19/6/14

19/6/14   THU   HOT

今朝雖然有私家校車, 但由於美孚嗰邊炒咗車, 搞到佢地差不多8點半先入到嚟, 返得學校都8:45, 我仲要自己揍番柏仲上嫲嫲到, 返得公司買得早餐嚟都已經9點半, 真係好攰! 做吓自己嘢咁啦, 午飯去咗家寶屋企食, 聽佢呻吓又睇吓朗B啦, 因為朗B唔係好願用力, 咪睇吓佢咩情況, 我真係好記得我兩隻仔兩個幾月已可以就咁抱起唔洗支撐住條頸, 伏係到時又已經可以抬起頭, 所以我冇諗過兩個幾月仲係咁粉團! 試下比佢坐喺梳化練吓力先, 都唔錯又肯笑, 玩到兩點真係唔走唔得啦! 返番去都算好, 老細冇返過嚟, 可以做自己嘢, 當然都有做公事, 唔係時間點過! 放工返去啦, 今晚老公唔返嚟食, 兩隻仔反而好聽話, 先同笨元睇咗功課, 跟住就一齊同柏仲玩啦, 笨元玩柏仲玩得好粗魯, 但柏仲又好受喎, 頂佢兩兄弟唔順! 要食飯啦, 就鋪好哂嘢墊住柏仲等佢自己玩, 都算叻仔自己玩喎, 等我地食完飯先再玩過佢! 七點幾執嘢回家啦, 返到去先同笨元沖涼, 再我自己沖啦, 柏仲就渣住架車太空漫遊, 等我做好哂D嘢先抱佢玩, 又要幫子元溫書洗茶點袋等等, 仲要篤佢做埋兩頁心算, 好在佢為咗陪柏仲玩, 所以好快做好哂! 玩咗一輪就要準備瞓覺啦, 一齊聽完故事就瞓啦, 我就餵柏仲食埋餐奶可以瞓, 之後就等老公返嚟!

<睇緊哥哥玩咩!>

 <學習中!>

 <一個教一個學!>