28/2/25

 28/2/25     FRI     COLD

到星期五啦，今日仍是過得唔錯！朝早聽完Do姐介紹新劇，因為1030先仲爺見家長，所以揍咗佢返學就馬上煲劇，結果放工返嚟一日煲哂，痴線！1130返到去都係抄散，不過頂飯更時個老師好廢，又管唔掂學生都算，淨係掛住打電郵打sims，都唔知佢搞咩差不多20分鐘都係得個題目，反而Ellie自己攞書做notes，我咪派哂書比啲學生做囉！放學去攞埋藥就返屋企，食嘢追劇，結果追到11點幾，太過份！

27/2/25

 27/2/25     THU     COOL

今日輕鬆到好悶！本身個學生殽，轉咗個唔難但成日都周圍行，所以我好攰，PE堂又行咗一堂，夠哂運動！好在可放番個長lunch同準時走！接咗仲仲放學返到去就煮麵食，餓呀！仲仲做埋每日練習就自由，等佢去咗踢波，我摺埋衫就煮飯，食完6睇埋祓魔先沖涼！

26/2/25

 26/2/25     WED     RAIN

今日又落咗一日雨，好在返放工都冇落，所以只係喺學校時要淋吓雨，今日個學生又開始放肆，由得佢啦，我見阿姐都係任得佢我就算，總之無驚無險又到3點就得，放學買埋蛋同奶返屋企先再去接仲仲，今日開始仲爺行新時間表，好好做吓英文同數啦，摺完衫我又要煮飯，好攰！

25/2/25

 25/2/25     TUE     COLD

今日又凍番啲, 朝早又要早起身, 仲仲要補課, 所以又係揍咗佢去學校就返屋企倒垃圾, 然後趕返工, 今日都算正常, 冇大事發生, 叫做順利放工咁啦, 又唔算太攰! 返到嚟先開始攰, 所以冇捉仲爺再做嘢, 食完嘢等老公返嚟揍佢去練波, 我就預備好飯餸再要去教會, 係有啲悶但都捱過咗, 8點半有多先走人, 返到嚟啱啱好食得飯, 食完都係洗碗沖涼休息啦, 返工的日子就係咁悶悶地! 

24/2/25

 24/2/25     MON     RAIN

又要返工啦，都要習慣吓又要開工的日子！揍咗仲仲就返工啦，落住雨都有啲趕，返去照常開工，chill住咁做好好對自己！所以今日都算易過，放飯時放飯，頂更時頂更，夠鐘就收工，轉個灣就到屋企時GP先打嚟我又聽切，唯有等佢再打嚟！返去食啲嘢又要出門口去球場，今日竟然車駁車勁快到！掛住打機7點多先煮飯食，都差不多，食完睇埋祓魔先洗碗沖涼！

23/2/25

 23/2/25     SUN     WIND

今日冇咩寫因為冇咩做，起身佢地已經出哂去練波，我煮早餐時已經返！食完同仲仲對埋份英文先，再教埋佢點做卷跟住就再清潔！仲仲點幾出咗去生日會，玩到8點喎，是但啦，咁我做完清潔就無所事事咗一日，老公基本上煮哂兩餐！接完仲仲返嚟食晚飯洗碗沖涼休息，明天返學啦！

22/2/25

 22/2/25     SAT     WARM

今朝起身都係梳洗煮早餐，食完趕仲爺做英文卷，我地就出咗去買餸，條友做咁耐都未完，算啦我冇片佢，一齊努力！差不多4點要出門口，過Stella新屋，子元一早約咗朋友出去玩，唔洗理佢！塞車過到去都5點有多，細路就打機，我地先room tour，新裝但佢哋覺得好多不足，仲要早兩星期比人爆格，陰公！賊人都好識搵食，新裝實有錢，仲要咁大工程！吹水食吓嘢咁，10點就走，啲細路要瞓！

21/2/25

 21/2/25     FRI     RAIN

今日基本上冇出過街, 過得好無聊, 算啦term break應該係咁過! 今日開咗電腦就開咗一日, 過吓相咁, 本身係諗住上網攞藥, 但上GP又話冇, 打咗去問又要等下星期一再覆, 是但啦都冇辦法! 仲爺有波練, 老公揍咗佢去, 我就繼續喺屋企hea吓, 等佢地返嚟就焗咗Pizza食, 到5點幾子元突然話原來今日要教波, 捉咗老公起身車佢去球場, 我就到咁上吓要煮飯, 食完飯打機打到停唔到手, 搞到又夜哂沖涼!

