30/9/25

 30/9/25     TUE     COOL

今日預算都人跟year 12學生, 但佢早會之後原來有appointment, 咁就係時候睇吓轉咩人, 都係好簽, 因為今日好多學生都冇返! 不過唔知點解突然條腰又痛, 係咩pose都痛, 好在唔係好洗行, 所以都叫做捱到放學! 返到嚟都係做唔到啲咩, 拉咗筋都冇用, 快啲倒完垃圾又要揍仔去踢波, 又睇住架巴士走咗, 等咗25分鐘先再有車陰公! 最後5點半先去到, 老公車返我返嚟貼咗藥膏布好似好咗啲, 但瞓低咗抖又痛過, 煮飯時真係痛到想喊, 但都要做, 煮好飯食完洗碗沖涼!

29/9/25

 29/9/25     MON     COOL

今日真係舒服好多, 所以話跟個學生真係好重要, 今日個year 12仲要有3堂個老師冇返, 咁就全自修, 我就可以好自由啦, 佢做到就做, 做唔到就算架啦, 唔係可以點呀! 仲有就係忙於處理子元所謂家長日, 但最終係見唔到, 明明我book咗架喎, 但唔知點解又冇, 最後安排到但都係冇用,因為又連唔到線, 終於連到又到聽唔到聲, 白廢氣力! lunch時間有驚喜, 有廚餘食, 應該係有啲活動提供午餐食淨, 都好啦, 本身諗住食完飯用個盒嚟, 但點知都好快比人食哂! 最後準時放工返嚟食嘢休息, 仲爺去踢波, 夠鐘就煮飯冇咩特別!

28/9/25

 28/9/25     SUN     COOL

今日到我冇出街, 老公就出咗去一日, 因為仲爺要比賽, 子元就去針炙隻腳, 所以我係起身食完早餐, hea到仲爺返咗嚟先開始做清潔, 但做完家務條腰又痛啦, 可惡! 仲爺就自己煮咗嘢食, 然後就同婆婆嫲嫲視像, 然後我就開始睇電視啦, 係悶架啦, 但星期日就係咁架啦! 老公點幾先到, 我都差不多煮好飯啦, 今日要多菜少肉嘛, 我實冇問題! 食完沖涼休息啦, 明天又要開工!

27/9/25

 27/9/25     SAT     COOL

今日子元要去踢波, 因為去reading踢, 所以食完早餐基本上都出門口, 遇12點多過到去, 睇比賽就一般啦, 老公都有踢, 我就只係等同打機, 重點係好肚餓, 因為踢完都3點, 老公話去附近食真茶餐廳, 真係好好食呀, 好可惜屋企附近冇呢啲嘢! 揍咗佢地返屋企仲要去買餸, 真係好攰呀, 加上食得好飽所以好晏先煮啲簡單嘢食, 老公解凍咗豬頸肉, 加埋魚蛋米超正, 食得嚟睇吓電視沖涼都已經12點!

26/9/25

 26/9/25     FRI     COOL

今日都知難過架啦, 冇諗過咁難過啫, 個學生搞事就遇咗, 本來我一向都已經當冇事, 總之你唔好得寸進尺就算, 但今日真係估唔到係個副校仆街行為令到我咁難受, 明明係個壞學生撞人, 佢當睇唔到之餘仲叫我行埋一邊, 然後被撞個學生再比壞學生啤佢, 佢問佢做咩事, 反而比副校鬧, 我睇住佢眼紅紅咁嘢食都唔買就走咗覺得好難受, 做壞事冇任何後果係咩操作, 我堅難受真係忍唔住要喊! 不過都有暖心收穫, merly同Snow嚟安慰我, snow仲一路跟住我同我傾, 等我分散吓注意, 呢啲真係意外收穫, 不過條壞學生咁跳我都要email比阿姐煮佢一餐先得! 最尾嗰堂佢都係完全失控, 我真係再冇力啦, 老師係好人所以我都想盡力配合佢, 但真係有心無力! 放工時心情都麻麻, 不過返嚟有仲爺呢個開心果就好好多, 反正星期五都係hea, 就好好hea吓啦!

