31/5/26

 31/5/26     SUN     COLD

今日食完早餐, 又係時候出去補貨, 今日去中超, 唔係老公就冇丁麵食, 買完返到去老公又要整埋條樓梯先, 我就要同阿媽講埋電話, 跟住仲要晾衫摺衫, 然後因為肚餓, 都要幫吓手整住碗仔翅先, 老公沖埋身先整埋有得食, 然後我又開始hea, 又係時候等老公煮晚餐, 今餐個麻婆豆腐好好食, 洗埋碗睇陣電視就沖涼休息!

30/5/26

 30/5/26     SAT     HOT

今日都仲係熱架, 只係冇之前咁誇, 今日主要活動去買嘢, 先去costco再去超市, 都已經好目標為本但係都攰! 因為wembley又有活動, 所以轉咗去hayes嗰間costco, 唔熟路所以都係買咗需要的就算, 跟住都係去買餸, 返到去仲要分裝埋晾埋衫先食嘢, 跟住就係預備睇波, 阿仙奴歐冠決賽, 可惜12碼輸! 因為繼續係好熱, 所以唔想食熱, 最終又係食麵食加涼伴雞, 簡單又唔熱! 喺廳坐咗陣都係返房沖涼, 真係好熱!

29/5/26

 29/5/26     FRI     HOT

今朝要去做pro-op檢, 約咗9點, 所以要老公車我過去醫院, 其實檢就唔耐, 都係抽血度高磅重量血壓心電圖, 應該都係為麻醉做準備! 咁檢完車我返嚟後又到仲爺要預備出去比賽, 咁等我休息夠啦就開始做家務, 除咗做清潔, 我仲抺咗廚房啲廚櫃, 因為真係好油呀, 跟住就食午餐, 方便起見煮咗粥, 做好哂嘢就食得, 跟住都係休息, 今晚會去正正屋企食飯, 佢地一齊踢波嘛, 去到都係食吓飯吹吓水咁, 兩個細未有飯食時都係繼續踢波, 玩到11點幾就走啦, 大家都攰啦, 要返去休息啦!

28/5/26

 28/5/26     THU     HOT

今日老公約咗人嚟睇條後花園樓梯報價, 都係估吓價先啫, 不過都要維修吓先用得, 頂住先啦! 食完早餐再hea吓, 就出去先攞藥, 跟住就去broadway, 老公要去剪頭髮, 我就要幫仲爺訂con, 買護膚品等等, 跟住就去食午餐, 簡單啲去咗食韓國嘢, 重點係有冷氣又人少, 不過對我嚟講行得有啲多, 去買埋廢水就回程, 我要返去休息了! 老公諗住維修樓梯點知差錯腳落爛咗嗰級, 好在唔算好傷但都係傷咗手腳, 陰公! 所以佢沖完涼就上咗房休息, 等到咁上吓先叫佢落嚟煮肉醬配麵食, 真係熱到唔想食飯! 食埋雪糕就返房涼冷氣啦!

27/5/26

 27/5/26     WED     HOT

今日繼續留在家中, 瞓到8點幾醒咗但睇機睇到10點先起身, 梳緊頭突然收到電話, 話星期五要去做手術前檢查抽血等等, 咁都正常呀琴日做完問卷下一步就係呢樣, 點知再過一陣又有電話嚟, 話有手術日期, 第一次打嚟話22/6, 咁都好啦, 真係一個月內, 點知唔夠一陣佢又再打嚟, 可以比到再早的期我, 就係下星期五, 咁真係好快喎, 梗係好啦! 所以都算係好, 快啲食埋個早餐, 再問清楚AI各樣嘢, 再通知埋老公要請假等等, 跟住寫埋email比學校, 下星期都唔返學啦! 跟住差不多夠鐘就繼續追劇, court真係好好睇, 之後整咗啲嘢食睇電視! 今晚唔想食飯, 簡單啲食手撕雞米粉就算! 

26/5/26

 26/5/26     TUE     VERY HOT

今日係倒垃圾先出過個門口! 朝早收到SMS要我填咗有關手術前的問卷, 都係好事但真係填咗我不多兩個鐘, 太多唔明的英文, 所以係咁要google translant, 終於填完都差不多12點幾, 落去煮早餐時仲爺先嚟煮, 可惡! 食完洗埋晾埋摺埋衫, 仲要等GP電話, 搞掂哂追埋劇, 仲要倒垃圾! 搞掂之後開始都係hea, 細BB仲hea, 係咁打機, 但我又真係冇咩比佢做, 我自己都係睇電視打機, 仲可以點呢! 食咗少少嘢! 跟住都係要煮飯, 不過真係好熱呀, 返房涼冷氣最好!

