30/6/14

30/6/14   MON   HOT

今日做咗日FTM, 原來真係幾攰吓! 朝早未夠7點起身, 叫醒笨元就餵豬仲食奶, 準時出門口有順風車撘, 今日返學校睇才藝表演, 問咗學校可以帶埋柏仲去咁就OK啦! 揍咗佢地入學校就同程生去快食個早餐, 然後上番學校門口等入去, 坐最前座同apple坐, 佢就可以玩柏仲, 睇表演都係1個鐘左右, 柏仲都算幾合作, 係靜咗時扭吓, 人地表演緊佢都專心睇! 睇完都係10點, 撘番巴士出去美孚, 去搞埋銀行嘢都搞到11點多, 再買少少餸今晚煮就返屋企, 已經熱到我死死吓, 餵餐粥柏仲食佢就瞓, 瞓醒12點就再食奶, 然後等佢再瞓時我就煮午餐食啦, 都是簡單煮個烏冬咋! 等佢醒咗就陪佢玩吓, 玩到4點就準備出門口去接子元, 但預唔夠時間, 好在程太今日接敏瑩, 叫佢接咗喺巴士站等, 剛好趕到! 我推埋車仔嚟撘巴士都冇問題, 好過揹實在太熱! 返到屋企沖哂涼就餵柏仲餐奶, 等佢瞓咗就馬上煮飯食, 食到一半老公打嚟話佢就返到問有咩餸食, 原來佢早咗返得到香港, 但只餸下肉餅, 咪叫佢煮個麵算囉! Daddy返咗一陣柏仲就醒啦, 咁K.O.咗笨元就同柏仲玩吓再去餵埋奶佢就瞓, 老公攞咗支香精油返嚟, 幫我按摩吓肩膀位, 勁舒服, 就算晚上柏仲醒幾次, 我都好快瞓番!

<口腔期咩都放入口!>

 <餅先食得架嘛!>

 <偷偷攞哥哥D玩具食!>

29/6/14

29/6/14   SUN   HOT
今日都係全日喺屋企休息, 瞓到8點幾但瞓得好差, 所以成日都好頭痛! 餵咗豬仲就叫老公起身煮早餐, 食完就要同子元溫習, 但佢係到拖, 終於入到房比我片咗一餐, 真係好恨嗰隻, 我要佢明白溫書係咩一回事, 唔係黑住面嚟溫書, 咁最終都溫得唔錯啦, 兩點左右我頂唔住瞓一陣先, 老公叫咗外賣pizza hut食, 食完睇埋running men, 跟住傢俬鋪就嚟覆埋尺, 我又要再同笨元溫埋工作紙, 跟住就沖好涼再比佢睇變形金剛, 晚餐煮拉麵食咋, 但笨元可能食咗藥冇咩胃口咁! 睇哂套戲剛好9點幾, 笨元瞓覺, 豬仲就捱到11點左右先比佢食, 我地就睇埋變形金剛第二集先瞓!

28/6/14

28/6/14   SAT   HOT
今朝如常咁揍笨元去畫班, 都係遲咗要撘8:40班車, 下星期真係要早D! 食完麥當當快手上去搞掂佢地我就買早餐返工, hea到差不多放工就等老公帶小笨同仲仲嚟, 比佢地玩夠就去食KFC, 然後要返屋企啦, 因為子元要溫書囉, 返到去已經比佢休息咗先, 跟住就溫中文, 到6點叫醒老公要出門口, 約咗小圈子佢地食飯, 撘地鐵去到剛剛好, 帶小笨去反斗城玩一陣, 順手買埋禮物比謙哥就上酒樓啦, 都係食餐飯啫, 冇咩特別, 一邊又要顧住子元同柏仲, 所以都係食咗D咩都唔知咁! 到9點左右就走啦, 坐健順風車, 雖然係迫D但都好過冇! 返到去排隊沖涼, 等佢兩個豬仔瞓哂就可以休息啦, 老公睇波, 我抖咗陣都去瞓啦!