25/9/25

 25/9/25     THU     COOL

今日都係照常咁返工返學啦, 我今日跟個唔洗太辛苦的year 12, 主力係要同佢做功課, 查實佢都冇能力, 都唔知做咩要比佢返嚟讀! 準時放飯可以慢慢食唔洗趕! 最尾嗰堂仲要抄散, 行行企企又收工! 返到去屋企冇人其實原來都幾唔慣, 仲爺after school club踢波差不多5點先自己返到, 子元去咗睇戲, 應該都要7點先返到, 咁我就自己睇電視食嘢, 不過之後仲要摺衫, 跟住仲要煮飯, 又開番啲舊劇嚟睇, 真係幾無聊! 

24/9/25

 24/9/25     WED     COOL

今朝仲爺話要去羽毛球club, 但因為8點開始, 基本上佢早起身我都要處理咗佢, 又要煮咗早餐同帶飯先可以再處理自己! 今日係跟三隻小天使, 仲要PE堂, 我真係夠哂運動! 對住佢地係要keep住比反應, 大佬呀邊有咁好力, 仲要遇埋去廁所等等, 又撞正轉堂時間咁, 我真係攰死! 所以夠鐘我都閃啦理唔到咁多! 返到去食嘢睇電視等等盡情休息先得, 不過都要煮飯等等, 係冇摺衫咁囉! 食完飯就沖涼啦, 今日都有啲攰!

23/9/25

 23/9/25     TUE     COOL

而家仲爺可以自己出門口, 其實都好, 我可以有少少時間唔洗趕! 返到去照常開工啦, 冇咩特別, 跟顛妹只要個老師醒目就唔會太難過! 準時放工係好事! 返到去仲要快手倒垃圾再揍仲仲去踢波, 最搞笑今次到我撞到學生呢, 仲要同一個站落車! 返屋企摺埋衫就要煮飯, 好忙! 

22/9/25

 22/9/25     MON     COOL

今朝子元出門口睇唔到, 原來老公冇交到電話費, 明明之前問咗佢又話交咗, 但根本冇之餘唔知點解佢又唔用網上個系統交反而就咁過數, 頂...原來要5個工作天先過到數, 仲要我打電話去問又艱辛, 搞咁耐都係得個等字, 有時真係燥, 都咁大個人, 咁少嘢都manage唔到, 激死! 好在今日唔算辛苦, 準時收工! 返到去食咗嘢先, 都冇睇仲爺有冇功課, 冇咩心情呀! 佢地出咗去練波, 我就遇番時間煮飯, 食埋糖水先沖涼休息!

21/9/25

 21/9/25     SUN     WARM

今日都係一個無聊的星期日, 朝早兩隻豬走上嚟嘈住哂, 咁都10點多要起身食早餐, 仲爺中午有比賽, 我就襯時間做清潔摺衫等等, 然後咪繼續睇吓電視, 反正晏啲又要睇波, 老公返到嚟整午餐, 食肉絲炒麵, 好好味呀! hea到晚飯要煮啦, 開咗套新劇, 本來都唔特別想睇, 但見到小紅書反嘛即刻想睇! 晚飯後又掛住hea, 差不多11點先沖涼, 沖之前趕咗仲爺去瞓先, 我又唔想煩!

20/9/25

 20/9/25      SAT     WARM

今朝瞓醒hea到10點幾先起身, 食完早餐都11點幾12點, 仲要去攞我張領洗證書, 原來都係就咁print出嚟, 都幾搞笑! 跟住就開始三間超市之行, 一次行三間其實真係幾攰架, 仲要已經控制住唔買咁多但都唔平, 真係生活艱難! 返得屋企都4點, 仲要放好哂啲嘢先食嘢, 跟住就可以睇波啦! 晚餐食羊扒, 喺costco買架都算幾抵食, 食得嚟沖涼都12點, 又要瞓覺!