25/5/26

 25/5/26     MON     VERY HOT

今日繼續閉關在家, 今日仲熱過琴日, 以靜制動, 郁少啲好! 朝早10點多醒咗就梳洗食早餐洗衫等等, 仲爺有波練, 老公揍咗佢出去, 辛苦哂! 咁我就睇電視睇到都冇嘢啱睇啦, 佢地返嚟再叫嘢食, 搞到晚飯都唔知煮唔煮好, 不過最終都煮咗, 食唔哂明天就做午餐! 等子元沖埋涼先可以洗碗, 快啲返房開冷氣沖涼休息!

24/5/26

 24/5/26     SUN     VERY HOT

今日冇出過門口呀, 咁熱都冇咩地方好去, 瞓到差不多11點先起身, 先換咗床單, 老公就煮早餐, 食完都係hea, 咁我而家只係可以hea, 咁係咁食吓生果咁等睇波啦, 仲爺就要趕佢去做埋sparx, 咁就可以開哂幾個mon睇波啦, 阿仙奴就冠軍咗架啦, 係睇吓熱刺降唔降到班, 可惜就係西咸已經盡力win咗但因為熱刺都win, 咁就冇事啦, 可惜! 跟住都係準備吓晚飯, 整好部份老公就煮, 咁又一日啦, 返房開冷氣休息!

23/5/26

 23/5/26     SAT     HOT

今日好熱呀, 不過都係除咗買餸出去之外都係喺屋企, 朝早老公揍咗仲爺去練波, 咁我起身食得早餐都11點多, 本來話要1點先返, 但比賽取消咗, 就早咗返, 本來諗住去costco, 但因為有event, 所以就咁去買餸就算, 不過都去埋B&M, 睇吓有咩補吓貨, 買完返嚟就食埋啲飯團, 然後仲要晾吓衫啦, 跟住又睇吓電視咁, 都等到7點幾先煮晚餐, 開好冷氣先沖涼休息!

22/5/26

 22/5/26     FRI     HOT

今日請咗假啦, 搞掂仲爺出門口, 朝早襯自己仲有體力就做咗清潔先, 跟住都係睇電視打機等時間過, 老公返嚟就叫外賣, 食完就準備去醫院, 今日去做檢查, 檢完就可以有下一步, 不過又塞車又要等, 其實都搞到5點幾先開始檢查, 估唔到原來都幾驗重吓, 個肌瘤已經跌咗出子宮所以先至係咁流血, 所以又放唔到IUS, 加埋我地貧基因, 又高血壓咁, 醫生將我放咗喺urgent list, 正常2-4星期就有得做手術, 另外佢再加咗個CEPOD, 即係我因流血再入急症就24小時內要安排做手術, 所以基本上呢個月內我點都可以解決佢! 跟住去接番踢完波的仲爺和子元就去食嘢, 返到屋企就relax啲, 等沖涼又食藥咁囉, 當然又upload封新的信比AI睇吓! 都要諗吓過埋term break係咪要返工!

21/5/26

 21/5/26     THU     WARM

今日都係照常返工, 不過身體去到中午都係唔多支持得住, 雖然今日已經係輕鬆學生, 但始終都係好辛苦, 去到最尾嗰堂前真係覺得唔想再喺學校啦, 同阿姐講咗佢都同意我返屋企休息, 我都同佢講埋明天唔返, 咁未夠3點就返到屋企, 基本上攤抖住係好啲, 不過個人都係好攰, 唉....明天一定要叫醫院幫我搞掂佢! 除咗晾咗衫摺咗衫, 我都冇同細佬溫書, 琴日都叫做溫咗, 臨急抱佛腳都抱唔到咁多, 等佢試吓啦! 加上我開咗VIU套新劇睇, 停唔到, 本來都唔諗住睇, 但今日就係早咗返嚟, 睇咗臨尾少少都已經忍唔住揾番第一集開始睇! 咁老公返到嚟就一齊睇, 睇到差啲飯都唔願煮! 跟住食完飯都係睇陣電視先沖涼休息!

