31/10/13

31/10/13   THU   WARM

今日下午去檢查, 搞到上午都冇咩心機做嘢! 朝早笨元又係要人叫先起身啦, 返到去都冇得排隊啦! 咁買埋早餐就返工啦, 返到去先寫吓日記上吓網hea吓咁啦, 淨係想快D閃得, 等到1點就閃啦, 不過又要去攞相又要去銀行, 約咗老公喺美孚HSBC等, 入埋錢就去食嘢, 然後再去超市買埋嘢就撘車返一返屋企換過D家當就撘的士上PMH, 因為都等唔到小巴, 實full! 上到去諗住今日早咗到應該可以預計時間走啦, 點知等到4:50先見得到醫生, 再要打電話返學校話會晏D先去接到子元囉! 話比醫生聽有M痛feel, 佢又好似唔多理咁, 仲要話有咩事都係落產房喎, 咁之後都係摸肚聽心跳啦, 冇咩特別嘢, 只係要去再去量多次血壓, 話我下壓有D高, 變咗又要再等! 最終過關約埋下次檢查日期, 早極都要35W先有得再檢, 都冇法啦! 出到lift口先記得冇攞葉酸, 唯有自己買啦! 馬上撘的士去接笨元, 再返出美孚拔牙, 約咗6:00! 去到已經有得睇, 好在笨元為食, 為咗杯平時好少食到的朱古力雪糕, 佢真係好勇敢, 因為拔牙的過程都幾得人驚(我個人認為), 先搽D麻醉藥先再打針, 仲要打兩次架喎, 等2分鐘D藥力發揮, 就用支嘢撩一撩, 用嘢一拔就得啦, 最痛係嗰兩支麻醉針, 笨元有叫架, 但佢都忍到, 真係好叻仔架啦, 係之後叫佢咬住舊綿花好似唔明咁囉! 一出診所就話要食雪糕, 但都未止血, 於是就話行到去美心嗰邊嗰間先買, 好在佢又冇扭! 食雪糕食得幾開心呀, 仲諗住佢冇胃口食飯所以喺美心食嘢都冇遇佢, 點知佢又要食喎, 咁都比D佢食啦, 之後借埋書回家啦, 都已經八點囉, 比笨元自己沖涼, 因為我地仲有好多嘢執, 咁佢又沖得OK的, 隔日同佢沖番確保佢唔會dirty囉! 之後同溫一溫書就由佢做埋填色比賽, 其實執埋書包校服都九點幾架啦, 佢仲諗住要玩, 但又要食蛋糕喎, 老公就有D火咁同佢講, 星期一至五唔係日日有得玩架, 要快手做好哂嘢又未夠鐘瞓覺先有得玩, 所以食完蛋糕佢都肯瞓啦! 我今日就腰勁痛, 痛到喊囉, 做咗少少產前運動好似有D幫助, 仲有個幾月我捱呀, 唉…十點幾已經喺梳化瞓著, 近來都瞓得唔好, 唔係發夢醒就係轉側時醒, 真係好想叫救命!

<夠哂哈囉喂feel!>

 <後面隻牙生咗好多啦, 非拔不可!>

 <咁快已經換兩隻恒齒!>

30/10/13

30/10/13   WED   WARM

又係如常返學啦, 笨元呢兩晚都夜咗瞓, 搞到朝早要叫起身先得, 咁就慢哂囉! 返到去梗係冇得排隊啦! 買埋早餐就返工啦, 老細今日冇返, 但搖控你做嘢都夠啦, 又買報紙又check email, 麻鬼煩! 搞到我連POPO都唔記得去, 要等午飯後先再去到! 下午都係吹吓水做吓自己嘢啦, 老細唔返幾寧靜呀! TEA諗住飲奶健康D啦, 點知都係嘔…下次都係唔飲奶啦, 嘔奶好臭! 返到青衣笨元係到喊緊, 因為嫲嫲關咗電視要佢瞓, 佢唔肯就係到喊, 但喊都冇用, 嫲嫲都係冇開, 做得好呀! 等我返嚟同佢講數, 連蘇菲亞都冇得睇, 同佢講數囉, 你唔瞓食唔到飯, 係連電視都冇得睇架, 喊都冇用都係冇! 咁佢又好似知咁, 即管睇吓佢下星期點啦! 食飯時果然打瞌睡, 但都叫做食得七七八八啦, 本來嵐嵐媽話帶妹妹過嚟GE, 但因為嵐嵐有幾聲咳, 所以都係唔過啦, 咁子元冇得教嵐妹嘢啦, 因為阿妹本來諗住入家姐間幼稚園架嘛, 點知面試時完全唔出聲, 學校話真係好難收, 比多次機會佢咪諗住過嚟找子元陪佢玩吓等佢唔咁怕羞囉! 咁冇法啦, 我地返到去如常咁搞掂D嘢比笨元玩陣就瞓啦, 不過做埋mels都九點幾, 玩得嚟佢又係到拖時間咁都十點幾先瞓!

29/10/13

29/10/13   TUE   WARM

又係如常返學的一天, 叫佢記得送番舊刷膠比鎵樂啦, 跟住就返工買早餐啦, 今日都係做吓自己嘢hea吓多, 又冇人skype吹水喎! 午飯買咗D腸粉配湯渣啦, 之後老細又係咁早返咗嚟, 真係好冇癮架! 下午再吓公事後就勁無聊地諗吓奶奶間屋嗰到點擺過D位囉, 不過未知size都係要返去度咗先有得詳諗, 而家都係想像式啫! 咁返到去咪度吓嘢囉, 笨元就係到睇佢個蘇菲亞公主, 食飯時食咗少少又瞓鬼咗, 叫咗佢放學返嚟就瞓架啦, 係唔肯聽, 等佢瞓到8:15左右就捉佢走啦, 瞓爛覺又係到發炆囉, 最乞人憎! 返到去沖完涼再溫習啦, 都溫到有D火呀, 唔知佢係一時間回唔到魂定咩啦, 溫好執埋嘢都十點幾, 比佢玩多5分鐘再瞓, 又要走出嚟幾次, 梗係啦, 七點幾先嚟瞓大半個鐘!

