30/4/26

 30/4/26     THU     SUNNY

今日正常返工返學啦, 我都係冇咩心機開工咁架啦, 因為啲老師仲hea過我, 咁不如我都hea吓啦! 仲有襯機會幫仲爺搵吓試卷, 得番咁少時間都唔知溫到啲咩啦, 盡人士啦! 食完飯有特別job, 要幫兩個學生考GCSE oral, 都考咗咁多年都冇咩要準備, 咁順利考完都放工啦, 要去GP攞埋張藥單先可以去藥房攞藥, 跟住就返去煮嘢食同埋hea! 由於好餓就食咗個意粉跟住就好飽! 所以都好晏先煮飯, 不過半個鐘就食完兼洗埋碗, 同平時hea食時間差不多!

29/4/26

 29/4/26     WED     WIND

今日勁大風囉, 有時行路都行唔到, 好在冇雨仲好好天! 今日全日也在介備狀態, 因為要等GP同health care center的電話, 朝早health care center打咗嚟話佢地唔會做, 因為我個case係medical, 所以佢地做唔到, 咁唯有等GP啦, 所以成朝都好唔專心, 但都要繼續做嘢架嘛, 結果等到1點食緊飯時就打嚟, 都算係順利安排, 不過仲要等到20日先有得做, 咁佢就再開藥比我食到嗰時, 明明係同一個醫生, 點解嗰日睇我嗰時能度衰咁多, 今日喺電話又好好喎, 唔理啦, 總之搞掂咗第一步, 先, 最好都係cut鬼咗佢一了百了! 最尾嗰堂就冇開工啦, 返咗大房吹水扮開工, 夠鐘就收工, 返到去都係要食嘢先啦, 又會睇吓電視, 仲有捉仲爺睇吓究竟幾時考咩科, 要溫吓書啦! 睇電視睇到7點幾先煮飯, 所以食得嚟沖涼都11點幾!

28/4/26

 28/4/26     TUE     COOL

今日朝早本身都冇咩, 都係咁要返工啦, 不過突然又凍咗好多咁, 好在著夠衫啫! 朝早都係忙碌呀, 跟另一個盲妹, 佢第一堂要出去學過馬路, 有council的人嚟教, 變咗我又要跟住行, 實在係令我對腳負擔增加, 好在之後兩堂都係坐, 跟住就放飯啦, 食完飯我工, 因為GP又話要驗血驗尿health check嘛, 點知去到先話根本冇book到驗嗰啲, 淨係得health check, 我心諗有鬼用咩, 仲有連星期五打過嚟話明天會打嚟傾, 都喺system到睇唔到, 咁叫我點信你, 最終health check 個醫生再幫我book多一次, 不過安全起見我都係自己再打埋去health care center, 靠GP我都死鬼咗! 總之都係明天等消息啦! 咁就開始做吓家務hea吓咁啦, 仲爺要去跑步, 咁我就要煮飯啦! 

27/4/26

 27/4/26     MON     WARM

今日要開工啦, 仲以為自己夠哂力, 但原來踩完單車返去再行就已經覺得好攰! 仲要同阿姐解釋吓我個狀況, 再簽埋張假紙咁, 跟住就要開工啦, 好在今日都係跟盲妹, 除咗有PE堂要找人頂外, 其他時間都OK, 不過因為攰所以都係hea吓就算, 夠鐘就放工, 返到屋企子元就第一時間話我知佢收到個email好似批咗, 估唔到課金真係快咁多, 叫佢再double check一次個status, 真係搞掂哂, 好開心呀! 咁佢就accept埋大學個offer同埋申請埋student finance, 所以都好忙, 搞掂又要煮飯, 所以我今日真係冇咩休息過咁! 食完飯洗埋碗沖涼就休息啦!

26/4/26

 26/4/26     SUN     WARM

今朝老公要揍仲仲去比賽, 我就起身食完早餐就換咗床單先, 跟住都係睇吓電視, 等老公返嚟之就出去買餸啦, 順手買埋午餐, 都係買subway咋, 返嚟老公就睇波, 我就忙忙碌碌預備今個星期的午餐, 又要蒸雞胸又要烚菜, 明天都要開番工啦, 因為再請又要fit note, 又要比人黑面! 等老公煮埋晚餐食完又睇多陣都沖涼休息啦!