20/5/26

 20/5/26     WED     COOL

今日返番工啦, 不過原來真係相對地比較吃力, 因為我一行又好冇力又慢咁, 好在今日都係跟啲簡嘢, 所以必要時可以自我休息, 估唔到會對我工作咁大影響, 希望星期五見完醫生可以快啲解決咗佢! 臨放工收到另一個referrer, 我個肝終於有得睇, 但唔知佢又會做啲! 有啲辛苦咁終於捱到放工, 快啲返屋企先, 食嘢休息洗衫晾衫, 仲有就係幫仲爺溫書, 星期五考埋就得! 老公就要煮飯啦, 食完睇陣電視就沖涼休息!

19/5/26

 19/5/26     TUE     WIND

今日一心諗住去GP處理埋個問題, 點知等咗大半個鐘見到個醫生啦, 到檢查後先話佢地都擺唔到, 佢唯有寫轉介信等我星期五去醫院時可以檢查時做埋佢, 因為佢地冇足夠條件做! 唉! 咁我即係要繼續食藥, 所以去藥房攞咗藥先返去, 叫做好彩老公今日請咗假可以車出車入, 唔係我又要行餐死! 返到屋企即刻同AI商量星期五點做, 希望如佢所講到時可以約到埋手術期, 快啲了結咗佢, 仲有放埋個IUS, 咁就唔洗再食口服藥, 可以捱到排期! 跟住都係等食午餐, 老公都係叫外賣, 咁我就照食啦, 食完同佢一齊睇咗套劇, 係幾好笑的, 睇得嚟佢兩兄弟都返哂屋企, 仲要捉仲爺溫書, 自我感覺良好就算, 叫做有做過嘢, 佢都係考得唔好都冇辦法! 8點多開飯, 都係睇波咁啦, 跟住沖涼休息!

18/5/26

 18/5/26     MON     COLD

今日請咗病假, 廢事返到去又係好虛弱咁捱時間, 不如請假休息咗先, 明天去GP做咗個前期治療先! 咁今朝送咗仲爺出門口, 我就開始hea, 仲有洗衫晾埋衫先, 聽完收音機再睇埋21世紀大君夫人, 終於睇哂, 不過都忍唔住劇透咗先再睇, 節奏有啲慢! 睇完繼續食吓嘢啦, 仲爺要踢波, 咁我就要煮飯啦, 都係簡單啲咋, 食完睇多陣波先去沖涼啦!

17/5/26

 17/5/26     SUN     COOL

今日一家都冇出過門口, 咁又冇地方要去, 仲爺又要溫書, 啱架啦! 10點多起身, 叫老公煮早餐, 我就休息, 我暫時係應該要休息, 因為我真係冇氣冇力! 食完早餐睇咗一陣電視就捉仲爺去溫書啦, 都幾煩架, 叫條友溫書真係好吃力, 先係英文, 老實我真係唔多識點溫, 咁唯有比份卷佢啦, 但做完都唔識對, 好在可以叫AI改卷, 幫到幾多得幾多啦, 之後再做咗份數, 冇咩幾多時間, 佢又話攰啦, 咁我都攰啦, 之後睇吓放學返嚟佢做到幾多啦! 睇吓波攤喺梳化休息吓, 準備咗少少晚餐嘢, 主力老公煮! 8點多開飯食完洗碗休息啦! 

16/5/26

 16/5/26     SAT     COOL

今日我繼續係唔舒服, 呢種日子仲要過幾耐, 我係想快啲處理咗佢, 但窮人就係咁, 冇錢去私家醫院! 咁就繼續用自己方法頂住! 朝早起身食完早餐就係睇電視, 等到咁上吓仲爺踢完波返嚟老公食埋嘢就出去買餸, 佢仲有去買咖啡添啦, 買完返嚟我都要晾埋啲衫先可以進入休息狀態! 睇咗兩套短視頻, 係幾好睇! 之後都係好唔舒服, 不過再抖咗陣食埋晚飯好似又好番啲! 要捱到星期二呀, 加油!

15/5/26

 15/5/26     FRI     COLD

今日都仲係凍, 都唔知係我個人凍定真係凍! 朝早返到去都係唔多想郁, 好在三隻小天使有speech and language section , 咁基本上頭兩堂我都唔係好洗上, 好事! 叫做係咁二上咗20分鐘英文, 又係時候放break啦, 我身體唔係好合作, 所以除咗唔好郁咁多留吓力, 我都冇咩可以做, 失血過多呢樣嘢真係冇咩可以做! 我真係幾經辛苦先捱到放飯時間, 好在咁啱今日食熱嘢, 食完抖吓又好似好咗啲, 不過最尾兩堂都係好攰, 真係靠意志力去支撐住架咋! 返到屋企再食完嘢, 慢慢恢復吓, 等佢地出咗去踢波仲可以做到清潔, 不過之後都係攰架啦, 最後食埋麥當勞就沖涼休息啦!

