14/2/18

14/2/18   WED   COOL

今日係情人節, 但其實對我嚟講真係冇咩感覺! 反而今日請咗假揍仲爺, 得佢同嫲嫲大包入迪士尼我真係唔放心! 今朝子元10點要學英文, 咁我9點多起身, 仲爺已經比阿哥搞掂哂沖好涼換好衫, 所以10點多已經過到去學英文, 我就同仲仲去大家樂食早餐, 食完都係10點幾, 於是咪去公園玩吓囉, 因為約咗大包11:30喺青衣站嘛, 10:50打比佢叫佢要起身, 都話我好咁早打比佢, 大佬你約咗我11:30喎! 結果我11:27到咗, 但等到佢12:10佢先到, 我堅係火喎, 12點時我已經嬲到話返屋企, 但仲仲又好慘咁, 唉….嗰吓真係進退兩難, 佢嚟到我都要鬧呀, 係過分嘛! 最終12:45先入到去, 真係少咗好多時間囉, 先去玩小小世界, 都要排差不多半個鐘, 想睇魔法書都排唔到, 咁就去玩IRONMAN囉, 仲爺叫做高度上過咗骨入到去, 大膽仲完全唔怕囉, 仲覺得好好玩添, 跟住再去咗睇吓米奇呀玩吓poohpooh啦, 再去影吓相, 最終都冇睇巡遊, 去咗反斗大本營嗰邊, 就係嗰到影相時….我交手部手機比大包, 佢冇接實….跌咗落地, 爆mon!!!!!!!!!!!!!!! 真係好唔開心架, 我真係一向都用得好小心, 唉…你話我姓賴都好, 同啲唔小心GE人一齊都出現個錯GE磁場, 好就好在應該只係傷咗表面, 去換番就得, 但都係赤啦, 激死我呀! 冇咩可以做, 都係繼續玩囉, 迷離莊園仲爺都覺得好玩, 一啲都唔驚囉, 同子元真係差好遠! 今次仲玩咗新嘢, 坐咗火車遊一個圈, 又去公主花園睇吓, 仲同黑豹影埋相, 最後再玩多次IRONMAN都走啦, 臨走都真係肚餓, 就買咗一個包3個人分, 都要$40架好鬼貴! 撘緊地鐵時仲爺已經瞓咗, 抱到我手軟, 本來想食牛陣但實在要排太耐, 最終上咗聯邦食, 送咗嫲嫲返屋企, 仲爺又話要喺嫲嫲到瞓, 咁反正明早佢都要入來就由得佢, 返去我地可以輕鬆少少, 沖好涼入埋啲相就瞓啦!