25/4/26

 25/4/26     SAT     WARM

今日重要環節就係填表申請ILR, 不過朝早仲爺要比賽, 所以我都係慢慢先起身, 煮早餐食完, 仲諗緊幾時開始, 因為都想老公返咗嚟先, 不過先check咗我地幾個UKVI的資料, 先發現仲爺個passport未update, 但佢個login又係用老公架喎, 咁都係要等佢返嚟先update埋佢, 跟住就開始申請馬拉松, 第一個填老公嗰個, 一定會喺用最長時間, 我又係開住個youtube嚟睇住填, 要慢慢填之餘有啲嘢又怕填錯, 所以唔覺唔覺都填咗兩個鐘, 終於完成! 最搞笑係scan passport時原來電話有case套住係唔得, 好在最終都成功搞掂! 跟住到我啦, 都順利! 到子元時, 因為舊login同新login crash咗, 第一次scan完passport時返唔到去張form, 最終再搞多次用番新login先掂, 嚇死! 到細佬時又好唔同的form, 都填到好緊張! 最終6點幾真係搞掂哂有哂號碼, 我可以休息啦, 攰到好似跑完真馬拉松咁! 所以攤咗喺床到睇機whatsapps吹水, 等老公煮好晚餐就可以食嘢睇電視, 洗埋碗就沖涼休息啦!

24/4/26

 24/4/26     FRI     WARM

今日當然冇出過門口啦, 要休息嘛! 下星期一先算! 因為仲係唔太好狀態! 朝早佢地返哂工, 咁我食完早餐就做咗清潔先, 然後就開始睇電視, 係冇咩做過正經嘢, 明天要申請ILR都要對住部電腦, 今日就hea吓啦, 放鬆啲! 睇咗DO姐介紹的韓劇, 又幾好睇喎! 期間肚餓自己食嘢先, 子元今日要考UK life test, 老公返嚟本來想叫嘢食食埋先, 但邊夠時間呀又唔聽, 最終等到2點3都要行啦, 都好快返嚟, 勁快做完pass埋啦梗係! 佢地返嚟我都係繼續睇嘢食嘢, 晚飯我切好啲雞, 老公揍完仲爺踢波就返嚟煮!

23/4/26

 23/4/26     THU     WARM

今日子元真係足18歲啦, 星期六慶祝咗, 所以今日都係正常過! 我就繼續休息, 反正都係要去照嘢, 請假算啦, 話得入院又咁快返工係唔似樣, 記住唔好奴性咁強! 朝早就睇咗套新鮮出爐影后電影, 跟住唔覺意睇個apps話檢查時間係11點半, 但封信明明話係1點, 不過反正都冇咩做, 就早啲過去又有得照喎, 所以可能係11點半, 呢到啲人真係好難明! 跟住照完嗰個醫生話叫我返去A&E個reception問下一步係點, 但原來個reception都唔知, 不過佢都幫我問, 問完都係話等收信! 返到屋企先食咗嘢先, 跟住再問埋GP都係等, 頂! 咁等一個星期先啦, 再睇吓佢地點安排! 之後就開始hea吓啦, 預算明天都唔返工架啦, 仲爺要去跑步, 咁我就要煮飯啦, so far今日暫時都可以, 希望啲藥暫時起到作用, 等我可以趕得切做手術!