14/5/26

 14/5/26     THU     COLD

今日要跟盲妹, 其實都攰架, 不過只要留喺課室, 其實都可以用番我自己個節奏嚟做, 但有時喺大房反而仲煩, 因為有其他人喺到指指點點其實仲煩! 另外就係今日有花生食, 兩條顛妹又打架, 我見佢兩個喺到就梗係閃得就閃, 有咁遠企到咁遠, 有咩都唔關我事啦, 仲企喺遠處同個香港人學生一齊花生! 另外今日都好攰, PE堂又要行圈喎頂, 雖然我已經行得好咗, 但行大半個鐘對我嚟講其實都攰架! 所以之後可以放飯我梗係即刻放啦! 我要休息啦! 跟盲妹好就好在可以早啲閃, 以今日比較攰的狀態係好事, 返到去都係要食嘢, 跟住晾衫摺衫, 然後我要休息打機啦, 今日冇幫仲爺溫書, 真係冇力, 佢又話要做功課! 食完飯睇多陣電視就沖涼休息啦!

13/5/26

 13/5/26     WED     COLD RAIN 

今日天氣真係好得人驚, 天晴落雨落雹無限loop, 真係好痴線, 本來我都以為自己避得過, 但去到放學嗰時都係避唔到! 講番今日先, 個人都係好攰, 好在係跟長留喺大房嗰個, 所以都可以hea, 佢又遲返喎, 所以已經係輕鬆咗! 本來諗住第三堂可以得我地喺房hea, 點知又有其他人喺到喎, 不過其實都唔理得咁多, 佢做好工作紙我都由得佢瞓, 因為我都唔係好想開工! 終於send 咗佢走我就開飯, 第五堂又比人改咗, 上上落落完一大輪, 被安排去二姐嗰堂, 但我真係想去, 同埋都得番半個鐘, 所以我逃走咗去sixth form後面坐, 咁啱有個學生行咗出嚟, 於是就同佢吹咗半個鐘水, 同學生溝通都係我地工作之一嘛! 終於走得, 諗住捱得過可以趕得切返屋企, 點知都係避唔到落雹, 好在啱啱去得切橋底避, 不過之後都係有雨, 返到屋企先出太陽! 返到嚟唔知點解好攰, 食咗嘢先叫做好啲, 今日都有捉仲爺溫書, 不過都好勞氣, 成日駁咀! 老公今日又要負責煮飯, 食埋涼粉就沖涼休息!

12/5/26

 12/5/26     TUE     COLD

今日都係咁開工啦, 唔算太辛苦係幾好, 不過係要跟另一個盲妹做training, 喺學校外學過馬路, 所以我都要跟住行咗大半個鐘, 係腳有啲攰囉! 跟住就係照常開工放飯, 冇咩特別! 收工準時走人, 返到去先倒咗垃圾再煮嘢食, 比仲爺再睇咗陣電視就要溫書, 不過一話溫佢就要POOPOO, 果然係懶人多屎尿! 最終5點幾終於可以開始溫, 其實都係督住佢架咋, 因為science我都幫唔到幾多! 不過都溫到開飯, 等老公負責哂煮飯, 食完飯仲有甜品食, Jenet又整咗pancake, 咁我都整番涼粉回禮! 都10點多先沖涼休息! 

11/5/26

 11/5/26     MON     COLD

今日冇返工, 因為係GP日, 有兩個appointment, 朝早係抽血, 1點嗰轉就睇knee, 其實都係嗰啲講法, 只可以靠時間去Recover, 一個月後再覆診! 抽血後去埋藥房攞IUS, 再返去煲粥做午餐, 但睇完物理治療先返嚟食, 跟住就開始hea, 佢地兩個放學返嚟就食嘢, 我就差不多5點多先食番琴日啲廚餘, 仲有整咗涼粉, 配番個西瓜嘛! 仲爺去踢波我就要煮飯, 都係簡單嘢啦, 食完食埋甜品就沖涼休息!

