

11/1/21

 11/1/21     MON.    VERY COLD

今個星期要一月開返工啦，唔想都要想，返到去吹陣水食埋早餐就開工，其實你話好多嘢做又唔係，總之keep住就有嘢做啦咁樣時間都過得快啲。一路做到午飯食完就出去行過圈，買麵包買雞蛋咁又返去啦，咁咪繼續做嘢囉有咩特別姐，基本上個個都係機械人咁樣過！放工即閃，返到去有湯飲有嘢食，不過要等子元踢埋波先至開飯，有嫲嫲煮好飯，不過真係好怕佢用到我個廚房啲嘢亂晒大籠！慢慢邊睇電視邊洗埋啲碗，睇完劇先至去沖涼都10點幾11點啦！

10/1/21

 10/1/21.    SUN.    COLD

今朝瞓到8點幾，都ok啦，但hea到9點幾先起身呢！老公話侷要補眠先，所以就等佢瞓到11號幾先叫醒佢起身出去食早餐，或者應該係午餐，去長沙灣食完就返屋企，約咗嫲嫲3點，咁就等夠鐘先去接佢，去咗德福食牛牛牛嗰晚打邊爐，不過都等到差不多4點半先入到去，食到6點點前就要走啦，去咗行街街買嘢咁囉，又買衫又買無印咁啦！最後行到7點幾送埋嫲嫲返去，我地就回家，執好買返嚟啲嘢，做運動等，就沖涼睇電視咁囉！

9/1/21

 9/1/21     SAT     VERY COLD

今朝真係好唔想起身呀, 不過叫子元自己行去補英文又好似好殘忍咁, 所以都係車佢去啦! 跟住食埋個早餐先去接番佢, 然後就返屋企啦, 叫仲爺做埋餘下的功課, 1點半又要出發去學音樂啦, 過到去佢先食個麥記, 然後去學嘢, 我就自己去食lunch囉! 回家後做埋一樣功課, 明天都要溫吓書先得! 6點幾煮飯, 今晚焗雞咋, 本來想煮意粉, 但仲爺又鍾意食飯咁就煮飯囉! 飯後做埋運動就沖涼睇電視!

8/1/21

 8/1/21     FRI.    VERY COLD

今日真係好凍啊，不過唔使返工都係好嘅！但下個星期再預返足啦，不過可以賺足佢賺錢咁就算啦，反正工都係要返了！咁我哋搞掂晒啲嘢遞信比佢嘅時候你就一定要好型！起身八點幾因為要睇住仲爺唔好偷懶上堂，食個靚早餐然之後接下衫，老公瞓到10點幾十一點先至起身，終於都上完堂啦，佢又要返早兩個鐘喎，所以11點幾12點就出門口啦！子元下午去踢波，帶佢去到美孚站撘西鐵入大埔簡單啲！我就同仲爺去咗買餸，真係好凍呀！回來後仲仲就做功課，我就煮嘢，又煲湯又煲羅漢果水，還要預備晚飯，不過笨元都差不多8點先返到嚟！

7/1/21

 7/1/21     THU.    COLD

今日又要返工啦，真係好唔想起身，但都要起架啦！返去食個靚早餐就開工，冇停手咁做，午飯後梗係出去行吓啦，買埋早餐麵包比佢地，又要返去做嘢！都係有停手啦，不過時間都過得好快，等老公過來接我，叫子元攞埋袋衫仔上來比個同事就得。諗唔到食咩，咁就不如去IKEA買外賣返去食！返到屋企，上咗一轉4LC屋企，佢地今晚就飛，突然間快到咁，見佢地仲執緊嘢，真係好唔知點咁，得一句講，煲底見啦！晚飯都係做埋運動沖涼睇電視！

6/1/21

 6/1/21     WED     COOL

今日瞓到10點幾先知醒, 仲爺例牌唔睇實佢就唔上堂, 比佢激死! 整咗早餐食, 老公11點幾先肯起身, 咁就車我地出去買啲餸佢就返工, 因為今日要返早一個鐘, 咁買埋飯返去, 子元就上完堂, 食完飯就休息吓, 2點就過荔天, 要去交功課交書單等等! 來回都係行路, 又買吓嘢食咁啦, 返到去教埋仲爺功課, 佢做功課真係蝸牛咁慢! 教完抖陣又要煮晚餐, 簡單煮雞扒飯咋, 食完咪清潔睇電視囉, 咁又一日啦!