28/10/13

28/10/13   MON   WARM

今朝都算撘到早嗰班車架啦, 但因為等小巴等耐咗, 始終都係過咗8:30後先返到去! 吹咗陣水先撘巴士, 買埋早餐返公司食, 然後就主力做兩樣嘢, 一係寫番3日日記, 二係睇吓學校隻CD開唔開到, 咁開到就要將笨元D相放番落自己個hard disk啦, 整埋落手指攞番去比老公睇! 因為好多file, 真係搞咗一日先搞掂! 午飯要買飯呀, 因為得八達通咋, 只可以買大家樂囉D! 食完一陣老細就返, 嘈住哂! 好在佢都要去開會, 所以兩點幾都走啦, 咁咪又可以繼續做自己嘢, 食埋tea就放工啦, 因為知道彌敦道封咗路, 怕冇巴士撘, 都有諗過撘地鐵架, 但肯定勁迫, 所以最終都係去番撘巴士, 但等到6點都仲未有車, 不過我都係諗住等42架啦, 終於等到啦, 見已經6:10, 就問老公走得未, 可以撘埋同一架車呢, 返得去都已經7點囉! 睇埋笨元D功課, 就同佢輕描淡寫講番佢今日喺學校發生的事, 因為林老師打咗嚟同我講兩單case, 一係攞咗鎵樂仔舊刷膠刷爛咗, 問番佢佢又話係順手攞咗, 同埋自己嗰舊刷得唔乾淨, 咁我就話同佢換過啦! 第二件事係今日教時鐘, 老師叫子元幫手做小老師咁睇睇其他未做完的同學, 點知條友就用咗我方法, 見人地做錯或做得唔靚就刷哂人地ge, 老師都話明佢本意係好, 但只係用錯方法, 當老師知媽媽係會咁刷功課後, 都明佢係小朋友學咗啫! 咁我地大家都好明冇一個人一出世就識同人相處, 都係要學ge! 食完飯回家沖完涼睇功課溫埋書, 佢就要做埋張填色, 佢好鬼認真咁去做, 所以都唔搔擾佢囉, 畫好執哂嘢本來想叫佢瞓架啦, 但佢話未玩過, 就比佢玩五分鐘, 咪安安樂樂咁瞓囉, 我地睇埋電視就瞓啦!

27/10/13

27/10/13   SUN   WARM

今日都算悠閒日, 改咗今朝學番畫班, 好在學10:40, 咁九點先起身都仲OK, 去麥當勞比笨元食咗早餐就帶佢去畫室, 我地先去茶餐廳食好味早餐! 然後周圍行囉, 老公成日覺得長沙灣好多嘢睇呢, 咁老實, 講買嘢方便同多又真係比美孚好ge! 結果買咗今晚煮咖哩D料啦, 總之買呀買咁啦, 去還埋兩本書, 都仲未夠鐘就又去麥當勞坐囉, 坐到夠鐘先去接笨元, 都係因為我行唔到咁耐啫! 接咗笨元就回家啦, 返到去真係好攰, 抖咗一輪先開始郁, 要笨元做好埋D功課, 跟住我就打掃啦, 老公走咗去瞓覺, 激死! 到我差不多抺好地佢都未係好捨得起身, 我同笨元就等佢煎pancake我地食嘛, 好肚餓啦! 食完佢又要準備吓今晚整咖哩牛腩D嘢, 搞咗一輪先幫笨元砌路軌, 我就唔理咁多休息啦, 想話執吓蕃薯粒D衫都冇力! 七點多食飯, D牛腩又整得幾好味喎! 食完就捉笨元去做珠心算, 但做得好慢囉, 我洗好碗抺埋個廚房佢都只係做咗好少, 老公都火火地! 到我地兩個沖完涼佢都係未做完, 係要掌門人開場啦, 佢先怕真係冇得睇, 做得勁快, 係咪乞人憎! 最後襯廣告時間先沖涼呀執嘢呀咁, 十點多都可以上到床瞓! 我地就好忙咁睇電視, 又walking dead, 又十級重案! 到十二點幾先瞓, 勁攰!

26/10/13

26/10/13   SAT   WARM

今日節目豐富呀, 朝早9:30要去到德雅interview, 都真係好多人囉, 去到見到程生佢地同埋靜瑜, 不過佢地IN9:00, 所以都已經上咗課室, 到子元上去時佢地先落嚟! 子元9:45上咗去in, 10:20已返落嚟, 問佢IN咗咩, 又同之前兩個同學唔同架喎! 佢係答問題後砌積木, 不過冇咩所謂啦, 至在參與! 跟住行番去太子撘巴士入青衣, 行得勁遠囉! 見到有巴士啱就上, 就算要運路! 入到去都係11:30, 喺麥當勞坐到12點多就行去學校, 不過都等到12:40先有得見, 其實老師都覺得子元各樣都好OK, 只係玩起上嚟太顛未必控制到自己囉, 咁呢D我地都知, 不過見佢學習進度都好好, 咁都OK啦! 吹完水都點幾, 接番笨元就走啦, 老公同笨元去踢波, 我就回家休息兼執屋, 都真係正確選擇, 我都冇抺地, 只係執吓地方摺哂D衫咋! 六點幾佢地返咗嚟, 又到老公去踢波, 我同笨元撐枱腳, 煮咗白汁三文魚通粉, 但因為佢地買咗少少嘢返嚟食, 所以都唔係好食得哂! 洗埋碗陪佢玩咗陣睇吓電視, 等Nicho攞咗蕃薯粒D嘢嚟, 落去接佢地仲要人地幫手攞埋上嚟呢, 因為佢老公架車等住所以都冇坐啦, 講咗幾句就走, 下次有機會先再玩啦! 可以同笨元沖涼啦, 跟住就瞓覺, 但都十點多囉, 所以好快瞓著! 我就等老公返嚟, 睇吓電視咁十二點幾就瞓!

