31/3/20

31/3/20     TUE     COOL RAIN

今日又係home office, 都有做過吓嘢的, 不過都係當放假咁過架啦, 瞓到10點幾先起身, 叫埋老公出去食早餐都已經中午啦, 唯有食個brunch 啦, 食完都冇買餸就回程, 因為只係煮晚飯的話都仲有餸! 返到去開始做功課, 唔覺唔覺做到3點幾先搞掂, 開始大家的自由時間, 都係打吓機玩吓咁啦, 6點多老公又煮晚飯啦, 早啲食完早啲搞掂啲嘢睇電視嘛, 老公今晚返夜, 9點幾10點就出咗門口啦!

30/3/20

30/3/20     MON     WARM

今個星期返一三五, 都要架啦唔係做唔切嘢! 返到去買咗麥記做早餐,因為真係好需要一杯似樣的咖啡, 點知仲賺咗因為佢比咗另一個貴餐我呢, 是但啦我目的係咖啡啫! 返去做好哂啲嘢就開始打機啦, 開得番個game梗係勁打, 結果放飯都喺坐喺位算, 因為星期一嘛要check番佢地有咩功課寫好哂! 下午本來只係睇小說過日神, 但之後要做相片報告, 咁又要停吓先啦! 放工老公來接我, 因為嫲嫲包咗雲吞可以入去食, 又食到勁飽呢, 老公仲要買咗雪糕, 咁真係飽到一個點! 8點幾9點幾先回程, 返到去又睇哂啲電視先去沖涼呢! 老公送咗我地返去佢就返工啦!

29/3/20

29/3/20.   SUN.    COOL

今日瞓到9點多起身，叫醒老公出去食早餐啦，順手買埋餸就返去，係時候review吓今個星期教咗啲咩，老公2點幾就出門口返工，佢今日要返兩更，咁叫子元幫手跟吓仲爺功課，我就去煮飯啦，午飯簡單地食意粉算啦，之後開始hea，完全咩都唔想做，但我都摺咗衫打咗機，仲無端端走去睇咗第一屆的全民造星，睇到煮住飯都睇呢，反正今晚都冇咩節目可以追！

28/3/20

28/3/20      SAT     WARM

今日最難受都係睇住子元網上interview九華時in到一pat屎咁, 我真係未試過喊住咁鬧佢! 或者係我太緊張令到佢都好緊張, 咩都唔識答呆哂咁, 我真係緊張到發夢都發緊呢樣嘢, 不過佢都係衰架啦, 之前叫佢要背好啲答案又背唔熟, 加上客觀條件個zoom收音收得唔好, 完全出哂事咁, 而家唯有望長天自行收咗佢, 咁我可以大抽獎時咩都唔洗選, 不過都要做定準備架啦, 呢個情況只可以有備無患! 下午同佢分析吓本區的中學資料, 根本冇胃口, 所以只係食杯麵! 之前喊住咁鬧完佢, 要找人抒發情緒, 傾咗個幾鐘呀! 結果今日係咩有益嘢都冇做, 老公揍咗仲爺去學音樂, 晚飯就又係煮咖哩! 總之今日面試後我已完全不在狀態, 嗰種由天台掉落地獄地的感覺, 真係好難頂! 晚上都係追電視, 星期六太多節目要睇!

27/3/20

27/3/20     FRI     HOT

今日在家工作都有做過吓嘢, 但基本上都當自己放假架啦! 瞓到9點幾起身出去食早餐再去荔天攞埋兩隻豬的書簿, 同Miss Lee講咗幾句啦, 再去Aeon買埋嘢就回家啦, 睇好哂佢地啲網上功課加實體功課, 做到3點多才完成, 出去食麥記得再去咗球場踢波跑步, 玩到5點幾其實都諗住返去, 收到炮哥話要去入定啲糧食, 信唔都好都去入咗先啦, 反正有啲嘢我都諗住買, 結果買咗500幾蚊啦, 不過都係糧食啫, 反正都要食! 返到去沖涼執拾等老公煮咖哩飯食, 今日踢完波好攰呀! 不過都睇埋啲電視先瞓!