5/1/21

 5/1/21     TUE.    COLD

今日又要返工啦，六點幾起身個天仲係好黑，我返到去買個包食個早餐，就幫手做嘢啦！嚟緊都應該好多嘢做，亦未必有的成日WFH，因為嚟緊有兩個同事都要請假，仲要請好耐，諗起都唔開心！但都無奈要接受，搞到我真係想快啲走！是日一真都係做嘢同吹吓水咁啦，時間都過得快嘅！放工回家，點知龍翔5串燒，我差不多6點半先逢到去，還要煮飯呢，不過今日都係簡單嘢啫，所以都好快手！9點幾10已經好眼瞓，要喺梳瞓陣先頂得住，今朝6:30實在未習慣！

4/1/21

 4/1/21     MON.    COOL

今日WFH，加上又開始上zoom的日子，都係喺屋企做吓嘢啦，8點幾起身食個早餐，又要捉住仲仲好好上堂，唔好偷偷睇機！等佢地上堂時就摺哂啲衫先，子元1點先放學，出去食埋飯，買埋早餐返屋企，老公趕住返工，就唔好車我地返去，我地自己撘巴士！返到到先係做功課，還要搵齊星期三要交的功課！期間我仲要煮埋個牛腩蘿蔔呢，然後捉子元落去跑步，仲仲就踩單車，我就行住打吓機！6點幾返去就煮飯食，然後都係如常咁囉，明天又要返工啦！

3/1/21

 3/1/21     SUN     COOL

今日瞓到9點幾10點, 起身後老公捉子元落去跑咗5K交功課先, 跟住我就整早餐同仲爺食先, 因為約咗Joe佢地行山, 都係好易行的山, 青衣細山! 約咗1點子元又話唔去, 咁喺屋企溫書啦, 都冇咩要執啦, 1點多過到去, 先食咗嘢先, 跟住就喺美景嗰到出發, 係多樓梯但都算易行, 景又靚! 我地邊行邊抖邊影相, 都係行咗2個鐘左右, 真係抵玩! 喺最頂影靚相, 老公仲同兩個細去咗個山邊石位影, 真係令我心驚膽戰! 準備回程, 老公知道抄牌, 馬上落山先, 開定車喺落山位等我地, 所以一落到嚟就可以上車, 都係好事, 因為我已經在腳震! 返長沙灣買埋餸回家煮, 點都食吓屋企飯啦, 慳好多呢!

2/1/21

 2/1/21     SAT.    COLD

星期六都係瞓到飽系列，但子元英文補習又話要改番星期六，真係好亂！十點幾起身後睇埋空間改造王，12點幾先出門口去食嘢，然後齊齊過海揍仲爺去學音樂，都係hea過，又買吓用品咁囉！學完嘢又唔想咁早返屋企，老公諗到去赤柱行，仲爺都冇去過，咁就去留個念啦！睇吓日落影吓相，行到差不多6點先走！返咗長沙灣買晚餐，已經好餓了！食完又係hea囉，或者做人就係應該hea吓！

1/1/21

 1/1/21    FRI     COLD

新的2021年來了, 琴晚玩得咁盡, 所以瞓到11點幾12點先起身呢, 等大家都hea夠出得門口去食早餐都已經係食tea時間啦, 去君日食完嘢就先去大圍站幫子元攞番張學生個人八達通, 諗唔到去邊嘛, 咁就去咗西貢行吓啦, 都係睇吓嘢食吓嘢咁啦, 順手買埋今晚晚餐啦, 呢樣買啲嗰樣又買啲, 有Pizza有泰國嘢等等, 返到去做埋運動沖埋涼, 咁就邊食邊睇叱吒頒獎禮啦! 2021年的第一天就咁樣過咗!