25/10/13

25/10/13   FRI   WARM

星期五都係如常咁啦, 朝早揍咗笨元返學就買早餐返工, 朝早都係做吓自己嘢, 冇咩特別skype吹吓水咁啦, 午飯又要落去買飯喎, 食得好飽! 下午老細返咗嚟, 點都要做吓嘢GE! 放工奶奶打嚟叫我買嘢加料, 咁只可在附件買叉燒啫, 老公又提我要去買風扇, 其實都唔係重, 但攞起上嚟都幾吃力! 返到去馬上同笨元做功課, 因為晚飯後又要去合唱團, 所以一定要第一時間做哂功課, 好在笨元都合作! 做完就食飯啦, 食完就出門口啦, 好緊密的節目! 揍咗佢去我地就可以去行吓街啦, 不過而家行街真係好吃力! 夠鐘返去揍笨就回家白白瞓覺, 明天活動仲豐富!

24/10/13

24/10/13   THU   WARM

今日都係幾hea的一天, 朝早揍笨元返學啦, 因為撘到早一班車, 可以排隊, 但佢一返到去D小朋友就係咁追嚟追去, 都唔知佢未出現時D小朋友係咪都係咁, 終於入得去要企好啦! 買埋早餐返公司hea啦, 之前開會D嘢都Prepare好架啦, 無聊吓等到12:30咪閃人, 約咗phoebe食lunch, 吹吓水咁又食咗好多嘢喎, 不過就唔知飽囉, 到行緊去地鐵站時就大穫啦, 嘔咗兩次呀, 本來都想忍住唔嘔, 不過真係忍唔到, 兩個膠袋都用哂, 冇個袋喺身總係冇咩安全感, 最終去咗票務處問佢有冇膠袋, 咁佢見我咁ge樣問我係咪想嘔, 我話我已經嘔咗兩個膠袋, 怕再喺車再嘔, 佢就比咗個嘔吐袋我啦, 好在啫, 咁安心D又冇再嘔啦喎! 跟住到入咗車箱啦, 我都冇諗住要搵住坐的, 只係企喺門之間那條柱扶穩, 咁去到太子企我隔離個師奶叫一叫我話有位坐, 我只係轉身同行咗1步啫, 嗰4個位已經同時比人坐哂, 咁都冇咩所謂, 咪企番好囉! 咁較近的一位阿太見到就想讓座比我, 但佢又一箱行李喺面前, 於是佢要推開個行李企起身先可以讓比我, 點知企佢前面個中年男子, 阿太都未離開個位, 佢已經攝咗個身埋去, 咁我已經行緊埋去啦嘛, 企正喺佢後面, 我一開始都冇點樣ge, 只係講咗幾聲唔該, 但佢可能塞住耳仔聽嘢完全為意唔到我, 咁我唯有大聲D講「唔好意思, 個位讓比我架!」佢先望一望, 見我咁ge身世, 佢冇得唔讓啦, 但可能覺得瘀呀, 跌落地嗱番渣沙, 回咗句「睇你唔到嘛, 唔洗咁大聲ge」, 咁我都冇埋佢, 反正理虧的又唔係我! 過得去會剛2:30, 高估咗自己的速度囉! 今日冇我老細係到, 果然開得勁快就開完個會, 3:30已走得架啦, 又決議好哂D嘢, 咁先係做嘢架嘛, 成日講到去咗大西洋, 點做! 大把時間慢慢返去揍笨元, 已經過哂4:30先到學校, 但排隊排到勁長龍, 我諗起碼等咗15分鐘先接到佢, 好在敏瑩剛miss咗架41A, 咁佢兩個就可以喺巴士站又玩一輪, 喺巴士又吹一輪水! 但最搞笑係公公漏咗個珠心算袋喺巴士站, 搞到程太打比我問, 最終公公要返去巴士站搵番, 好在真係搵到咋! 回家後沖涼煮晚餐啦, 都係簡單地睇吓雪櫃仲有咩就煮埋咋, 晚餐後我先要求笨元溫習, 咁溫書都OK, 但到做珠心算時就唔like啦, 又發脾氣又做得慢咁, 我覺得自己都算控制到架啦, 最終佢都做好哂要求嗰三行, 咁執好書句同校服咪比佢玩10分鐘就瞓囉, 都攰啦! 我冇咩做, 等緊我個紫米露返嚟, 因為有D餓! Barry打嚟吹咗輪水啦, 佢都係想找老公問嘢啫! 咁食完就睇吓電視先瞓囉!

23/10/13

23/10/13   WED   WARM

今朝都係如常咁返學啦, 落到巴士站先發現唔記得帶茶點袋, 都冇辦法啦, 叫佢返學校同老師講借餐具囉! 買埋早餐返工啦, 今日都係冇咩做架咋, 老細完全冇msg煩我啦, 不過冇咩做都真係悶悶的! 午飯後都係睇吓電視咁啦, skype吹水咁囉! 下午都係好悶呀, tea 後等收工, 返到去笨元掛住睇卡通, 到食飯時就眼瞓啦, 食咗少少都已經食唔落, 叫佢入房瞓陣佢真係瞓著咗, 瞓到八點都唔起身, 嫲嫲咪比錢叫我地撘的士返去囉, 因為佢知佢唔比我地只會等巴士, 於是老公抱住笨元落樓我地咪撘的士返去囉, 好在落車時笨元都肯自己行埋返屋企, 因為我話開盤比佢沖涼, 有得玩水梗鍾意架! 沖完涼有哂精神咁就做埋mels囉, 自動自覺嗰隻喎! 咁溫埋書就比佢玩15分鐘啦, 之後都好乖咁瞓覺! 我都攰啦, 新聞都冇睇就瞓啦!

