30-31/7/24

 30-31/7/24     TUE     HOT

今日準備要飛，不過都係照常咁起身煮早餐執埋啲嘢，hea到咁上吓叫埋外賣，2點就出門口去機場，雖然老公車我地，都係預鬆啲好，不過真係好早，寄埋行李坐極都仲係3點幾，都要入去做安檢架啦，一路都好順利，入到大堂好多人，搵個位坐吓等出閘口，4點半終於知閘口可以行過去再等，6點先起機，漫長的12小時機程開始，全機滿座，食咗兩餐，試埋食杯麵，睇咗兩套新戲，但唔係好瞓到，陰公！落機搞唔掂電話卡增值，返咗去先，我真係好攰！由荔枝角行番去已經濕哂，買咗嘢沖涼先！最難係搞唔掂啲上網嘢，仲要再出去萬寧買嘢加埋買魚蛋燒賣，我夠哂攰，有咩明天再算！

29/7/24

 29/7/24     MON     HOT

今朝起身都要就住sleepover兩個細路喺廳瞓咗, 知佢地實好夜先瞓, 所以唯有9點幾先落去煮早餐, 煮得嚟佢地都醒架啦, 等佢地食飽終於出咗去買嘢, 同仲仲執完行李, 終於到我有機會執行李, 比仲仲嗰啲多好多嘢! 到咁上吓就返嚟接我地, 揍咗子元去練波, 再同博文佢地去Costco行吓, 去埋Wembley佢地打吓卡, 就去番球場,book咗埸佢地打波, 我就叫老公車我返屋企, 倒咗垃圾, 再自己過去球場同佢地會合, 去咗食TeKi, 8點幾要走啦, 有一家要北上返屋企, 我都想返去休息吓啦! 都要再執吓行李! 

28/7/24

 28/7/24     SUN     HOT

今日瞓醒食完早餐本來諗住執行李，但最終都冇做，細佬話打機就4個一齊打咗轉Mario party，然後就出門口去central London，約咗konter隊友晚飯，咁就泊好車慢慢行過去，老公搵咗間意大利菜tea一tea，其實好貴但又真係好食！之後一路行到唐人街，又要等到夠鐘先去餐廳，終於入得座，食嘢吹水兩個鐘，再去食甜品，最終兩個男仔決定嚟sleepover，冇咩所謂啦難得一見，咁就各自己回程啦！

27/7/24

 27/7/24     SAT     HOT

今日瞓到9點幾10 點先起身，因為約咗舅父仔佢哋食午餐，所以簡單食啲早餐就算，12點半出發，遇一個鐘諗住夠，點知white city條路封咗，搵替代路線再塞一輪，都遲咗20 分鐘先到！一路食一路傾到3點幾，就行住商場再傾，到5點幾先散！返屋企做咗清潔再休息吓先煮飯，結果8點幾9點先開飯，食完洗碗沖涼，沖完涼子元突然話我地架車被撞到少少要去睇吓，好在真係好少但安全計都要check囉，再後面嗰架傷啲！

26/7/24

 26/7/24    FRI     WARM

今日老公要book GP睇隻腳，8點要打電話，唔知係佢講得唔清楚定真係收得唔好，最終我幫佢講先講清楚，book咗9點2去睇，咁就快手食早餐出去，睇完冇藥食，返屋企hea到12點去榮業食茶餐廳，本來諗住中超，但子元夠鐘練波就車佢去球場先，老公去洗完車再揍佢返嚟，7點佢地又出去玩波，今次我唔去啦，成一嚟成個鐘車，二嚟我想睇奧運開幕，好正好好睇，期間快整咗個通粉食，睇到10點幾沖涼再等宵夜！

25/7/24

 25/7/24     THU     WARM

今日冇出過門口，所以都冇咩好寫，瞓醒起身食早餐，然後咪睇電視打機，到點幾兩點要煮午餐，簡單有咩就用咩炒麵，都幾好食！之後都係hea住咁過，自己都覺得過份！老公返嚟要揍子元去跟波，咁又要職工頭圍用膳，然後梗係快手沖涼，咁就唔洗洗碗！