19/9/25

 19/9/25     FRI     WARM

今日學生就可以遲返, 我地就要同平時一樣, 不過返到嚟我都冇去做啲咩, 借啲二搵個位打吓機好過, 學生返到就開工, 今日跟三隻小天使, 真係好攰架, 不過我覺得用啱咗個方法, 而佢地又冇咩大事, 大致上都係順利的! 準時收工返去食嘢同休息, 真休息呀, 星期五就好攰, 可能平時點都有嘢要做又要諗煮飯, 但星期五真係飯都唔洗煮, 好事! 老公簡單整咗餃子魚蛋粉絲一品窩, 食咗啲嘢就算!

18/9/25

 18/9/25     THU     WARM

今日都有啲忙忙亂咁啦, 唔係我係啲人手, 不過今日啲學生早放, 所以放飯係咪都可以正常食都係好事, 之後就"扮"工啦, 總之唔做唔錯, 做咗又冇獎, 我識架啦! 準時收工先係皇道! 跟住就係返屋企睇吓我隻BB點啦, 今日佢late start, 較哂鬧鐘等佢自己知時間出門口! 返到嚟都係要食啲嘢先揍仲仲出去踢波, 等咗兩架鬼車先有車, 好在都算準時到! 跟住返到去摺埋啲衫, 然後又要出去, 去子元學校聽咩鬼talk, 條友仔問咗話佢可以唔洗去, 咁佢就真係唔去, 得我一個捱, 仲要冇用的都知去嚟做咩! 好在老公會嚟接番我, 再去買外賣, 但嗰間都真係唔多好食, 可惜! 

17/9/25

 17/9/25     WED     COOL

今日記錯咗跟咩客, 原來要跟條麻煩妹, 不過我都盡量係唔理佢咁多, 冇意思! 總之保持佢唔出事就得, 又唔太晏有飯開就得啦! 然就係準時收工啦, 仲爺就放半日, 真係開心, 不過條友仔返屋企又唔send message嚟, 係都要人地問佢先得,呢樣唔好! 到我放工返到去, 都係要食咗嘢先, 跟住都係hea吓, 7點多先煮晚飯, 難得今日係唔洗就踢波嗰啲!

16/9/25

 16/9/25     TUE     WARM

今日都係一支好簽, 所以要好好享受, 因為嚟緊幾日都係辛苦嘢! 朝早行行吓返學, 仲爺有同學浦頭, 搞到我都冇位企, 所以行到去公園位就同佢講bye bye算! 本身今日已經有得hea, 加上個學生早閃咗, 我又可以早咗食飯, 然後再跟另一個, 都唔算太難, 準時收工, 返到嚟又要倒垃圾又要開電腦交嘢, 搞唔掂要佢地幫吓手, 快好多! 不過都係食唔切嘢, 唯有揍完仲爺返嚟先食, 仲要摺衫煮飯, 其實都幾忙! 食完飯沖涼都9點幾啦, 趕埋仲爺去做功課!

15/9/25

 15/9/25     MON     RAIN

今日又要工啦, 跟sixth form其實都閒, 但因為有個同事唔知點解編咗有佢個囡嗰班, 所以又要同我swap, 都有啲煩不過是但啦, 都係咁做! 只係要交接有啲煩啫, 好難交收! 點半等個學生走咗我就可以放飯, 遇咗遲又好似冇咁餓! 食完上多堂就走得, 最尾因為得番嗰15分鐘我都唔返上課室, 搵個位扮工就算! 閃人去藥房攞埋藥先返屋企, 今日唔洗再出去, 仲爺又去練波, 子元又有得OT教波, 所以9點幾先食飯, 仲開住新一季膠戰送飯, 真係好正! 所以洗埋碗已經差不多11點先沖涼啦!