22/10/13

22/10/13   TUE   WARM

今朝都係如常咁啦, 點都做唔到八點前出到門口, 所以都係只可以撘8:10班車, 返到去個時間應該唔洗排隊架嘛, 點知勁長龍喎, 莫非遲咗開門! 揍咗笨元入去後, 見到有個女同學埋去比咗封粉紅色的信笨元, 佢打開睇完又放番入書包, 真係好好奇係咩, 但都要今晚先知! 之後同咗Apple傾偈, 傾到9:15班車先至上到, 買埋早餐返去, 老細今日飛, 感覺FREE好多! 朝早都係做自己嘢同吹水啦, 午飯後打機睇電視啦! 跟住都唔係好想做嘢, 不過又真係幾悶囉, 點知四點多老細打嚟, 做埋D無謂嘢, 真係想聽少佢把聲一日都唔得! 放工去荃灣剪頭髮, 去到見笨元低著頭剪緊, 原來瞓住嚟剪, 服咗佢! Ann見到我大住肚都打個突, 跟住就係咁講生仔D嘢, 所以都剪得慢咗, 我洗頭時最辛苦係起身嗰吓囉, 辛苦幫我洗頭嗰個仲要推我起身! 我未剪完老公就到, 3個剪好哂都七點幾, 到附件食晚餐, 求奇入咗一間食西餐因為笨元話唔想食米線, 咁又幾好食喎! 跟住我問笨元女同學比咗封咩佢, 叫佢攞出嚟, 笨元係話「我都唔知佢畫咩」, 我地大人一睇就似情信囉, 而家D女仔真係早熟, 五歲幾就有情信! 返到屋企沖完涼, 就叫笨元回番信囉, 當普通嘢咁回啫, 叫佢畫番幅畫比人, 寫番句thank you囉! 溫埋書都晏啦, 快手瞓覺啦! 我地都係睇埋新聞咪瞓囉!

<這就是子元收到的人生第一封情信!>

21/10/13

21/10/13   MON   WARM

又要返工返學啦, 笨元今朝係早起咗身呀, 我起身時佢已經換緊校服, 但之後都係慢, 所以都只係撘到8:10班車! 返到去吹咗陣水就閃啦, 買埋早餐返工啦, 上午都係做自己嘢, 午飯去買多個米粉, 因為只帶了湯嘛! 食完咪睇吓電視囉, 老細下午返咗, 但佢都好忙, 都冇咩理我亦好快閃咗, 明天佢就飛啦, 可以free3日咁大把! 下午做商會D嘢, 做足一個下午, 食埋tea收工, 返到去笨元掛住睇電視囉, 我就好攰唔得閒理佢啦! 老師打過嚟話冇帶番英文書返去, 明天記得帶番, 又話個PPT已present咗, 明天可以比番我, 我順手問埋佢子元present成點, 老師話同平時判若兩人, 見到佢好緊張, 縮埋一舊, 同好細聲喎, 覺得佢好得意, 聽到我好想笑囉! 食完飯即閃啦, 趕到巴士返去沖涼時, 叫咗佢好耐都未入嚟, 入到嚟問佢又十問九唔應, 激到我爆咗, 踩地下D水彈濕我, 激到我火起裝咗杯水淋落佢個頭, 跟住就走咗出廁所唔理佢, 叫老公執手尾, 搞到我仲要比老公鬧, 真係好火好火呀! 到佢沖完出嚟我就同佢講佢錯咩囉, 話以後一返屋企佢沖咗先呀, 冇得玩住嚟等沖呀! 搞掂就溫習啦, 今日佢學寫個「愛」字, 但寫得勁衰, 要逐筆教佢呀, 教教吓係佢學得唔耐煩囉, 心諗我教你都未唔耐煩啦, 真係五行欠丙呀! 之後又要佢默番上星期五的句子, 諗都唔諗就答唔識, 又比我丙囉! 叫佢試咗先啦…唔識! 搞掂就執書包執校服洗茶點袋囉, 10點前都可以瞓到, 我地就hea到新聞後咪瞓囉!

20/10/13

20/10/13   SUN   WARM

今日係hea過的一天, 笨元都瞓到八點幾先起身, 佢為咗下午可以全日玩, 真係一起身就做哂D珠心算, 真係服咗佢! 我地勁衰咁瞓到11點呢, 咁笨元又冇叫我地梗係唔起住啦, 等老公煮早餐時我就同笨元做埋功課D手尾, 食食吓早餐時聽到有人開門喎, 原來喺嫲嫲喎, 佢電話冇電上嚟叉電喎! 咁我地食完早餐就要出去圖書館同超市, 嫲嫲要出去馬會幫大包買馬喎! 先去還書再諗住去睇風扇的但都唔啱喎, 咁去埋超市借埋書行返屋企, 勁攰呀! 先開好咗套變型金鋼, 等老公打掃我咪hea 吓先囉, 陪笨元睇戲, 但佢勁問嘢好煩囉, 對佢嚟講劇情太快睇唔明! 睇完都五點啦, 老公都要幫佢砌大路軌, 我就摺衫, 之後老公就預備今晚火鍋的料, 喺惠康見有個叫火鍋配料的pack, 全部是蔬菜類, 只係$28勁抵! 咁今晚就烚吓烚吓啦, 食埋上次喺九龍灣買嗰隻烏冬, 笨元幾識食呀, 呢隻靚嘢佢就係咁食! 之後快快手沖好涼就可以睇掌門人, 仲有幫笨元執清楚返學D嘢啦! 睇完掌門人剛剛好睇walking dead, 終於有新一輯, 又係好令人緊張呢! 之後又啱啱好可以睇十級重案, 結果睇到點半先至瞓!

19/10/13

19/10/13  SAT   WARM

今日變咗睇波日, 下午睇完笨元又到晚上睇老公, 真係有D悶架! 朝早如常返工啦, 放工原來笨元做珠心算做得慢, 所以遲咗出門口, 又唔打比我喎, 我打極比佢又冇人聽, 急死我啦! 咁最終我落咗樓同佢地會合啦, 點知笨元又話急VV走咗上去! 終於搞掂去食KFC就趕巴士入大埔踢波啦, 今次我喺車瞓唔著呀, 笨元落車都唔願行, 抱到DADDY手軟! 今日見佢真係進步咗, 不過佢有個習慣好得意, 分組時佢喺要排最尾, 叫坐低聽嘢時佢又要坐到最後, 真係要問吓佢點解先! 踢完攰到要DADDY揹過去沖涼, 好搞笑! 最後撘巴士入青衣, 又到老公踢啦, 先喺大快活食晚飯, 不過真係唔多掂, 又細份又唔係咁好食! 跟住過球場啦, 好在老公話佢踢半場, 咁等佢地開咗波我地咪上看台坐囉, 差不多完場先落番去, 佢有個隊友比人踢親要call白車呀, 但白車話若你要去私家不如自己坐的士, 你又未至於行唔到, 白車車去都得但大家都要寫報告, 真係咁都得ge! 我地冇理就走啦, 返到屋企都9點囉, 沖涼比佢玩陣就瞓啦, 我都真係好攰啦!