20/2/25

 20/2/25      THU     RAIN

今朝要揍仲仲去試腳football camp，9點半放低佢就去食早餐再去藥房買埋嘢，返屋企都12點幾，又同老公一齊煲劇，今次開咗viu套原創劇睇，二次元好睇，期間只係各自煮麫食，煲到2點幾要去揍仲，接咗佢，條友原來今日冇戴con，又打爛咗個眼鏡，馬上去broadway即配個框，買埋嘢食再買埋星期六去生日會份禮物回程！返嚟仲要同佢洗鞋洗衫，條友沖涼時走去玩個香紛爉燭，用廁所去點個火，再將燒焦咗嘅廁紙掉廁所，重點係我發現但佢唔認，咪比我地片餐死，呢啲邊有得唔認，激死！幾時先學識唔講大話！早啲煮飯因為肚餓，最終煲哂套劇到最新嗰集，好痴線但超好睇！

19/2/26

 19/2/26     WED     COLD

今日醒咗就自己起身煮早餐食完打機，完全冇動力，等佢地肯起身，12點前又要車仲仲去同學仔屋企玩，再去郵局寄埋老公超速張嘢就返屋企，幾個鐘就只係倉粥同睇射鵰，追咗幾集終於追淨一集！接完佢返嚟老公又瞓，我又開始自尋短見咁要仲爺做收，換嚟咪唔知死幾多細胞囉！

18/2/25

 18/2/25     TUE     COLD

今朝瞓到9 點幾先醒，到起身煮得早餐嚟都11點幾，要叫仲仲做數，佢今日最終都冇跟時間表做嘢，只係做咗SAats但完全唔掂，佢啲數學基礎廢，希望呢三個月教得到！午餐快食個麫就出去，本來諗住帶佢去掝隻bb牙，但去到差不多動刀先話佢地未有政府比錢，若要整就要自付£90，咁梗係唔拔住，等吓先唔通比錢！回得程都4點幾，咁又冇咗一日！

17/2/25

 17/2/25     MON     COLD+

今日仲爺要賓仔比賽，基本上全日比咗佢，好攰！朝早醒咗見老公仲喺床，佢話唔舒服請假，唔知點解明明t預term break得我地喺屋企，突然佢又喺到，好似唔知點咁，破壞咗本身setting，佢喺到但又唔係幫手你仲要處理埋佢！食咗早餐出去，撘巴士啱啱好咋時間，去到等咗陣放咗佢比教練就行咗上teki食拉麵，再買咗飯團比仲爺踢完波食，來回行咗一個鐘，睇佢踢又企咗兩個鐘，回程已經好凍又要等巴士，上車我真係瞓咗陣，好攰！返嚟食啲嘢，我要休息，休到7點要煮飯啦，又係睇射鵰到10點幾先沖涼啦！

16/2/25

 16/2/25     SUN     COLD

今日冇出過街，只係起身食早做家務，同阿媽傾完電話，陪仲爺玩完Lego就煮午餐，都係食琴日淨咗嗰啲，然後就到老公睇波，曼聯又輸！跟住開咗套戲睇，到8 點幾先煮番琴晚啲餸又一餐，勁！再睇射鵰到10點幾先沖涼！

15/2/25

 15/2/25     SAT     COLD RAIN

今日係阿May佢地過嚟玩, 上次去完佢嗰到, 今次到過嚟我地呢邊, 終於張家都肯一齊出嚟, 算係難得, 約咗兩點喺central London食日本嘢, 但朝早我地都好忙, 仲爺又激我又鬧情緒咁, 我由得佢自己梳理吓, 要長大就係要咁冇得幫! 食完早餐咪執好屋先, 仲要摺埋啲衫, 今晚佢地嚟都要簡單收拾吓! 老公揍完子元做gym返嚟就快手繼續整食物, 整到1點真係要出門口, 估唔到又咁塞車, 真係個幾鐘先到, 明明只係半個鐘路程! 2點幾去到, 食嘢都食咗個幾鐘, 咁呢間日本嘢都幾好食! 食完就去Notting Hill書店打卡, 都幾好玩, 周圍好多攤位, 回程就去咗tenpin篤波同玩食錢樂園! 到7點幾先返嚟屋企, 煮嘢食都煮咗好耐, 9點先開到飯, 但都OK的, 最終食吓蛋糕等啲大打埋啤牌, 12點先散場!