26/3/20

26/3/20     THU     WARM

返埋今日又放假, 好好地做好嘢又可以自由! 朝早買埋早餐返去食, 跟住努力做嘢啦, 朝早基本上都做得七七八八!午飯後冇出去, 因為都唔知去邊好, 所以都係繼續睇小說好, 慶餘年小說版真係好好睇, 睇咗一個下午! 老公整好續牌就過來找我食tea, 喺呢到實在係自由到一個點! 本來諗住返去hea埋嗰個鐘就收工, 點知返到上去發現阿姐send咗個email話要寫job duty喎! 咁又要齊齊夾口供睇吓點寫, 再之後收到周生又話要改photo report, photo report, 好在我呢啲摩打手搞得掂啫! 有老公接我放工, 仲順手車埋炮哥, 返到去叫埋嫲嫲佢地落樓就出去晚飯了, 本來諗住去食粥,但笨元又唔肯, 所以去咗食愛群, 老公送埋我地回家送埋嫲嫲就去做運動!

25/3/20

25/3/20     WED     HOT

今日都係冇出過門口, 我地好聽話架嘛,冇需要就唔出街的! 朝早瞓到9點多起身, 梳洗完同佢地一齊整西多士做早餐, 都算幾成功喎, 味道都可以, 食完抖陣笨元就差不多出去補英文, 佢可以自己出去我地就唔一齊啦, 襯這時間做做私人事, 還要教仲爺功課, 跟番佢邊啲未抄落作業等等, 然後笨元回來就準備煮午餐, 食完等佢快啲做功課, 下午都係休息吓又捉佢prepare吓星期六面試的事, 老公放工做埋運動先返嚟, 咁就開始煮飯食, 本來佢話又出去球場同佢地做運動, 但其實球場又唔係真係冇人, 佢地又真係想喺屋企, 咁就不如做番平時室內做嗰隻算, 大家一齊做! 飯後如常咁洗碗清潔沖涼睇電視!

24/3/20

24/3/20.    TUE.    WARM

今日要返工，不過都係返得好free嗰隻，因為我嗰組得我返利登咋嘛，即係唔會有人管住，可以更放縱咁自由時間！朝早真係想上咗去打完卡再落去食早餐，但都冇咁做，因為又要派口罩又要報飯探熱咁，全部都係自己做，之後又真係有嘢做，所以早上都係忙碌中度過，係可以聽住收音機嚟做自在啲！ 飯後去咗apm行咗陣，真係為行而行，想個人郁吓啫！下午返去做埋啲手尾開始自由時間，主力就係到睇小說，今次有新嘢睇，聽炮哥講慶餘年小說版好睇就試吓，結然唔錯喎，睇到放工老公嚟接我，又話要買嘢食嘢飲，結果我又由得佢啦！返到去未開得飯，幫手蒸魚焗雞腿，7點幾開得飯，食完叫老公送嫲嫲返去，揍埋兩隻豬，因為佢話要帶佢地去球場做運動，我就洗碗清潔沖涼睇電視，佢地10點幾返到嚟，沖完涼就趕佢地去瞓，明天又要同功課搏鬥！

23/3/20

23/3/20.    MON.    HOT**

今日home office， 真係要做吓嘢聽吓電話囉，因為飛咗線落嚟架嘛，冇得hea! 不過唔返工咪仲辛苦，要管住兩個做功課，冇得唔做！10點幾先起身，出去食埋個早餐買埋餸回來，原來已經1點幾！路途上睇到message得知梓朗今早去了天家，雖然一早有哂心理準，但真係出現時，又是一個不知怎面對的心情！好在回家後忙教功課忙煮午餐等等都放下先冇去想，老公6點幾才回來，然後都係食飯煮飯清潔沖涼睇電視啦，明天返工又有排忙！