18/10/13

18/10/13   FRI   WARM

今日有得去參觀, 所以笨元都肯早起身, 返到去剛剛好開門, 睇咗陣笨元, 冇咩機會吹水就撘車返工啦! 都係做吓自己嘢悶吓咁啦, 午飯後睇吓電視hea吓咁, 原來老細今日又唔返, 但大老闆娘返咗, 所以都要做吓樣做吓嘢! 又係好悶住咁過埋個下午啦! 放工直接返屋企, 因為笨元今晚要合唱團, 奶奶又怕我地趕出嚟, 所以放學揍咗笨元出嚟! 返到去先同笨元做咗功課先, 星期五實在太多功課啦, 唔做好先假期又冇心機做架啦! 做完就已經開飯, 食完比佢玩咗陣又要出去合唱團, 我地又去咗759洗錢, 買埋D無謂零食! 接番笨元時順手同敏瑩報埋下期一齊合唱團! 回家馬上沖涼瞓覺, 明早又要一早學畫畫嘛, 我地就睇埋新聞打吓機咁就瞓啦!

17/10/13

17/10/13   THU   WARM

今朝都趕趕地架啦, 加埋等唔到小巴, 8:50先返得到學校囉, 笨元見到校長聲都聲咁好好笑囉! 出到學校又掛住吹水, 9點先去撘車所以買埋早餐都遲返到公司! 不過朝早都係冇咩特別, 做吓自己嘢咁啦, 午飯後打吓機睇吓電視咁又開工, 老細今日終於有返, 好似幾日冇講嘢咁講唔停, 煩到你死! 食埋TEA就差不多放工啦, 阿媽攞咗D麵同果皮比我, 都好今日直接返屋企唔怕重! 回家後先同隻笨白白完就食飯, 佢把嘴真係好尖, 新鮮雞就話好好食, 幾快食哂D飯呀! 休息吓睇埋愛回家就溫習, 然後叫佢做珠心算, 點知做咗幾題就話眼瞓, 不過佢真係肯刷好牙講完故事就瞓覺, 咁可能真係攰呢, 珠心算又唔趕就比佢唔做住囉! 佢瞓咗都冇再走出嚟, 我就等老公買紫米露返嚟比我食, 睇吓電視等D衫可以放埋入乾衣機就瞓啦!

16/10/13

16/10/13   WED   WARM

今日如常起身返學返工啦, 不過五點幾醒咗去廁所後就唔係好瞓到都幾辛苦呀! 喺葵涌道塞咗半個鐘車, 返得去都九點九, 仲要買埋早餐嘛! 上午都係做吓自己嘢啦, 午飯簡單地帶咗幾隻餃子配個福麵就得啦, 下午唔知做咩好忙喎, 真係忙公事嗰隻, 老細又冇返但都好忙, 難得呀! 食埋TEA就放工啦, 撘巴士返去時睇吓套新的韓劇, 都係查案嗰類, 初頭都怕血腥但又唔算喎, 呢類韓劇好睇過嗰D咩報復嗰D好多! 返到去笨元都係睇佢D卡通啦, 開飯後又食唔哂, 咁見佢食咗好多肉就算囉! 回家後馬上沖涼, 然後做珠心算, 之前完全唔記得要做, 今晚係趕功囉! 跟住又要溫書, 做圖書紀錄冊等等, 做到十點有多, 本來話唔比佢玩架, 但最後都比佢玩咗5分鐘佢又心甘喎! 我地睇埋新聞都瞓啦!

15/10/13

15/10/13   TUE   HOT

又要開始返工啦, 嚟緊都冇假期, 要到放產假呢! 朝早揍咗笨元返學就買早餐返工啦, 食完做吓自己嘢, hea到咁上吓開始做埋D抄寫工作, 雖然已是尾聲, 但估唔到都要抄咁耐, 午飯後抄到放工先搞掂呢, 老細冇返, 係返嚟接大老闆娘時比嘢佢簽啦! 放工返到去笨元掛住睇電視都唔理我, 我咪睇吓功課先囉, 老公返嚟之後話我知, 佢接放學時老師同佢講話笨元喺學校打人, 盤問咗好耐先叫做講到少少, 事源英文堂老師叫收拾D蛋喎, 咁佢想攞詠彤嗰隻睇, 人地又唔比佢睇佢就搶, 唔夠搶就打人! 話佢佢就係到打瞌睡咁, 食飯又食得勁慢, 又扭個頭去睇電視, 我就坐正喺佢面前望實佢食, 對住我呢個咁強硬的媽媽, 佢冇得逃避架啦, 話之你太上老君喺到都冇用! 講番打人單嘢時, 嫲嫲就係到幫口, 好在老公唔係愚孝, 會出口話番佢阿媽啫, 唔係要我出聲都唔知點! 終於食完飯休息一陣就走啦, 今日都攰啦冇咩力理佢地住! 返去沖完涼好少少, 睇好功課溫埋書, 執好嘢佢就知道只可以玩一陣, 算佢識趣冇扭就瞓啦! 我地都係睇吓電視, 睇埋新聞就瞓啦!

14/10/13

14/10/13   MON   HOT

7年之癢結婚周年, 要帶埋隻笨一齊出去呢, 怕佢小器呀! 朝早瞓到十點幾先起身, 只可以去闆闆嗰到食早餐, 執齊嘢出發, 食飽就撘巴士去歷史博物館, 都係幾唔關係的慶祝活動吧, 不過又諗唔到有咩地方可以去, 諗過去book酒店玩架, 亦諗過過澳門, 但又好似貴咗D, 同埋我都未必有力玩, 不如出年帶埋蕃薯粒先一齊去! 去到買飛入場, 另場外有巴士展, 但人多到都睇唔到D咩! 要比錢的“香港故事”人少好多! 笨元今次比較識睇啦, 字亦識多咗, 不過都唔算好有耐性睇! 行完全個展覽大約兩個多小時, 影埋出面的舊巴士就找地方食嘢啦, 平平地食咗個TEA就撘巴士過去海運買牛扒, 生蠔整大餐! 解釋咗比笨元聽佢就肯放棄去反斗城, 同埋佢已經謝謝地, 冇力行啦, 回程巴士上勁瞓囉, 返到去六點幾啦, 沖好涼等食, 老公今日好乖, 煮之餘肯洗埋, 因為我要跟埋D功課等等嘛! K.O.笨元後就睇電視, 睇咗套“英超有情人”, 睇到一點先瞓啦, 但近來都瞓得唔好, 唔係醒就發夢, 唉!

