29/4/15

29/4/15   WED   HOT

真係要諗吓辦法點令柏仲瞓晏D先得, 因為佢醒咗之後又爬上床, 我出廳佢又要跟住出嚟, 又成日走入廁所, 好麻煩! 子元都自己醒, 因為急POPO喎, 所以都好早出到門口! 搞掂返上樓個衰豬又要抱住食奶, 然後我就揍佢入嫲嫲到, 因為老公去見工! 好好彩好快有車, 揍咗佢落去我就返工啦! 返到去都係hea吓咁啦, 午飯後老細已經返咗, 又要開sales會咁, 時間都過得好快, 放工馬上返屋企換哂D床單, 難得有時間冇人喺屋企搞住哂, 子元功課班7點先放, 咁我做到6點半就去揍佢, 老公都同嫲嫲及柏仲到咗, 因為冇買餸, 所以出去食, 等緊子元時, 柏仲竟然辦大事, 我地又冇帶片喎, 諗諗吓不如上敏瑩婆婆到換片, 因為有婷婷D片, 唔洗專登買! 搞掂就去番上次游水後食嗰間, 今次食西餐, 估唔到四十幾蚊塊扒都好食喎! 食完回家啦, 撘巴士時子元瞓咗, 落車時又發眼瞓瘟, 我咪又激到死囉, 又鬧餐佢勁! 返到去沖涼後K.O.咗柏仲, 睇子元功課啦, 點知原來佢好多改正又未做等等, 愈做愈火又鬧又喊囉, 佢又眼瞓但都要做哂先得架, 唉…都係要諗吓辦法!