22/4/26

 22/4/26     WED     WARM

喺醫院瞓到5點幾醒都算係咁架啦, 我都要梳洗吓自己, 琴晚冇沖涼瞓已經係底線, 所以今朝點要洗面刷牙! 然後都係睇吓機打吓機, 又未有得食嘢, 因為話要scan嘛, 點知到9點幾有兩個醫生的物體嚟同我講話冇得照住要再安排, 亦都可以放我出院, 呢個印度醫生就有少少耐性同我講啦, 大佬呀醫學名詞轉哂英文版點咁易明! 最終我係可以食番早餐, 然後等出齊藥, 老公嚟接我就走得, 我仲可以食埋午餐! 呢到三餐係有餐牌, main course, 飲品甜品, 真係幾特別! 出咗院返去先沖涼, 仲有食藥啦, 但食完藥都仲係出血, 其實有啲驚, 明明喺醫院冇事, 可能係因為吊住啲藥直接啲, 但食藥就要啲時間, 同埋食完藥勁攰, 所以喺咁瞓, 瞓到老公話開飯, 然後都係要洗碗, 跟住再食藥, 希望今晚可以瞓番覺好!

21/4/26

 21/4/26     TUE     COOL

今日上半部都冇咩, 但之後就精彩! 先講早上, 都係咁返工學啦, 老公去咗見工所以請咗假, 咁返到去都係咁開工, 但開始愈來愈唔對路, 因為開始係失血, 可以去到廁所我都盡量去, 不過失血過多我已經開始冇力, 但都頂到放工, 叫個同事幫手, 我早少少走慢慢去攞車, 仲要踩單車返去, 我都覺得自己勁, 好在老公喺到, 咁就車我去醫院, 咁情況去醫院安全啲, 反正琴日GP都幫唔到我! 咁去到就等啦, 我個case我覺得已經算快, 唔洗一個鐘已經見到醫生, 開始要抽血種豆, 唔痛就呃人, 仲要喺個脈門位, 跟住就開始漫長的等待, 由差不多5點, 我坐喺嗰到坐到差不多12點先上到病房, 話預算明天scan, 咁就住一晚啦, 喺急症已經有嘢食, 係三文治嗰啲, 不過我吊住鹽水其實又唔太餓, 最終叫老公攞嘢嚟時順手買個魚柳包, 仲爺當然跟埋嚟睇吓佢阿媽, 上到房見到其實都幾近似香港私家醫院, 咁安頓好都要瞓啦, 睇手機睇到點幾都瞓得著!

20/4/26

 20/4/26     MON     COOL

今日原來都有啲凍, 真係估唔到啲天氣! 返去見到要跟嗰個都唔係+, 已經係好事, 本來中途以為可以返大房做電腦嘢, 點知最終都係冇, 咁繼續囉, 反正我點半就要走, 要去睇GP, 都有啲激氣, 首先去到個機又down咗, 唔可以自己register, 諗住喺reception嗰到問啦, 但又冇人喎, 最終係打咗電話去同佢講等佢個hotline幫我Register, 然後等咗好耐, 差不多3點先有得睇, 但我明明係book咗2:20架喎, 其實都幾過份, 仲要個醫生又勁衰, 我好心唔講...比我同chat傾好咗我個症狀比佢睇, 但佢係勁重印度口音囉, 我聽唔明都好正常呀, 佢竟然串我係咪唔識英文, 激死! 最終佢係幫我book咗blook test, health check等等, 但轉介真係唔知幾時, 佢話會4-6星期囉最少, 我係咁chur佢, 佢勁嫌棄我, 只係想趕我走咁囉, 同埋佢叫我食藥, 我問多兩句佢又cut 我咁, 真係幾難受, 下次去睇一定要避開呢條印度婆! 幾經辛苦約埋blood test就可以走, 但都差不多3點9, 痴線! 返到嚟就食咗嘢先, 餓啦! 然後都係hea吓打吓機咁啦, 仲爺去咗踢波, 到咁上吓就煮飯啦, 然後都係食飯洗碗沖涼囉, 冇咩特別!

19/4/26

 19/4/26     SUN     SUNNY 

今日有出過門口呀, 仲爺就有去踢波, 不過我就冇出去啦, hea到咁上吓就煮早餐食, 同埋就係睇金像獎, 仲有要打比阿媽, 老公就整腸粉燒賣做午餐, 到佢睇波就我要整雞胸同菜, 冇幾耐就又要開始煮飯啦, 咁又一日啦, hea埋今個星期, 下星期就要申請ILR, 不過而家個表簡化咗, 應該就易過之前啲人填嗰份表, 但都要預咗一日喺到處理!