<好多人的巴士展!>

 <子元拿機影...十幾張有一張可以!>

 <扮林村許願樹, 子元自己寫的!>

 <扮圍村仔?>

 <閒來自拍>

 <開大炮射我喎!>

 <扮貴族?>

 <真係有紅色郵筒架!>

 <兩款添呀!>

< 唔會郁的電車!>

 <場外巴士展!>

 <和Daddy來一張吧!>

 <唯有最好的合照!>

<影到人又影唔到車!>

 

<自家制大餐享受中!>

 <大大個焗薯!>

 <勁美味生蠔!>

 <超級大牛扒!>

 

13/10/13

13/10/13   SUN   HOT
今日都幾hea吓, 遇咗係HEA日架啦, 朝早笨元都九點多先起身, 所以我地都瞓到十點, 本來諗住去荃灣剪頭髮, 但原來我地個髮型師呢兩日都OFF, 好在打咗個電話去問吓先啫! 咪唯有出去麥當當食完早餐, 再去買埋材料今晚煮咖哩囉! 由於要借圖書, 唯有行返去圖書館借完再行返屋企, 勁攰呢! 返去抖到點幾先開始捨得郁, 笨元做填色比賽, 我就打掃做家務, 之後都係休息吓收捨吓佢D功課等, 老公走咗去瞓覺, 好在笨元夠鐘都走去叫醒佢起身煮飯, 我就整緊佢D功課! 食完好好味咖哩就沖涼預備睇掌門人同聲夢呢!

12/10/13

12/10/13   SAT   HOT
今日都算充實的一天, 朝早老公佢同笨元仲早出口, 因為要去學畫畫嘛! 我就返工hea吓到放工啦, 夠鐘笨元就嚟接我放工啦, 簡單地附近食個午飯, 就要撘巴士入大埔踢波啦, 車程上大家都瞓咗, 好在老公知醒落車! 其實都係陪佢啫, 個幾鐘都有D悶架, 不過見笨元跟D大哥哥踢又幾得意! 夠鐘走得, 撘巴士返到長沙灣去食好味嗰間客家嘢, 行行吓笨元話急PO喎, 最方便梗係返阿媽到啦, 佢應該真係好急, 行得好快仲要夾住個PAT, 好搞笑, 不過到失咗少少手忍唔到, 但都唔太嚴重, 去乾淨洗乾淨就可以去食嘢, 食咗好多生炒骨呢, 我地都食咗口水雞, 超正! 回家白白後就睇克勤, 之後又要睇星夢, 都幾攰吓! 十二點多先瞓呢!

11/10/13

11/10/13   FRI   WRAM

如常咁起身返工返學, 今日都算排到隊啦, 跟住我就買早餐返工, 返到去都係做吓自己嘢啦, 上網吹吓水咁! 午飯後都係hea吓咁啦, 知道老細唔會返, 不過都係要做吓抄寫嘢, 食完tea勁飽, 真係後悔食咗因為好飽! 返到去笨元冇瞓覺, 咪捉佢做功課囉, 今日做咗一個鐘呀, 因為都真係多嘢寫, 仲要欠剪報未做架, 家長們就喺apps討論學校旅行件事, 我地真係心大心細去唔去, 一來23/11先係, 二來又係去大棠, 三來大小同價$200要埋個好難食的餐盒! 之前一向都係餐盒分開計架嘛, 佢地決定14/10生日會時開會討論吓, 我地都係睇大隊討論結果係點再決定架啦! 食飯時笨元都唔多合作, 鬧住嚟食, 因為8點又要去合唱團呀, 開飯時已7:25, 搞到7:45先走到, 好在趕到巴士, 去到都8:10啦! 佢學嘢我地就去買嘢, 再去麥當勞坐坐就接佢, 返去沖完涼玩咗陣咪瞓囉, 我唔得啦攰到死只識攤喺到, 但又唔眼瞓喎, 睇埋新聞hea吓先瞓!

10/10/13

10/10/13   THU   WARM

今朝笨元都早起身架啦,可惜架小巴塞車, 搞到佢連隊尾都冇得排咁, 好失望! 同家長們吹水吹到9點先走, 好在返得去都唔太晏, 食埋早餐吹水做吓自己嘢啦, 不過今朝都好多公事, 搞到好晏都未有時間寫日記! 午飯後都係睇吓電視啦, 老細冇返嚟, 不過都係照樣咁做嘢啫! 抄吓嘢吹吓水咁又放工啦, 琴晚講咗奶奶揍笨元返美孚煮意粉食, 但突然又話去美心食, 但我又唔想再出去嘛, 最終我話我買嘢返嚟煮! 返到去奶奶先至講佢因為刨薑皮刨到唔知時間冇食到晏, 所以先至想早D喺美心食嘢就算, 唉…咁又唔打比我時講埋, 最終佢買咗腸粉食咗就冇再食晚飯, 可能意粉佢又麻麻地! 笨元都唔係食得好多, 因為之前食咗一個包! 咁食完就睇埋愛回家先同佢溫書做功課, 然後陪佢玩陣就瞓覺, 幾有規律呀, 等佢瞓咗我就hea吓咁等老公返嚟啦, 佢買咗紫米露比我食, 食埋睇吓電影台, 但睇到十二點多已經好攰, 不過衫未洗好未乾得冇得瞓住, 要等老公幫我按腳嘛, 等到差不多1點先有得瞓, 但因為喺梳化我已瞓咗陣, 結果入到房反而瞓唔著, 吹水唔知吹咗幾耐先瞓著呢!

