29/2/24

 29/2/24     THU     RAIN

今日又要跟year 7個麻雀煩友，佢真係好煩，唔想上嗰啲堂就搞事等老師趕佢走，但就搞著我囉，好地地坐好咪算囉，好在今日我早放，上少兩堂冇眼睇！陪放飯同一個PE miss吹咗一輪水，原來佢係實習老師，最好笑係佢同我講唔鐘意呢間學校， 學生又差硬件又差同埋完全令人冇歸屬感！1點幾走得，先去快買個餸再去接佢，諗住3點見家長，點知原來我遲啲先見要詳談，仲爺又唔同我講！不過可以去佢課室睇吓都好！返嚟hea 到煮晚飯，今日又去煮碟頭飯呢！

28/2/24

 28/2/24     WED     COLD

今朝冇奶沖咖啡，搞到我要即刻出去買！所以又遲咗出門口，好在都唔算遲！照常開工啦，冇咩特別，夠鐘可以放學，接咗仲仲返去，打電話比嫲嫲，因為佢今日生日，比佢地傾吓！然後都係食吓嘢休息吓，但仲爺又激我，叫佢好好做數又係到態度差，又要我發佢老脾！晚飯時要睇波冇得睇我啲嘢，又爭唔到廁所沖涼，可惡！

27/2/24

 27/2/24     TUE     COLD

今日都係好正常，冇咩特別地返工放工，係有啲悶悶地，但我唔介意悶囉，照樣上堂食飯放學，接仲仲放學，返嚟倒垃圾食tea，準備晚飯！今晚食牛腩麵，食完要去上慕道班，返嚟洗埋碗沖涼休息！

26/2/24

 26/2/24     MON     COLD

今日凍咗好多，返到去終於搵到二姐簽假紙，然後就開工，都冇咩特別，係小息要留喺室外有啲凍！放飯時發現我隻杯比人攞咗去用，仲要唔洗，好在SMSA嗰幾個EE知道邊個用咗， 仲比我放隻杯去佢地個櫃！順利放工接仲仲，返嚟食嘢，子元揍仲仲去踢波，我可以做吓蟲蟲打吓機睇電視，都要預備煮飯！

25/2/24

 25/2/24     SUN     COLD

今日要休養生息！子元11點要補習，10點幾點都要起身，喺屋企食啲嘢，等子元補完先去茶餐廳食嘢，再去買啲餸就返屋企，做好清潔又要摺衫，其實都冇咩休息，所以晚飯準備咗少少就等老公繼續，我就做吓蟲蟲先！食完睇陣電視先洗碗沖涼！

24/2/24

 24/2/24     SAT     COLD*

今日好忙碌呀！約咗過May到，又要等子元補完課，又要帶仲爺去試隱形眼鏡，仲要買炭買刺身生蠔，差不多1點先出發！先去雷丁接咗ting hin先過Bristol，最終差不多4點先到，又透爐又食刺身先，然後開始不停燒嘢食，大家輪流燒吓又入屋吹吓水咁，基本上冇停過口，之後又開生蠔，但我有啲肚痛，唔敢食咁多，只係食咗一隻咋！之後keep住個肚都唔係咁舒服，所以都唔食咁多嘢！一路吹水到1點幾先肯走！回程初頭都順利，但好快就大霧，仲要疑似唔夠油！好驚恐地快手搵油站，好在都趕得切，入夠油再幾經辛苦霧中返到屋企！

23/2/24

 23/2/24     FRI     Hail

星期五永遠都有驚喜，明明我今日應該跟Daisy輕鬆架嘛，點知返去又搵唔到佢又唔見佢，到最後應該係根本冇人安排好，cover緊我嗰個跟咗Daisy出trip，咁我變咗要調轉跟佢嗰個，嗰件Anjalina都係咁麻煩，佢根本係針對啲弱勢老師，重點係搞著我嘛，啲老師成日想踢佢出課室但又唔可以先慘，最差係佢踩到我底線，又搶我電話又係咁掂我，又攞我啲嘢，有個老師叫我寫底再email比飯筒，我覺得是但啦，佢太過份其實都要！幾經辛苦捱到放學，諗住可以返屋企，點知一出學校門口就落雹，等咗一輪好啲先行得，冇雹但有雨，我返到去濕哂，凍到兩條大腿紅哂，乾好自己再食埋嘢，又要出去買餸，車咗仲仲去球場再同老公一齊去買，等仲爺踢完返去煮飯等等！

