30/4/16

30/4/16   SAT   HOT

今日都係辛苦的一天, 朝早返去食早餐, 然後10點多就要出去了, 過灣仔搞嗰個爛鬼活動, 攞齊貨落去車, 司機車我地過去, 但原來咁早去到都冇用, 因為嗰條街都未封路, 結果得個等字, 議員辦事處嗰到又話出咗去見市民, 結果分咗兩批等, 等到12點幾都未得, 我又返咗去議員嗰邊幫手攞貨, 路又窄車仔又難推, 幾經辛苦過到去攤位位置, 等到可以set up就快手做嘢啦, 我地呢D實務派嚟架嘛, 洗鬼人幫咩, 邊學得低B妹咁要人幫啫, 好在個promoter無意間幫我地出咗氣, 話:“唉…後生女就有人幫” 因為議員見佢開唔掂個易拉架就去幫, 我地喺到setup D枱就梗係冇人幫啦! 一路整嘢一路執生啦, 搞到點幾我都走啦, 因為要做的我都做哂! 咁返長沙灣找老公, 等子元放足球就去麥記午餐, 然後揍佢去打乒乓球, 跟住就返屋企! 仲仲瞓咗我小睡咗一陣, 因為今晚又要入天水圍食飯, 老公揍子元放乒乓球後又去踢第二場波, 我就等佢地返嚟先接我地一齊入天水圍, 其實都唔遠但入到去找停車場入口都亂亂地, 差不多7點才到! 都係食餐飯咁啫, 不過食食吓promoter打嚟, 話收檔嗰到遇到的問題, 咁我就要遇番之後兩日點安排, 不停whatsapps聯絡人等等, 總之餐飯都冇咩食過, 不過都冇咩所, 之後都去B仔食第二轉! 食完影埋合照就閃, 大家都閃得好快, 我地去到B仔嗰邊時都有落雨, 好在都唔係好大, 叫好嘢食等食啦, 好耐冇食過啦! 食食吓見到隔離枱原來係康傑28屆的同學仔, 咁遠都撞呢! 食完買埋外賣返去比嫲嫲, 差不多11點多先喺青衣走, 因為要等到夠11:30新停車場嗰邊可以入車, 見都夜開就等埋先入去! 所以返到屋企沖埋涼都已經好夜, K.O.咗兩個我地搞掂埋都點幾先有得瞓!

 

 

 

 

 

 

 

28/4/16

28/4/16   THU   HOT**

今日仲仲又係一早嘈醒我, 不過佢而家識自己玩或者唱吓歌, 唔會扭出房都好少少! 齊齊送哥哥校車就返去換衫返工返學啦, 今日有點趕搞到去到就啱啱開門! 食埋早餐就返工啦, 今日都係如常啦, 不過就要搞星期六攤位D嘢, 又要整咩鬼價錢牌已經整咗我幾個鐘, 唉…呢D咪一句話洗死人囉! 放工要買兩日餸先返去, 攞到手都軟! 返到去子元又未做好嘢, 仲仲個掛牌又唔見咗, 唉, 十九幾萬樣嘢煩! 老公話約咗休攞D coupon, 所以叫佢揍哂兩隻嘢出去, 等我靜靜地煮飯! 開好哂枱都未返, call咗佢地就返到啦, 食完各自做好嘢, 洗碗的洗碗, 沖涼的沖涼, 等我沖埋涼先同子元對功課, 都唔算錯好多, 默書阿媽話佢都溫好就放佢啦! 不過練埋波都10點幾先瞓, 我摺埋衫可以hea吓, 今晚唔係好多餸所以同老公齊齊食咗個杯麵先瞓!

27/4/16

27/4/16   WED   WARM

都係如常咁返工返學啦, 而家仲仲有份自己GE LEGO玩, 佢已經識砌埋啦喎, 果然係叻仔咗呀! 揍咗子元上校車就返上樓換衫啦, 揍埋仲仲就食早餐返工, 朝早都係做吓自己嘢啦, 午飯大家都冇帶飯就去咗D2食, 輕鬆吓咁啦! 下午回來又要開會啦, 其實開會都冇咩GE, 但我唔鍾意人地, 尤其是非上司人士點我做嘢囉, 所以我都好不悅地回敬番D文字比佢, 每人做嘢都有緩急先後架嘛, 你見人地未做就催, 仲要話係friendly reminder, 去死啦! 你估我真係好閒呀, 開完會返去又收到email話有貨收唔到, 又要打電話又要問又要覆email囉! 真係好火! 放咗工就去買餸啦, 返去不久老公都返啦, 煮完飯食完都係8點左右, 但子元又唔夠自覺啦, 又到前一晚先嚟做視藝功課, 結果我只係比咗半粒星佢, 希望佢明天再進步番啦! 老公食咗藥又係早瞓, 咁我搞掂埋子元去瞓再摺衫等等, 見仲有時間就換埋季先囉, 唔洗朝朝攞衫攞得咁辛苦!

