10/6/14

10/6/14   TUE   HOT

今日笨元如常返學啦, 嫲嫲要覆診, 所以阿媽過嚟睇住柏仲, 叫咗佢熱番D粥佢食, 應該OK! 程生佢地請哂假, 所以可以車我地返學, 返到去都係吹吓水咁啦, 不過佢地同校長好多嘢要講, 所以都冇等佢地我自己撘番巴士返工算啦! 今日都係冇咩做, 只係係咁上網囉, 臨放lunch前Barry打嚟話佢喺附近想找我食lunch, 但我有帶飯嘛, 琴日已經陪咗情緒低落GE程生食個晏, 今日又陪Barry咁我個飯點算, 加上佢又係找我攝, 仲要我行過去寶興嗰邊, NO啦! 下午老細都冇返, 要開會嘛, 所以都係hea過, 不過成日上網真係冇咁多嘢上, 所以下午時要搵D嘢做吓! 放工後就買些少餸返屋企, 返到去見兩個細喺廳, 阿媽喺廚房煮緊飯, 咁我咪馬上同柏仲沖咗涼先, 再同笨元沖涼囉, 由於柏仲而家愈來愈有搞家能力, 坐住架學行車周圍走撞到笨元D玩具, 所以笨元好唔滿意柏仲囉, 呢個係遲早出現的問題, 要慢慢調節子元的心態架啦! 食完飯要溫習啦, 默書時寫個“聲”字係咁話點解個耳字要喺中間, 解釋完佢知又唔肯寫番好, 火到我呢, 叫阿媽去教佢啦, 教咗廿幾年一年級生係唔同D, 佢有佢嗰套去解釋佢知, 終於咪寫到囉! 執好書包校服先可以自由, 佢入咗房要同柏仲玩, 同之前話唔想要細佬完全係兩回事! K.O.咗笨元就餵埋柏仲食奶, 廢事再夜D叫醒佢食又係到發顛! 之後瞓咗陣再睇埋笑傲大結局先瞓覺呢!