24/7/24

 24/7/24     WED     WARM

假期真係正式開始啦, 今朝雖然都係一早醒咗, 但都以hea到咁上吓先起身, 然後就整早餐食, 再出去超市買嘢, 本來諗住雪糕有減, 但冇我都照買! 返到屋企用吓電腦, 執吓file等等, 整咗pizza做午餐, 子元去咗踢波, 我就同仲爺打吓機, 咁就過咗一個下午, 佢地返嚟就煮飯啦!

23/7/24

 23/7/24     TUE     WARM

今朝都係要早起身，因為仲仲今日仲要返半日，揍咗佢返去，佢見人地有帶花送比老師，佢自己都想送，咁放學幫佢買啦！返屋企抖抖要出去抽血，老公今日冇返工，咁順手車我去，唔洗自已揸咁辛苦！順手去買埋花同朱古力，返去畫埋張卡就可以繼續睇雪中悍刀行，結果今日一次過煲哂，中途係出去揍仲同煮兩餐停過，第一日假期就咁過咗！

22/7/24

 22/7/24     MON     WARM

我返埋今日就放暑假啦，今日返去都係做吓清潔工人，做電腦嘢，我寧可做主力電腦工作就算，好怕做勞動，不過電腦都煩，都係亂哂龍！放飯唔洗限時限刻，食飽抖吓都仲得！做到3點差不多準備了，閃人啦！放暑假囉！返去揍埋人， 仲返嚟食肉少少嘢，5點應該要出車，揍仲去踢波，條友又未準備好又出咗門口先發現未戴con又要留轉頭，結果遲5點8先到！等老公車我地返去，準備晚餐睇吓電視咁又一日！

21/7/24

 21/7/24     SUN     WARM

今日7點就醒咗，但都9點幾先起身，老公同子元出去踢波，我就做完清潔同仲仲打機，佢地2點幾3點先返到，餓死我，快啲去Broadway 食雞，再行咗需要的鋪頭5點就要走，鋪頭閂門！返屋企抖陣就預備整晚餐，今晚食肉骨茶，正！之後睇悍刀已經冇精神，都係收機沖涼啦！

20/7/24

 20/7/24     SAT     HOT

今朝瞓到11點幾，半夜都醒過但冇諗過瞓到咁晏，收到個sms話下午有得樓睇，咁問咗Barry佢都話睇咗先就照落實去睇啦！起身食完早餐就出門口去買餸，買完餸返嚟就出去睇，不過睇嚟都係sai氣，因為佢地唔租比有小朋友，雖然sai氣但都學到嘢，原來租比細路業主要比多啲保險，所以先唔租！返屋企要摺吓衫，睇電視都煮飯，食完梗係繼續睇雪中悍刀行，睇到11點幾老公先肯停！

19/7/24

 19/7/24     FRI     VERY HOT

終於捱到最後一日有學生返的日子，好在今日都係輕鬆過，movie time完就小息，跟住去assembly ，我地都係坐吓，等到12點學生走得，我就自己喺staff room hea吓先！12點半去sixth form room，第一時間擺嘢食先，跟住就say goodbye，今年太多老師走，講咗好耐呀，今日又熱喎，焗死人啦，1點9終於走得！快啲返去食嘢！唔洗揍仲仲放學，條友病咗，琴晚已經係咁，半夜又喊醒，比佢玩死！食完嘢全個下午都做蟲蟲，睇雪中悍刀行，睇到老公佢地要出去踢波，就同仲仲簡單煮粥食就算，等老公買宵夜！

