30/9/24

 30/9/24     MON     RAIN

又要開工啦, 朝早仲要子元學校target setting day online meeting, 又浪費咗我10分鐘, 搞掂出門口時又落雨, 正好試吓件新褸, 又幾好喎! 返到去記得個學生今日有個活動, 重點係全日都喺同一個課室, 我又冇咩可以做, 本書又就睇哂, 打機又唔可以咁張揚, 悶死我! 放工準時走人去揍仲, 佢返嚟食完嘢就要去球場, 今日子元喺到可以揍佢去, 咁我就可以做埋啲家務同睇我想睇的電視! 食完飯hea多陣就沖涼瞓覺啦, 今日都好攰咁!

29/9/24

 29/9/24     SUN     COOL

今朝老公係都要我地一齊去仲仲足球比賽, 明知幾點要到但又唔早啲起身, 慢咗又係到賴人, 好煩! 今日個肚都唔係好舒服, 球場又大風, 終於踢完可以返屋企, 又買少少嘢今晚煮等等, 返嚟老公煮咗西多士, 但真係多夠囉, 所以我地再整咗撈烏冬, 食完本來睇吓波, 但曼聯真係唔掂, 我都係做啲有用嘢, 開電腦幫仲爺報好中學, 交好啲費等等, 總之就做啲有用嘢啦, 差不多8點老公煮好飯可以食啦, 明天又要開工啦, 努力!

28/9/24

 28/9/24     SAT     WARM*

星期六梗係瞓到自然醒, 然後食完早餐就去broadway訂仲仲隱形眼鏡, 再買埋防水褸, 跟住就要返教堂嗰邊見神父攞封信申請中學用, 然後返去接埋佢地就去咗買麥當勞, 食到飽飽返嚟, 我就做埋清潔先, 老公約咗人傾電話, 咁各自搞掂就去超市買埋餸先返屋企, 忙住幫仲爺睇功課, 今日啲功課又真係有啲難, 又要連繫WW1, 玩死我! 預備埋煮飯都8點幾先開飯, 我又忍唔住睇多次雪中X刀行, 所以又夜一夜先瞓!

27/9/24

 27/9/24     FRI     RAIN

今朝落雨落到狗屎咁, 可惡! 裝備都係唔足夠, 都係要時候補充! 今日學生開11點, staff就要training,講到尾都係為嚟緊ofsted做數準備, 不過老實我呢啲薯仔都唔太關事架啦, 唔好煩到我! 終於講完又要去準備今日時間安排, 因為改到得番40分鐘一堂, 我仲要替三個飯更, 時間表唔到要重新計算過, 總算搞得掂, 但就變得好趕忙, 得頭兩堂比較好啲可以自然活動吓! 上咗兩堂PE, 有堂仲要同個盲的上查實幾無聊, 攞個有聲的波拋, 但我都要好敬業樂業咁做囉, 終於做哂全部替飯更可以食飯, 真係唔願返去開工, 不過去到都係坐吓就算啦! 準時收工走人, 唔洗揍仲仲梗係去買埋餸啦, 唔好星期五晚飯成日求奇煮個麵就算! 仲爺去練波我就hea吓, 等佢地返嚟先煮意粉, 簡單快捷! 

26/9/24

 26/9/24     THU     RAIN

今日都係比較辛苦架啦, 返學都冇落雨, 但我睇咗天氣話今日都係有雨, 都係泊喺入面好啲, 今日唔係跟+所以基本上係可以自由活動多啲, 所以都放咗個長飯, 總之盡可能咩都唔理咁啦, 夠鐘我就放工, 我完全唔想理啲無謂學生無謂人咁多! 下午開始落大雨, 好在到放學時唔算大, 但一路過嚟接仲仲都好辛苦, 返嚟換好衫抺乾自己仲爺話收到老公msg叫佢跑步, 我真係忍唔住話叫佢收線, 出面3號風球咁呀唔好玩啦, 同阿哥搞掂埋啲公務食咗啲嘢又要摺衫, 好多衫未摺! 所以晚飯要老公煮, 咁洗完碗等沖涼, 終於可以打吓機! 日子係有啲無聊但我都覺得幾好!

