12/6/14

12/6/14   THU   HOT

今日要自己撘巴士返學啦, 不過等46X真係好難等, 之後又要再等88B, 結果8:35先返得到去, 但我地已經7:50出門口架啦喎! 佢遲咗返我又撘唔到班車, 骨牌效應呢! 買得早餐返公司都9:30, 寫好日記等就要做番琴日個會議記錄啦, 唔覺唔覺都幾多嘢記, 搞到食晏都未做好, 唔理咁多食咗飯先啦, 老細今日過大海, 唔洗理佢, 不過大老闆娘就返咗嚟, 雖然冇咩搔擾但有個人喺到始於差D! 下午打埋個記錄就自由啦, 做吓自己嘢, 幫豬仲搞申請passport D嘢, 原來都幾複雜, 仲要book時間同佢去交表, 真係頭都大埋! 放工返青衣啦, 一入屋條友就話做哂心算, 不過要佢做埋改正先, 跟住睇功課發現有一頁未做, 係星期一請假時的功課呢, 要佢做埋先可以自由! 老公話要OT, 所以要帶飯比佢, 食完我都叫快手執嘢返去, 因為快極都只可撘8:10班車, 連大包都唔等啦, 佢仲要慢慢執嘢! 回家後馬上同笨元沖涼然後自己沖, 跟住叫佢溫默書, 今次真係比心機去溫啦, 咪默得唔錯囉, 佢咁努力都係為咗搞掂哂D嘢可以玩撲克牌, 話要玩大D喎咪教佢囉, 玩咗兩鋪安安樂樂去瞓, 老公剛返嚟, 我都唔得閒理住, 因為又要餵豬仲食奶嘛, 唉…真係冇咩理過佢咁, 好似好衰! 食完奶就去瞓, 又可以自由啦, 老公買咗榴槤比我食, 正! 11點幾就瞓咗啦, 半夜三更的世界杯都唔關我事!