14/9/25

 14/9/25     SUN     COOL

今日我就冇出過街啦, 星期日都係喺屋企hea吓多架啦, 朝早老公要揍仲仲出去比賽, 仲爺叫我一齊出去睇佢, 但我仲喺張床邊趕得切出門口呀, 所以都係冇理佢! hea到10點多先起身梳洗煮早餐食, 然後就做清潔啦, 仲爺踢完波返嚟, 打埋電話比婆婆, 跟住我就摺衫, 仲爺就要做功課, 老公煮嘢食, 然後係睇波同埋hea! 晚飯食四寶飯呀, 真係好正, 仲有菜芯, 不過得少少啫! 食完飯食埋涼粉, 睇埋電視, 終於比我搵到女神配對計劃最尾嗰個星期睇, 到10點多先沖涼休息!

13/9/25

 13/9/25     SAT     COOL

今日瞓醒就發現條頸痛, 又瞓扭頸! 唯有貼磁石啦! 食完早餐就出去買餸, 因為又要去埋outlet買波boot, 所以就去tesco試吓買餸, 但唔熟路就真係好難搞, 再加上唔知今日個路面咩事, 好多平時唔塞的位置又塞, 幾經辛苦去到, 買完再泊去costco就行過去outlet, 點知又落雨, 睇完都係買唔到佢地要的波boot, 但都要返去啦, 先去costco買埋午餐先返去! 本身今晚諗住煮三寶飯, 點知jenet問我地打唔打邊爐, 咁就一於買料過去打啦, 吹住水咁吹到11點幾先走呢!

12/9/25

 12/9/25     FRI     WARM

今日都攰, 話哂都星期五啦, 又要揍三隻使喎, 好難唔洗力, 例如條肥妹成鬼日喊, 我而家都廢事理佢咁多, 冇得救! 所以可以準時食飯準時收工就算, 不過有樣嘢都算好笑, 課室又crash, 結果企喺課室門口齊齊等到嗰班落堂, 真係好奇怪! 放工返到嚟食嘢啦, 仲要處理吓仲爺, 條友仔話我抄錯時間表, 大佬你學校個時間表seience寫Sc, PSHE就寫Se, 差嗰少少我實在真係分唔到! 之後佢地出哂去, 我就hea喺梳化打機, 攰到完全唔想郁! 等老公佢地返嚟, 簡單整米線食就算啦!

11/9/25

 11/9/25     THU     RAIN

今日又晴又雨咁, 搞到我又要擔心架車, 不過原來都冇咩事, 有太陽曬一曬就可以! 朝早返到去本來以為都係跟Y12嗰個, 但等咗佢一堂都冇返, 結果要改跟第二個同埋替飯更, 仲要替4個, 由11點半跟到2點先到我開飯, 可惡! 早知咁遲先有得食我就食定嘢先嘛! 差不多點事仲要落大雨, 總算避到! 放學即閃, 返到去都係照樣趕仲爺快啲啦, 佢真係好似唔識睇鐘咁, 唔知時間, 成日都要人提! 去球場都唔算塞車, 老公車咗我返屋企, 又要摺衫同開始煮飯, 都冇得抖, 好攰呀!

10/9/25

 10/9/25     WED     RAIN

今日個天又晴又雨咁, 真係搞唔掂, 返到學校明明好天, 小息前又落雨, 所以馬上襯空檔去泊番好架車, 繼續努力工作, 都有啲攰但三隻小天便係易搞的! 佢地放飯又可以print埋我想print的嘢, 好事! 放工快手閃人, 又要去GP檢查, 仲要諗吓點book醫生問埋攞藥, 真係好攰! 檢查完返去食啲嘢, 摺埋啲衫老公返嚟等佢食埋嘢, 就出去仲爺學校家長會, 都係一個鐘啫, 算係都有用, 簡介吓咁, 聽完7點多, 但因為今日冇時間買餸, 唯有去買麥記, 食完沖涼做嘢等等!