10/5/26

 10/5/26    SUN    COOL

今日主要都係要去買餸, 雖然今日係母親節, 但其實我冇咩話要慶祝, 不過老公琴日問我我就話想去試吓間日式pancake店, 都係喺broadway啫! 所以朝早等仲爺去踢完波回來先可以出發! 不過要講番今朝發咗個惡夢, 真係幾恐怖吓, 係喺一間屋但入面好亂好亂, 我叫極都叫唔出聲又叫唔到佢地執咁, 最終叫得出聲係因為真係喺現實中大叫咗, 又嚇醒咗老公! 講番下午啦, 買埋餸返嚟就一齊出去broadway, 先去食咗雞先再去試間pancake店, 我都係覺得原味好食啲! 食完去天天買埋嘢就回程, 返到嚟又要預備今個星期的午餐雞肉同菜, 差不多又要煮飯, 所以都唔係抖咗好耐! 仲有要洗衫摺衫呢! 咁又一日啦!

9/5/26

 9/5/26     SAT     WARM

今日其實都冇咩地方要去, 主要都係去costco買嘢, 不過都要等仲爺練完踢完波返嚟先可以, 所以朝早起身食完早餐就係咁睇電視打機, 其幾都幾浪費時門, 但間中都係要咁架啦, 等老公返嚟就出去啦, 明明唔係買咗好多嘢但都137, 不過有一半都係魚肉! 跟住買咗熱狗等等, 不過可能老公肚餓, 又冇諗過我叫咗子元佢地煮嘢食, 所以又買埋佢地嗰份, 呢啲咪又係做多咗囉, 不過佢都係唔認架啦! 返到嚟處理咗啲魚肉之後再準備晚餐, 已經8點幾先煮但都係唔係好餓囉, 食完繼續睇電視到10點幾先沖涼呢!

8/5/26

 8/5/26     FRI     COOL

今日都係咁返工啦, 第一堂個學生好遲先返, 其實佢又唔想學嘢, 我又唔想教佢, 所以hea係最好, 不過又唔可以太明顯啦, 其實冇人睇到, 我絕對唔介意比佢用電腦呢! 最唔好係第三堂飯桶無端端走咗嚟大房, 明明可以hea但就變咗要開工囉! 終於捱到放飯, 可以慢慢食, 基本上再返去都唔諗住再搵嘢做, 喺大房hea到夠鐘就收工! 返嚟食完嘢, 仲爺去咗踢波, 我就開始做家務, 收衫清潔同晾衫, 跟住就可以休息, 子元今日last day中學生啦, 下星期一開始考AL啦! 佢地踢完波買嘢返嚟食, 仲爺明明得到MVP禮物, 點知攞到個朱古力奶色返嚟就跌咗喺門口, 唉....佢幾時先長大! 食完嘢等佢沖完涼我都仲涼啦!

7/5/26

 7/5/26     THU     COLD

今日大致上都係咁開工啦, 學生唔難搞, 可以打機時就打吓機, 唔可以時就上吓堂啦, 準時放飯, 可以hea就hea吓, 放工返到去, 見芷悠媽叫我打比佢, 講申請student finance啲嘢, 其實都幾頭痛, 唯有盡力做, 咁我又盡力做諗住叫子元申請埋入境證明, 點知又好複雜, 咁我一頭煙老公又返嚟, 我唔想佢問我嘢所以一句stop咗佢, 叫佢唔好同我講嘢住, 但最終點都係搞唔到住, 咁我再問番老公係咪去投票, 佢就勁衰語氣啦, 咁就互撞發火啦, 佢又話要揍仲爺去練跑, 咁我梗火啦, 因為琴日講好咗話我等埋佢返嚟先一齊去, 但佢又話我咁, 佢出咗門口開始我就勁emo,  又開始係咁掟嘢, 但我都收哂衫晾哂衫先換衫出去, 先係自己去咗投票, 跟住冇馬上返屋企, 因為覺得好委屈, 唔想返去! 最終先去咗教堂坐, 跟住就去咗Lidi, 係買咗啲嘢, 叫做鬆咗少少, 但返到去煮飯時都仲係黑口黑面架, 因為真係唔好心情! 諗起都想繼續黑面!

6/5/26

 6/5/26     WED     COLD

原來今日都幾凍, 我都冇為意, 所以出咗門口先覺得凍! 今日都係輕鬆學生, 不過子元突然send個msg嚟話student finance嗰到要交entry clearance證明, 好在我有時間可以揾清楚資料, 唯有都係盡做啦, 不過返到屋企先可以教子元點做, 原來呢個初級大人都仲有好多嘢要學呢! 終於搞掂佢嗰到我又發現啲衫洗完要晾, 但我仲未食嘢呢, 最終子元都好乖咁捉埋仲爺上去摺衫同晾衫! 咁我就可以好好休息吓! 最終睇吓電視到咁上吓煮飯, 開飯老公就要睇波, 所以食完飯我都沖涼先啦!