18/4/26

 18/4/26     SAT     WARM

今日朝早唔忙碌, 因為仲爺去咗比賽, 咁我就喺屋企睇舊嘢, 又睇番造星囉! 等佢地返到嚟就準備出去, 先要去broadway買蛋糕, 子元下星期四正日生日, 所以提早今日慶祝, 試咗個新蛋糕店, 主要都係食千層蛋糕, 子元唔想買一整個, 所以就各自買件裝可以拼埋, 其實都幾好! 佢地一人買咗兩件, 我就主力買咗榴槤味, 好期待! 跟住就去食午餐, 然後去買埋生日汽球等等! 先揍咗佢地返屋企, 我地就再去買餸, 仲要買牛扒, 今晚食牛扒, 不過老公又係好似我咁未習慣個爐先以整得熟得滯! 洗埋碗就今日重頭戲 -- 送生日禮物! 老公買咗部電腦比子元, 咁佢大學都要用架啦, 所以就買咗比佢, 之前我地收埋咗喺樓上, 襯佢喺房就set up 哂啲蛋糕抬埋部機call 佢出嚟, 仲要拍住佢見到禮物個樣, 條友呆咗, 佢真係好開心呀, 咁佢開心大家都開心, 一家人嘛! 然後齊齊影相食蛋糕啦! 

17/4/26

 17/4/26     FRI     WARM

終於到星期五啦, 今日照要我跟3隻小天使, 仲要第一堂係PE, 佢地完全冇諗過要安排人cover我, 叫我同個老師講, 咁我就唯有攞埋櫈去草地坐住開工, 因為我同個老師講到明我撞完車嘛, 咁個老師都奈我唔何! 之後嗰堂英文本來我勁唔想上, 咁啱我又可以skip堂, 之後雖然有時都燥底, 不過我而都識做啦, 快手send個email 比阿姐等佢handle就得! 準時收工返去食嘢, 老公整咗意粉, 食完佢地去咗踢波, 我就做家務, 做完就可以開電視係咁睇, 等佢地買麥當勞返嚟食, 咁又一日啦!

16/4/26

 16/4/26     THU     COOL

今日同琴日一樣都係返去做嗰啲嘢, 都有少少upgrade咗的感覺, 但有個同事真係超煩, 係咁阻住我, 但又喺到講啲無謂嘢, 我都已經勁冷對待架啦, 佢都好似唔明咁, 同埋佢係嗰啲盡可能咩都唔好做, 然後有嘢要做就慢慢做, 有咁少做咁少嗰隻, 老實我係勁討厭佢呢啲人, 真係唔想同佢有交流囉! 另外今日做埋aprisal, 得到唔錯的評語, 都係二姐好, 佢都好識得管理部門, 係好事! 咁今日都有啲忙啦, 仲要去埋EAL嗰到商議埋下星期oral exam啲嘢, 因為係新人負責, 佢都頭痕架啦, 不過我都幫唔到佢好多! 最後準時收工, 踩車返到嚟抖陣食嘢就休息吓啦, 都有捉仲爺做吓數, 但佢就係唔肯睇英文書! 但兩條友突然又話換床單喎, 做佢地唔到! 晚上無聊開咗造星二嚟睇, 間中就想睇番吓啲綜藝嘢!

15/4/26

 15/4/26     WED     COOL

今日路面好似又人多車多番, 所以今日都有少少心理障礙, 努力維似番安全就算! 估唔到係今日返去除咗係要跟嗰件煩嘢, 但佢基本上都係困喺大房, 所以我主力係要做文件嘢, 其實我係幾enjoy的, 好過跟住啲顛人, 連cover都唔洗做, 幾好! 夠鐘就放飯, 最尾嗰堂做埋就收工! 返到去都係休息, 好攰, 身體唔係好舒服, 都係要book GP跟住番身體啲問題, 食咗啲藥頂住先, book咗下星期一親身去GP, 逼佢要轉介到我去醫院先得! 晚飯繼續都係要我煮, 食完洗埋碗沖涼摺衫晾衫, 真係好多家務架!

