28/2/18

28/2/18   WED   WARM

今朝請咗假睇子元話劇, 不過依然係要一早起身, 仲爺仲要未夠5點喺到叫救命, 初頭兩聲媽媽我都唔想應, 但第三句話我要疴屎你就會即刻醒哂, 其實佢都好叻仔出到嚟去, 只係急得滯條褲又有, 又上唔到廁所咁解啫, 結果我又要洗褲洗佢洗廁所, 同佢換番褲先可以再瞓, 都已經5點3, 好在今朝唔洗整飯, 一於瞓多10分鐘先起身! 揍哂佢地返學, 我同老公就去食早餐, 就喺嗰時同佢講番琴日件事, 佢意思都係騎牛搵馬囉, 咁都係架啦又冇本錢唔做! 食完早餐去醫院攞啲家檔比Barry, 唔知今日出唔出到院, 真係陰公, 踢波踢到跌斷手! 差不多時間就去學校啦, 原來11:30先開始, 睇就只係睇佢嗰幾分鐘表演, 不過條友仔又做得幾好, 啲戲好咗喎! 佢個灰太郎真係好可愛! 睇完我地都閃啦, 食埋午飯我就返工, 老公就返屋企整嘢, 得番半日好多嘢迫埋嚟做, 5:30老公嚟接我, 入青衣同嫲嫲切蛋糕, 然後再落青衣城食晚飯, 8點幾返去啦, 去攞車時喺停車場撞到Carlie喎, 約都難見! 揍哂全部人返屋企老公就去踢波, 我就要K.O.佢兩隻嘢啦, 老公都11點幾先返到嚟, 我睇完電視只係喺梳化瞓住等佢, 等佢沖完涼出嚟我就入房瞓!

27/2/18

27/2/18.  TUE.  WARM

今日真係唔多想回顧，因為感覺不良好，好複雜！但或者喺呢到先係最好的抒發途徑，因為唔洗理會有冇人聽，有冇人講出去！講番今朝先，因為要去開會又要諗著咩衫啦，揍咗仲爺返學就返工，都係返去執埋今日啲嘢就出門口，過到去都係加快開票，因為要喺啲老細閃之前比佢地簽名，當然仲有收吓利是先啦，今日都唔算好多嘢開，但都要做嘅！開到12點幾先過去酒樓食飯，食飯時其實都冇咩特別，都係傾吓偈咁啫！食完埋單後總監話有嘢要同我講，就係今日的重點，仲要去coffee shop坐下嚟講，其實我都估到大約喺咩，不過真係聽到時又係另一回事，因為總監話老細話要炒我，但總監就stop咗件事，話等佢了解吓先，所以就找我傾吓，主要都係因為多咗一個部門，多咗兩條友，兩條會爭嘢做，為咗唔比老細知自己做錯嘢而將錯嘅事推落人地身上嘅人，原來唔止係我地出面有咁嘅感覺，連廠同總監都覺得咁！但重點喺老細睇唔到其他所有嘢，只係見到某人的勁！講到尾係我呢啲人太天真，喺老細面前唔識打卡唔識做戲，唔識明知做唔到但又扮做到，成日冇嘢做咁！但老細又唔明佢開咗個部門做嗰啲嘢其實咪就係我做緊嗰啲囉，咁我當自己變咗下屬咁去問上司點做嘢時，上司唔係下達指令而係叫我將做緊嘅嘢比咗佢去跟，日積月累下咁我仲有咩做？加上我又唔識主動爭嘢做，久而久之就被認為冇嘢做囉！另外，總監亦都唔想有人座大，將自己人慢慢引入公司！就算我只係輔助的角色都有價值，總監都明我係啲跟指令下做嘢嘅人，而唔係創啲嘢出嚟嗰種人，不過老細唔明就唔明，睇吓總監今次點處理，佢叫我要等老細返嚟認低威，但我反而有另一種諗法，或者呢個係一個點觸發我向外求，我而家仲好矛盾未想到個方向，其實我都真係好想找人傾吓，但我真係找唔到呢一個人，我又想好好咁發洩一場，但我完全諗唔到可以點發，我連喊都喊唔到，因為喊好似都冇作用，咁我而家算唔算處於人生的盲點呢？其實你話家庭我覺得我算好好，但講到尾就到錢，若有錢我真係想全心全意照顧屋企，再做part time，但又support到，唉，請問有冇人可以幫到我！