26/4/16

26/4/16   TUE   WARM

今日婷婷請咗假, 唔洗趕, 照樣揍咗仲仲就食早餐返工, 返到去都係做吓自己嘢啦, 午飯後都係睇吓電視吹吓水咁啦, 冇咩特別啦! 下午都係做吓公事啦, 放工準時走, 老公喺樓下接我, 因為佢作感冒早走去咗睇醫生, 返屋企瞓咗轉, 已經好D啦, 因為約咗嫲嫲食晚飯, 佢去買洗衣機呀, 所以點都要出嚟! 去接咗子元先回家做埋D功課, 佢仲未做好嘛, 咁老公就去接嫲嫲佢地先, 用半個鐘叫做做好埋功課, 但食飯時叫佢用嚟睇書就唔鐘意, 話佢本來就唔想睇呢本要睇另一本喎! 食完飯佢去咗玩機, 我地就睇電器啦, 快手買了洗衣機都要走啦, 明天要返學! 返去先K.O.咗仲仲, 子元就要做埋功課的手尾, 溫默書等等, 但今日自覺性不夠, 我都講明冇星星攞, 要佢知道hea我係冇星架, 咁先配合到獎勵表的推動作用嘛! 老公病了早瞓, 我自己慢慢做埋d嘢睇電視到1點先瞓呢!

25/4/16

25/4/16   MON   WARM

玩咗兩日再返工, 真係少D力都唔掂! 朝早都係咁拖子元起身返學啦, 揍埋柏仲就食早餐返工, 返到去不久就要出去, 因為又要睇場, 今次同番自己友同事去睇, 好好多囉, 大家目標一致D, 總之想盡快搞掂個場, 老細心態先係重點, 睇完返嚟sales開完會就同老細滙報, 中午前就已經決定到啦, 幾好! 午飯後都係睇吓電視咁啦, 下午做吓公事又做吓自己嘢咁, 放工返去接子元, 今日派咗小考成績表, 成績退咗少少啦, 我話要開始番個To Do List啦, 成日都遊雲咁唔知要做咩又唔溫書, 咁佢講就講到天花龍鳳咁, 成日都係講就精彩過做, 不過佢今日又真係自動自覺咗! 晚飯後都係快手K.O.咗柏仲, 就可以跟埋子元功課溫習咁, 跟住佢仲要練波同打陣機, 10點半先瞓呢! 若佢呢個自動自覺run得好, 我就可以抽少少時間落樓跑番15分鐘步先沖涼呢, 肥到隻豬咁迎接夏天唔係咁好!

24/4/16

24/4/16   SUN   RAIN

今朝柏仲7點才morning call, 已經算好比面, 不過都係瞓得麻麻地, 所以7點半起身去梳洗時一用錯力就扭了頸, 痛足全日搞到都好辛苦! 大家都梳洗完就諗住去飯堂買麵食, 點知話跳咗線咩都煮唔到喎, 好在我地有杯麵啫, 叫咗填飽咗個肚啦, 跟住執好嘢就開始去玩啦! 先去咗做手工整熱縮膠牌, 跟住就去射箭, 然後就去兒童遊戲室放電, 因為11點後的活動係比日營玩, 所以喺遊戲室玩到12點就返去執齊嘢走人, 本來諗住去西貢食嘢, 但因為泊唔到車, D細路又瞓哂, 個天又落雨, 就返番長沙灣快食茶記就算! 回家第一時間沖涼, 老公好偉大地睇住佢地, 我執好嘢就入咗房瞓, 頭又痛頸又痛! 瞓到5點多就要起身, 因為book咗去愉景新城間日本嘢食晚飯, 約咗嫲嫲同大包一齊過去, 混混亂咁食完餐飯就去反斗成買玩具, 行咗陣就回家了, 明天要返工返學呢, 我返到去仲有好多嘢要執啦, 洗衫啦等等, 12點到就瞓啦, 我攰到好似比人打咗一身咁!