31/7/23 MON RAIN
今朝都係瞓到自然醒啦, 食完早餐又同council嗰到周旋council tax問題, 搞咗一個鐘都係重頭嚟過叫我再email過再upload過, 搞到12點左右阿媽話想出去, 佢想自己出去行吓, 但我都係唔放心, 本身叫仲爺帶住佢, 但諗諗吓其實仲唔放心, 兩個都冇電話, 最終叫佢地等我一陣, 我同佢地一齊出去, 行咗去Lidl再行去魚檔買魚, 本身行都冇咩問題, 只係仲爺係咁講嘢, 聽到好攰, 返到嚟煮咗嘢食完我只想攤吓, 個精神好攰咁! 之後就開始追吓劇睇吓戲咁, 老公返嚟帶咗兩隻豬去踢波, 我就睇時間煮飯, 食完飯就沖涼休息!
26/7/23 WED HOT+
今日都係瞓到自然醒, 但個自然太早, 之後都唔係好瞓得番, 可惜! 起身梳洗食早餐, 之後就準備帶阿媽出去行吓, 因為鐵路又好似有啲問題, 我地就近近地去broadway附近個公園行吓就算, 其實又要撘巴士過去再諗番條路點行都夠我玩! 去到公園其實冇咩嘢睇架咋, 有公園仲爺又可以玩吓咁, 阿媽又玩埋一份, 佢玩到企喺千秋上面呢! 我見都幾近日本麵包店就去買埋麵包啦, 跟住就行番Broadway去M&S買埋方包就撘巴士返去, 落車喺Lidl再入貨, 阿媽話想食豬肉嗰啲, 咁就買咗肉餅囉! 返到屋企見到有封信有哂我同老公個名都知道唔方好嘢, 原來係council話我地冇交felix road嗰邊的council tax, 頂......我咪改咗地址囉, 又改唔啱? 咁佢又識寄嚟呢到比我地, 痴鬼線! 幾經辛苦打咗電話去問到人, 佢話要email完租約個文件比佢等佢close咗呢個account, 就咁改嗰個又唔關事因為唔同account number, 完全諗唔明係咩玩法, 總之email咗比佢先啦, 唔見佢覆都要再打去問! 好在佢地自己整好嘢食放好哂買返嚟的東西, 咁我搞掂都落去食嘢啦! 然後就係同仲爺今日學習, 因為佢要等daddy返嚟帶佢去踢波, 所以好積極搞掂哂等老公返嚟, 佢地去踢波我就繼續睇金師傅, 一邊煮定飯, 佢地踢完返嚟快手沖涼, 因為落雨濕哂! 諗咗可以上下層一齊沖只係水弱啲啫! 食飯都係睇吓電視咁啦!
16/7/23 SUN WINDY
今日點都成行去一轉海灘, 雖然天氣都係一般, 但起碼有太陽, 只係好大風! 起身食埋早餐都10點幾先出門口, 要渣兩個鐘車所以過到去都12點半, 泊好車攞齊嘢去海灘, 本來諗住搵個位settle down, 但老公見到有個位有啲餐枱, 咪坐嗰到再去買嘢食囉, 仲爺就可以喺對出個沙位玩, 等我買完fish and chip返去, 我地啲位比一大堆印度人迫滿哂, 基本上佢地目的都係趕我地走, 成個場佢地包哂, 到我陪住細佬玩嗰時, 有個直情喺我地前面攞啲零食出嚟引海鷗, 搞到啲海鷗喺哂我地前面, 我真係火起, 老公都話走啦, 因為迫到你根本坐唔到, 痴線架, 我嬲到喺咁fick佢地, 但佢地唔知真唔明定扮哂嘢, 好在今朝有食血壓藥咋! 而家講番起都炆! 去車放番好啲嘢等仲仲抺身換埋衫就周圍行吓, 真係隨意行吓影吓相就算, 4點幾回程中途仲要停吓services, 買吓嘢食先得! 返到屋企快手煮咗飯先, 然後先執嘢, 仲要摺埋啲衫食埋飯都夜啦!
