30/11/15

30/11/15   MON   COOL

今日柏仲未起身, 就叫老公起身整飯比子元帶! 揍咗佢上校車就返上樓準備出發入嫲嫲到, 食埋早餐先返工啦, 朝早返到去都係做自己嘢, 淨係整番D相都搞咗一朝, 好忙好忙咁! 中午飯後都係睇電視, 下午就係開會開會同開會, 返埋位都已經五點幾, 時間真係過得快! 放工去接笨元啦, 仲要買埋餸, 返到屋企就煮飯沖涼, 老公都好早返, 8點左右食完飯, 但仲要洗碗抺地, K.O.埋仲仲先同子元睇功課溫書, 搞到9點幾呢, 明明星期日溫完默書架啦, 又唔記得咁! 跟手又要安排今個星期的事, 好忙好忙咁呀! 子元就成日要陪瞓, 雖然只係一陣, 但都要佢明有時時間唔夠就係咁! 叫做安排好今個星期的人事安排啦, 又要摺衫等等等, 我係做到11:45先可以坐落梳化, 唔夠一陣又瞓啦!

29/11/15

29/11/15   SUN   COOL

難得今日唔洗學畫班, 所以瞓到9點幾先起身, 不過由6點開始其實我已經起咗好多次, 只係唔願正式起啫, 最終都要起架啦, 梳洗出去食早餐, 本來諗住食完返嚟溫好書就出去數碼港行吓, 點知原來都幾多嘢要溫, 又差不多已經1點, 都係比仲仲喺屋企瞓夠先, 點知條友唔肯瞓, 係咁喊, 但最終咪又係瞓咗! 子元溫完執好書包就比佢玩吓睇吓電視, 等仲瞓醒先收拾出門口, 都已經4點啦, 原來過數碼港的車程要個半鐘, 已經係完全唔洗等車嗰隻架啦, 要坐咁耐真係唔掂! 過到去都太陽落山, 影唔到靚相, 可惜! 比佢地跑吓踢吓波睇吓玩具就走啦, stay咗個幾鐘咋, 撘番出去灣仔轉船過尖咀, 約咗程生佢地喺海運影聖誕燈飾, 等得佢地都8點幾, 影完一輪先去食嘢, 但程小姐又扭計話要返屋企食, 其實佢係想返Aeon玩卡, 咁因為已經差不多9點, 返去邊有嘢食, 佢就係到喊, 搞咗一輪先講掂去KFC食, 佢仲要只係食其中一款雞翼, 唉…算啦個囡人地GE唔關我事! 食完撘巴士返去啦, 仲仲都開始扭, 返去快手沖涼食奶瞓覺!

 

 

 

 

 

 

 

 

 

 

28/11/15

28/11/15   SAT   COOL

估唔到今日一早出門口, 到好夜先返! 朝早要揍笨元去體操, 但因為一早比仲仲嘈醒, 再瞓到8點先起身, 搞到趕唔可以食埋早餐先, 快手揍佢過去我就買早餐返工! 今日都有嘢做吓, 幾難得! 差不多1點老公就揍埋仲仲過嚟, 因為子元已經由婆婆揍咗入沙田! 我地用最快方法撘MTR入去, 但都要50分鐘左右, 去到佢地都食咗頭圍, 咁我地再叫嘢食啦, 搞得嚟都3點先走, 因為子元又要喺樓下玩吓, 柏仲又影吓相咁! 由於3:30要去到荔天乒乓球, 而巴士要等20分鐘, 所以都係撘的士, 等佢期間就去咗訂蛋糕呀周圍行, 問程太借片等等, 子元放學就撘巴士入去阿休到, 5點幾入到去啦, 柏仲瞓咗架, 放佢喺床瞓陣但好快都再醒咗, 要睇住佢真係好攰架, 尤其要打邊爐, 所以先餵飽佢, 有契爺揍住哂佢地, 可以食得輕鬆D! 大人們吹吓水, 細路們玩吓, 不過3個唔同年紀真係唔可以一齊玩! 最後活動係食蛋糕, 預祝仲仲兩歲生日, 仲仲食蛋糕食得好開心呢! 玩到10點幾打的返去啦, 沖涼瞓覺, 陸生仲有力睇波, 好嘢!

27/11/15

27/11/15   FRI   COLD**

今日都係急急咁起身梳洗整飯返學啦, 揍咗子元上樓車就到柏仲返上樓, 老公今日揍佢入去, 因為佢都去青衣上堂喎! 咁我就喺屋企執嘢整嘢, 到8點幾先買早餐返工, 今日好似冇咁忙, 要抖一抖啦我唔捱得! 吹吓水做吓自己嘢咁啦, 午飯後都係睇吓電視啦, 跟住就做吓公事啦, 3點幾出發去工展會嗰邊造證, 搞掂本來想去citysuper買餸, 但根本冇我地呢D中餐料, 所以最終都係返屋企附件先買, 由於唔想浪費時間喺車程, 所以最終係撘MTR, 喺荔景買埋餸就返去, 都係5點多, 可以整住餸先, 6點幾先出去接佢兩個, 老公揍咗柏仲就去小童等我地, 一齊揍佢兩個去換衫, 兩個今次著埋同一款衫, 兩個外星人呢! 揍咗佢地去泳池我地就返上去煮飯, 今次預早整好嘢都唔係太難搞, 又叫老公餵咗柏仲食先, 咁到我地食時可以打暈佢, 8點幾上到來就沖好涼食飯, 食完細路入房玩, 今日子慧要休息, 所以得佢兩個非常咁靜, 佢地一3個一齊就煩! 我地就吹水, 老公就出咗去踢波, 吹到咁上吓洗埋碗, 佢地今晚都早走啦, 10點多就走啦, 我可以慢慢拖地, 仲可以睇埋子元功課等等先捉佢去瞓都唔洗11點! 老公踢完波返嚟, 沖好涼睇吓電視, 12點幾就瞓!

26/11/15

26/11/15   THU   COLD

今日真係凍咗好多, 但柏仲照樣要起身送哥哥校車, 冬天流流都係蒸熱番D飯餸子元帶飯算啦, 冇咁多嘢搞! 跟住就揍柏仲入去啦, 點知巴士好早, 又趕唔切執好嘢出門口, 但再下一班車又勁遲, 結果選擇咗出去撘42A, 雖然都係趕唔到最近嗰班, 但點都快過42! 跟住就買早餐返工啦, 今日都好忙, 朝早做陣自己嘢又開工, 之後係好多零零碎碎嘢咁, 呢到做D嗰到又做D咁, 我都唔知自己忙咩! 午飯後睇吓電視hea吓咁啦, 下午又再做做做啦, 堅係忙, 呢D嘢真係要還! 放工去接笨元返屋企啦, 又要煮飯等等, 又係忙忙忙, 整好嘢食飯家務又到子元功課, 都冇咩同柏仲玩, 又係時候打暈佢, 咁先可以幫子元溫書, 明天中默點都要默多次!