22/3/20

22/3/20     SUN     HOT

今朝瞓到10點多先起身, 明明聽到老公返過嚟,點解起身唔見佢, 原來佢落咗車上視像暮道班, 順便過去接梓朗媽過醫院, 跟住先回來. 我起身就捉佢地梳洗食早餐, 然後就到學習時間, 上星期都冇理到仲爺, 今個星期捉佢睇番哂中英數, 盡吓力啦教得幾多得幾多, 老公回來後都冇咩幫手, 等我搞掂仲爺就可以出去食飯, 冇咩選擇都係去君日, 食完就過隔離球場郁一郁, 練波踩單車係到, 我就係咁二郁吓, 量力而為咁跑咗陣再陪佢地練一陣, 唔覺唔覺都兩個幾鐘, 真係夠皮! 去買埋餸就回家, 沖個涼休息吓又要煮飯, 9點多老公就同子元出去, 我就管住仲爺早啲瞓, 成日都咁夜先瞓唔掂!

21/3/20

21/3/20     SAT     WARM

星期六最好就係可以瞓晏啲,不過都係瞓到8點幾就要起身, 笨元要去補英文嘛! 咁我地就去食早餐啦, 夠鐘就接番笨元, 我地去咗惠康買餸,唔係今晚冇嘢食, 老公就去車Yoki去醫院, 終於要面對的事終於要面對, 佢地今日都喺康傑group公開咗呢件事! Johnson打過嚟問呢件事, 佢地明晚都會一齊去探一探梓朗, 算係見最後一面, 點都係朋友, 盡一盡心意都應該! 子元話同學仔收到九華的面試信, 我諗嚟諗去好唔好落樓睇信箱, 最終都去咗睇, 終於收到啦, 今個星期要好好計劃吓, 下星期點面試! 下午老公揍仲仲去學音樂, 我就同子元講授番今個星期教的, 然後可以打吓機休息吓, 老公回來煮晚飯, 有好好食的焗豬扒飯, 飯後老公去做運動然後返工,我地就清潔沖涼睇電視, 今晚個個台都有好節目, 真係好難選擇!

20/3/20

20/3/2.      FRI.     COOL

終於到星期五啦， 相對地今個星期好似過得快啲啦！買好早餐返去食，食完又開工！時間過得好快，食完晏我又自己出咗去觀塘海皮坐，望吓海咁幾舒服呀！行返番去時喺橋底間餐廳撞到spilt office的另一班同事，吹咗陣水先返去！下午都係做嘢啦， 全個下午都係做相片報告，真係做到眼都矒埋！放工彈閘過球場手搵埋老公佢地，子元踢波仲爺踩單車，踢到7點多散水，喺樂富食埋飯先返去，老公就直接返工啦！

19/3/20

19/3/20.    THU.    COOL

今日都冇咩特別，如常買早餐返工啦，報好更做多陣嘢就過咗美羅寫埋啲水樽，蘭子係咁叫我一齊食飯，但時間真係好早，捱唔到食飯時間，同埋我真係麻麻地同佢地食飯！都係去行吓德福好過！返去食完飯都係睇機囉，下午真係有做嘢架，所以時間係過得快！放工返去等老公煮晚餐，今晚有卡邦尼意粉加燒春雞，好好味呀！之後都係洗碗清潔沖涼睇電視，老公又要返工啦，9點幾就出門口返去！

18/3/20

18/3/20.    WED.    RAIN

又係悶悶的一日！早上都有點趕，買埋早餐返去食完就開工，做吓嘢又打吓機咁，本來要過去美羅寫水樽，但因為落雨都係冇去，喺office 吽，連食完晏都冇出去，怕落雨嘛！唯有係咁打機囉！下午主力打機，因為開咗好多個鐘！打到放工返到屋企就要煮飯，老公今日又要揍子元去覆診，跟住去踢波，再要去婆婆到揍番仲爺回來，好在仲爺喺婆婆到食咗飯，咁我就只係煮餸煮麵可以了！食完老公就要返工，我地梗係睇電視啦，咁又一日啦！

