30/11/24 SAT COOL
今朝其實7點幾醒咗但都hea到9點幾10點先起身, 諗起哥哥又話11點做gym點解仲喺屋企, 原來佢以為我地車佢去, 咁唯有快啲齊齊煮早餐, 然後出門口車佢去, 跟住我地就去Ealing Broadway買仲仲明天生日會的汽球, 再去starbucks先, 仲有去咗morrison買米, 做特價嘛但原來要會員先有, 我嗰吓又DL唔到個apps, 好在最終搵到個顧客用佢張卡嘟咗咁就有得平! 買埋餸返屋企, 整咗午餐簡單食咗, 叫仲爺做功課執房, 明天生日會唔想亂七八糟! 等佢地去咗踢波, 我就做清潔啦, 然後就要預備晚餐等老公返嚟煮, 我就上房用吓電腦先!
29/11/24 FRI COLD
今朝連板車都塞, 差不多一小段已經要行行人路, 咁啱撞到佢個同學, 佢又想同同學仔一齊行, 咁我就自己直接返工先啦, 今日工作係冇學生, 幾輕鬆呀! 一返去見到佢地係到食大餐吹水, 咁我唯有加入啦, 都要咁做架啦, 10點要去會議室聽training, 講做考試的做法, 因為下星期開始mock, 返去開始係要做所以update student profile, 其實都唔明有幾難做, 根本只係好簡單, 我只係想快做完佢就算! 午飯叮完個飯攞番去大房食, 然後做埋啲嘢咁囉, 放工要接仲仲, 跟住等嘢食, 食完都係睇電視打機, 老公揍咗仲仲去踢波, 我就整咗佢生日會個Backgroud, 咁又玩咗兩個鐘, 又再等老公買晚餐返嚟食, 食完休息啦!
27/11/24 WED COLD
今日又凍番，知道今日有戶外更，更加要做好準備，頭兩堂都算唔錯，只係跟一個佢又唔算太過份，小息去圖書館Katy攞埋仲爺份日禮物就，然後食飽準備上路，簡單嚟講今日EP回復發顛狀態，又得番嗰兩句，估到佢唔會肯走，但冇諗過佢同水飯房逃犯會挑機打架，搞到幾十人跟住哂，最好笑有個男老師請佢走咁濟，佢發顛話唔鍾意學校，個阿sir爆咗心聲，話咁點解你要返嚟，你而家可以走架喎，幾想笑出聲！最終飯筒嚟接手，送咗去佢房，我心諗夠鐘喎仲唔走，結果搞多差不多半個鐘先掟到佢走，竹又要寫部告，1點9先開飯，去hea埋嗰堂就放學，今日唔洗急接仲仲佢田徑，咁就好啲！晚飯肉骨茶比較簡單！
15/11/24 FRI COLD
終於捱到星期五, 本來以為今日可以輕鬆啲, 但原來唔係, 輕鬆咗頭兩堂啦, 都唔係可以hea嗰隻架啦, 嗰三個angles都唔angle架啦, 對住佢地真係好攰, 小息抖咗一陣, 第三堂又要接手件EP, 本來去到12點半咪好囉, 做咩要去到1點呢, 你地高層又冇人睇住佢, 佢咪又走咗去唔想走囉, 搞到我又要追啦, 最終飯桶會合咗我, 抬條友走, 終於可以放飯, 放到差不多第五堂, 又要去飯桶的英文堂, 仲有明明係另一個同事跟住3 angles, 但飯桶又唔知叫咗佢去邊, 咁佢就走咗啦, 好在今日我唔洗接細佬啫, 唔係點算, 我又唔知邊個有人接邊個冇人接, 好在撞到另一個同事解救咗我啫! 走得都好多嘢做, 先要買麵包, 再幫仲仲訂隱形眼鏡, 然後同子元攞藥先返去, 真係好凍, 返到去食嘢休息睇電視, 等老公揍仲仲踢完波返嚟買麥當勞!