9/9/25

 9/9/25     TUE     WARM

今日雖然跟住Ellie-mae, 但佢出奇地合作, 可能都係開番學初期, 仲摸緊老師們底細未敢搞事住掛! 所以今日我都算輕鬆! 不過每堂其實都好悶, 真係要保持狀態都要用啲力! 都冇咩講啦, 夠鐘準時走人, 因為又要倒垃圾又要揍仲爺出去練波都有啲攰, 老公車到我返嚟, 又係要摺衫同煮飯, 都冇停過, 食完飯沖涼叫做可以休息吓!

8/9/25

 8/9/25     MON     WARM

今日又要開工啦, 仲要有好簽, 咁就享受吓, 只係唔記得帶本書睇吓, 時間易過啲! 於是都係搵啲嘢做吓咁! 放完飯要去cover, 咁就行咗45分鐘, 因為學生放飯佢只係係咁周圍無定向咁行, 所以只可以喺下一堂會合, 不過都要同阿姐返映咁放飯唔得! 最尾嗰堂跟埋個year 7就可以啦! 放學本來諗住去攞藥, 點知話GP冇send到, 白行一趟! 返到去先要處理吓仲爺, 因為子元去咗練波, 老公去咗攞架代用車, 等佢地去咗踢波我就要摺衫煮飯等等, 都攰!

7/9/25

 7/9/25     SUN     WARM

今日瞓到自然醒啦, 主要都係做清潔, 換床單同埋買啲餸! 一起身就換咗床單先, 老公煮早餐, 食完就做咗清潔先, 跟住出去買餸, 冇車唯有靠腳啦, 同老公仲爺一齊行去lidl買, 返嚟老公就整米線, 但整得嚟都5點幾, 所以晚飯都好晏先食, 我食唔落添呀, 只係食咗兩件雞就算! 明天又要開工啦, 加油!

6/9/25

 6/9/25     SAT     WARM

今日真係好唔想寫日記, 因為琴晚瞓到1點多就比子元上嚟叫醒, 我地架車比人hit and run, 樓下鄰居已經馬上幫我地追都追到, 我地完全迷失點做, 好在鄰居們都好幫忙, 結果嚟緊嗰兩個鐘我地要影相, 報警察攞reference #, 再報埋保險, 冇咩可以做! 瞓覺啦! 朝早Barry因為琴晚收到我whatsapps, 今日就過嚟睇吓我地點, 亦都會車我地去雷丁, 佢地就踢波, 我同Barry就去咗超市買餸, 然後去咗食嘢, 吹吓水咁, 然後去番球場睇佢地到完場, 返到屋企都差不多6點, 架車已經比保險拖咗去安全點, 7點幾Barry佢地過嚟食, 都要答謝吓人地做uber! 食完洗埋碗, 佢地都坐到10點幾先走! 

5/9/25

 5/9/25     FRI     WARM

又到星期五啦, 今日要跟3隻小天使, 所以體力上都係好攰, 精神上真係可以, 因為第一個星期嘛, 都冇咩特別嘢做住! 只係要等到點半先放飯, 真係有啲餓! 等到點幾終於可以休息得, 然後返去基本上佢地都走得, 因為最尾嗰堂唔洗上, 所以都係好事, 但嗰堂重點係甚麼見啲year 7家長, 咁本身都OK, 你又要曬馬都算, 最後原來只係每每form企起身派張證書同頸繩, 校長再握手, 真係想講粗口, 如果我要請假嚟睇啲咁無聊的事, 真係會發火! 所以準時我就走人, 返到去有嘢食, 然後都係hea, 摺埋衫再煮晚飯啦, 子元要教波, 返嚟就食肉醬意粉!