26/2/18

26/2/18   MON   WARM

今日真係好正式咁要返工返學做嘢啦! 朝早都有點趕, 返上樓快手搞掂埋仲爺起身出門口, 不過都係唔會開門前返到架啦, 返去食個包做早餐咋, 跟住就做好公事先, 午飯去咗買便當, 因為真係覺得好肚餓, 咁都食得滿足GE, 不過下午開始又咳得勁, 一咳就好易嘔, 激死! 最終都被勸落去睇吓中醫清吓, 咁近近地可以落去睇又冇咩所謂, 登記咗又要等到5點先有得睇, 早知攞埋袋啦, 因為仲要等, 搞到5:30先睇完, 上去攞番嘢閂門再去學校接子元, 行過美孚買餸先返屋企, 又要再落樓接仲仲, 因為老公約咗同事食飯喎, 揍住佢兩個唔係難煮飯, 只係仲仲成日要人陪好麻煩! 7點幾終於食得, 佢地真係好鍾意食粉, 今次煮雞肉腸仔西蘭花長通粉, 又搶食呢! 之後都係沖涼做功課溫書啦, 老公9點到就返咗! K.O.咗仲仲就可以沖涼, 今日都好攰, 摺埋衫11點就瞓!

25/2/18

25/2/18   SUN   WARM+

今朝可以瞓晏啲啦,9點幾10點先起身, 不過嗰兩隻嘢喺廳其實已經好嘈! 梳洗後煮早餐啦, 因為出去食真係貴, 食完老公帶子元去打鼓同踢波, 我就同仲爺喺屋企, 其實都幾hea, 只係摺咗衫都冇做啲咩, 點幾兩點開始要仲爺執嘢, 落樓玩吓啦, 喺屋企都玩咗好耐! 去吓遊樂場咁, 本來諗住過球場找老公佢地, 但時間又唔啱, 就只係喺美孚玩吓遊樂場算, 等佢地返到嚟接埋我地返屋企, 老公去買嘢食, 食完就K.O.咗仲爺, 老公同我都瞓咗, 6點幾仲爺起身我地都要起身, 去咗長沙灣食咗簡簡單單一餐咋! 返去沖完涼睇吓電視, 套新GE劇又幾好笑喎, 仲仲10點前就比我K.O.咗, 子元就睇哂先瞓, 可能瞓咗晏覺所以hea到點幾都未瞓得著呢!

24/2/18

24/2/18.  SAT.   WARM*

今日短周， 但笨元要學英文， 所以都係只可以瞓到8點多就要起身，揍咗佢去我地就去食早餐，阿媽send msg來話阿婆入咗院，咁見有時間就去睇吓佢，唉...阿媽都話去到呢個年紀呢個狀況，有時可能舒舒服服咁去就算！接番子元返去執埋嘢下午兩個學嘢，咁就入沙田啦，睇完阿婆都真係覺得好難搞，叫佢其實都冇理過我，阿媽話係缺血性中風，醫生話1/3個腦都已經function唔到，又用唔到藥，仲可以點！差不多時間就出番長沙灣，子元去踢波，我就捧仲仲去對面海學音樂，真係千里迢迢，揍到佢過去佢真係認得路架喎，好嘢！佢學嘢時我就去行吓嗰間好大的12蚊店，不過都係買咗1樣嘢啫！接番仲仲就去咗食KFC，飲飽食醉回程時就瞓，抱到我隻嘢咁，所以叫老公喺地鐵站口接我！返到去佢繼續瞓，我就自由吓，子元去咗游水，等佢游完就去食晚餐，食埋糖水返屋企，沖涼睇吓電視咁囉！