14/4/26

 14/4/26     TUE     WARM

今日終於重新出發, 踩番我架戰車返工, 都有啲緊張架, 不過預早咗15分鐘出門口, 慢慢踩返去, 加上今日路面都唔多車, 所以都好順利, 8:50已經返到去, 所以可以慢慢嚟, 加上今日跟個簡單的, 做多單cover, 所以都算好輕鬆架啦! 不過都係唔可以企咁耐! 準時收得工, 慢慢踩車返去, 先倒咗垃圾就馬上整嘢食, 跟住就係係咁打機, 一日冇打停唔到咁, 打到7點幾真係要煮飯! 食完飯都9點幾, 快啲去沖涼啦!

13/4/26

 13/4/26     MON     WARM

今日終於要開工, 今日係坐巴士好啲, 明天先試單車啦, 應該冇問題的! 返到去都有少少遲咗, 因為巴士行行吓又要停等時間, 可惡! 估唔到今日training嚟真, 之前都未試過train足咁耐, 所以今日咁都有啲攰, 不過可以準時收工就算啦! 但撘巴士返嚟仲耐, 等極都未有車, 差不多4點先返到嚟, 馬上整嘢食, 餓啦! 然後就係hea啦, 仲爺又要去練波啦, 咁我到7點幾就煮飯啦, 不過仲未掌握好個新爐的火力, 所以個無水雞有啲失手, 好似今朝雞蛋咁, 因為好快就水滾所以3分鐘係唔夠, 明天要再試試加長少少如何! 食完飯食埋西瓜涼粉就沖涼休息啦!

12/4/26

 12/4/26     SUN     WARM

今日最後一日假期啦, 明天又要返工啦, 所以要把握時間去玩, 因為老公要幫大包買jellycat個袋喎, 咁咪出去囉, 朝早仲爺要比賽就比埋先啦, 我都慢慢hea吓先所以佢地返嚟我仲先煮緊早餐, 咁仲要洗埋衫, 蒸埋雞肉先出得門口! 渣到去broadway搵咗好耐先有位泊, 仲要有少少遠, 跟住撘tube去到先去買咗嘢先, 跟住就去食嘢, 仲爺搵到間coco, 咁連香港冇得食, 就喺呢到食吓啦! 食完去埋買蕨餅, 仲試埋焙茶, 好味! 跟住我又想去行吓無印, 但原來都冇咩好買! 所以最終都回程, 返到嚟抖咗都要煮飯, 因為子元唔知我地冇買嘢返嚟比佢食! 食完飯一齊食埋個蕨餅就沖涼休息啦, 明天撘多日巴士先啦, 扮吓嘢睇吓可唔可以早多一星期放工先! 

11/4/26

 11/4/26     SAT     COOL

今日係仲爺要出去踢波啫, 咁我就繼續喺屋企hea啦, 當然係食完早餐就繼續睇多陣逐玉先啦, 老公12點半要睇阿仙奴, 咁就要交番個電視比佢啦, 要等佢睇完我又可以睇番啦, 目標係今日睇完佢, 因為下星期返工啦冇咁多時間睇! 午餐都冇煮嘢食, 因為早餐都咁遲食囉, 廢事煮啦! 6點幾就快手煮晚飯食囉, 蒸咗蒜頭豆豉豬, 佢地好鍾意呢! 最終食完飯老公一齊睇哂逐玉啦, 真係睇哂啦睇到11點幾呢!

10/4/26

 10/4/26     FRI     WARM

今日老公要去揍番隻LULU返嚟, 所以10點幾出咗門, 咁我就到咁上吓先起身食早餐, 期間仲做埋清潔同洗衫晾衫, 咁就可以繼續睇我套劇, 到兩點幾仲爺返嚟啦, 但正正都一齊嚟咗, 佢地又話約咗去正正屋企玩, 今晚又去佢嗰到食, 所以我地送咗兩隻友仔去佢地屋企之就出咗去買餸返嚟煮, 煮咗咖哩魚蛋牛筋腩, 同蘿蔔炆冬菇, 7點幾先過到去, 無法啦又要買餸, 去又要煮再食埋午餐咁, 係咁上吓! 咁去到食飯吹吓水, 玩到差不多12點先走!