17/3/20

17/3/20.    TUE.    COOL+

又係要返工啦，未出門口仲仲已經醒咗，又變咗貓咁痴住，都要狠心架啦，買早餐返去食，做咗陣嘢又想hea啦，反正都冇嘢趕，午飯後去咗觀塘海濱望住個海吹吓風，真係唔想淨係對住四面牆！夠鐘又返去吽，咁都有做吓嘢嘅，唔係可以點呢！放工當然彈閘快閃，返到去又唔洗煮又唔洗有飯食係最好，只係要管吓兩隻失控的豬！飯後吸塵抺地沖涼睇電視，咁又一日啦！老公今日返中連夜，明天佢放工回來我又要返工啦！

16/3/20

16/3/20.   MON.    WARM*

又到星期一了，琴晚瞓得唔好，好在今日都冇咩忙，慢慢做咁時間都易過啲！買埋早餐返去食，又要做吓嘢啦，真係做咗一朝，非常好！食完午餐就出咗去行個圈，買咗零食比我隻豬頭笨！下午就變咗睇小說啦， 咁又睇咗一本！放工返去煮飯食，老公揍子元佢地去咗踢波嘛，唔好出去食啦又有風險又貴，喺屋企點食都係$100就得，出街一定唔得！食完佢又去咗做gym，我地咪做家務睇電視囉！仲仲砌Lego叻咗好多啦，呢個長假對佢嚟講好似利多於弊！

15/3/20

15/3/20.    SUN.    COOL

星期日應該要瞓晏啲，但我都係九點幾就起身，梳洗食早餐，都係求奇找啲嘢食就算，然後就係學習時間，要清一次佢地今個星期學啲嘢，終於搞掂都已經點幾，又要煮午餐，真係好充實，今次用咗豬扒蘿蔔蕃茄煮粉，佢地又搶食呢！食完放生佢地睇電視嘅睇，玩玩具嘅玩，但3點幾就要開始就要錄笨元條片，唔覺唔覺錄咗大半個鐘先掂，佢又西哂面咁真係好可惡，又要困住仲爺喺房唔比出嚟唔比嘈，真係好辛苦先完成，再用笨元部機send埋去長天，算係大功告成，聽天由命啦！之後梗係休息吓hea吓啦，7點多出咗美孚食譚仔，再比佢地去球場踩咗陣車就回家沖涼，又要清潔一次啲車，攰死我！終於沖好涼就邊摺衫邊睇電視，明天又要返工啦！

14/3/20

14/3/20.    SAT.    WARM

唯一有嘢學的星期六，時間係咪算易過啲呢！朝早8點多要起身啦，跟住就揍子元去補英文，我就同仲爺去食早餐，已經食得慢架啦，但都仲有半個鐘先 夠鐘，所以去咗曼山行，喺759買咗少少嘢咁，接埋子元買埋飯比佢晏啲喺屋企食，返到去試咗錄interview條片，都算可以啦，1點我就同仲仲出門口， 過海怡學音樂前上Joyce屋企食嘢玩吓吹吓水，咁都幾開心嘅，等仲爺學完嘢就回家啦，見住架171走，就轉咗撘地鐵返去，各有各用電腦，完全咩都唔想做，當然都唔想出去食飯， 所以老公同笨元踢完波就叫佢地買嘢反嚟食就算，跟住佢地又再去踢波喎，我咪同仲仲喺屋企囉， 做好清潔沖好涼又再hea過！