23/2/18

23/2/18.   FRI.   COOL

今日應該可以瞓晏啲，因為嫲嫲過來揍佢地，點知反而就早醒，真係激死！買埋早餐返工啦，今日都唔算太多嘢做，時間有啲過得慢添，午飯後睇吓電視啦！下午找到好節目，找到個網上小說睇，雖然文字一般但故事都算幾吸引，咁就消磨到一個下午啦， 5：30閃人去揍子元放畫班，老公咁啱出咗九龍就車埋我地返屋企， 接埋嫲嫲同仲爺就出去食晚飯，買埋糖水返屋企，沖涼做肌肉練習，摺埋衫終於可以休息啦！

22/2/18

22/2/18   THU   COOL

今日真係凍咗好多, 出到街先覺得, 好在都著夠衫! 子元今日都係去婆婆到, 我就買埋早餐返工啦, 衰啲咁講今日真係有啲悶, 冇咩可以做咁! Hea到放飯都係睇吓電視啦, 今日睇埋個大結局, 下午都係搵嘢做吓咁, 終於等到放工, 去接子元入青衣食飯, 今日大包唔喺屋企, 總係覺得間屋闊咗! 食完飯8點多閃啦, 返去沖好涼睇好哂功課佢地都瞓哂, 我就摺衫睇埋套河伯大結果, 12點幾1點先瞓!

21/2/18

21/2/18   WED   COOL

今日真係要正正式式開工啦, 朝早7:45起身但全部起得身出門口都8點幾啦, 揍咗子元去婆婆到, 老公要去我公司樓下攞證, 所以都要帶埋仲爺一齊, 然後再揍仲仲入青衣! 返到公司食埋早餐做吓嘢咁啦, 跟住都係做吓嘢囉, 午飯食埋啲蘿蔔糕咋! 下午都係hea住過做吓嘢咁啦! 放工返去接埋笨元入青衣食飯, 咩都唔洗做有得食真係幾正, 包姐今晚撘機去韓國, 真開心又有得去旅行! 食完飯返屋企, 沖好涼比佢地玩輕粘土, 我都玩咗陣, K.O.咗仲爺, 子元就要做exercise啦, 今晚我都有做一轉, 手腳肌肉嗰D都易做, 但一做腰腹就真係唔掂! 打埋機12點幾先瞓!

20/2/18

20/2/18   TUE   WARM

今日要開工啦, 雖然第一日開工基本上係返去開一開機就等落鋪頭拜神等食飯, 但都係要一早起身架嘛, 點知鬧鐘響咗都唔知, 8點先知醒即刻快手叫哂佢地起身行人啦, 好在都算趕得切啫! 返到去食少少嘢就扮吓工先啦, 等人齊啲就派吓片, 影吓相咁就落鋪頭拜神, 跟住都係影吓相啦, 12點過富豪食午飯, 可能肚餓開頭啲點心真係好好食, 之後開始飽啦覺得食極都仲有, 都開始喺到hea, 問定老公咩時間過到嚟! 都算時間啱啱好, 佢嚟到我就落到樓, 陪佢地食咗嘢先再去街, 去咗黃埔玩食錢樂園, 佢地係玩得好開心GE! 跟住就過海子元去踢波, 其實就太早過去囉, 雖則話要搵路啫, 但都真係太早! 5點幾泊咗車喺條後巷就行去球場, 雖然球場隔離有個遊樂場, 但玩足兩個鐘其實都攰架, 我指係我, 所以捱到7點幾我真係要捉番仲仲去車等, 又大風咗又冇外套我真係會病! 點知返去睇到架車抄咗牌啦, 唉…都話早啲返嚟睇住架車架啦! 等佢地踢完返過嚟換埋衫就去食嘢, 返得屋企都10點幾, 快手K.O.咗仲爺再捉子元幫手摺埋啲衫先瞓!