22/2/24

 22/2/24     THU     RAIN

今日真係好輕鬆，基本上都冇咩嘢忙，所以我已經帶定書返去睇！朝早返去都冇雨，但之後就落足全日雨！好在今日大部分都室內，自己放吓飯又替吓飯更，吹吓水咁又一日！放工接仲仲返去又係食嘢囉，老公返嚟整鴨腿湯飯，然後揍子元去踢波，我就睇住電視摺埋衫，食完飯要洗埋碗先沖涼呢！

21/2/24

 21/2/24      WED     RAIN

今日落咗一日雨呢，好在唔算太大，但我都帶咗遮，因為個學生有機會成日喺戶外，都係帶定穩陣啲！好在因為真係大雨佢又可以喺室內用電腦，咁我都可以坐吓暖吓，又唔洗同佢吹水！另外今日啲堂都幾啱上，尤其是最尾opinion support係吹水眼鏡佬堂，同琴日個氣氛差好遠，大家又分享吓嘢食，真係好正！夠鐘就走得，接咗仲仲返嚟就食嘢休息睇電視，不過都要預備定晚餐材料等老公煮！

20/2/24

 20/2/24     TUE     COLD

今日都係咁返工返學啦，冇咩特別都係咁過，都諗唔到有咩好寫！冇事冇幹都係好事！放學快手去接仲就返去食嘢，今晚我又要去上慕道班，子元腳痛唔去踢波，得仲爺去，我就上完先返嚟先食飯沖涼，又好夜先搞掂！

19/2/24

 19/2/24     MON    RAIN

今日終於要返工返學啦，仲仲慢吞吞，好在都冇遲！返去照常開工，今日啲堂幾悶吓，加上放飯時佢係咁吹水，又妄想症發作唔知講咩咁，不過我襯放飯時間打到電話去book GP，但， 又收唔到sms，都要搵機會再打去問多次！上埋最後一堂英文又放工，接咗仲仲返屋企，食完嘢都仲係好攰又頭痛，都係要哥哥揍仲仲去球場，我就做埋啲家務，夠鐘就煮飯，又掛住睇電視搞到仲仲10點幾先瞓！

18/2/24

 18/2/24     SUN     RAIN

今日兩個又要踢波，子元又要補習，所以都係恒常星期日做法！仲仲踢早場，跟住到子元補習，然後我地去買埋餸再接番子元，食埋午餐就返嚟做清潔， 子元夠鐘又去比賽，我就可以休息吓，摺埋衫睇吓波子直播，老公返嚟就煮飯！明天大家都返工返學了，term break幾快又完！

17/2/24

 17/2/24      SAT     RAIN

好似好耐未試過感冒，所以琴晚突然作感冒，食咗藥仲係好辛苦，全晚都瞓唔到，一轉身就醒，好辛苦！朝早食咗塊包就食藥，慢慢就叫做好啲，結果全部一齊留喺屋企一日，睇電視打機睇波，咁又一日！老公煮咗好味晚餐，冇梅菜扣肉又回窩肉，好正！

16/2/24

 16/2/24     FRI     COOL

今朝醒都差不多9點，睇吓機先梳洗，食得早餐都11點幾，叫子元做咗數學，跟住打吓機老公又返，就出去榮業食真茶餐廳，行咗陣中超就返！返嚟覺得唔舒服，食咗必利痛，好似好啲，但都係要再食感冒藥，閂咗套如意傳，原來幾好睇！

15/2/24

 15/2/24     THU     COOL

今日都係hea吓咁啦，term break係咁架啦！朝早8 點幾9點起身整早餐，食完都冇咩做睇吓電視，然後幫子元溫咗陣書就去買餸，順手買埋午餐，除咗pizza仲整咗銀牙肉絲炒麵，味道啱啱好，超正！之後都係hea吓，老公返嚟就比咗個電話要我講，佢問緊買醫療保險，我都諗緊其實係咪真係有需要買，都二百幾鎊一個月喎！晚飯開咗套《金手指》睇，搞到十點幾先洗碗沖涼囉！