9/10/13

9/10/13   WED   WARM

每日都係如常咁叫兩隻嘢起身返工返學啦, 跟住我又係買早餐返工, 食得早餐嚟又係做吓自己嘢同skype吓咁啦, 午飯食完都係睇電視咁啦, 老細返咗嚟就簽吓嘢咁啦! 下午又要做抄寫呀, 日日都一樣咁其實都幾悶! Tea Time竟然覺得肚餓, 叫咗個餐食到好飽, 返到去食完飯又有得食腐竹雞蛋糖水, 好正呢, 笨元之前成日都話想食, 但又冇同嫲嫲講過佢都知個孫想食呢! 食完閃人啦, 返到去都八點幾, 沖完涼做埋功課呀溫習等, 比佢玩多5分鐘就要瞓, 瞓咗晏覺好好多! 我今晚都眼瞓, 未睇新聞已經要瞓!

8/10/13

8/10/13   TUE   WARM

今朝笨元都唔多願起身, 所以出得門口都晏又走咗班巴士, 好在小巴快笨元都仲有得排隊尾! 跟住我都係買早餐返工啦, 朝早做吓自己嘢同埋喺skype吹水咁啦, 時間都過得快! 午飯後都係睇陣電視打吓機咁啦, 老細返咗嚟比嘢佢簽吓講吓咁佢又走啦! 咁我咪繼續邊skype邊做廠嗰D抄寫嘢囉! 放工前食埋個tea又閃人啦, 返到去笨元真係瞓咗, 乖仔呀雖然6點先瞓, 咁等老公返嚟開飯都7點, 叫做瞓咗一個鐘, 雖然食飯都係食得衰, 但起碼返屋企後做功課時唔會打瞌睡嘛! 沖完涼就叫佢先做珠心算, 都冇發呆! 跟住同佢做埋Mels書同溫習後, 再睇埋普通話書都十點多, 真係要執嘢瞓覺啦! 我就因為只食餸冇食飯肚餓, 叫老公煮咗麵一齊食, 食完唔可以即刻瞓嘛, 咁就hea到十一點幾先瞓囉!

7/10/13

7/10/13   MON   HOT

又到苦悶星期一啦, 如常捉佢地起身返工返學, 有得排吓隊尾咁啦, 跟住我就買早餐返工啦, 返到嚟都係做吓自己嘢, 星期一多D自己嘢做GE! 午飯都諗唔到食咩, 最終試咗車仔麵, 又幾好食喎清清地! 下午老細返咗嚟一陣, 傾吓嘢咁啦, 好快又閃啦, 咁我都有嘢做唔得閒應酬佢! 放工返去笨元掛住睇佢D卡通, 我問佢裝功課的白膠套去咗邊, 佢又一D都唔緊張咁, 因為我知去咗另一個同學到, 想睇吓佢咩反應, 點知佢唔緊張之餘仲叫我買過個, 我咪叫佢返去自己搵囉, 唔見咗就買過咁冇責任都得GE! 到開飯時又係到打瞌睡, 加上放學時肯定食過嘢啦, 唉…我冇眼睇, 叫佢瞓唔瞓, 叫佢唔好食咁多又要食, 到開飯時又冇精神又冇胃口, 為咩呢? 叫佢入房抖一抖又唔係抖, 咁咪走人返屋企囉, 返到去沖得涼嚟溫埋書都9點幾, 又要幫我摺衫喎, 冇理由唔比佢幫嘛, 佢話見我咁辛苦喎, 死未! 拖到10點先瞓, 我地就睇埋新聞先瞓囉!

6/10/13

6/10/13   SUN   HOT

今日都係休息吓, 瞓到十點幾十一點, 笨元都冇好早入嚟嘈, 起身後叫老公煮嘢食啦, 然後就去圖書館借書, 唔洗去超市入貨就直接回家啦, 比笨元玩多陣我抖一抖就打掃啦, 叫佢兩個做不如自己做, 仲快仲乾淨! 之後睇埋電視都三點幾, 去美心食tea亦都出埋街啦, 跟老公去樂富, 比子元活動吓, 佢開波之前我地就回家! 過到去玩遊樂場, 真係放哂佢D電呢, 跟住去超市本來想買三文魚煮意粉, 但D三文魚又唔靚, 於是冇買到囉! 咁就去球場又放吓笨元電, 開波我地就回家啦, 笨元真係放哂D電, 撘地鐵時係咁想瞓, 有一轉有位坐吓轉車後就冇得坐架啦, 扶住笨元企住瞓囉! 最終都唔返去煮嘢食啦, 問佢食麥當當好唔好, 佢話淨係食Corn同奶, 咁咪叫一個兒童餐share食囉, 嗰吓又未係好餓! 返到去就唔瞓啦, 沖完涼玩吓, 佢話要睇埋掌門人先瞓, 我到九點餓餓地就叫老公買D嘢返嚟食, 笨元又食埋一份! 食完又要等Daddy哄佢瞓, 所以十點多先瞓囉! 本來我都幾攰架, 但又要老公按腳, 所以等埋佢睇完波都12點幾呢, 勁攰呀!

5/10/13

5/10/13   SAT   HOT

今日又忙碌又攰呀! 朝早如常返工, 佢兩父子仲早出門口, 因為改咗去第二間畫室學畫, 重點係同埋敏瑩一齊學, 一齊喺麥當勞食埋早餐就去學, 子元學完仲問下星期係咪都喺到學呀, 知道係不知幾開心! 跟住12點就過咗嚟, 但唔可以比佢係到坐咁耐架嘛, 於是放低D家當就落番去等, 我放工去KFC搵佢地, 原來老公同佢喺KFC食完嘢再畫住畫等我! 咁等我食埋嘢就出發去尖咀, 喺車齊齊大覺瞓, 塞車嘛! 去到尖咀差不多3點, 軒媽都差不多到, 咁等埋就一齊去行反斗城啦, 要兩個一齊睇玩具其實都幾難, 喺嗰到玩咗好耐, 小朋友就開心啦, 大人就悶囉! 企到腳軟架啦, 終於可以去大家樂嗰邊hea吓, 找到位食住嘢休息吓, 其實陣間都食自助餐, 就唔應該食tea, 但要找地方坐吓都唯有係咁! Hea到差不多6點Amanda打嚟話佢到附近啦, 咁我地咪行過去酒店囉, 已經開始食得, 但笨元一嚟就唔合作, 安排佢坐位又唔聽, 比我捉咗埋一邊鬧, 喊哂口咁架但對我冇用架, 唔講清楚係唔會放行! 開始食嘢啦, D生蠔細隻到呢, 好在今次我主力唔係食呢D啫, 都係食咗兩隻咁大把! 其實嘢食就真係一般, 主要都係聚吓啫, 過兩個月我生, 出年又到Amanda, 真係可能要暑假先可以再出嚟玩, 最多都係去吓對方屋企! 吹吓水咁又兩個幾鐘, 坐到夠鐘9點多先至走, 返得去都差不多10點啦, 沖完涼都捉笨元瞓, 老公十一點幾都話眼瞓, 可能因為今朝要早起掛, 平時星期六可以瞓到好晏架嘛, 我又唔攰喎, 於是睇電視睇到十二點幾先瞓呢!

