4/2/18

4/2/18   SUN   VERY COLD**

今日主力都係喺屋企附近活動, 因為要儲24小時的小便交番醫院驗, 係有啲核突架啦, 咪check吓囉! 朝早9點要起身啦, 搞掂出門口揍咗子元去上堂, 我地就去食早餐啦, 接子元時Miss Yu話佢又冇做功課, 唉…補習的功課都要跟足架仔! 時間關係冇得留堂做, 又要去打鼓啦! 等佢時去咗AEON, 主要幫子元買番heat-tec褲, 撞啱運動部做特價, 找到啲款半價, 為番起$150條都扺啦有牌子喎! 子元放鼓班叫佢自己行過嚟AEON找我地, 慢慢放佢自己過吓馬路! 返到屋企就執吓屋, 仲有兩個星期唔夠就過年, 好在今年冇咩大嘢要執啫, 但都要佢地收拾吓個房, 堅係亂! 跟住就去試盈暉新餐廳, 質素暫時可以但只有茶餐嗰類, 要再睇耐D! 去百佳買埋餸今晚喺屋企煮, 凍到完全唔想出街, 返去仲爺同老公就瞓晏覺, 子元溫默書又打吓機咁, 我就摺咗啲衫睇吓劇啦! 6點幾老公起身做大廚煮晚餐, 我呢個二廚就已經預備咗材料, 7點幾食得, 老公之後又要去踢波啦, 我對住兩個都冇咩動力郁, 開住暖風機都仲係好凍! 佢兩個沖好涼, 比仲仲睇咗兩part迷你兵就局佢去瞓, 子元就睇到完場, 大考後我都冇咩跟功課默書, 始終都要慢慢放手, 尤其默書呢D唔計分嘢等佢知衰都好! 我都11點幾12點先去沖涼, 老公回來都12點幾啦, 真凍到隻嘢咁, 快啲沖好涼就瞓覺啦!