18/7/24

 18/7/24    THU     HOT

今日繼續好悠閒，好事，學期尾係應該咁！今日啲堂都係閒住過，除咗英文仲好似講書咁，不過都唔關我事，我繼續可以打機時打機，唔可以時就睇書，一日都好快過，準時收工揍仲仲，問埋佢班主任下星期運動會係咪照常返放，我都要知道先可以安排！放學時仲仲話佢咳同喉嚨痛，都要返去食藥架啦，快啲好番呀！老公返嚟整埋個牛腩就揍子元去踢波，仲仲嘔咗一次，佢樣樣都特別誇張！8點幾食嘢先唔等啦！

17/7/24

 17/7/24    WED     HOT

今日都係好閒啦，其實都最後兩日返學，仲要上堂真係好奇怪，我今日都真係好閒，睇哂第一冊步步啦，仲打咗好多機，又代吓飯更咁，放學準時收工接仲仲，返去食啲嘢等老公返嚟就出去中超同costco買嘢，一買就9點先返到，買埋costco嘢食返去食完就沖涼！

16/7/24

 16/7/24     TUE     WARM

今日都係輕鬆啦，跟出跟入頂吓飯更咁，閒到睇咗大半本書打咗好多機！閒到都冇咩好寫咁又收工！揍埋仲仲返去倒完垃圾可以食嘢，然後梗係睇電視，豬一樣的生活！夠鐘就煮飯摺衫等仲仲踢完返嚟，食完睇雪中悍刀行，又要沖涼休息！

15/7/24

 15/7/24     MON     RAIN

今日工作都係好輕鬆架，只係我個人本身攰，就覺得好攰！跟Daisy基本上都係輕鬆，跟出跟入啫！又可以自己控制放飯時間，仲可以放個長lunch，唔錯！放學準時走人，揍埋仲仲返去先整咗雞腿先，因為佢兩個去球場，老公返來接我去超市買餸，再去球場會合，老公一落車不久就落大雨，一路落到夜晚呢！返去快手煮飯食休息啦！

14/7/24

 14/7/24     SUN     HOT

今日可以自然醒，起身本來快食咗個早餐就出去買餸，但最終都冇出去買餸，咁就做清潔啦，因為下午有活動，本身諗住跟住子元去打羽毛球，但老公話仲仲球會有party，仲要係BBQ，結果我都係選擇去party，都幾好玩，不過如果我一早知會帶埋地墊去坐就唔洗企幾個鐘！6點幾走啦，要返去煮飯沖涼準備睇波，可惜……英格蘭輸咗比西班牙！冇法啦人地真係太勁！明天繼續正常返工返學！

13/7/24

 13/7/24     SAT     WARM

今朝7點就起身，因為子元去Maidstone踢波，因為要揸兩個鐘左右車，原來都唔算近！去到直去球場，冇啲餓，好在搵到間士多，買啲嘢食頂住先，跟住邊睇邊打機，點幾鐘走得，去Maidstone市中心，睇吓當初諗住落腳點，更加覺得而家選擇啱！泊好車去食嘢先，之前search過冇間泰國菜，近近地就去試吓，估唔到好好食！食完去市中心行吓，冇咩好行唯有行個圈打個卡就走，返到去都差不多7點，又推吓咁差不多9點先食嘢，繼續睇雪中悍刀行，又11點幾先沖涼！

12/7/24

 12/7/24     FRI     WARM*

今日終於捱到星期五, 唔知點解今個星期過得好慢咁! 朝早我仲發咗場大脾氣, 都係仲爺點火, 駁咀駁舌, 加埋我情緒仲未回復得哂, 直情係大叫大跳, 出門口嗰吓樓下仲問我有冇事, 不過發咗嗰道火出嚟又真係舒服咗好多, 只係仲爺受罪, 冇法啦佢自投羅網咁! 返到去都係要開工, 好在今日唔係正常上堂日, 行草地同喺課室嗰啲, 但佢個班主任都係嚴厲, 有兩堂課室的都請咗佢走, 其實都搞著我, 但我見佢平時都幾好人就算啦! 好在係今日有飯開, 唔洗捱餓先, 到啲學生放哂學, 我就要返去寫嘢, 寫番哂條八婆做咗啲咩衰嘢, 都好有啲嘢做吓, 話哂仲有一個鐘先走得! 放工去藥房攞埋藥就返去食嘢, 跟住都係摺吓衫睇吓電視咁啦! 仲仲踢完波返嚟, 都冇特別煮飯啦, 下午茶食得飽就唔煮啦, 幾好呀方便!