14/2/24

 14/2/24     WED     COLD

今朝老公要早出門口，但又唔記得帶銀包車匙，搞到我又要開門比佢，又要等一輪先瞓得番，10點幾先知醒，就起身整早餐，食完同子元溫埋Geo，本來諗住出去買餸，點知老公話佢放工返嚟先去costco買牛扒，順手買埋榴槤，£15有貓山王，香港都差不多！不過去程好塞車，老公回程想去日本鋪買刺身都唔得！返到去就煎牛扒，因為今日係情人節，點都要慶祝吓！然後我又好無聊咁追番啲舊劇，又好夜瞓！

13/2/24

 13/2/24     TUE     COLD+

今朝老公要返工啦，但我都一齊醒咗，咪早啲煲定粥，之後可以食！今日主要活動換床單，洗衣機忙咗一日，食完早餐開始hea，飲咗咖啡醒番啲，阿哥中午要返去補課，等佢返嚟先食嘢，食埋啲雲吞，老公返嚟接咗子元去球場，因為今日約咗Konter隊友，佢地過嚟比賽，順手食晚飯，去咗Taki食日本嘢！

12/2/24

 12/2/24     MON     WIND

今日佢兩個都要踢波，因為遲咗起身，都未食早餐就去咗球場，又著唔夠衫，又肚餓又攰！最終我入咗室內等，仲去咗買咖啡比埋老一齊公飲！踢完去咗Broadway，仲仲要試吓配隱形眼鏡，順手食埋午餐，仲買咗箱荔枝，£7咋！返屋企換過厚衫諗住睇子元比賽，點知條友踢咗陣又受傷，所以我同仲爺又入室內休息，等佢踢完先返屋企煮飯食！

11/2/24

 11/2/24     SUN     WARM

今朝仲仲唔洗踢波，應該係琴日落雨浸咗個場，咁就唔洗咁趕，只係揍子元去補習，再去教堂先返屋企做家務，清潔洗衫等等！然後就休息做蟲蟲，到預備晚飯時間先郁，咁又一日啦！

10/2/24

 10/2/24     SAT     RAIN*

大年初一，恭喜發財！今朝瞓到自然醒，食早餐，等阿May佢地嚟會合，再出Central London，點知有啲意外，首先佢地熱水爐冇水壓冇熱水，然後車程上兩個囡又嘔，嘔到九彩，最終佢兩個留咗喺我地屋企休息，我地揸車出去再轉tube，行大笨鐘，London eye再上唐人街，又落雨咁佢地又要影相，加上都遲咗出嚟，所以都唔太夠時間，不過氣氛都幾好！8點返到屋企，快啲整好個盤菜煮埋飯，食呀吹水呀，又傾到點幾先返去啦佢地！

9/2/24

 9/2/24     FRI     COOL

終於都捱到最後一日啦，又term break又年三十晚，所以幾冇心機開工！以為又落雨，點知又出太陽，等我仲著咗子元件褸防雨！返到去都係如常咁開工，但已經處於離線狀態，好冇動力！不過都做咗應該做嘅嘢，比咗錢個學生返去香港時順手幫我買eye mask, Holly又送咗朱古力比我！終於放學啦，唔洗揍仲但就要再去買餸，買魚買蝦買雞等，但最終都係唔齊，要揍咗仲仲去踢波後再補！返到嚟就不停煮啦，樣樣都好多功夫，等老公回來繼續一齊整，都要差不多9點先開飯，食到飽飽又要洗碗，沖完涼仲要摺衫先瞓得！

8/2/24

 8/2/24     THU     RAIN

今朝真係夠哂大雨，我件粉色褸真係頂唔住，濕哂左邊手臂，真係好狼狽！不過今日日程都算唔錯，又有時間做吓自己嘢，係放飯時佢要行嚟行去煩啲囉！放學接完仲仲返去煮茶點，幫子元溫咗陣書就做吓蟲蟲，晚飯老公整咗鴨腿湯飯先揍子元踢波，分兩場食我又可以唔洗洗碗！