9/4/26

 9/4/26     THU     WARM

今日我大係冇出過去, 仲要過得同琴日差唔多, 都係醒咗但10點幾先起身, 係落樓下見到子元囉, 跟住都係煮早餐食, 然後就睇咗一日電視, 逐玉真係好好睇呀, 我今日又睇咗十幾集啦, 喺到食晚飯時先至停, 轉咗睇的士囉, 要清吓個腦先, 咁睇法真係發夢都會見到嘛! 所以都冇咩好寫, 因為全日都係睇電視, 咁我都有做吓work out, 始終隻腳仲未好多哂, 都係要練吓肌肉, 希望快啲完全康服啦!

8/4/26

 8/4/26     WED     WARM

今日我冇出過街啦, 瞓到9點多係醒咗, 但睇吓機咁都11點多先食早餐, 屋企冇哂人但又唔係返咗學, 真係好奇怪! 食完早餐就預備定午餐, 因為琴晚食得太飽肚痛, 瞓得唔多好, 去到要搽白花油先搞得掂! 所以今朝只係食通粉, 午餐就食粥算啦! 然後就係咁睇電視, 開咗逐玉係停唔到, 睇到晚飯前先停呢, 男主角真係太靚仔啦! 晚餐只係蒸肉餅, 老公嗰份係咸蛋, 我就係冬菇, 得兩個人喺屋企食飯好似未試過! 洗埋碗我就去沖涼返房hea, 細佬9點幾打過嚟, 唔見佢兩日突然覺得佢可愛咗咁多!

7/4/26

 7/4/26     TUE     WARM

今日係忙忙碌碌的一日, 算係好多嘢做呀! 朝早老公就要揍仲爺去足球訓練營, 我同子元就快手煮早餐倒垃圾洗衫做好哂, 因為Holly10點話嚟, 佢地就睇吓電視打吓機咁, 我11點多都出門口去剪頭髮, 不過等唔到巴士, 見老公又差不多返到, 咁我就叫佢去巴士站接我, 車我去髮型屋, 日式髮型屋真係唔同啲呀, 呢幾年都未試過可以洗剪吹呢, 所以65鎊喺抵架啦, 跟住就去咗食taka, 食當日特假餐就算, 最後去埋ealing broadway, 本來想買染髮但又冇紫色, 所以都係冇買到! 咁就返屋企啦, 雖然子元班friend喺到, 咁我就上房囉, 都係睇吓youtube打吓機咁, 5點幾6點就出門, 去咗食間新嘢, 打邊爐加韓燒咁, 不過我地而家食得唔多可能都蝕架, 但整體嚟講呢間都好食的, 主要都係好玩囉, 咁食物又算有水準, 算唔錯架啦, 仲有埋甜品食, 下次可以帶埋黑熊同lulu嚟食就回番本啦! 食到好飽呀! 返到去得番我地二人世界呀, 子元同小施子去holly屋企瞓呢, 仲爺又去咗宿營呢!

6/4/26

 6/4/26     MON     SUNNY

今日咁好太陽, 又唔想淨係喺屋企, 最終只係去咗B&M同Tesco, 不過都買咗唔少嘢, 都係日用品嚟, 帶埋子元去佢就會要買呢樣買嗰樣, 不過條友而家自己有收入嘛又唔同可以自己買玩具! 返到嚟都係冇咩做, 晾埋啲衫先, 都冇食午餐囉, 因為都好晏先食早餐嘛, 食咗個葡tat就算, 預備定晚飯啲嘢咁啦, 不過都7點多先開始煮, 仲爺話想打機嘛, 咁佢明天又入camp啦, 咪同佢打吓囉, 條友今次自己執行李呀, 唔知佢執成點, 希望唔會帶漏嘢啦! 