11/7/24

 11/7/24     THU     WARM

今日都係咁返工啦，記錯咗今日係星期五，痴痴地！不過唔係好想講今日，主要都係狂比人冇禮貌，最後放工時真係忍唔住流淚，太委屈！講番揍咗仲仲返屋企，忍唔住要吸塵清潔埋條樓梯，舒服哂！等仲仲睇完電視我就可以用，因為要摺衫又想等埋老公一齊先睇雪中悍刀行，所以開套舊劇嚟睇！冇等埋佢地就食啦，子元踢波9點多都未返！睇咗一陣套劇都要沖涼休息！

10/7/24

 10/7/24     WED     WARM

今日學校sports day，其實都唔係好關我事，我只係想好好睇吓書或者打吓機，但都唔算打咗好耐，一來有啲環節又係要全班出去，二來喺課室又要做PR傾偈，邊有得打！最慘係要等啲學生走哂先有飯開，餓死我！好係放工準時走，接埋仲仲返嚟，睇咗雪中悍刀行先，老公都早啲準備晚餐，8點要貝英格蘭大戰荷蘭，今次唔洗加時，最尾一分鐘入波咁就入決賽！

9/7/24

 9/7/24     TUE     RAIN

又係落雨的一天，好在放學先嚟大雨啫！今日工作上都冇咩特別，好好開工又打吓機咁，把握時間約埋carlie佢地見面，難得Stella都有返去，咁就一齊見面食飯！放學本身都未大雨，但接咗 仲仲又係差條直路，又濕到淋，仲要倒垃圾，唯有換件朝乾衫再倒！之後終於可以整嘢食休息，開咗新劇追嘛，都係張若昀做主角，真係好好睇！結果又十點幾先沖涼！

8/7/24

 8/7/24     MON     WARM

今日又要開工，出門口有啲遲，啱啱好趕得切，都係正常week B咁開工，冇咩特別！係數學堂時教番老師計數，見佢地成日用啲蠢方法真係好睇唔過眼！除咗個學生比較多嘢講，其實還可以！準時放學接仲，返嚟食啲嘢子元就要揍仲仲去球場，我就可做吓蟲蟲休息，都要準備晚飯！又睇哂慶餘年2，諗住開套都係張若昀做男主角的！

7/7/24

 7/7/24    SUN     RAIN

今朝老公同子元去咗踢波，咁我就同仲仲食早餐再做清潔，搞掂哂就同阿媽傾埋電話，然後食午餐，都係叫咗外賣啦，但都係好唔抵架啦，都要叫少啲！之後全程都係攤喺梳化睇慶餘年，除咗冇摺衫囉！晚飯煮肉醬意粉就算啦，食完沖涼都11點囉！

6/7/24

 6/7/24    SAT     RAIN

今日又落雨又天晴咁，所以都冇咩計劃，瞓醒食完早餐，就出去買咖啡順手買埋餸先返屋企，返到去老公諗住整陣後園又落雨，唯有放棄，整定嘢食睇波，今晚又英格蘭又荷蘭，好忙！最終佢兩個勝出，下場對戰！

5/7/24

 5/7/24     FRI     RAIN

今日返放學都落雨, 真係好可惡, 好在返學嗰轉都唔算太大雨, 返到去個學生冇返, 咁我就唯有炒散, 我都幾鍾意炒散, 因為真係好hea, 仲可以選去邊班, 梗係選啲冇咁辛苦架啦! 自己選啱時間放飯, 可以食耐啲, 仲打埋電話去問藥房攞藥! 下星期就有得攞! 放學可以準時返去啦, 不過臨尾好大雨, 返到屋企時濕哂! 換好衫食嘢, 不過老公今日幫我叫嗰個泰式炒河唔好食, 但我都已經食得好飽, 所以晚飯大家都係各自肚餓先煮麵食, 因為要睇波嘛, 可惜葡萄牙輸咗十二碼, 出局了! 睇完沖涼啦, 已經10點幾11點!