13/3/20

13/3/20.    FRI.    WARM

終於捱到星期五了，都係買早返去食啦，做好基本嘢又可以打機睇小說啦，午飯出去同Joyce佢地食，試咗間越南嘢好好食，下次帶老嚟試吓！食完返去都係做自己嘢啦，時間真係過得好慢，6點彈閘完全唔理啲人，返到嚟收拾吓仲爺啲嘢，篤佢做埋功課就準備開飯，唔洗煮又唔洗洗碗真係好正，只係抺好地，又可以沖好涼睇電視打機！捉住咗笨元玩熊大上菜，玩咗好耐到老公回家！

12/3/20

12/3/20.    TUE.    COOL

今日依舊係冇嘢好做，好在仲可以打機睇小說打發時間啫！買埋早餐返去食吓，跟住就做咗一陣嘢， 完成就可以開始睇小說打機囉，午飯後同咗joey去行個圈，至在郁等吓個人唔好咁悶！下午返去再Hea多陣就可以出去，過美羅寫水樽嘛，點知CAM又送漏樽，真係好麻煩囉，又要再過嚟，又要請旨嘛！5:45先走得甩，撘地鐵返到去老公已經煮緊飯，所以7點多就開飯，食完佢就去做gym，我就做清潔睇仔睇電視！

11/3/20

11/3/20.   WED.    COOL

今日只係做咗上午一陣嘢就開始閒，所以睇咗兩本小說，其實冇嘢做啲時間更難過！買埋早餐返去食，然後咪開工囉，唔洗一陣就做好啦，跟住就開始睇小說，琴日嗰啲未睇哂嘛！午飯後都係唔想留喺office，所以去咗apm行，冇買啲咩，只係用coupon買咗許留山！返到去下午都係睇小說，好在可以睇，唔係就真係悶死都未放工！終於捱到放工，返一返屋企先同埋仲爺佢地出美孚，會合食上海嘢！老公佢地明明konter練完波，食完飯又去踢過！咁我就唯有同仲爺返去睇電視啦！

10/3/20

10/3/20     TUE     WARM

今日係預咗早上做嘢, 下午打機的日子, 所以早上好努力, 勤勤快快的做了大部份相片, 話咁快又放飯, 食完同Joey媽媽去咗祥華shopping, 買咗最重要的咖啡, 還有零食呢! 返到去就準備開始打機, 由於有好多個鐘free, 所以可以慢慢打仲要邊睇住小說邊打, 真係free到一個點呀! 放工撘巴士回家, 其實都係嗰班車, 只係早咗幾個站撘, 一定上到車之後仲有位坐! 返到去等食, 又唔洗洗碗, 真係最輕鬆, 之後可以打吓機睇吓電視咁又一日!

9/3/20

9/3/20.    MON.    WARM

又要返工啦，今朝提住自己係要返利登唔係宏天，喺樓下買埋早餐返去食，又係時候開工！初頭上唔到網，開唔到email，又要等吓，9點幾叫做ok番，咁就工作啦！由於真係有嘢做所以都好努力咁做嘢，午飯快食完就同joey出咗去，陪佢去太平洋嗰邊囉嘢，都係想行吓郁吓啫！最後過佢地嗰邊提埋我支火酒就回巢！又做了一個下午，今日做好明天可以做自己嘢！放工應該係老公過嚟接我嘅，但佢地踢波踢到差不多6點先走，結果我喺街企咗半個鐘囉！返長沙灣食粥做晚餐就回家了，沖好涼邊睇電視邊執佢地google classroom，嚟緊今個星期的進度等等！

8/3/20

8/3/20     SUN     WARM

今日又係全日喺屋企的日子, 老公返早, 我就瞓到10點幾, 仲爺掛住睇機冇整早餐比我地食, 咁我就唯有自己嚟囉, 食完就開工, 同佢地睇功課, 執子元長天面試份簡介同英文讀書報告, 真係放假放到佢個人散哂, 份嘢寫到舊屎咁, 結果執完差不多7成係我做, 仲要send埋比Miss佢地睇完先可以! 午飯食隔夜餸加煮麵, 處理完佢地溫習嘢就可以休息打機等等! 老公回來梗係又入咗房瞓, 佢又話唔煮飯出去食粥, 但真係唔想出街, 最終等老公瞓夠就去買外賣比我地食, 睇吓電視沖埋涼咁又一日啦!