25/9/24

 25/9/24     WED     RAIN

今日又要返工啦, 都知道應該唔太難頂, 都係揍細路咁啦! 今朝仲要落雨喎, 終於試咗件雨褸, 但原來個袖都遮唔到, 不過都好過就咁風褸! 返到去就照開工, 都係悶架啦, 不過有糧出就要接受! 放工彈閘去接仲仲啦, 返去食嘢休息打機, 哥哥踢完比賽返嚟腳又痛, 教練叫佢下星期要休息唔可以踢! 子元返到嚟話要食雞蛋, 但真係冇啦都要專登出去買! 返嚟諗住開住電視聲煮飯, 但又冇咗個live台, 可惡! 食完都係快啲沖涼休息啦! 

24/9/24

 24/9/24     TUE     WARM

今日放假一天, 因為仲仲PGL之後放假一天, 我都要放假一天囉, 好事! 瞓夠先起身, 雖然都唔係瞓得好晏, 起身煮個豐富早餐, 跟住梗係hea, 老公又係咁要我地去做運動, 所以食埋午餐3點左右都出去, 都叫做做咗, 返嚟都係要倒垃圾等, 然後都係休息吓, 今晚又要去教會, 但今日好悶囉個topic! 回來食飯洗碗沖涼休息!

23/9/24

 23/9/24     MON     RAIN

今朝唔洗揍仲仲, 好似有啲失咗方向咁, 不過要幫子元book下星期target setting day, 好重要呀趕住開工前搞掂埋! 食埋早餐出門口, 周圍都有啲水浸, 好在都順利返到去, 照樣去開工啦, 唔忙但都攰咁囉! 放工又係唔趕但都係想快啲走人, 去埋超市先返屋企, 補給吓咁啦, 返去煮嘢食然後就hea! 仲仲預算5:45先返到, 所以等埋老公返嚟食完麵先去接仲仲, 天暗暗咁梗係渣車出去, 果然真係有雨, 仲仲落車之後完全唔識講嘢咁, 原來佢講咗太多日英文未轉得切台, 好搞笑! 返去要幫佢洗咁啲衫先, 然後都係煮飯食睇電視沖涼咁啦!

22/9/24

 22/9/24     SUN     RAIN

今朝又一早醒咗, 可惡! 明明今日可以瞓晏啲架嘛! 自己整咗早餐食完就摺衫, 等老公都起身搞掂就出去買餸, 只係去咗中超同超市, 老公想返嚟睇波嘛, 加上去costco主力都係買蛋咁就算啦, 返去又要執嘢出嚟擺, 整定嘢煲粥, 先做咗清潔, 做完啱啱好可以食, 食完繼續hea, 睇完波係時候煮飯, 食完又掛住睇埋伏仇者又10點幾先沖涼! 細佬明天返啦, 真係有啲掛住佢添!

21/9/24

 21/9/24     SAT     WARM RAIN

今朝又要6點半起身, 因為子元要去大學open day, 北上好遠Lough borough 7點幾已經出咗門口, 停咗一次services啫, 但因為好多位都只係行得50M, 結果10點先到大學附近, 但因為太塞車, 又要趕睇唔同的talk, 所以我地自己行過去, 老公再慢慢塞, 好在最終都聽到哂全部想聽的talk, 非常好! 仲周圍參觀咗又影咗吓相咁啦, 最後睇埋宿舍, 條友勁有興趣囉, 不過入學條件要AL三條A, 真係好期待佢會唔會攞到, 都要睇定plan B架啦! 4點散場要走, 又要塞一餐先出到去, 先要入油同去超市買啲餸, 仲要落大雨, 最終8點先返到屋企, 好誇張! 簡單整嘢食咋, 已經好攰啦! 

20/9/24

 20/9/24     FRI     HOT

今朝6點幾要起身啦, 因為仲仲要去PGL, 話要7:45集合, 我地都準時架啦, 但唔係太多人到咗, 一路等一路有佢啲朋友仔到, 咁佢就梗係搵佢地傾偈啦, 終於等到架大巴啦, 又要搞一輪排隊上車啦, 仲爺開始流露出不捨之情, 摟住又唔放咁啦, 終於終於上咗車再開車啦, 啲家長齊齊好不捨咁啦, 都搞到8點幾架啦, 我都要返工! 到學校嗰頭都未夠鐘梗係唔入去住, 先買杯咖啡出埋個post先, 因為學生今日晏返, 所以未洗開工, 但係要開工後發覺冇帶零食係唔得會好餓, 加上今日早食早餐更餓, 好在12半有飯開, 收工都麻麻地準時, 不過重點係雖然唔洗趕揍仔, 但要預番去幫barry收鎖匙, 有啲情況佢又會打嚟老公又打嚟我又要行住講電話, 然後又要幫仲爺book埋升中見神父攞信等等, 差不多4點先返到嚟, 食埋嘢出去攞key, 講個地址就攞到喎, 咁求奇! 去幫佢試開咗個門, 巡咗一圈咁啦, 返屋企抖抖就出去食晚餐, 伏咗間貴嘢, 好赤啦唔想提, 錢總會返嚟! 食埋甜品就返屋企, 明天又要早起, 北上去參觀大學! 

