6/5/16

6/5/16   FRI   HOT

今日放假一天, 仲攰過返工呢, 因為要係咁出出入入, 仲仲又成日挑戰我! 朝早如常咁揍子元校車啦, 提咗佢敏瑩今日一齊撘校車返嚟, 跟住快手上樓搞掂出門口, 揍咗仲仲入學校就快食個早餐再上番學校門口等入場, 同班家長吹吓水啦, 有D都認得GE! 入到去原來都係企喺到睇, 見到仲仲企右邊就企過去近D佢, 仲仲見到我都有D驚訝, 不過佢全程都只有舞蹈有唱出聲, 平時鬼咁大聲唱歌又唔見佢而家唱! 都係睇唱歌跳舞啦, 仲仲都真係跳得幾好喎, 算係跟到架啦! 最後一個環節係送花比家長影相, 重點係支花要送比我, 但佢就勁唔想, 可惜老師一定要佢送, 咁佢可以點呢, 咪好委屈咁送咗比我, 睇住支花走咗, 一路排隊一路找媽媽……手上支花, 最後忍唔住喊咗出嚟, 吳老師帶咗佢入課室, 冇得睇佢跳送客隻舞, 好在我識叫校長, 咁佢就拖番仲仲出嚟, 叫做有得睇埋啦! 一路跳就要家長走啦, 唔係到時一個二個又喊架啦! 咁散水就快手撘地鐵返美孚, 先去銀行跟住就去買餸, 快腳返到屋企已經10:45, 得大半個鐘時間做嘢, 11:30又要出門口入去接番仲仲, 去到學校, 老師校長都同我講, 佢好肯定柏仲唔係唔捨得我而喊, 而係因為我攞咗佢支花, 我話我梗係知啦, 咁佢地做咗個愛的傳聲筒, 老師就教仲仲用個筒喺我耳邊講:媽媽我愛你, 真係好鬼可愛呢! 接咗佢就去撘巴士啦, 不一會有車, 上咗車第一時間同佢著番條片先, 返到屋企換好衫再煲番個粥同佢一齊食, 一般合作咁食啦, 食完都係放佢自己玩, 因為我要預備今晚D餸, 都係邊做邊同佢玩吓啦, 3點多捉佢入房瞓, 點都唔肯瞓囉, 但都冇得唔瞓, 到4點子元敏瑩返上嚟佢都未瞓, 咪比我鬧囉! 我又要幫佢執衫換季嘛! 結果4點多瞓到, 我都搞掂兩隻大食嘢, 5點多諗緊點出門口去小童時, 仲仲已經醒咗, 咪齊齊出去囉! 去到佢就玩足一個鐘, 我就陪佢玩吓囉, 佢都好自娛架啦! 6:30佢地放合唱團, 就自動自覺去換泳衣啦, 搞掂哂出發行過去都係6:45咋喎, 今日非常早! 安頓好佢地我就返屋企煮飯, 今日老公返咗大陸做嘢, 所以我又要一個人頂哂, 不過星期五熱熱鬧鬧咁都幾快過, 同仲仲沖好涼叫佢自己食飯又係唔食得多啦, 等佢地上哂嚟又係沖涼呀等等, 忙忙亂亂咁先餵咗仲仲食奶, 但到開飯時先記得起佢, 咁佢都好乖只係坐喺床等我, 關燈佢就瞓啦, 食到9點幾吹吓水等等, 10點多佢地都閃哂, 我仲要執埋手尾呢, 趕埋子元去瞓, hea到差不多1點好攰先瞓!