11/5/16

11/5/16   WED   HOT

今朝都係如常咁返學返工啦, 琴日就落狗屎, 今日就曬到燶! 揍咗子元仲仲返學就食早餐返工啦, 返到嚟都係做吓私務啦, 填埋D稅表交, 午飯為咗低B妹叮飯蒸飯問題, 搞到好麻煩, 佢呢D公主真係要人服侍囉, 叫過佢做但佢當聽唔到! 所以先唔同佢蒸, 連呢D嘢都要煩埋, 真係好煩囉! 搞到我琴晚都發埋哂呢D夢, 當然係發夢啦, 因為老細竟然會幫我, 現實冇可能啦! 下午都係做吓公事做吓私事啦, 又要開會等等, 都搞到差不多5點! 放工買少少餸返去咋, 因為奶奶買咗好多菜比我地, 所以都係買D肉就得! 返到去邊煮餸邊睇住佢地啦, 子元今日起連續3日都係唔洗上堂, 所以輕鬆好多, 我又唔係煮好多餸, 老公又早返, 所以7點9已經食完飯, 佢地沖完涼見有時間, 就同子元換埋床單, 好似好耐冇換過啦, 我唔提出唔做就冇人郁, 好在老公都肯幫手, 攞埋佢D公仔出去洗, 換完好好多! 8點幾仲仲入埋房瞓啦, 跟住都係沖涼睇電視, 今日睇咗萬千呃like賀台慶, 真係幾好笑! 12點幾先瞓呢!