19/9/24

 19/9/24     THU     HOT

今朝都係咁返工返學啦, 啲學生今日返半日, 但我地就要返足, 所以等佢地走咗先有得食飯, 順手去買飯團比仲仲明天PGL帶做pack lunch, 佢唔想帶包囉, 都係的, 朝爭爭咁係唔想帶! 返番學校其實冇咩好做都要扮吓工, 但放工之後就好忙! 接咗仲仲返去, 收到老公msg話要去郵局攞件, 但我睇極都唔見話可以攞, 不過都要去啦, 去到咪又真係冇得攞囉, 我已經好燥, 因為好熱, 跟住又有好多email等等, 又要趕住出去中學open evening, 5點幾去到估唔到睇到8點多, 真係冇比較冇傷害, 呢間學校又大又靚囉, 基本上都問到我要問的, funny位係竟然撞到個舊同事, 個MFL的老師嚟咗呢到教, 感覺好得意有個熟人咁, 不過每個地方唔睇得耐又比tour guide叫住走有啲可惜, 最搞笑係校長個talk喺教堂講, 咁大回音其實冇咩聽到囉! 8點幾返到嚟等食飯, 然後同細佬執埋明天PGL啲嘢, 沖涼休息!

18/9/24

 18/9/24     WED     HOT

今日熱咗好多呀, 真係唔應該著褸! 朝早照樣返學返工, 都係冇咩特別, 上堂等落堂, 同啲學生一樣啦, 好好食個飯又繼續, 放學有啲遲, 不過仲仲自己放嘛, 真係冇咁大壓力, 返到嚟又要同佢換過個行李箱, 嗰個太細, 諗諗吓到時佢自己砌唔番咪死火, 都係鬆動啲好! 跟住又唔想郁啦, 食都唔想食, 到老公返嚟先再算, 早啲煮飯食完, 9點幾已沖好涼, 咪又上網咁囉! 

17/9/24

 17/9/24     TUE     HOT

今日又熱番, 中秋節都咁熱, 不過好似香港仲熱啲, 去到35度, 痴線! 朝早都係咁返工返學啦, 都冇咩特別, 有堂就上有飯就食, 跟呢個學生就最好, 你真係伴住佢上堂就係, 夠鐘就放學走人, 唔洗趕住接仲爺係好啲, 但我都唔想迫人咁放學, 所以都係準時走人好啲! 接完仲爺返去倒埋垃圾諗住可以休息, 跟住先醒起未買魚, 唯有再出去買, 返嚟食啲嘢都要準備今晚做節, 好多嘢煮, 要煲花膠雞湯, 又要整蝦整魚, 又要預備菜同鮑魚, 細佬去踢咁耐波就煮足咁耐, 期間仲要摺埋衫等等, 個人有啲燥底添! 終於食得飯都8點幾, 好似煮得太多咁好在都食得哂, 咁就過咗個中秋啦, 梗係有影吓相打吓卡咁啦, 仲要洗埋碗沖涼休息嘛!

16/9/24

 16/9/24     MON     WARM

今日又要開工啦, 揍咗仲爺返去就返工, 都係咁冇咩特別, 學生又唔係難搞, 開頭都係要搞清楚啲老師先, 唔好亂嚟! 所以今日時間都過得好快, 最好笑係最尾嗰堂我地掛住做數唔記得咗夠鐘早5分鐘走, 好在仲爺今日開始可以自己放學, 叫咗佢喺學校門口等我先去接, 咁又唔洗睇老師面口, 仲爺都好乖企好等我, 仲要見到我時扮佢班主任嗰次睇錶, 頂佢! 返去快手食啲嘢就要出門口, 因為要去球場嘛, 老公車咗我返嚟本來諗住整吓燈籠, 但完全唔成功, 唯有放棄, 好好去煮飯啦! 食完捉仲爺做埋啲數, 條友又講大話, 明明冇做又話做咗, 今次要督住佢做之餘再對埋要佢改正, 唔知係咪咁所以咁攰, 等我沖完涼佢已經瞓咗!

