31/10/16

31/10/16   MON   COOL

今朝好似唔係好夠瞓咁, 但都要起身, 仲要叫埋老公起身, 佢話佢整午餐盒比子元嘛, 咁我就專心搞掂佢地出門口, 老公整起餐盒又再瞓, 佢又瞓得番架喎! 揍咗子元上校車就返學返工啦! 朝早返去都係開吓會咁啦, 跟住都係寫日記做吓自己嘢, 午飯去攞錢順手買飯啦, 跟住老細返咗嚟, 完全阻住哂睇唔到電視! 下午都係做吓自己嘢, 但後來老細過咗嚟, 梗係阻住哂啦, 點都要做吓公事囉! 放工Gloria幫我接咗子元嚟公司, 不過個衰仔喺學校玩話劇玩得顛得滯, 嘔完個人冇哂力咁, 真係完全唔識自控! 放工就返屋企樓下惠康買餸, 返到去就抖一抖執吓嘢先煮飯, 同佢對功課先, 明明派咗英進評卷, 但又唔記得帶番嚟, 由得佢明天欠啦, 要佢付吓責任! 對好功課叫佢改, 佢就喺枱瞓咗, 最後老公返到嚟咪叫佢瞓陣先囉, 食飯出嚟! 食完收拾好洗好碗, 已經8點幾, 子元都仲係未做好我比佢的練習! 結果只可以跑步冇得打波, 但跑步佢又因為兩星期冇跑, 又跑到死死吓咁! 真係好激氣!! 返到上樓交咗溫中文的重組句子同標點比老公教, 我呢排好亂, 冇哂方向點同佢溫! 10點幾沖好涼, 老公今日攰啦明天又要早返公司, 所以佢瞓先, 我睇埋芉月先瞓!

30/10/16

30/10/16   SUN  WARM

今朝唔洗接敏瑩, 所以勁遲先出門口, 9:20先上到畫室, 仲仲又畫吓嘢咁先去食早餐咁啦, 跟住本來想去入咗油先接子元, 點知又塞車, 我要行老遠去接, 買齊埋嘢就接子元, 返屋企又要溫書啦, 溫到咁上吓就要休息, 都係換床單, 又喺床下底搵番趙學而的CD出嚟過落手指放喺車廳, 喺個塵封的紙箱找到很多中學年代GE嘢, 又執又睇咁到3點幾先去食嘢, 近近地落樓下咋! 食完返上樓仲爺瞓覺, 子元就再比D練習佢做, 但佢都係仲有錯囉, 不過都好少少架啦, 都唔明溫書究竟係佢GE事定我GE事! 到7點幾就出去食飯, 去咗北海道食就算, 回來都沖涼瞓, 子元又要再做練習! 對好都要佢瞓啦, 我地就睇埋芉月先瞓!

29/10/16

29/10/16   SAT   HOT

今日長周要返工啦, 仲爺6點幾就已經起身, 完全冇理我感受, 搞到我勁頭痛囉, 激死! 返到去都係hea, hea到差不多放工叫咗老公帶佢兩隻嘢上嚟, 最終係子元帶住仲仲上嚟, 子元仲話佢差D記錯樓層! 玩咗陣落番樓就去食嘢, 食完子元就去乒乓球, 我地就回家, 仲爺瞓咗, 我整咗陣嘢到3點幾都瞓陣, 老公去咗接子元, 等佢地返嚟, 仲爺又醒咗就要同子元溫書, 都係溫吓常識先, 溫極都仲係覺得佢唔夠熟咁, 因為老公9點喺葵芳踢波, 所以去咗葵芳食粥嗰間, 仲仲真係識食, 米芝蓮就搶食! 食完本來想買番對拖鞋款涼鞋, 但就係冇囉! 咁老公就去踢波, 我地自己撘地鐵返去, 沖好涼都係hea, 冇再溫書啦!