7/2/24

 7/2/24     WED     COLD

今個星期過得好慢，實在太掛住放term break啦！今日大致都係咁上吓，樣樣正常，有機會就睇吓書咁， 又搵機會喺圖書館搵溫Geo的資料！我都要努力局佢溫書，好在近水樓台啫！放學返去接咗仲仲，食完嘢又係開始溫書，中途抖吓，我睇電視時都係有摺衫架，等老公煮飯我就可以繼續同子元溫書！

6/2/24

 6/2/24     TUE     WIND

今日大致都係照開工，只係午飯時個學生係咁留喺室外，大風吹到我死！今日終於帶咗本書返去睇，必要時都冇咁悶！放學接咗仲爺，返去都係食嘢同倒垃圾啦，見子元出咗考試時間，諗住同佢寫吓，但佢地出咗門口踢波，我唔知佢冇啲科屬於咩班，要佢自己搞！然後就開始蒸糕！又由6點玩到食飯先蒸完，今次係時候影埋相寫吓食譜！晚上子元又係掛住打機，完全冇準備考試個狀態，要我發脾氣，可惡！

5/2/24

 5/2/24     MON     COLD

今日都趕趕地，返到去先睇自己跟邊個，又有好簽要好好珍惜！不過唔記得帶本書睇吓，真係好悶，好在第一堂學生有meeting，我又打咗半堂機，最唔明係臨落堂可以返課室，點知見到莊生係課室出面，我完全唔知佢叫我唔好入課室囉，真係堅煩！第三堂又有talk要聽，其實今日都冇咩上堂，好事 ！放學接仲仲，返去整咗蘿蔔糕食，今次懶得煎，蒸就算！抖吓摺吓衫夠鐘就煮飯！

4/2/24

 4/2/24     SUN     COOL

今朝都係清潔日，等佢地出哂去補習踢波等等就開始，又清潔埋浴缸，仲打埋地臘，然後接子元放補習，去食午餐再去多轉超市，買料包雲吞，返去休息吓都係要開始預備材料，仲爺又冇功課未做好要幫佢用電腦搞！包好雲吞冰咗佢應該唔會痴埋一舊，留番團年飯食！

3/2/24

 3/2/24     SAT     COOL

今朝本來諗住出去買完咖啡買少少嘢，點知炮哥話Costco有平嘢，就去咗入貨，最後去埋中超同超市，買埋今個星期啲餸，返嚟準備定，Carol一家又過嚟搵我地，老公整定碗仔翅，嚟到就開枱打牌吹水，老公中場又去咗講電話，唔係咁好囉！打完牌食飯啦，開咗套電影一齊邊食邊睇，睇完佢哋都要走啦，好多嘢要攞呢！

2/2/24

 2/2/24     FRI     COLD

明明今日跟Daisy輕鬆架嘛，返到去先發現又轉咗，仲要係Amira，頂！本來都冇咩，但第一堂已經好悶，咪收埋打機，點知嗰條老師臨完時竟然話我唔應該上堂用機，可惡！你自己搞唔掂又唔好拉我落水啦！之後都係粉腸日常啦，佢繼續唔合作我繼續唔理佢！最後嗰堂訓導主任堂，查實我完全唔知佢教咩，你話溫習都好啦，都要人明先得架！終於走得直閃，返去都係食嘢同hea，我今日好攰啦！

1/2/24

 1/2/24     THU     COLD

今日跟Daisy其實輕鬆，佢有佢自動自覺，我有我做自己嘢，反而係啲同事，又話Daisy咁早落堂，又要早過3：15走，好鬼煩！上堂冇咩做就繼續整揮春，不過有時啲時間真係好難打發！睇嚟明天都要帶本書返去消磨吓先得！放學接仲爺，又話喺學校有推撞，有張口供紙要簽番，我問清楚根本仲爺係自衛，唔係出手，咁我梗係唔簽，仲寫長文等佢搞！晚飯整肉骨茶，好簡單！可以輕鬆打機睇波子！