7/3/20

7/3/20.   SAT.    WARM

今日終於有假放，2月實在係返得太少日子工， 今個星期返足5日好攰！今朝笨元要補英文，所以8點幾就起身，佢有佢補習，我地就去食早餐，接番佢就回家，本來諗住下午老公揍仲爺去學音樂，我就同子元喺屋企，但一來唔想煮午餐，二來想出去遠啲地方郁吓，所以一齊出去！過到去食撒利亞，仲爺就學完先食麥記，我地食完就行埋十蚊點，好多嘢想買呢！終於完成哂返屋企，砌埋未砌完個砌圖，老公就煮晚餐，食完佢同笨元去踢波，我就同仲爺口僽屋企，睇完電視佢瞓覺，我就可以自由吓啦！

6/3/20

6/3/20     FRI     WARM

今日係被迫搬寫字樓的日子，如常咁返到去，都係趕頭趕命咁食埋個包就開始執埋啲嘢，遇咗今日都做唔到啲咩架啦，好在冇咩趕！10點幾人地開始進註，我地就行行企企咁！等到11點幾夾齊人，本來諗住打的，咁好peggy姐又車我地，所以就好快去到，上到利登5樓就得我一條友，貨又未到喎，但望到自己張枱時真係好灰，本來環境已經窄，又dirty咁，只係抺咗張枱，BD幾個同事都上到嚟，佢地望完個位仲驚啦，所以一齊落左3樓，睇吓green team佢地點個場，感覺上光啲涼啲好過我地啲！因為未有箱到冇咩可以做，就跟佢地大隊去食晏，食日式放題的餐，半自助咁為起都係$60，因為疫情下有平嘛！食完我地早啲走返去接貨執嘢，足足執咗我諗有個幾鐘，先清理好哂，又要抺又要插線，再放番我啲snoopy同我啲bb們的相喺到，即刻warm哂！跟住真係做吓嘢啦，不過都係準時彈閘！去摩士等子元踢完波就回家食飯， 嫲嫲已經煮起哂，食完hea 住咁睇吓電視吸塵抺地，等佢地瞓哂諗住用電腦就開唔到，火都嚟埋，因為仲爺用過！搞到我都唔知點算好，打比老公佢就叫我打比barry， 好在最終佢都隔空幫我處理好，有啲it人喺到真係好！

5/3/20

5/3/20     THU     COOL

最後全日喺宏天啦, 大家都好有離愁咁,其實都係幾個月啫, 唔知點解好唔想咁, 今次split office, 真係留守又做死, 要搬又悶死, 完全係雙輸囉, 但都局住要咁做, 真係好無奈! 朝早返去食埋早餐都係做吓額外嘢, 因為過到去都係要量體溫, 又要訂飯, 全部嘢都要個表, 總之成朝忙內忙外咁, 話咁快又食飯啦, 今日當然有加餸, 因為要等大家回歸先可以再開大食會啦! 食完hea吓睇吓機咁又下午開工時段啦! 靜悄悄咁就過咗呢個在宏天的下午, 要兩三個月後才可以回來! 老公來接我放工, 上咗德福食KFC, 食完就返屋啦, 老公就去做運動!, 我地就返屋企睇電視!