14/2/25

 14/2/25     FRI     COLD

終於捱到term break前最後一個工作天，朝早照揍細佬返學，不過就子元接佢放，因為佢今日放早，好在子元已放假，等佢搞掂！今日大致都係咁，到放工計劃中老公嚟接我，但佢去咗老遠攞蛋糕，結果差不多4點先嚟到，好塞車，先去買咗牛腩同牛扒，返屋企放低嘢再去中超同超市，野外定向咁先搵到唔塞車，買齊接埋子元先返屋企已經7點幾，馬上整嘢食同摺衫，大牛扒有啲難咀嚼，但都好味，洗完嘢沖涼，已經唔早，仲仲叫極都未瞓，結果比我地訓話咗一大輪，唔係鬧佢係教佢，加埋唐僧子元一齊教，應該有效掛！

13/2/25

 13/2/25     THU     COLD

今日都算過得舒服，辛苦咗咁耐，都要比啲舒服我先得！除咗平時個學生，仲要去唔同班帶啲學生去speech and language ，可以出去行吓！放學接埋仲返去，又要出去買通渠水同奶，返嚟食完浬可以休息吓，晚飯主力得隻雞，加啲菜同腸仔就得！

12/2/25

 12/2/25     WED     COLD

今日照常開工啦，只係有得早走，仲仲今日早放，所以我都要請假！心情都特別愉快！不過發生咗另一樣嘢就唔太愉快，就係下層個廁所塞咗，老公返嚟要慢慢搞，希望明天冇事！放工接埋仲仲買埋餸先返去，食完嘢就開始hea，不過我都摺咗三機衫，到7點多真係要煮飯，我預備就老公煮！

11/2/25

 11/2/25     TUE     COLD

今日冇落雨啦，朝早又要揍仲仲去補課，但真係太趕，朝早倒唔切垃圾，唯有放學返嚟先倒！返到去照常開工，都係咁架啦，盡人事啦！放飯時就好好休息，夠鐘就準時收工，揍咗仲仲就返去煮嘢食做吓蟲蟲，差不多時間先煮飯，食完沖涼休息！

10/2/25

 10/2/25     MON     RAIN

又要返工啦，都係激氣架啦，但都唔會令自已嬲，寫衰佢咪得囉，我緊張飯桶會唔會嚟上英文堂多啲，最尾嗰堂見喺代課，即刻輕鬆哂，夠鐘我就自我放工，接咗仲爺返去食啲嘢又要出去踢波，幾經辛苦先返到屋企，勁塞車！返嚟一陣都要煮飯，食完繼續睇射鵰，今日唔可以睇到咁夜，明天要早起！

9/2/25

 9/2/25     SUN     COLD

今日主要任務係去教堂浦吓頭同填埋個領洗文件，跟住去B&Q買埋嘢就返屋企做家務，咁就大半日啦！做好嘢諗住煮啲嘢食，點知老公又話叫咗外賣，又喺到亂洗錢！食得咁飽晚飯又食唔哂，不過可以留番明天，射鵰又睇到唔想停，但要沖涼啦，明天要返工！

8/2/25

 8/2/25     SAT     COLD

今日都冇咩特別，起身後老公趕住出去接子元再去練波，所以我自己煮早餐，仲要執屋，琴晚食完嘢冇人執，亂到呢！食完早餐清潔咗個廚房，實在太黑，要漂白一次，做就就摺衫，老公返嚟整完嘢食就出去買餸，佢話好凍要打邊爐，咁就去咗天天買料！返去都要準備，早啲打，慢慢打！之後又睇劇睇到11點先沖涼！

7/2/25

 7/2/25     FRI     COLD

今日又凍咗好多啦, 加上仲會落雨, 我都係著番防水裝先! 今日又要上PE, 真係唔多想, 但落雨就肯定唔洗留喺室外都係好事! 基本上今日都係輕鬆順利, 放學又有同事幫手等埋個家長嚟, 我可以準時走, 不過放學時真係太大雨, 落埋冰雨添呀, 真係好需要一個hamlet, 老公話佢幫我買咗啦, 月尾有! 返到嚟快啲換衫, 真係濕哂! 跟住都係打機休息, 咩都冇做, 星期五嘛是休息日! 老公整咗曼魚炒飯, 晚上又買咗麥當勞, 肥死!  