13/7/23 THU WARM
今日終於有得做輕鬆嘢, 揍吓Jazzy又做吓飯更咁, 幾好! 本來以為頭兩堂喺G&S過, 點知老師知道我跟Jazzy就比佢去參加活動, 結果去咗field hea咗兩堂, 期間好忙咁安排下星期二...因為子元學校頒獎禮, 子元有獎攞, 但仲爺又要踢波, 唯有請炮哥幫手接! Break之後就做飯更, 都係hea, 唔太難搞, 只係放飯前竟然又火警鐘, 但今次原來係真, 係sport hall嗰邊, 散得就去放飯, 最尾嗰堂揍埋Jazzy就走得! 接咗仲爺返嚟休息吓, 等佢地去咗踢波我就可以繼續追金師傅同埋要摺衫, 返嚟食埋晚餐睇埋電視已經10點幾!
10/7/23 MON WARM
今日返到去學校都冇更表, 阿姐出嚟話我跟Amira, 仲要頂飯更, 最終咪唔Work囉, 又係啲豬隊友問題, 真係人蠢冇藥緊, 老師轉咗房佢搵唔到, 但啲學生又搵到呢, 完全唔明! 仲要話佢地唔喺課室你就應該去AL1, 真係好火, 我聽日一定比面色佢睇! 另外今日跟嗰個學生成日就係想留喺廁所, 我真係唔明! 放學又趕頭趕命去接仲仲, 趕到唔記得咗放番低個walkie, 又要返轉頭! 返屋企放低嘢就同老公去買餸同食啲嘢, 學校個飯真係太細! 買完返嚟要做番清潔, 早兩日出咗去玩嘛! 做得嚟又食啦, 睇埋膠戰先洗碗摺衫, 搞到10點幾先沖涼, 好攰!
8/7/23 SAT RAIN
今日係兩日一夜之旅, 今日先去Bath, 不過出發前先要去攞仲爺個足球獎, 都係豬肉獎啫, 因為我地趕住出發, 吹咗一陣水就閃啦, 但仲爺傷心到喊囉, 都唔知佢喊咩, 是但啦, 快啲出發啦, book咗枱食飯, 要兩個幾鐘先到, 加上又落大雨減慢咗速度, 都遲咗差不多半個鐘先到, 仲要搵位泊車, 不過都真係幾好食, 只係有啲貴! 食完嘢就同張家一齊遊市中心, 都跟住上網搵到的路線嚟行, 有羅馬浴場, 二百年的橋, 半月建築物等, 行吓又落吓雨咁, 都算幾豐富, 因為大家都攰, 冇等到嗰間餐廳食, 直接返咗Bristol, 又係去睇橋, 然後食晚餐, 就咁搵咗間日本嘢食, 終於可以返酒店沖涼休息! Letty佢過嚟玩咗陣先返房!
7/7/23 FRI HOT
今日又變番熱，都啱嘅，夏天嘛！今日佢兩個唔洗返，咁我咪可以慢慢出門口，返去都係準備點名，我第一時間攞咗Letty嗰班嚟點，又可以同佢吹水，原來琴日佢同佢老豆炒大穫，3點幾先瞓，陰公！我聽完佢講又覺得炮哥有啲唔啱，但呢啲係人地家事，只可以開解吓佢，夠鐘又要各自走，返番大房其實冇咩好做，完全係搵嘢嚟做就算！放飯咪食自己，食完去搵Letty繼續吹水，繼續開解！到下午時段就唔多洗做，於是幫Anna砌埋個行程同有咩地方好食！最後未夠3點就放人，正！返去等老公整花園收埋尾，就出去Broadway 買嘢，估唔到仲爺又撞到學校老師，我又撞到學生同老師！返屋企就執吓行裝，明天短trip啦！
5/7/23 WED COOL
今日學生就唔洗返, 淨係year 10返, 所以我地返去其實真係無所事事, 仲要安排我跟Amira, 其實都好, 我跟住佢淨係坐喺課室, 基本上係咩都唔洗做, 咁啱有兩個香港人學生, 可以吹吓水咁都幾好! 放飯時嗰條學生又去啲唔去得的地方, 又要我出手, 之後又周圍走, 最後我都廢事去追佢, 諗住去report 比訓導聽, 呢個時候佢就走出嚟搵番我轉頭, 你話係咪煩! 終於捱到放學, 返去超市買餸, 太耐冇入貨, 竟然買咗40幾鎊, 實在係要入太多貨! 返到嚟係咁食嘢, 夠鐘就揍仲爺去田徑, 返到嚟做埋運動就有飯食, 梗係繼續睇膠戰, 好好笑! 飯後食埋個雪糕, 滿足!