15/9/24

 15/9/24     SUN     WARM

今朝仲爺要一早比賽, 老公一早去揍佢, 唔關我事, 所以我繼續hea到10點先起身煮早餐, 所以老公佢地返嚟我都係啱啱煮緊早餐咋, 等我食埋就出去行IKEA, 老公自己話要去行, 但行行吓又話肚餓又要快啲行完走去食嘢, 不過都買到需要的, OK啦! 去番yeading嗰邊超市有埋麥記可以食埋, 食完買定外賣, 先去超市買埋餸就返屋企! 返到去再要做就係幫仲爺執行李, 雖然係星期五但都要執定先, 因為預算有咩冇買都仲可以再有時間買! 都執咗好耐呀, 跟住仲要摺衫, 摺得嚟又要煮飯啦, 食完睇吓電視先沖涼休息!

14/9/24

 14/9/24     SAT     WARM*

今朝都算瞓到自然醒, 老公要揍子元去比賽, 我就食完早餐做清潔, 因為今日約咗去朋友屋企BBQ, 等哥哥踢完返嚟沖完涼就出去食嘢同買埋BBQ啲嘢先, 過到去都差不多4點, 係有啲慢, 跟住都係開始準備食物同透爐, 都係邊整邊吹水, 今日有一家係新人, 所以都係繼續吹吓水, 啲細路又玩到好嘈咁啦, 燒到天黑都未燒完, 不過都有燈可以繼續, 食到飽飽收拾埋就入番屋入面吹水, 差不多11點幾先走, 明天仲爺要比賽, 都要走架啦!

13/9/24

 13/9/24     FRI     COLD

今日凍咗好多咁, 咁快冬天! 仲爺今日有information day, 所以10:30先返工, 揍咗佢返去仲要企喺門口等到9點先入得, 聽完仲有時間去攞藥, 買雞翼同飯團, 返去到都係hea吓開工, 最辛苦反而係替飯更嗰時, 明明都係兩堂, 但我好似上咗好多堂, 遊走咗好多地方咁, 仲要都幾趕吓, 行到腳軟! 明知遲食飯就一早食定個飯團打底, 可以食個晏飯, 上多大半堂就走得! 唔洗急住趕返去接仲仲, 老公車子元去做gym, 我同仲爺等外賣, 食完仲仲去踢波, 我就摺衫hea吓! 7點幾炮哥上咗嚟整wifi, 都搞咗一輪, 佢走咗就開飯, 只係食炸雞脾配麵, 睇吓電視沖涼休息!

12/9/24

 12/9/24     THU     RAIN

今日揍咗仲仲學就返工啦, 今日都係辛苦架啦, 雖然唔係Escort+, 但仲難捱因為個學生都係勁唔聽話, 只係可以盡量由得佢, 堅唔想理佢! 小息撞到letty佢地, 佢地知道大房對外開放, 就放飯都入埋嚟食啦! 好在佢今日冇喺圖書館嗰邊食咋, 有人打架囉, 我喺房入面又要控制住個痴線婆, 搞到我都睇唔清楚點打, 可惜! 最後準時自己放工, 因為要去仲仲的PGL TALK, 好在都唔講得耐, 返得切屋企食啲嘢又要去子元個information day, 其實都唔知聽咗啲咩, 是但啦! 老公嚟接咗我地返去就煮飯, 食完洗碗沖涼休息啦, 明天又到仲仲information Day, 我真係好攰呀, 一次過聽咁多個talk! 

11/9//24

 11/9/24     WED     COOL RAIN

今日都係咁開工啦, 都幾忙碌, 冇咩時間休息咁, 可惜! 準時有得開飯已經好好啦, 今日出埋嚟緊時間表, 睇落都算唔錯架啦, 所以都冇出聲, 順利準時放得工, 又要趕去接仲仲, 返到屋企都係先食嘢, 然後仲爺因為疴唔出屎, 又搞著我, 最終去咗幫佢去藥房問左有冇藥買, 今次呢間有喎, 都係外塞, 又係難為我囉! 搞掂佢仲要煮晚飯, 今日都好攰哟, 早啲瞓啦!