27/6/14

27/6/14   FRI   HOT

今朝敏瑩又送車尾, 我地反而剛剛好上到車, 返到學校都係等入去啦, 熱到呢! 買埋早餐返公司, 朝早都係做吓自己嘢啦, 中午落去買車仔麵, 平平地食一餐啦, 下午老細返咗嚟, 傾咗陣嘢後佢就走, 可以做吓自己嘢, 找吓8月去澳門的資料, 若再去番悅榕莊真係要問Amanda有冇平房先抵去, 唔係全家去要差不多5000蚊真係好貴! 放工喺759掃咗好多貨, 搬到我死死吓! 返到去老公瞓咗, 真係由得兩個仔喎, 柏仲喺床子元自己玩緊! 望一望個表先知柏仲未食奶, 又即刻開始餵佢, 然後要幫子元溫書, 起碼溫咗中文先嘛! 跟住又夠鐘去合唱團, 我地就去咗食飯啦, 豬仲真係唔多肯坐, 可能坐得低悶, 都係時候要train佢架啦, 都就嚟足7個月囉! 食完返去接佢地啦, 又玩到九點半先走, 期間放柏仲喺枱做乳豬全體, 程太又放埋敏婷上去, 兩個喺到好似打架咁GE樣真係好得意! 夠鐘就走人啦, 返到去沖埋涼都11點仲要餵埋柏仲, 老公就K.O.笨元, 我都超攰, hea多陣就瞓啦!

<熱身!>

 <埋牙!>

 <還拖!>

 <出手!>

 <呵番!>

 <柏仲舊曆7個月啦!>

26/6/14

26/6/14   THU   HOT

今朝竟然係我地撘得切巴士但敏瑩撘唔切, 我地上咗車先見佢message話等緊車, 真係第一次! 返到學校咪得個熱字囉, 真係超辛苦! 趕得切車返工, 買埋早餐就返去hea, 因下午要去開會, 所以一食完晏就走人啦, 好在可以喺手機繼續睇套劇! 兩點過到去老細都到咗, 但等齊人開會都等到2:40先開得成, 好在3點幾已經開完, 但老細唔肯走, 要借D二問佢call咗司機嚟未, 咁我就4點已可以閃人, 慢慢返青衣買埋魚柳包先去接笨元, 但去到已4:40架啦, 都仲未開門, 而且條龍已經九丈遠, 係到諗緊點算時, 見到敏瑩公公喎, 今次真係痴得就痴啦, 又要一齊撘41A呢! 佢兩個等車時個衰樣, 真係忍唔住要影下放上group, 上到車兩個吹水的內容亦真係好搞笑! 行到返屋企已經超攰, 大家都過一過水先, 老公一早返咗嚟, 所以嫲嫲已回家, 咁等柏仲醒咗應該夠鐘食奶嘛, 點知條友可能下午食咗飯先瞓所以唔餓, 係都唔肯食, 咁又要出門口去荷李活廣場踢波嘛, 唯有熱番支奶先, 去到再飲, 果然去到餓啦就飲哂! 今日夠時間, 可以放柏仲入草地影吓相, 真係好可愛呀! 之後都係抱住豬仲睇吓波, 又放佢喺車仔睇吓親子王, 子元後期已經出咗嚟休息, 我又走咗上台位影吓相咁, 幾好玩! 踢完個個都要返去交人啦, 咁我地咪一家四口去食晚飯囉, 基本上係邊到有位就去邊到食, 最終試咗間新嘢都係食日本嘢, 有麵有飯有壽司都OK! 食完仲試埋杯楊枝金露爆珠, 好正! 但返到屋企已經超攰, 沖好涼仲要餵埋奶, K.O.埋隻小笨元咁, 已經11點半啦! 不過我地都睇埋愛回家先瞓呢!