6/2/25

 6/2/25     THU    COLD

今朝出車不利，一左轉由中間路面cut番左，對頭車突然扭軚衝向我地，急煞車後仲仲向前跌，好在唔快都係少跌，但都乞人憎，嚇死人！等天收！返去如常開工，冇咩特別！準時放學接仲仲，返去都冇食嘢，掛住睇番新聞，老公返嚟先煮咗個湯，7點幾先準備煮飯！

5/2/25

 5/2/25     WED     COLD

今日都係要正常開工, 個學生又好似打回原型咁乞人憎, 咁我又繼續做番應該做, 對佢地冇得好啲, 冇好報架! 所以我都係做番本份算了! 點都算係順利收工啦, 雖然今日唔趕揍仲但都想準時走, 返屋企抖到咁上吓就去接佢, 先去超市買多少少肉, 唔係今晚又唔夠食! 接咗仲爺, 佢自供出自己去咗打籃球冇去到補課, 激到我呢, 返到去完全冇啋佢, 嬲到老公返嚟, 講咗佢聽, 然後仲爺勁少有地自己做哂應做的今日功課, 根本就係知做錯咗, 但都係要片佢一餐, 叫咗佢明天返學校同老師講, 自己的錯自己認! 老公煮飯, 我就上網更改埋GP, 登記都要搞一輪呢! 食完飯又掛住睇電視, 10點幾先沖涼!

4/2/25

 4/2/25     TUE     COLD

今朝又要早起身, 仲爺要返boots up class, 咁就順手倒咗垃圾先返工, 第一堂就PE, 真係好唔想, 因為條麻煩妹又返咗, 不過我都盡量唔理佢咁多, PE堂仲話要出去行, 大佬我地已經喺室外啦玩嘢呀! 到第二堂佢話仲係好唔舒服, 最終小息我帶咗佢去reception叫人打電話比佢阿爸嚟接佢走,咁我就可以輕鬆啲, 佢又走得甩我又走得甩, 係佢老豆慘啲啦, 但人地家事我唔理得咁多啦! 之後都係頂轉飯更, 再hea吓咁啦, 因為都有另一個妹要跟, 嗰個易搞好多, 不過佢2點都有appointment走埋, 咁我最尾嗰堂都真係free! 所以可以準時收工, 不過返到屋企食咗嘢反而開始連個胃都唔舒服, 周身痛等等, 完全係作感冒, 真係唔想返教會, 一來又凍二來真係有啲悶, 同埋愈來愈少人返咁, 我不如集中三四月搞埋個領洗佢算啦! 所以食咗藥喺屋企休息, 摺哂啲衫洗好米等老公返嚟煮餸! 

3/2/25

 3/2/25     MON     COLD

今日難得輕鬆工作！返到去諗住都辛苦，點知個學生又冇返，代飯更又唔洗，可以放個長飯，舒服吓！仲有準時收工！接埋仲仲返嚟食啲嘢又出發去球場，遊完車河返嚟又要煮飯，我而家試吓晚餐唔食飯類會唔會好啲！沖完涼仲爺又係叫極都未肯瞓，要我發火唔理佢先識快手咁就冇意思！

2/2/25

 2/2/25     SUN     SUNNY

難得今日咁好太陽，但都係喺屋企，只係出咗去買餸！瞓醒食完早餐，然後出去買咗餸先，返嚟同嫲嫲講埋電話，我就要做清潔，食咗少少嘢，攤抖吓，老公預備晚餐，食洋蔥豬扒飯，睇埋電視沖涼瞓覺！

1/2/25

 1/2/25     SAT     COLD

今朝又發惡夢醒，可惡！但都hea到好遲起身，然後都係出去買餸，直接去costco買就算，咁又個幾鐘，返去食完嘢摺埋衫hea吓，老公揍仲去練波，返嚟先一齊煮晚餐，放假都係無所事事！