11/4/15

11/4/15   SAT   RAIN

琴晚3點幾先有得瞓, 柏仲又發顛, 真係人都顛! 今朝老公又要去做兄弟, 小休結婚嘛! 8點多佢就要起身, 查實我都要, 柏仲已經醒咗仲好好精神, 我就真係完全唔想郁, 仲要煮早餐佢地食, 但笨元仲係冇咩胃口, 煮完又唔多食, 比佢激死, 咪話中午煮粥順手比埋佢食囉! 玩到疲勞過度就發燒, 真係服咗佢, 柏仲都攰啦, 粥都未煲好佢又瞓啦, 2點幾老公打嚟又話叫我準備出發, 因為佢地架28座過到嚟順手車埋我地去婚宴場地, 跟住又話要我自己行過去, 最後我叫佢喺圖書館嗰到等得唔得呀, 因為落住雨我真係好難推車推咁遠, 最終3點幾打嚟又話要即刻到, 唉…比佢玩死! 好在柏仲都瞓醒咗, 比支奶佢食咗先行, 好狼狽地上到車, 好快過到去九龍灣啦, 其實咁早來到都唔知做咩咁, 應該只係帶子元過來就算, 係佢要練舞囉, 不過條友一玩得顛又燒過, 激死, 臨開場先嚟料, 叫Ben順路過來時買退燒藥, 食咗藥抖咗陣叫做跳舞OK啦, 食嘢就由得佢想食先食啦! 仲仲就玩完一輪臨開席就嚟瞓, 但瞓得一陣又被嘈醒, 之後都嗲咗要老公抱, 成隻樹熊咁! 小休同cw個婚宴真係好特別, 唔會覺得悶ge, 又有歌舞表演咁, 全程睇住d細路已經夠攰, 子元又成日同花女去咗玩相機, 忙得佢呀! 11點幾終於走得啦, 飛的返去都係12點左右, 馬上k.o.兩隻嘢, 但柏仲又係扭, 近來扭人按住佢腳先肯瞓, 好煩, 唔係就顛喊, 好似子元咁上吓大時又係扭人陪, 係咪呢d時候就係咁呢, 我又用唔到Crying control program, 因為佢落咗床上唔番去, 等佢換咗小童床我先對付佢!