<佢兩個坐哂喺地下食嘢...>

 <好可愛的坐草地相!>

 <daddy和哥哥喺後面玩緊!>

 <呢張相超似子元細個!>

 <我的足球寶貝!>

25/6/14

25/6/14   WED   HOT

今日都要揍豬仲入青衣, 真係超攰超熱呀! 出到巴士站見未有車就買包啦, 點知行番出嚟就見車埋站, 馬上衝上去啦, 好在啫! 返到去都係繼續熱啦, 送咗小笨入學校就揍柏仲上嫲嫲到, 仲要落雨喎, 真係好狼狽! 上到去都要抺吓汗先, 有衫換我真係想換埋衫呀! 行到上巴士站剛好趕到班車, 買埋早餐返去啦, 做吓自己嘢咁, 其實應該要抽時間幫子元預備溫書D嘢, 但實在太多, 都唔知點出卷好! 中午飯後都係睇吓電視咁啦, 下午又要開會啦, 唉…而家個個星期都要開會真係好無奈, 雖然都唔算太多嘢做, 不過開會要聽佢地講廢話真好無奈! 老細今晚有飯局, 遲遲都唔肯走, 仲要走過嚟行catwalk show咁, 但又唔留意吓自己又未拉褲鏈! 差不多6點先走得, 好在都撘到巴士, 仲同老公喺巴士站會合! 一路上找吓有咩地方星期六小圈子飯局, 因為group上又有D火藥味, 有時都覺得大家係咪可以好好遷就吓呢, 難得聚會吓好似又要吵架咁真係好煩, 我都諗唔掂食咩啦! 返到去笨元成日話要入房玩, 但廳明明鋪咗地墊點解唔喺廳玩呢, 最終佢都要屈服, 到食飯時就係到發呆, 唔理咁多食完就陪豬仲玩, 最終撘咗的士返屋企, 嫲嫲比咗錢老公撘的士, 仲趕到返去睇愛回家, 超好笑! 沖埋涼就同笨元溫陣書, 不過佢有D咳食咗藥, 又已經溫到9點幾, 豬仲又扭眼瞓, 所以老公K.O.笨元我餵豬仲食奶, 10點我地已經自由啦, 用小米盒睇番上次未睇完嗰套Running men, 11點幾就瞓覺啦!

<睇佢兩個玩真係好開心!>

 <一個傻一個顛!>

 <比人玩完個樣!>

24/6/14

24/6/14   TUE   HOT*

今朝要揍埋柏仲入去嫲嫲到, 所以都要早起身搞掂D嘢行, 一路都收唔到程太whatsapps, 以為未有車啦, 點知原來係佢冇帶電話, 好在喺對面馬路見到41A, 見冇車就衝過去好在趕到, 返到去都超熱呀, 揹住柏仲又更加熱啦, 終於揍咗柏仲去茶水站比嫲嫲, 我就可以返工啦! 買埋早餐返公司, 都係做吓自己嘢, lunch老細們都好早返哂嚟, 好在亦好快走, 咁我地又可以繼續hea, 到tea 食番個麵先, 因為今晚去飲梁小姐個囡嗰餐, 梗係要填飽個肚先啦, 遇佢遲開席架嘛! 五點幾換咗衫先, 睇住running men 等到6:45先出發, 過到去尖東都係7點半左右, 先影吓相先啦, 跟住都係坐, 等到9點先開場, 證婚又講輪, 破咗我記錄9:45先有得食呀, 所以好在食咗個麵咋唔係餓死! 食物就一般啦, 但D侍應就真係好唔掂啦, 態度唔得呀! 食到11點幾先散, 好多人都早走, 我地算係咁食到尾, 返到屋企都差不多12點, 沖好個涼要再叫醒柏仲食一餐, 因為佢之前有一餐食亂咗D時間, 8點食咗咁廢事佢餓醒, 過咗眼瞓時間又瞓唔到, 搞到兩點先瞓呢!