13/11/24 WED COLD
今日真係好唔想返工, 都係因為啲無形壓力, 又要跟條EP, 陣間佢又唔肯走咁點呢, 頭嗰堂個學生上數學又勁搞事, 小息時個扮高層同事又話我應該要跟住阿邊個邊個, 但老實完全冇black and white講過, 請問邊個會知呢, 是但啦, 為份糧其實都習慣, 香港人咁夠奴性應該先頂得住! 今日好彩條EP又冇出聲又去咗飯筒到, 佢地12點半就抬咗佢走, 我又繼續捱埋嗰兩堂, 好在可以食個飯抖一抖! 放學因為唔急走人, 仲仲有after school club, 咁我可以去超市補給埋先去接佢, 回家後好攰, 咩都唔想做, 到老公返嚟沖埋涼我先開始預備材料, 食完飯又掛住睇youtube又10點多先去沖涼休息!
12/11/24 TUE COLD
今日本身過得好好, 個學生冇返, 咁就跟個list做, 一路都好好, 因為都係自己去安排, 到3:07已經諗緊12分就好行出去, 準時走人, 點知有個同事突然入嚟話叫我去跟EP, 我心諗吓佢仲未走咩, 重點係夠鐘就叫我送佢去某個老師到, 其實站於我嚟講係冇可能做到, 因為佢一見到我一定會鬧同走佬, 我就心急啦, 因為已經夠鐘, 我又已經唔見咗佢, 又冇人同我講唔見咗佢點做, 心急如焚咁我已經失咗方寸, 最終我放棄咗去搵佢, 話番比個老師聽, 仲要返大房放番低個radio, 已經差不多20分, 咩都唔理我衝去接仲仲, 去到得番仲爺一個企喺教堂門口, 佢話差不多想入去office搵人打比我, 我最緊張就係理個原因, 我唔想佢自己喺街等我咁耐呢! 返到去又要倒垃圾, 又要預備準備定晚飯啲嘢, 然後再去教會, 返嚟食完飯可以休息了, 不過仲係好不憤, 學校其實要檢討吓咁做對學校係咪真係好!
7/11/24 THU COLD
今日好在著夠衫, 返到去先睇到第一堂又要跟條EP行足一堂, 就咁一個鐘我已經行咗4千幾步, 真係好誇張! 到第三堂去做cover又要我去跟半個鐘, 雖然條EP去咗飯桶間房坐, 但我要唔出聲唔郁咁坐半個鐘都係辛苦架嘛! 終於之後可以回復正堂, 可以繼續行行企企食飯幾味, 打吓機同學生傳吓紙仔咁, 我自己都覺得好笑! 夠鐘放學走人, 接咗仲爺去郵局寄埋比聖誕老人封信, 郵局人員好正, 會配合埋交戲, 貼好郵票, 叫佢出出面郵筒入落去, 聖誕老人今晚會嚟收! 咁梗係要影埋相出吓post! 回家又可以休息啦, 今晚老公煮晚飯, 我係要準備少少嘢就得! 食完又睇吓電視咁, 然後沖涼休息!
4/11/24 MON WARM
終於要返工啦, 今朝睇個更表, 點解我會跟足一日EP架, 返到去再問, 原來佢返到12:30, 但我都要跟佢3個鐘, 其實都唔簡單囉, 又要寫底佢做咩又要跟住佢, 我今日決定唔遠攻, 嚟個近攻, 激到佢火起, 我就不知幾心涼, 反正你點對佢佢都小你架啦, 梗係唔好便宜佢! 終於捱到12點幾可以趕佢走, 我就可以放飯, 我決定放個長飯, 真係攰呀! 到點半返到去大房, 都係坐吓, 等到第五堂本來想求奇跟一個學生就算, 但最終佢冇嚟課室, 咁我就返咗大房扮哂嘢, check吓email到差不多放工時間就閃人! 接咗仲爺就返去快快手手又要出門口去球場, 轉咗冬令上咗巴士已經天黑, 去到球場條路黑哂! 回來抖咗一陣又要煮飯, 其實星期一都好攰!