4/9/25

 4/9/25     THU     RAIN

今日都唔算好攰啦, 因為跟year 7喺學期初係好事, 未開始壞嘛! 朝早學生10點半先返, 我就print哂啲時間表先, 慢慢再貼啦! 頭兩堂學生都係喺班主任堂, 咁我有時間好好做吓自己嘢, 放飯後, 開始真上堂, 但都係派吓簿寫吓嘢咁, 都好快又放學啦, 原來唔洗趕都有好處, 心理上都冇咁緊迫, 返到去仲爺已經沖完涼添, 煮緊嘢食, 但我提佢要去練波喎, 又要趕住出門口啦! 等老公車咗我返嚟, 又要摺衫煮飯, 當然有打吓機咁啦! 又10點幾先沖好涼啦!

3/9/25

 3/9/25     WED     RAIN

今日係仲爺中學開學日, 都係大日子嚟架, 所以朝早都係幾忙吓, 又要再開始番整飯的日子, 仲要早啲出門口, 所以都有啲手忙腳亂! 加上出門口時又落雨, 都幾麻煩! 都算順利行到返去, 喺學校門前影到相, 佢順利入到學校, 咁我都返工啦, 因為落緊雨我又未戴頭盔, 都要搵個地方處理吓, 跟住就冒雨返學啦, 返到去都幾濕吓! 然後就係開工啦, 又要一個鐘training, 然後同琴日一樣開工, 不過顛妹冇返, 咁我就坐到夠鐘再去放飯, 都係好事嚟! 食完又要去番year 7嗰到, 頂多個半鐘又收得工, 快啲返去想睇吓仲爺搞成點, so far佢都順利啦, 齊哂啲嘢返嚟已經好好! 叻仔! 因為餓同攰, 所以都係主力休息同食! 跟住就係煮飯啦, 食得嚟都9點幾, 又搞到12點先有得瞓!

2/9/25

 2/9/25     TUE     RAIN

今日終於有學生返學, 不過頭一個鐘都係要聽talk, 但已經好好, 都係快啲聽完就算! 10點多Y7始出現, 但我唔洗特別揍Y7, 只係跟嗰班, 中場其他級都返, 我就轉去跟Ellie, 反而舒服好多喎唔知點解, 可能唔洗上堂又唔洗跟啲咩, 行行企企又開飯啦, 食完飯都係去做吓跟班, 仲要玩埋野外定向咁, 夠鐘就放學, 落雨唔快得, 返到去都3:45, 仲要倒垃圾, 再揍仲爺去踢波, 太趕了! 最慘架巴士半路冇得行, 我又唔熟路喎, 但都要落車架啦, 照行住先, 再打比老公睇吓點算, 行咗一半都叫做會合到, 揍咗仲仲去球場老公車埋我返屋企, 摺埋啲衫都要煮飯, 等仲爺上埋音樂就開飯, 所以洗得碗嚟都10點幾, 快啲沖埋涼趕仲爺瞓覺, 明天大家真開學!

1/9/25

 1/9/25     MON     RAIN&SUNNY

今日真係要開工啦, 但琴晚唔知係咪杯咖啡太勁, 我竟然完全瞓唔到, 好痴線, 最終我都唔知自己幾時瞓著啦, 但7點就要身啦, 因為只係照顧自己, 所以好快搞掂, 返到去先係training, 都係坐埋一堆聽嘢, 冇位坐局住坐咗大姐隔離! 好在之後返到大房, 基本上都係自由活動格局, 所以都係吹水等等, 夠鐘就食飯, 再搵Ellen吹陣水, 繼續hea到夠鐘就可以放工! 咁第一日開學就輕鬆咁完咗! 返到屋企先食嘢, 午餐食咗個杯麵咋, 好餓! 跟住要摺埋啲衫, hea到7點多要煮飯啦, 今晚都係要早啲瞓, 太唔夠瞓啦!