31/10/24 THU WARM
今朝仲未決定跟唔跟子元去打羽毛球, 咁又一早醒咗就算啦, 跟埋去! 不過太趕出去連咖啡都沖唔切, 所以好辛苦呀, 好在等埋holly佢地嚟到, 開始咗打波就好啲, 仲仲真係未打過, 佢條友以為自己一打就識, 邊有可能呀, 所以都係比佢落場打咗一陣咁大把, 過吓隱就算! 仲爺之後又要打籃球, 咁就打到差不多10點再撘車返去, 因為肚餓就直接食埋午餐, 眼闊肚窄整多咗, 我食唔哂! 同仲爺做埋學習嘢就睇黑白大廚, 然後又要同仲爺打機, 到5點幾6點老公返咗嚟, 啲人又開始萬聖節嚟攞糖, 咁我都同仲爺出去攞糖, 今次踩埋車去遠啲攞, 玩吓玩吓玩咗一個鐘都幾攰! 返到嚟差不多有飯食, 我地仲踩埋去Barry屋企探吓佢呢! 食完飯睇電視到10點幾先沖涼瞓!
25/10/24 FRI WARM
返埋今日就放term break啦, 本來今日都好地地, 朝早出門口仲仲又搵唔到件風褸, 應該琴日漏咗喺球場啦, 都冇法...放學先算! 要風褸係因為今日佢地有netball比賽, 要嚟我學校打呢, 都幾期待, 諗住可以去睇吓佢, 但其實都唔係好方便, 不過最終都睇咗一陣, 亦都有過去同佢打招呼! 本來今日只係要做cover, 應該輕輕鬆, 但嗰啲高級少少的又喺到大石X死蟹, 要我跟條EP行咗大半個鐘! 係好唔like, 但又可以點呢, 佢根本唔比你選擇! 放學一收得工就走人, 好在唔洗揍仲仲, 因為突然落大雨, 返到去濕哂! 食完tea就開始hea, 因為仲仲會去練波, 會買麥當勞返嚟食, 咁就好好休息吓!
24/10/24 THU WARM
今日返工諗住都有排辛苦, 點知有驚喜喎, 今日啱啱改咗跟Emily的做法, agent cover我地同事各3堂, 佢自己再頂兩堂, 我仲更加好彩, 因為第一堂開始冇幾耐佢就比個主任帶咗入房, 坐咗半個鐘有多先走, 都算係咁, 但佢走嗰時都真係走得幾快, 我試過追但當然追唔到, 好在第二堂有人接更啦, 咁我梗係去番我個學生到, 雖然佢唔算易搞, 但都仲控制到! 自我控制食飯時間, 但一日總係過得好耐, 幾辛苦先捱到放學咁, 快啲接咗仲仲返屋企食啲嘢, 又要揍佢去踢波, 今次夠近可以踩車, 去到又要等佢踢完, 由於cafe啲薯條太香, 老公又未食嘢, 咁就食咗兩個餐, 晚餐可以食少啲!
22/10/24 TUE COLD
今日都係如常返工返學, 唔算有咩特別事, 冇特別先係好事, 係放飯冇人嚟頂搞到我上堂時個肚係到叫, 幾尷尬! 好在係我個學生今日同大姐有meeting, 咁我問佢你地meeting時我可以放飯先嘛, 咁先有得食飯咋, 最尾嗰堂行行企企咁都可以, 但跟EP嗰個同事就冇咁好彩, 又喊住返嚟, 睇埋明天個同事點先, 配合吓我星期四場戲要點演! 因為星期四到我啦, 睇吓有冇咁好彩佢唔返我唔洗跟佢啦! 放學揍咗我仲仲就返嚟倒咗垃圾先, 然後跟吓仲爺同子元啲公務, 又email又message 咁, 仲要對吓仲仲啲數, 原來好多日冇同佢對啦, 改正都有排做! 跟住煮個麵老公返嚟食咗仲仲佢去踢波, 我就準備定晚飯然後去慕道班, 但今晚勁少人囉頂! 終於完得返嚟食晚飯然後快啲洗埋碗沖涼休息啦!