19/2/18

19/2/18.   MON.   WARM

話咁快又到假期的最後一日，所以都玩得幾盡！朝早9點幾先起身，快手梳洗出門口，揍咗仲爺比婆婆就去快食個早餐，然後入青衣睇黑豹，冇我想像中咁多打鬥位，反而講故事多，都係standard英雄片啦！睇完又要快閃，接番仲仲就去AEON飲茶，約咗Carlie同Stella佢地團拜，本來只係飲茶，飲到3點多再上去樓上睇吓玩具，玩得咁上吓最後決定咗去Stella屋企坐吓，都係太古成啫，老公話冇所謂咁咪一齊去囉，去到有機打有玩具玩，我地大人就吹水玩吓B啦幾開心！話咁快又7點幾開飯啦，最好笑係個工人姐姐唔識炒飯，我同Carlie兩個咪入去睇吓仲可以點救囉，最終都叫做食得，等Stella老公買埋嘢上嚟齊齊開飯，食完飯又玩一輪玩到差不多10點先走，仲爺喺東廊已經瞓咗，返去執得嘢沖埋涼都12點啦，今日真係玩得好開心！

18/2/18

18/2/18.  SUN.   WARM

今日是五條king團拜，不過撞正子元海景嗰到有比賽又唔可以唔去，所以我同仲爺入屯門先，不過都唔係朝早入，9點幾起身老公揍子元出門口啦，我就煮早餐比仲爺食，然後接埋啲衫，等仲爺玩陣先我再換衫梳頭， 今日仲爺好乖又而自己執玩具喎！行出去撘巴士入去，我選擇唔轉車啦係要行遠啲啲啫，入到去佢地都喺到打緊機啫，仲爺就自己玩車車，其實都幾好架，我就主力食嘢先，之後都係睇住佢地玩，到4點幾Amanda個friend又帶埋3個小朋友嚟，真係夠哂熱鬧啦，如果子元都嚟埋先就真係唔敢想像！我地大人就玩咗幾轉七級豬，真係好耐冇玩過啲咁低B嘢，6點幾老公佢聽也終於嚟到，嗰家人又差不多走，所以之後玩都唔算太混亂，7點幾又食飯啦，最終都係食燒味飯，玩到8點幾軒媽佢地call到車都走啦， 我地就坐到9點多，幫手執吓嘢先囉！返到去仲爺醒咗就沖埋涼先瞓！

17/2/18

17/2/18.  SAT.   WARM

年初二的活動都係年年如是，不過中午先去阿婆到就真係可以瞓晏啲！9點幾比佢地嘈醒都要起身啦，煮早餐執吓嘢執吓自己出門口都12點先過到去，人又多地方又細，食起飯上嚟都真係要立食先掂，我又要照顧仲爺食飯，佢都算係咁食完肯添少少食哂，坐咗一輪老公帶佢落去玩遊樂場踢吓波咁，唔洗困喺屋又咩都冇得玩，子元就有電視可以唔郁，有好有唔好啦！差不多3點閃人，去葵廣幫子元個電話換電，都係時候要比個電話佢， 一來佢平時用開嗰隻電話錶爛咗，咁反正我有部I phone 4喺到，只係舊電老化，$150換咗佢又可以重生， 幾好呀！接埋嫲嫲同大包就去愉景新城玩吓，都係去嗰兩個地方啦，6點幾就去食晚餐啦，又係去地下嗰到食西餐，見佢地人人都叫咗一份，咁我食仲爺嗰份得啦，最多叫多個拼盤齊齊分！食完回程啦，返到去執吓嘢打暈仲仲，又整吓子元部電話，update過哂啲嘢都搞咗一大輪，沖好涼休息吓，明天又去拜年！

16/2/18

16/2/18. FRI.  WARM

新年快樂呀，大年初一都係同往年一樣啦， 瞓到9點幾10點先起身， 梳洗完煮丁麵齊齊食，11點幾12點過到去阿媽到拜年，但怡今年唔知醒，所以冇一齊影相，直接去阿嫲屋企會合，等得嚟都點幾先開飯，已經醒目放兩個細出走廊放電， 食完飯玩咗一輪都3點多先閃，本來諗住入青衣，但佢地全部都喺嫲嫲屋企，最終因為嫲嫲肚餓叫我地買嘢比佢食，所以都係要入去，我食咗啲藥所以攰攰地，好在仲有個床位可以自由吓，但都咁上吓都係要出去伸展吓，去橋嗰邊買少少嘢食郁吓，返去同仲爺笨元喺lift口踢陣波就開飯， 但我地都冇飯食， 因為要比班親友食，堅係慘囉！終於7點幾8點佢地走啦，我地本來都諗住走，但又要等埋大包車佢出去， 佢啲時間觀真係另一個平行時空，5分鐘5咗唔知幾多次先出到門口，真係好乞人憎囉！返到屋企都係沖涼啦， 今日食咗藥都係矇矇地，真係要休息吓！