5/5/26

 5/5/26     TUE     COOL

今日又要開工啦, 本來以為跟顛妹會好攰, 好在佢今日係水飯房, 所以某程度上我係輕鬆! 早咗出門口又出咗返到去, 有啲蝕添, 明天都係慢慢嚟! 由於今日要做AL的oral exam, 但負責人又好似咩都唔知咁, 搞到我要係咁自己上網揾, 好在有AI啫! 另外顛妹放break時要去HOY到, 但個老師又好似咩都唔知咁, 我真係好嬲囉, 啲高層可唔可以有啲系統, 唔好難為我地啲細! 終於完成埋個exam就可以收工啦! 今日都算完成咗好多嘢, 連醫院嗰邊個appointment都完成埋, 佢話可以照做喎, 咁就跟佢指示啦, 希望一切順利, 放工返嚟食嘢時連隻腳個物理治療都book埋啦, 咁就安心睇電視打機, 夠鐘就煮飯食飯, 老公就要睇阿仙奴, 贏咗入到決賽!

4/5/26

 4/5/26     MON     WARM

今日都係冇出過街, 一個bank holiday就喺睇電視同幫仲爺溫書中渡過! 朝早都瞓到8點幾又睇幾個鐘機先起身啦, 老公整早餐, 今日食中式, 蒸包, 燒賣, 腸粉, 粉果, 好味! 食飽睇咗陣電視就打比阿媽, 傾完就開始同仲爺溫書, 今日溫咗history同數, 真係好攰! 所以午餐主要都係老公煮, 跟住仲要整今個星期帶飯的雞胸同菜! 晚飯老公就主力煮, 之後忍唔住睇埋波先沖涼, 因為今場真係幾好睇!

3/5/26

 3/5/26      SUN     WARM

今日雖然有出過街, 但都只係去買餸, 不過就去埋中超, 所以都大半日架啦! 朝早瞓到10點幾先肯郁身, 咁就等老公煮早餐啦, 食完hea吓都12點幾先出去買嘢, 先買咗咖啡先再去買餸, 攞咗返屋企先, 跟住就再去中超, 返得嚟都3點幾4點, 老公整咗碗仔翅做午餐, 咁食緊時又睇波啦, 洗埋晾埋衫, 我就係咁打機, 要過關嘛! 晚餐又係好正, 買咗隻黃油雞嚟蒸, 仲有麻婆豆腐! 食完就睇番chill club年度榜, 表演好睇, 因為得獎都冇得唱歌, 咁又睇到11點幾先去沖涼啦!

2/5/26

 2/5/26     SAT     SUNNY/RAIN

今日我冇出過門口呢, 所以都唔知有咩好寫添, 朝早仲爺去踢波, 咁我就到咁上吓起身食早餐, 跟住都係hea吓, 佢地返嚟老公叫咗外賣, 食完洗完衫晾埋衫, 又係時候幫仲爺溫書, 因為今個月要考試, 點都要溫書呢, 都溫到7點幾連埋做功課! 跟住等老公煮晚餐, 我仲有午餐食唔哂的米線, 可以晚餐用嚟做主食, 跟住就咁睇電視到10點幾先沖涼呢!

1/5/26

 1/5/26     FRI     WARM

今日好攰, 三隻小天使真係令人好攰, 電話去到放飯都仲有70幾%電就知我根本冇咩機會攞部機出嚟, 所以收到有醫院信都冇時間check, 結果返得屋企咩都已經問唔到, 因為全部都收哂工, 所以靠chat最多係email同喺系統登記咗要改appointment日子! 希望下星期佢地開工就搞得掂啦! 講番喺學校, 除咗攰就係攰, 好似咁多個鐘都不停有人同你講嘢, 我都想唔應但又冇得唔應! 所以放得工我真係急不及待走人, 仲要去埋藥房呢! 返嚟終於搞掂啲嘢我仲要做家務, 清潔摺衫晾衫, 之後我已經攰到唔想郁, 最終老公佢地同仲爺練完波買麥記返嚟, 食完我仲係唔多好心情, 係沖完涼之後好啲啦但都係攰架啦!