 

 

 

 

 

 

4/10/13

4/10/13   FRI   HOT

今朝終於可以準時出到門口, 果然快好多返得到學校, 同D同學仔玩到顛哂, 要叫番佢返嚟排好隊, 又捉佢同敏瑩吓相咁, 估唔到影得咁好喎! 終於入得去啦, 睇咗佢一陣先等車返工, 買埋早餐返公司啦, 朝早做好自己嘢就做埋D抄寫工作啦, 快D完成佢唔洗心掛掛! 午飯去買大家樂, 食完咪打吓機睇吓電視! 老細返咗嚟見佢心情好問埋我放產假時請人D嘢, 佢話算啦唔洗請, 老實講我都有少少放心D, 因為咁就唔怕到時真係長放啦! 我都好老實若放緊產假都要做嘢就出番全份糧比我架, 錢真係好重要! 放工就返去青衣啦, 老公喺美孚同我會合一齊返去, 笨元冇瞓到覺, 於是叫佢做咗功課先, 本來都唔好面口架, 但我話陣間又要合唱團, 明天又要學畫畫, 仲約咗軒軒俊彤佢地, 咁佢先肯即刻做, 雖然大半個鐘搞掂, 但都唔係好好面口架啦, 因為我話佢D中文字唔寫好筆順要刷佢! 個心又走咗去睇電視呢, 做做吓叫我開番個電視, 我話你喺屋企做功課有冇開電視, 佢諗諗吓又係先冇再出聲! 做完馬上開飯啦, 最遲7:30又要行人啦, 去到剛好開始合唱團, 我地就去咗759行吓, 又洗吓錢咁啦, 跟住去麥當勞坐吓, 老公食咗杯雪, 又夠鐘去接笨元啦, 返屋企沖涼前比佢玩咗陣, 沖完涼都10點, 又要瞓啦, 我地就睇埋新聞先, 點知update番部iphone搞到十二點幾先有得瞓呢, 最PK係到半夜5點電話響喎, 仲要係無號碼, 真係想殺人咁滯!

<兩小無猜!>

3/10/13

3/10/13   THU   HOT

今日返半日啫, 因為下午檢查, 梗係放足半日啦, 唔好蝕比佢嘛! 朝早拖咗隻笨起身返學, 近來都唔願起身, 朝朝都要我叫, 好在之後做嘢都未算太慢! 返到去排到隊尾, 我就買早餐返工啦, 做好自己嘢就做埋廠D抄寫嘢囉, 叫做中午放工時做好嗰部份可以閃人! 返到去先整嘢食, 食飽就睇住電視摺埋D衫咁, 執得嘢嚟都三點幾要出門口啦! 勁好彩地一落到去就有車有位, 上到去喺lift口已撞到老公, 咁就可以一齊上去, 登記好就量血壓, 例高架啦, 坐咗10分鐘再量都係高, 再坐5分鐘…今次低番D, 交咗先又過骨喎, 跟住就等啦, 等咗約一個鐘先到我, 例牌等就1個鐘, 見就5分鐘! 都係聽心跳摸肚, 冇咩特別就約下次個期, 今次叫佢約早D都係3:15, 希望趕得切揍笨元放學啦! 搞掂就撘番車落葵芳, 買咗D嘢食, 老公就返公司, 我就返青衣囉, 笨元照樣睇電視睇到入哂神, 我就食完嘢飲埋湯睇吓功課, 都幾多樣喎, 食飯時唔願食啦, 因之前又湯料又魚蛋燒賣, 咁咪放佢一碼囉! 差不多時間就閃啦, 返到去沖好涼要做埋Mels, 都九點幾囉咪要佢瞓囉, 擺明已經攰啦! 我地就hea到11點幾瞓啦!

2/10/13

2/10/13   WED   HOT

琴晚真係好好瞓, 因為真係太攰啦! 朝早笨元唔肯起身, 拖佢起身咁滯, 加上等小巴等咗好耐, 所以好遲先返到去呢, 諗住佢地趕住要出去參觀嘛, 點知又唔係喎! 買埋早餐返公司, 做自己嘢啦, 上網寫日記吹水等等又一朝! 午飯後就要做抄寫工作啦, 抄到差不多放工就食埋個TEA休息吓啦, 返到去飲埋碗湯已經飽, 唔多食得落飯, 笨元仲快過我食哂, 比佢玩咗陣, 7:15就閃啦, 因為老公去咗踢波嘛! 上到巴士站冇42喎, 唯有出去撘啦, 好搞笑地笨元坐坐吓打瞌睡喎, 幾想影低佢呀但又拍唔切, 落車前拍醒佢, 拖佢去撘小巴又再瞓, 落車又再拖佢返屋企, 一入屋就走去櫈坐咗喺到瞓, 忍唔住影低佢! 見佢攰比佢瞓陣先, 我要check番條數點解少咗幾百蚊, 原來扣咗笨元份意外保年費, 嚇得我呀! 執好嘢叫醒笨元去沖涼, 沖完應該醒哂啦, 同佢抺完身就自己入房著衫啦, 到我沖完聽到佢喺房完全冇聲, 仲以為佢瞓咗添, 原來佢搵咗本填色貼紙簿出嚟畫, 真係估佢唔到! 等我搞掂哂就溫習咗先, 然後執埋書包校服比佢玩番15分鐘就瞓覺啦! 我就hea吓等老公返嚟啦, 點知肚餓喎, 咪叫佢煮咗個麵囉, 滿足哂先去瞓啦!

<入到屋第一時間坐喺到瞓!>