10/9/24

 10/9/24     TUE     COOL

今日都凍凍地, 秋天果然來臨! 今日工作上都冇咩事, 簡簡單單咁啫, 所以都冇咩好講! 收到牙醫診所打嚟話可唔可以改今日, 所以又要plan吓今日放工個行程, 要快快手手放工即走, 接咗仲爺然後快手返去叉一叉電, 唔係架車冇電過診所, 然後都要叫細佬執好嘢換定波衫, 因為佢今晚要踢波! 去到診所都好快有得睇, 仲以為係靚女睇, 點知入到去先知原來係個巫婆咁, 仲爺又第一次睇牙, 仲要係拔牙, 佢真係喊咁口, 緊張到死, 最終麻醉咗先拔, 其實都好簡單! 睇完等老公嚟接我地返去, 佢就帶仲仲去踢波, 我仲要摺衫整餸, 等子元到時煮, 因為我要返教會呢, 準時走得返嚟食飯洗碗就沖涼瞓覺!

9/9/24

 9/9/24     MON     WARM

今日要開工啦, 好在都係輕鬆工作, 我學生10點先返, 所以喺大房做吓嘢先, 轉咗大姐, 大房都冇以前咁得人驚, 阿姐冇話我點解呢樣點解嗰樣, 感覺真係好好多! 學生返到就開工啦, 冇咩特別, 準時收到我揍仲, 其實我都已經好準時, 都係36分已經到, 個老師竟然睇錶喎, 頂佢呀! 返去快手食啲嘢就出門口, 要帶仲爺去球場, 有啲趕要跑搞到隻腳又痛, 仲要好痛嗰隻, 都唔知有冇事! 返去煮飯食睇電視沖涼瞓覺!

8/9/24

 8/9/24     SUN     WARM

今朝仲仲要比賽, 但係唔關我事, 老公揍佢去, 我食完早餐就做清潔, 都要啲時間, 做完就可以休息吓, 阿媽打嚟傾咗陣, 然後仲仲踢完波返嚟, 我地就出去買餸, 然後返到嚟老公整午餐, 食咗意粉pizza, 我就睇埋Avenger, 7點多要煮飯啦, 食完睇多套就沖涼瞓覺, 明天又要開工! 

7/9/24

 7/9/24     SAT     WARM

今朝要同仲爺去整番個新眼鏡框, 所以都唔可以瞓太晏, 去到眼鏡鋪都好快換好就走得, 因為今日要過雷丁, 所以買啲包同咖啡喺車食完就算, 直接過Reading就去商場行咗陣, 子元買咗條牛仔褲, 然後就直接去球場, 本來我都諗住出去睇吓, 但因為真係落雨啦我都係躲番入車安全啲, 打機打到好眼瞓, 都係瞓咗陣先, 之後踢完就同另一個konter隊友去食晚餐, 都係食吓吹吓水咁啦! 7點左右就散啦要交枱, 返得屋企都係8點幾, 沖涼休息啦, 眼瞓!

6/9/24

 6/9/24     FRI     WARM

到星期五啦, 今個星期都算過得快架啦, 可能真正有學生的日子唔算多, 所以日子都易過! 朝早子元一早出咗門口, 到仲爺時佢明明攞咗條吠出去又可以唔知, 喺房搵完一輪我再出去攞起件衫先發現根本就係到, 佢啲嘢成日都唔知喺邊放到亂哂, 好似又係我錯咁喎, 點解咩嘢都係我錯咁, 我係工人都仲有錢收, 而家仲仆街過工人囉! 返到去都係照常開工啦, 都轉咗好多新老師, 佢地好多都唔多知啲學生係咩情況, 有時真係好難撈! 放個早飯咁, 所以放工返去都餓架, 食完嘢就係攤喺到, 仲爺要去踢波嘛, 咁我都有摺埋啲衫, 不過晚飯真係唔洗煮, 因為都食飽咗, 所以開咗電影睇我又睇到好晏, 所以話電子產品係害人不淺, 個個對住啲娛樂就咩都唔做, 結果仲爺就係掛住睇嘢, 食完麵淨係洗咗碗就冇洗其他又冇執枱, 平時教咗佢要做嗰啲全部都冇做我就梗係火啦, 日日都教日日都講你唔悶我都悶啦! 咁鬧佢都好應該啫, 鬧完重點係其實我已經唔知可以點教到佢做人基本要求, 佢而家係連基本都做唔到, 我係咪應該放手唔理等佢自己亂哂龍然後知錯定點呢, 我都唔係成日幫手架啦, 但佢要學幾耐先識呢, 唔通真係幾廿歲先學得識, 定幾廿歲其實最終都唔識呢, 我真係唔知可以點!

