23/4/16

23/4/16   SAT   RAIN

子元8歲了, 睇番轉頭佢成長得特別快, 過幾年聲都變埋, 仲會唔會要媽媽摟呢! 今年安排了宿營活動慶祝, 不過第一個慶祝活動係去找葉醫生, 點都要睇咗先因為佢條氣真係好唔順, 不出所料真係要聞一劑醫院的氣, 搞掂攞埋藥都10點, 快手揍佢去畫班, 我地就去食早餐, 然後返屋企收捨行裝, 我就係咁執執執, 好怕執漏嘢呢! 12點多真係要出發啦, 去接番子元食個KFC午餐就過去西貢! 全朝都好好天架, 一出發就落雨, 真係有D灰, 只希望去到唔落雨啦! 車程上兩隻豬瞓哂, 所以去到都唔落車住由得佢地再瞓, 反正都係要攞KEY啫, 不過等我聽哂入營講座等等攞到key先叫醒佢地! 今次個房都算好位置, 喺2樓第一間房, 若果3樓仲好唔洗上落樓梯! 去到setup完已經3點幾, 分頭行事我帶子元去射箭, 老公帶仲仲去兒童室放電! 跟住會合番就係去玩攀石啦, 不過子元呢個無膽仔, 爬到第3格已經爬唔到, 又冇力又驚咪係到喊囉, 真係頂佢唔順, 於是叫老公同佢地借拍打乒乓球, 我就照排隊攀石啦, 當然爬到上頂啦, 仲可以用番以前玩下降時的動作添! 子元打乒乓球又喺到出術, 老公咪丙佢囉, 又係到唔開心, 真係好麻煩! 5點幾敏瑩佢地到啦, 老公就出去接佢地, 因為冇車位比到佢地! 等佢地settle咗就出去食晚餐, 係海鮮宴呢! 900蚊料+900蚊工錢, 當然仲有再叫吓菜呀飯呀飲品加一咁啦, 不過樣樣都好大碟, 好正呀! 之後又去咗買甜品先返去, 屈蛇8條友塞喺車返去再分兩批由上下閘入去, 返房後開始準備去再玩, 又整手工又再去攀石, 敏瑩係大膽好多囉! 最後去活動室玩到10點就返房了, 要執嘢沖涼, 其實公眾浴室都好, 總之有一個大人喺房就得, 各自各去沖好涼返嚟都已經11點, 執吓嘢食吓嘢咁, 仲仲攰到爆都唔肯瞓, 坐咗喺到話唔瞓但已經瞓著咗, 一篤佢就已經瞓低咗, 子元敏瑩就自己玩, 我地12點幾都瞓啦, 張床就點都係麻麻地架啦, 不過都算係咁架啦!