15/2/18

15/2/18.   THU.  COOL

話咁快又到年三十晚， 朝早都係7點幾起身，食埋早餐就揍子元比婆婆跟住我就返工啦，返到去其實都冇咩做，咁鬼holiday mood點會想做嘢，所以都係吹吓水咁， 係要處理吓琴日我冇返工時發生的花牌事件，有時簡單啲處理咗佢咪得囉，有咩好鬥呢， 人地口大你口細！午飯都係食蘿蔔糕，然後都係睇吓電視再貼吓新年裝飾啦，下午返多兩個鐘就放工，不過我要攞個電話去葵廣換番個mon先，真係好蝕囉，唉....破財！搞掂老公嚟接埋我返荔欣，去大快活食咗啲嘢先返上樓做埋啲手尾，抺一抺地就出去接埋阿嫲去阿媽到食團年飯，不過要等埋阿妹放工都7點幾先開到飯，食到8點幾開始收拾啦，仲爺就好鬼唔合作好嘈啦！晚飯完就去咗AEON一轉，買咗禮物同少少糖果放全盒，回家後仲好忙，搞掂仲仲沖涼就比佢入吓全盒貼吓揮春應吓節啦，沖好涼摺埋衫入埋利是都點幾啦，要快啲休息！

14/2/18

14/2/18   WED   COOL

今日係情人節, 但其實對我嚟講真係冇咩感覺! 反而今日請咗假揍仲爺, 得佢同嫲嫲大包入迪士尼我真係唔放心! 今朝子元10點要學英文, 咁我9點多起身, 仲爺已經比阿哥搞掂哂沖好涼換好衫, 所以10點多已經過到去學英文, 我就同仲仲去大家樂食早餐, 食完都係10點幾, 於是咪去公園玩吓囉, 因為約咗大包11:30喺青衣站嘛, 10:50打比佢叫佢要起身, 都話我好咁早打比佢, 大佬你約咗我11:30喎! 結果我11:27到咗, 但等到佢12:10佢先到, 我堅係火喎, 12點時我已經嬲到話返屋企, 但仲仲又好慘咁, 唉….嗰吓真係進退兩難, 佢嚟到我都要鬧呀, 係過分嘛! 最終12:45先入到去, 真係少咗好多時間囉, 先去玩小小世界, 都要排差不多半個鐘, 想睇魔法書都排唔到, 咁就去玩IRONMAN囉, 仲爺叫做高度上過咗骨入到去, 大膽仲完全唔怕囉, 仲覺得好好玩添, 跟住再去咗睇吓米奇呀玩吓poohpooh啦, 再去影吓相, 最終都冇睇巡遊, 去咗反斗大本營嗰邊, 就係嗰到影相時….我交手部手機比大包, 佢冇接實….跌咗落地, 爆mon!!!!!!!!!!!!!!! 真係好唔開心架, 我真係一向都用得好小心, 唉…你話我姓賴都好, 同啲唔小心GE人一齊都出現個錯GE磁場, 好就好在應該只係傷咗表面, 去換番就得, 但都係赤啦, 激死我呀! 冇咩可以做, 都係繼續玩囉, 迷離莊園仲爺都覺得好玩, 一啲都唔驚囉, 同子元真係差好遠! 今次仲玩咗新嘢, 坐咗火車遊一個圈, 又去公主花園睇吓, 仲同黑豹影埋相, 最後再玩多次IRONMAN都走啦, 臨走都真係肚餓, 就買咗一個包3個人分, 都要$40架好鬼貴! 撘緊地鐵時仲爺已經瞓咗, 抱到我手軟, 本來想食牛陣但實在要排太耐, 最終上咗聯邦食, 送咗嫲嫲返屋企, 仲爺又話要喺嫲嫲到瞓, 咁反正明早佢都要入來就由得佢, 返去我地可以輕鬆少少, 沖好涼入埋啲相就瞓啦!