15/5/16

15/5/16   SUN   HOT

仲仲7點多又醒了, 但我都拖到8點先起身, 結果去畫班又遲遲地啦, 最搞笑係今日揍埋婷婷嘛, 咁食完早餐上去時我同程生揍住4個, 同lift有個阿叔話: 嘩! 4個呀你地, 我地即刻澄清, 唔係…兩個家庭嚟架, 不過真係4個都真係好誇, 要生兩次龍鳳胎先得! 揍咗佢地去就食早餐再去買嘢, 明天起唔出去食早餐啦, 太貴! 老公話不如食脆片, 都好呀, 買咗100蚊左右, 睇吓可以食幾耐! 跟住就去接番佢地啦, 但仲仲呢個時候竟然POPO咗, 好在有婷婷的片用, 咁換好咗佢就肯坐啦! 返到屋企仲仲完全交比老公負責, 我就開始同子元溫書, 本來都好地地, 但溫到咁上吓佢已經好黑面, 大佬我同你溫書你仲黑我面, 激到我火火地我話咁我走啦, 佢初頭都仲發脾氣架, 之後就喊啦, 搞咗半個鐘先OK, 咪又係再繼續, 我已經唔係non stop咁溫, 係有休息又唔係坐定又好聲好氣架啦你仲想點!!! 溫到差不多3點仲仲起咗身, 要完成埋先可以出去食嘢, 咪溫埋先出街囉, 近近地去咗愉景新城啦, 但假期都係唔好嚟呢到, 得人多事! 6點多就回程了, 買咗料煮意粉, 點知掛住叫子元起身等等又要抱仲仲唔記得攞, 老公就去咗踢波, 結果只可煮罐頭湯意粉加IKEA買的薯餅! 子元就掛住睇電視, 咁都一齊睇啦, 仲仲又邊食邊離坐, 係要我發顛聲去鬧喎! 食完比佢睇埋電視先沖涼, 跟住就K.O.仲仲, 再同子元睇陣書啦, 10點前已瞓啦! 老公返嚟先食晚餐, 佢買咗米線咋, 我又痴咗少少啦! 最後睇埋電視12點幾先瞓呢!