21/4/16

21/4/16   THU   HOT*

今日本來都冇咩嘢, 都係如常返工返學咁啦! 係仲仲朝早唔肯執玩具, 搞到我又要鬧囉! 返到公司都係做吓自己嘢啦, 都冇咩特別, 點知老細打嚟, 本來想找另一個同事問出年Annual Dinner D嘢, 但嗰個同事冇返, 就搞著我啦, 最終仲要搞到今日要出去睇場, 咁都不特止, 仲要叫埋低B妹一齊去睇! 好…睇飽佢囉! 午飯後做陣嘢, 約咗司機3點半出發, 過到去先睇第一間酒店, 其實我就覺得不過不失, 以十圍嚟講真係差不多, 若有大嗰個場GE話, 咁都係偷偷地影吓相, 因為人地有function用緊, 叫佢比我睇埋大嗰個場, 但入去嗰段路太窄同一嚟見到廁所就真係麻麻, 而且for 24席未必啱, 但老細叫睇咪睇埋囉! 咁睇完出番酒店, 低B妹就發功啦, 第一句就已經話:「你仲同佢講咁耐問咁多嘢, 比我就一睇到佢個地下就已經走啦, 你睇幾污糟!」, 我真係呆呆地, 但再睇佢有咩偉論發表! 跟住佢問其實係咪一定要喺酒店搞, 我話老細咁指示我地通常都係跟住做GE啫, 我仲以為佢話想去酒樓, 然後佢竟然話:「其實可以去賽馬會, 遊艇會架!」我真係好想O個嘴比佢睇, 你跟官唔耐唔知官姓咩冇所謂, 但唔好意為自己知囉, 都未知你老細係咩人, 就遊艇會呢D, 我咪話, 其實我地一向都係老細指示點做就點做, 若果你有新意見你可以直接同老細講! 跟住去睇酒店B啦, 入到去冇咩裝飾, 咁我地最多會用簡潔嚟形容, 但佢竟然係話人地簡陋, 好在佢冇當住人地面講咋, 加上酒店B裝修到8月先完成, 所以都冇咩現成嘢可以睇, 最多係睇吓佢個未裝修GE廳, 但始終不能作準! 咁睇完已經5:15, 各自散水啦, 我仲要同老細滙報吓咁! 老細迫我要選一間, 咁我大概捉摸到老細想要咩咪答咩囉, 都係咁打工架啦係咪, 唔通吓吓遊艇會咩! 叫佢做低B妹真係冇錯! 買埋餸返屋企, 奶奶話有餸攞出嚟咪唔洗買咁多囉, 都係煮飯食飯洗碗抺地基本嘢啦! 仲仲近來愈來愈多古靈精怪嘢, 好多自創遊戲, 好多古怪玩法, 例如攞架消防車扮花灑同狗狗沖涼, 又再自己沖涼, 又會渣車去買嘢, 會扣安全帶咁, 總之將生活溶入遊戲! 等佢瞓咗就可以沖涼啦, 子元今晚冇咩特別嘢做可以早D瞓, 我地就睇埋電視先瞓, 因為有一堆衫等緊我摺呢!