19/10/24 SAT WARM
今朝瞓到10點先知醒, 難得呀! 約咗Barry佢地去Costco, 所以食埋早餐就出發, 先去買咗咖啡, 再去Costco, 塞吓車咁都差不多1點先到, 佢地都大開眼界, 因為地方又大啲嘢又大份, 慢慢行吓行吓咁都咗個幾鐘, 叫佢地買埋保暖衣, 最終買埋午餐就走啦, 塞滿車呀要佢地抬住啲廁紙先夠擺! 返到屋企食埋嘢佢地就去踢波, 我就留喺屋企做家務, 7點幾諗住出門口whatsapps比老公, 先知原來佢地唔知點解仲踢緊, 結果等佢地踢完我先出門口, 但原來咁夜渣嗰條路咁黑都好難渣! 去到等咗一陣先見佢地, 問咗意大利餐廳仲有得食咁就入去啦, 都係各自叫意粉再叫Pizza share! 最好笑係其中一個工作人員原來係細佬同學個爸爸, 最後平咗20鎊比我地, 所以識人好過識字, 最後去埋食甜品先返去!
18/10/24 FRI COLD
今朝都係咁返工返學啦, 頭兩堂都OK照跟番平時個學生上堂, 又PE又英文咁其實都又攰又悶, 諗住第三堂做吓cover然後就係可以食番個輕鬆飯啦, 點知個agent話跟Emily跟唔掂, 咁竟然要轉人, 點解又係我呢, 最後我又行咗差不多個鐘啦, 放完飯都要再行呀, 好在1:30可以跟番我個學生, 咁真係可以休息啦, 去圖書館坐吓咁, 上埋最尾嗰堂收得工, 星期五係老公接仲仲架嘛, 點知返到屋企咩人都唔見喎, 咁咪睇吓GPS囉, 見到老公同子元應該去緊球場方向, 咁就問子元仲仲去咗邊, 好在過咗一陣聽到有人按門鐘, 原來老公喺教堂會合咗佢之後因為時間關係叫咗佢自己行返嚟, 我都冇咩好講啦! 食咗外賣就hea, 仲仲踢6-8, 所以晚飯又外賣麥當當就算! 我開咗walking dead嚟睇, 又停唔到啦!
14/10/24 MON RAIN
今日係結婚18週年, 咁就18年啦, 好似真係好快咁! 我啲豬頭們都咁大囉! 不過今日冇咩慶祝, 咁又返工又落雨, 都冇咩地方好去, 最終只係叫咗外賣甜品就算慶祝, 我其實都覺得夠! 講番朝早, 又落住雨咁返工, 返到去發現我個學生唔喺到, 最終佢係冇返的, 咁被安排了跟失蹤女, 佢終於都返咗嚟, 咁跟完第一堂就去第二堂個agent到等佢做第二堂, 舒服地過咗一堂啦, 放break咪返番去大房準備食嘢去廁所同夾吓跟住做cover的人, 點知飯筒突然衝入嚟話點解冇人跟住失蹤女, 頂佢呀, 就係因為佢咁, 我由11點一路跟到佢1點, 足足兩個鐘呀, 佢係咁小我惡言相向咁, 我勁唔滿意囉, 點解係我去跟, 若果一個人就可以跟哂全日, 咁之前我地就唔洗每人頂一堂啦, 我覺得佢地都係想迫到個學生去到無藥可救就可以踢佢出校, 但就搞著我啦, 捱到1點可以食飯啦, 食完都擺唔切個飯盒, 點知企咗10分鐘, 突然飯筒同訓導主任嚟捉佢走, 原因我估係佢同啱啱嚟同佢吹完水個學生講咗佢cut手, 咁個學生報串, 所以佢地就嚟捉人, 最慘係我又要跟埋去, 好在企咗一陣訓導主任就叫我走, 嚇死我! 咁聽到佢話要suspense佢兩日, 唔知真係趕佢走定只係唔比佢返兩日, 反正我呢一刻係放監, 提早閃人, 本身約咗3點去仲仲學校, 因為要見班主任, 佢要target planning, 極速去超市買埋蛋返屋企放低先去學校, 啱啱好! 去到主要講佢上堂唔專心點搞, 跟住就係去接佢放學囉, 返屋企快手食啲嘢先出門口, 仲仲要去踢波嘛! 晚飯食完就食埋甜品, 沖涼休息!
12/10/24 SAT WARM
今日約左Barry佢地要帶佢地行超市, 但因為時間關係, 10點幾去接佢地, 去唔到太多地方, 咁就先去咗超市, 去番平時我地去開的, 陪佢地一齊買又買多咗啦, 先返去擺低啲嘢, 跟住就再去Broadway, 食咗嘢先再快手買埋今晚邊爐嘢, 我又帶佢地行埋藥房等等, 跟住都要車佢地返去, 因為老公要帶子元仲仲去練波, 而我就要收拾吓間屋, 摺埋啲衫再預備邊爐! 7點幾佢地嚟到就可以食住吹吓水, 但佢地個仔都真係幾難搞, ADHD原來真身係咁, 佢都要諗住邊啲學校先係最適合, 到10點幾我有少少下逐客令咁, 因為仲爺話真係頂唔順佢個仔好嘈又係咁搞佢啲嘢! 等佢地走咗我先可以沖涼休息呢!