5/4/26

 5/4/26     SUN     COOL

今朝都係瞓醒就食早餐啦, 不過都好遲先食呀, 食完就要去教堂, 話哂復活節都係大節, 點都要浦吓頭呢, 跟住返嚟整好埋啲食物, 就去winnie屋企開party, 其實都係garthering吓啫, 去到都係食同吹水, 次次都係咁, 嘢食又食唔哂, 不過今次已經好好多, 都食咗8成架啦! 最終10點幾先走, 都有啲攰啦!

4/4/26

 4/4/26     SAT     WIND+

今日冇出去, 都唔係好舒服, 都係喺屋企hea吓就算, 朝早都好遲先起身, 所以食得早餐嚟都好晏, 老公又要出去玻璃膠, 順手買埋咖啡, 咁我就襯時間做埋清潔! 然後佢地返嚟都係睇吓波食吓嘢咁, 老公本來話唔換個爐住架, 但之後我地打緊機時佢又走去換爐, 最終成功換咗, 不過唔可以煮嘢住, 所以就叫咗外賣啦, 個米線喺好食但味精勁重, 我飲咗一支水都唔夠呢! 老公睇波我就上去沖涼hea吓睇吓啲sub9劇, 都幾好睇架!

3/4/26

 3/4/26     FRI     WARM

今日主要係去買餸, 朝早都係醒咗就食早餐, 食琴日喺網紅店買的麵包, 又真係幾好食架喎, 我怕自己唔夠飽, 已經整咗個米粉添, 不過買完餸返嚟都係好餓咁! 同埋今日去咗waitrous買, 因為去咗買羊腩, 泊咗喺嗰到, 反正雪櫃仲有餸, 唔洗買咁多嘢, 就喺嗰到買埋囉, 本身主要係買整青咖哩羊腩的配料, 但買吓又一啲買吓又一啲, 最終都係要攞購物車! 買完返去快手食幾塊餅先掂, 午餐老公整咗炸雞脾, 好好食呀! 然後又係hea同開咗新劇睇啦, 到咁上吓時間就要煮飯啦, 食完就沖涼休息啦!

2/4/26

 2/4/26     THU     COOL

今日主要活動係出central london, 因為約咗舅父仔佢地飲茶, 基本上係10點幾出咗門口, 因為先去麥記食咗早餐, 跟住我要去攞藥, 然後仲爺要去攞con, 喺ealing broadway泊好車, 再撘tube出去, 咁其實都算快, 總之準時去到酒樓, 坐吓傾吓吹吓水, 其實都食咗幾耐, 期間仲爺仲打比阿媽, 等佢睇到我地一齊飲茶呢! 最尾已經比埋錢, 但係個經理都問我地食唔食糖水, free咗楊枝金露比我地食埋先, 最後我地一齊去咗一間日式麵包店買麵包先分道揚鑣, 佢地仲比咗利是我地, 估唔到嚟到英國都仲有利是收, 佢地又專登由南部撘火車過嚟搵我地! 本身老公想再去買闕餅, 但一來我覺得有啲遠, 二來子元又話想去間figuer鋪, 咁就去咗睇啦, 之後先去撘車, 路過咗條街買咖啡, 行番出去車站嗰條街, 竟然好多間賣結他, 仲爺馬上兩眼發光, 唔洗我地陪都夠膽入去睇, 幾鬼high呀佢! 撘車返到去broadway攞埋車就回家, 由於太飽啦, 都唔洗煮晚飯, 我都係煮咗個麵就算!

1/4/26

 1/4/26     WED     COOL

今日又係冇出過門口, 只係落過樓下收信咁大把, 都幾無所事事, 咁又唔可以日日放假都咁充實架嘛, 梗係要chill吓先啱! 朝早都8點幾先醒哂, 再慢慢起身整早餐, 結果有啲遲, 趕唔切仲仲10點學音樂前食到早餐, 咁就唯有學完先食! 之後我就無所事事啦, 睇吓電視打吓機咁, 再叫仲爺要做咗功課先同佢打機, 咁佢都叫做快快手做咗先, 咁就要同佢打啦, 午餐只係食pizza咋! 打到差不多5點都要收機啦, 要晾衫啦嘛, 跟住又要煮飯啦! 今晚試咗個新菜, 蘿蔔炆冬菇呢, 佢地都覺得好好食!