13/11/15

13/11/15   FRI   WARM

今日都係如常咁起身啦, 本來諗住自己搞得掂子元的午餐盒就唔叫老公起身架啦, 但柏仲又呢樣又嗰樣, 我根本冇辦法整嘢, 時間緊迫就唯有叩門叫醒哂嗰兩個, 好在佢地都合作, 咁就準時出到門口囉! 揍咗佢返上樓快手摺衫就行啦, 入到去奶奶話老公搵我, 條友又冇帶KEY又冇帶銀包, 頂佢呀, 仲叫我去美孚間餐廳搵佢, 我咪話我又要專登落車, 所以叫佢去巴士站等, 我就咁比錢佢夠今日用就算! 如常返工做嘢啦, 午飯後去咗買餸, 咁今晚唔洗咁趕, 因為要煮肉骨茶! 咁買完返到嚟收到學校電話, 原來係班主任打嚟, 話子元喺對卷時用刷膠刷咗錯個答案改番再出去攞分, 問咗佢好多次都話係考試時改, 但老師見佢有刷膠鉛筆喺枱面, 最後喺課室門口再問佢佢就答話係剛剛改, 我都知佢係要面唔想喺D同學面前認衰, 但錯就要認打就要企定嘛, 結果要下星期一見家長, 聯同訓導組審一審佢, 我就希望唔好記任可嘢, 你隨便罰可以! 不過都唔到我地話事架啦, 都係要同佢一齊去面對! 搞到我成個下午都神不守舍咁, 同老細講咗下星期一要早D閃, 唉…一句講哂煩啦! 放工快手返屋企放低嘢又趕住出去接佢地啦, 真係忍唔住第一時間要問子元, 佢夠膽第一次答我都係話佢冇改喎, 頂!!!我真係火到爆, 唯有再問, 再話佢知件事GE嚴重性, 佢先細細聲講番係派卷對卷時先改, 不過由於喺街又要揍住敏瑩, 我冇得同佢詳談住, 都係要等今晚佢地走哂同埋老公一齊先教訓佢! 程生攞上水褸嚟順手載我地過去運動場換衫, 今日真係黑色星期五囉, 都喺到換咗年幾衫啦, 我一向都係帶埋子元入女更衣室換架啦, 除非嗰時程生一齊揍先交換人質換衫啫! 有個清潔阿姐竟然指住子元話:「你叫佢出去先啦, 呢到女廁嚟架嘛!」, 我真係發火呀, 我話佢未夠8歲係可以去異性更衣室架, 我今日已經火架啦, 仲惹我, 最終我勁發悔氣咁鬧子元但說話係比人聽GE, 咪係咁叫子元你好自己出去先呀, 亂到我都唔知自己講咗咩, 我估清潔阿姐心諗又惹咗個顛婆! 趕到過去其實差不多入得, 但我又要交錢又要處理一個冇帶泳帽一個爛咗泳帽, 又揹住幾個袋喺身, 真係好攞命! 老公帶咗柏仲來泳池找我, 一齊返到去就要煮飯啦, 今晚食肉骨茶, 跟住食譜整, 睇落似模似樣喎, 另外仲蒸咗魚同炒菜炒瓜, 但冇人欣賞, 因為大家都專注喺個肉骨茶到, 由於實在太好食, 準定下星期用肉骨茶打邊爐, 真係好顛! 由於今日好攰, 叫老公洗碗, 佢又好乖咁洗喎, 所以我只需抺地! 10點幾11點佢地都走啦, 咁老公就等佢地走咗之後同子元傾番今日件事, 希望佢真係明個嚴重性啦! 沖完涼趕得切睇奇皇后, 睇完就瞓啦, 我真係好攰啦!