10/10/24 THU COLD
今日凍咗好多, 天氣報告話10度都唔夠, 所以都係著番多一件好啲! 返到去冇咩特別, 照跟更表做, 但其實最唔願做係今日, 因為個學生係最乞人憎, 有兩堂要做cover我係勁樂意架, 可以行行企企就最好! 撞到holly又吹咗陣水, 勁唔想入番課室, 走咗去同letty佢地傾咗陣, 都係要開工, 捱到最尾嗰堂ART, 佢地嗰本身已經唔多合作, 嗰個老師就過隔離叫咗二姐過嚟, 帶走咗幾件煩友, 我就梗係唔跟埋過去, 為咗要準時收工嘛, 接埋仲仲去超市買餸先返屋企, 食嘢先緊要啲, 仲仲去咗踢波我就預備晚餐料, 仲爺想食焗豬扒飯就有得食, 開心得佢呢!
8/10/24 TUE RAIN
今朝返到去, 明明係跟開個學生, 但應該又唔夠人, 所以調咗我去做year 7, 不過都冇所謂, 都係咁做, 有時有啲變化都冇咁悶, 不過就唔好好似今日個天氣咁, 時晴時雨到一個點, 好在我有water proof唔係實死! 今日基本上都真係幾攰, 又要做埋飯更! 最breaking news係今日我睇緊FB, 見到喺地區group又post missing kid, 竟然就係我地成日要跟的遊蕩生, 今次唔知會發生成點啦! 終於捱到放學快啲走人去揍仲仲, 渣到去Lidl時竟然見到今日啱啱落機的Barry一家, 咁都撞到點都要一齊行, 先去接咗仲爺再上嚟坐吓, 因為佢地要借埋個煲去用, 搞笑! 結果我返到嚟好忙咁先要倒垃圾再同佢地吹水, 最後等老公返嚟揍仲仲去踢波時先順手車佢地返去! 我先有時間整餸, 今日都真係夠哂攰, 因為我仲要去返教堂, 體力透支!
7/10/24 MON COOL
今日本來好地地, 工作都唔太難, 但第一堂要跟遊蕩生周圍行唔易, 又唔可以比佢發現係你跟佢, 又要知道佢喺邊, 不過我係enjoy呢個遊戲, 好過唔知去邊坐喺個課室吽, 咁我個學生10點返, 我還咗玩到9:55就算, 一路都好順利直到臨尾, 見到飯筒應該捉咗佢個同伴, 佢就開始發現我, 咁我見時間都差不多, 確認咗佢大概喺邊就算, 去接我個學生, 點知行番去日本花園時, 飯筒捉住我又喺到擺款, 叫我要跟貼佢呀同佢講嘢呀等等, 又話最尾10分鐘唔見咗你, 我都駁駁地嘴架啦, 但都係盡量答佢OK就算, 不過心底都係火, 心諗你而家唔係我老細呀, 關你叉事咩小你! 跟住今日都係如常開工同埋悶啦, 準時放工接仲仲, 我仲早過佢去到教堂呢! 條友掛住吹水咁慢! 返去食完嘢就揍佢去球場, 返嚟又要準備晚飯嘢, 又要摺衫等等! 老公回來煮埋個雞煲就食飯, 之後hea吓睇埋電視沖涼休息!
3/10/24 THU COLD
今日出咗門口先覺得凍, 明天都係著多啲衫穩陣! 返到去照樣開工啦, 今日都算還可以啦, 都係咁多嘢上, 不過都有時間睇吓書都係好事, 都遲咗放飯架啦, 不過有得食都好好架啦! 放學亦都準時, 去到接仲爺發現唔見佢喺教堂門口等, 以為佢跑步比賽完仲未返, 入咗學校搵佢又唔見, 佢班主任就同我去reception打電話比Lucas媽媽, 因為我話佢會一齊等, 就喺佢打到比佢時, 我就見佢地三個行緊返嚟, 應該係仲爺聽到我話今日會去超市買餸, 佢就一齊行咗去嗰頭等, 真係比佢激死! 最緊要冇事! 去買完餸就返去啦, 簡單預今晚煮粟米肉粒, 老公揍仲爺去踢完波返嚟煮!