4/3/20

4/3/20     WED     COOL RAIN

今日嘛都係咁返工囉, 7點幾起身老公就放工返嚟啦, 佢就等兩個豬仔起身才出去食早餐, 我就買早餐返工, 開咗工都係做吓嘢咁啦, 今日都唔算有嘢趕, 嚟緊星期五就要被迫遷啦, 所以都冇咩心機做嘢咁, 午飯大圍叫車仔麵外賣, 我就跟啦, 食完都係打吓機咁, 再上去幫阿Joe買啲消毒嘢, 又返去開工啦, 下午做好埋嘢就開始收拾家檔, 其實我真係好少嘢, 我真係可以好斷捨離的人, 掉咪掉囉冇咩所謂架, 終於等到放工, 阿姐又話要加買3支探熱器, 咁啱今日要行過球場咪過去睇吓囉, 萬寧屈臣氏真係冇哂, 但竟然比我喺華潤堂買到, 不過真係好貴呀$699支, 炒到貴哂! 行到過去佢地仲踢緊, 7點幾先捨得散, 返咗長沙灣食埋晚飯才回家, 老公返嚟攞埋嘢又返工啦, 我就10點幾趕哂兩個去瞓, 唔係話唔返學就可以咁夜瞓架嘛!

3/3/20

3/3/20.   TUE.    COOL

今日都係如常咁返工啦，老公叫醒咗啲仔，一齊送我返工再去食早餐！開工後都係做吓嘢啦，唔洗太急咁慢慢做啦！時間過得好快又午飯啦，食飽飽就打機啦，下午吹吓水又做吓嘢咁，終於放工前發佈消息點樣分office工作，我都係要去番利登嗰邊返工，都唔知叫做好定唔好！不過都冇得選擇就唔好理咁多啦！放工返到去就準備開飯啦，老公食完又出去做埋運動就返工，我就喺揍住佢兩個，其實佢地真係好嘈好唔冷靜，仲要捱多個幾月先有學返，其實係家長最痛苦！放縱得太耐佢地又睇埋哂啲電視先瞓，笨元仲衰，掛住睇電視，叫佢開機洗衫又唔蓋內蓋，又搞甩洗衣機個皮帶啦，啲衫又洗唔到啦，希望老公明天整得到啦，雖然個洗衣機係就嚟壞，但我都唔想佢被「謀殺」囉，自然死亡先啱架嘛！

2/3/20

2/3/20.   MON.  COOL

今日要正常返工啦， 突然覺得公司多咗好多人，反而唔係好習慣！我起身老公就放工回來，啲仔交比佢啦，我就返工！返去食完個早餐就要開工，又量體溫又做吓其他嘢咁，10點多先開始正經做到嘢！月頭都係勤力入job cert啦，好快又放飯，經過一個月自閉飯後，已經唔覺得要找人陪食飯，都係好事，因為收到風嚟緊group要將four arms的部門全部分一半打散，我十成要閃嗰批，初頭諗會好麻煩，但諗諗吓都係好事，因為做少好多喺head quater要做的事，只要做好自己嘢就掂，又唔洗見到阿姐，仲唔係好事！下午開工啦，全個下午都係入job cert啦，好快就放工，回家就有得食啦，老公整咗羊腩煲，好足料飯都唔洗食！之後佢就出去做運動，我就繼續對住嗰兩隻豬，清潔好就沖涼休息睇電視！

1/3/20

1/3/20     SUN     WARM

今日又係半步門口都冇出過呢, 朝早老公又要視像上堂, 跟住到我起身佢又上番床瞓, 我係最唔喜歡咁, 好似撘住咁! 所以就係到鬧情緒呢! 咁最終佢出門口去做運動前都叫做氹番我, 求奇食咗啲脆片做早餐! 然後就叫仲爺換床單等等, 還有睇吓佢地啲書, 計劃定下個星期要做啲咩功課等等, 打咗陣機兩個又叫肚餓, 所以都要煮午飯比佢地食啦, 下午都係由得佢地玩, 6點幾又要煮晚飯啦, 食完飯清潔完就沖涼休息呢, 明天起要正常返工啦, 又要習慣吓呢!