5/9/24

 5/9/24     THU     RAIN

今日都係照開工啦, 上午個學生只係留喺form room, 其實要坐咁多個鐘真係幾辛苦, 所以都出去行咗兩次, 我仲可以處理埋啲電話, 開學真係好多嘢煩, BSH又話子元冇返學, 但我又睇錯咗係WP, 總之就亂哂龍啦, 午飯後開始要正常上堂, 好在佢英文堂時我放飯, 輕鬆! 放飯後PE堂基本上係吹水都冇咩時間做嘢, 只係突然落好大雨, 好在已經入咗室內, 但因為都要早走, 最終都要冒雨行, 好在正式放學時冇事, 但回程段路周圍都浸, 所以都唔快得! 返到去子元又有問題要解決, timetable的問題, 都唔知係學校system問題定點, 總之改唔到要跟番第一個version, 但又話子元冇上堂, 亂到呢, 好在email完解決咗, 可以食嘢休息, 攤夠先煮飯, 所以食得嚟睇吓電視又10點幾!

4/9/24

 4/9/24     WED     WARM

今日都係照常要返工返學, 不過子元就8點要返到, 所以一早就出咗去, 揍咗仲爺返學就返工, 都係返去先training, 上網聽但邊有專心聽, 都係繼續check吓email等等, 夠鐘就去接學生, 都係咁做啦, 只係學生個爸爸遲咗嚟接, 餓死我啦, 食飽又要去課室開工, 真係令人特別想瞓! 終於捱到放工, 接仲爺時巡例同新班主任講吓我有可能會遲接, 又想問實佢下星期啲學校meeting係點, 但佢好似答得好冇耐性咁, 第一印象唔多好! 算啦, 返去換好衫又要去同仲仲練田徑, 喺公園撞到鄰居, 仲仲同佢一齊打吓波, 我同人地阿嫲吹吓水咁囉! 返去摺埋啲衫, 老公煮咗麵大家食, 我唔知係咪大攰隻眼睇嘢有個影, 所以休息吓休到瞓咗, 瞓醒先煮晚飯食得嚟洗埋碗都9點幾10點啦!

3/9/24

 3/9/24     TUE     HOT

今日有學生返啦, 主要都係year 7, 其他級都會返個幾鐘, 其實我都算閒架啦今日! 朝早先揍咗仲仲返學, 子元今日返10點幾, 佢喺屋企影咗張得個背影的開學照, 好過冇啦! 返到去先做吓剪剪貼貼, 10點學生嚟到又要迎賓咁, 跟住又要跟番其他年級, 終於放飯時都餓啦, 食完又要去頂更, 然後到最後環節treasure hunt又亂哂龍, 我冇理咁多啦, 企番自己岡位, 夠鐘就放工, 接完仲爺返屋企, 好好地食嘢休息緊, 仲爺突然話菇菇痛, 食咗敏感藥一陣都係話痛, 最終老公返嚟車我地去睇急症, 等咗兩個鐘睇完, 最終唔係尿道炎, 只係可能佢忍尿忍得耐冇去返嚟一去就痛喎, 是但啦, 總之冇感染就得! 返嚟老公都煮好飯可以食, 食完就沖涼休息!

2/9/24

 2/9/24     MON     CLOUD

今日終於要開工啦, 不過第一日都係簡簡單單, 好事嚟! 朝早要叫子元自己call GP, 跟住我就自己返工啦, 今日學生未洗返學, 路面仲係好少車, 非常好, 返到去先要聽啲高層講嘢講到10點幾, 終於到自由時間, 吹水吹到放飯, 食完返去又係繼續吹水, 最尾新大姐同二姐嚟講吓今年啲嘢, 重點係暗串飯筒走咗唔同架啦, 叫我地有咩就直接同佢地講, 成個部門氣氛好番好多! 扮工多一陣就收工啦, 返去不久又要揍仲仲去踢波, 但去到發現今日個勢似係trail day, 打比老公叫佢check, 比我講中啦, 打道回府, 不過要接埋子元, 攞埋我free返嚟的folder, 返到嚟咪要煮飯囉, 今晚要早啲趕佢地去瞓, 明天真係要返學啦!

1/9/24

 1/9/24     SUN     HOT

真係最後一日暑假啦, 都係hea過, 但都要做家務等等, 早餐老公煮麵, 午餐求奇食咗啲嘢就算啦, 食番琴日啲牛腩, 做清潔做完好攰, 太dirty! 黃昏時收到子元學校email, 終於知道星期二返幾點要點做, 重點係竟然係有功課, 臨開學先send嚟叫做, 數學嗰啲佢都掂, Eco真係玩鬼我, 又要教佢點做, 不過咁就唔洗煮飯囉, 老公負責! 食完飯食埋盒榴槤就沖涼休息, 明天努力!