4/7/24

 4/7/24     THU     WARM

今日終於又可以輕鬆, 子元朝早要去另一間sixth form試堂, 比面都去吓啦, 但7點幾就出咗門口, 個幾鐘先到實在太誇! 我返到去開工都係輕輕鬆, 跟Daisy冇咩事, 只係佢有數學測驗, 要去另一個房測, 原來係因為佢因為測驗緊張會係咁發聲, 測一堂都唔止, 放完飯英文堂都要繼續, 佢數學麻麻, 好在我都仲還可以, 係有一兩題唔識, 因為平時都冇上堂鬼識咩, 但都叫做幫到手啦! 放學又可以準時啦, 揍咗仲仲返去, 都係食嘢呀睇電視咁, 跟住老公揍子元去踢波, 我就要預備晚飯, 佢地返得嚟都差不多9點, 所以食得嚟好晏啦! 

3/7/24

 3/7/24     WED     RAIN

今日竟然落雨, 好在我都係跟個簡單學生, 都唔算話好難搞, 佢第一堂又未返, 同事叫我照跟佢時間表, 咁啱又係自修堂, 我就咁hea咗一堂, 都唔係冇做嘢, 咁梗係做自己嘢啦, 反正已買機票, 咁梗係plan吓行程約吓人啦, 再諗吓有咩要買有咩要食咁, 等自己開心吓啦! 第二堂佢返咗咁就要去上堂, 但都係上hea數學老師堂, 絕對係唔多洗做, 反正教咗佢都唔明架啦! 總之今日都係輕鬆架啦, 準時收工去超市, 仲仲after school club, 慢慢先去揍佢, 返到嚟都係做好啲嘢休息吓仲要摺衫啦, 跟住又要預備晚餐, 整好咗等老公煮, 我就終於可以繼續煲慶餘年, 第二季已經睇到十幾集, 原來有時真係睇一次唔夠明白, 係需要再睇! 睇到9點幾沖涼, 咁都仲有時間用吓電腦!

2/7/24

 2/7/24     TUE     COOL

琴日輕鬆完, 今日要還啦, 朝早原來都幾凍但出咗門口先覺得, 冇得攞番件衫, 局住頂住冷! 返到去知到跟顛妹, 又係攰攰的一天啦, 其實可以唔理時我係唔會想管佢架, 都係做樣比人睇啫, 但都要做架! 大致上又唔係話咁辛苦, 但總之都要做囉! 好在係準時收到工揍仔放學, 因為今日子元幫唔到我接! 接完仲仲返去倒埋少少垃圾就可以煮麵食, 然後休息! 仲仲今日又要踢波, 等佢地踢完返嚟8點幾開飯, 又有得睇波咁啦, 搞掂就沖涼休息啦!

1/7/24

 1/7/24     MON     HOT

今日又要返工啦, 朝早瞓醒都唔係好夠, 因為臨天光先嚟發夢, 好在今日返到去個學生原來冇返, 咁某程度上都係hea住做, 非常好! 頭兩堂, 叫做真係有做吓嘢, 之後都係坐吓睇吓書, 食飯又可以食耐啲, 真係好難得! 最尾嗰堂仲要係OS, 完全係自己用電腦時間, 仲可以早啲走去埋個廁所先行人, 接埋仲仲返去, 梗係休息同睇電視時間, 子元又要揍仲仲去球場, 我今日都冇咩hea呀, 摺咗衫乾埋衫就再要預備晚餐, 因為老公做接送我就要做煮飯!