28/10/16

28/10/16   FRI   HOT

又到星期五啦, 今日都唔算有咩忙GE, 朝早要整烏冬子元帶返學啦, 跟住就好趕, 去到青衣已經8:30, 啱啱趕得切開門入去, 唔係又要排隊架啦! 返到公司就都係做自己嘢, 午飯後都係睇電視啦, 下午老細返咗, 都係開佢地D高層大會啦, 我有我做自己嘢, 好無聊咁整咗張旅行資料比我D團友, 真係整到好似人地旅行社嗰D咁囉! 放學買埋D餸就返屋企, 整好一部份又趕住出去揍佢地游水, 之後接埋仲仲就返屋企, 又要煮飯又要睇住仲仲, 都有D難度, 因為佢係咁走入廚房! 煮好飯佢地都未返到, 咁咪洗好D嘢先囉, 沖好涼食得飯啦, 都叫做順利, 9點半前已可收碗, 仲仲同婷婷玩到顛, 所以都要早D同佢沖涼瞓覺, 但陸生去咗踢波嘛, 好在程太提出話幫仲爺沖, 咁我就可以吸塵拖地先, 仲爺又可以早D瞓, 大家今日都想早走, 因為都攰啦, 我抺好地都沖涼, 佢地10:30已經閃了, 我仲要摺埋衫先可以抖呢! 老公11點左右返到, 都係沖涼睇電視, 佢就食個麵先瞓囉!

27/10/16

27/10/16   THU   HOT

今日仲爺又一早起身啦, 夜晚冇跑步之後佢又變番早起, 咁好明顯係因為跑步令佢攰D! 一齊揍咗哥哥返學就到我地準備返工返學啦, 今日早到出門口喎, 難得! 我今朝直接過灣仔攞嘢, 所以喺青衣城食個早餐先, 然後慢慢撘地鐵過去攞完嘢喺街買咗幾張貼紙先返去, 冇咩特別嘢趕做, 只係要幫老細寄嘢, 又去埋郵局交錢買郵票咁, 買埋午飯返嚟! 下午老細都有返, 都唔算煩住GE! 放工去接笨元, 其實都有買餸, 但就係唔想煮, 可能攰了! 咁諗住叫pizza, 但老公話不如去深水涉買嘢食, 結果買得嚟返去都已經8點幾先食, 本來想早D食完幫子元再溫書, 咁溫唔到啦, 不過叫佢做埋嗰幾張工作紙, 咁佢又OK喎, 可見呢個每晚重覆又重覆做GE方法係work! 我今日真係好攰, 睇睇吓芉月都瞓咗囉!

26/10/16

26/10/16   WED   HOT**

今日都係如常咁啦, 仲爺又係一早起身啦, 齊齊送哥哥落樓返學, 然後就到我地返學返工啦, 返到公司今日都係hea, 朝早做吓自己嘢, 下午食完飯睇吓電視, 下午先要開Sales會, 跟住就開工展會, 開完都就嚟5點, 所以有嘢都係明天做! 放工去接笨元然後返屋企放下行裝就去青衣城, 因為嫲嫲部手機壞咗, 要再去買, 所以去咗青衣城食晚飯, 去咗食泰國嘢, 原來有D嘢都辣, 好在仲有D嘢唔辣都食得, 喺商務買咗幾本歷史版植物大戰疆屍, 等佢有興趣睇吓同歷史有關GE嘢! 回家後K.O.咗仲爺, 叫子元做埋功課同英文工作紙, 對好埋我就叫佢快D瞓, 已經11點啦, 我就沖涼摺衫睇電視瞓覺!

25/10/16

25/10/16   TUE   HOT

今日都係如常咁返學, 朝早都係咁返工返學啦, 返到公司整吓仲仲D相, 學校派咗隻N組的碟, 咪過番D相落去囉, 跟住就整商會嘢, 午飯都係睇吓電視食飯啦! 下午老細返咗嚟, 好在都唔係好多嘢搞, 都係佢地D高層開會啫, 我就自由活動啦! 放工去接咗子元就回家, 仲要接埋仲仲, 佢喺嫲嫲到飲嘢燙到個嘴, 搞到瞓唔到晏覺, 結果喺車到瞓咗, 咁就抬佢上樓囉, 放喺梳化由佢瞓吓先, 到我煮好晚餐, 同仲爺換埋片佢都唔醒, 就抱佢入房瞓, 我同子元就食晚餐, 今日食雞肉火腿芝士長通粉, 可以留番D料明天轉沙律醬子元又可以帶飯啦! 跟住都係沖涼, 叫子元做英文練習, 又做吓重組句子咁囉, 唉…好似好多嘢未溫咁, 但又好似唔知可以點溫, 書已經冇咩可以再睇, 反而係要佢做練習好過, practice多D好過! 等佢瞓咗我就休息, 堅喺攰, 本來想睇電視都瞓著咗, 瞓到芉月開場又醒, 老公11點幾返到嚟嘛, 佢都攰啦, 睇完芉月即瞓!