28/6/25

 28/6/25     SAT     HOT

今朝一早就要起身, 其實都係8點啫, 食完早餐就趕住出門口, 要去仲爺中學嗰到買二手校服, 其實佢唔多想架, 但真係平好多呀, 只係遲咗10分鐘到, 已經少咗好多嘢, 第一時間去搶校褸先, 跟住就係jumper, 呢啲最貴嘛, 然後就係PE衫, 可惜PE褸搶唔到, 得番啲細size, 唔緊要啦搶到幾多得幾多, 6件最後都唔洗30鎊, 真係慳咗好多, 揍咗仲爺返去就去買餸, 返到嚟都係12點咋, 早起身真係做多好多嘢, 不過下午就開始浪費時間, 仲爺開咗尤魚遊戲又冇睇, 但我就睇哂, 不過都唔係太明, 不過就一次睇哂6集, 所以黃昏先嚟做家務, 唔想拖到明天先做啦, 之後都係老公煮晚餐, 子元下午就已經出咗街同fd玩, 不過時間啱啱好, 佢返嚟都食得切飯!

27/6/25

 27/6/25     FRI     VERY HOT

今日係year 6 induction day, 仲仲都要去中學嗰邊, 早知可以正常時間揍佢返去我就唔請假啦, 早咗15分鐘返去蝕咗添! 返到去仲要兩個阿姐守門口位, 叫我搞掂就去sports hall集合, 諗住hea吓先都唔得, 可惡! 去到又要點名又要帶隊, 嗰個sixth form完全係偷懶hea做系列, 不過我嗰班人少, 又冇sen, 最多有幾個hea友咩都唔想做已經算好好! 有break 放有lunch time比平時已經唔錯, 只係熱到死死吓仲要PE堂好無謂, 我差啲曬到暈! 最尾放學環節都算順利, 我嗰組得一個未有人接, 最後阿姐見3:15就話我可以走, 好事! 快返去沖涼食嘢, 我都未食完佢地就出哂去踢波教波, 我就好好做隻蟲蟲啦!

26/6/25

 26/6/25     THU     HOT

今日又係跟顛妹, 都冇話公唔公平架啦, 有工就開啦, 控制到幾多得幾多囉, 冇咩可以做, 總之冇大單嘢就算, 放學最開心, 快手走人接埋仲爺就返去, 煮嘢食完又要快手帶仲爺去球場, 又要撘半個鐘巴士, 今次去Southall, 原來係5點半先開始, 咁就唔洗咁早啦, 塞埋車返去, 又係摺衫睇電視準備煮飯咁啦, 今晚食粟米肉粒飯, 簡單好食! 不過洗埋碗食埋雪條都差不多10點!

25/6/25

 25/6/25     WED     HOT

今日又要跟顛妹, 都真係幾攰吓, 因為你同佢講啲咩, 佢promise啲咩, 都係冇意思, 總之唔出大事就算, 佢個死對頭今日又冇得返, 所以應該都冇咩大礙! so far都係算平安, 第一堂數學堂, 忍唔住同老師吹水, 咁啱佢又係letty同holly班主任, 都算有啲話題, 反正嗰班垃圾都唔係學嘢, 不如我地吹吓水! 之後都算平實咁捱到放工, 接咗仲爺返嚟沖涼食嘢, 仲爺好似唔記得自己要踢波咁, 慢吞吞係要比人鬧! 我休息到5點幾本身諗住出門口, 老公返到嚟食埋麵車我去仲仲中學, 因為要聽講座, 都係歌功頌德咁啦, 大概都係嗰啲嘢! 聽完同另一個熟啲個家長吹咗陣水, 再去埋Lidl買埋嘢就回家, 幫手煮埋飯食完已經9點幾, 之後先沖涼休息!

24/6/25

 24/6/25     TUE     HOT

今日跟三隻小天使, 好攰, 好在醒目嗰個已經回復正常幫到手, 因為煩嗰個真係好煩, 真係想打佢一身, 但你又唔可以打佢喎, 只可以唔理佢, 因為真係冇意思! 然後繼續為做而做, 好在可以早啲食咗個飯, 咁放學返嚟又再食嘢, 原來午飯唔食飯真係會好快餓, 都唔係幾得! 返嚟食完嘢睇吓電視咁, 仲爺去踢波, 我打機打到咁上吓就要煮飯啦, 今晚有韓燒肉加生菜同包飯醬, 搶住咁食!

23/6/25

 23/6/25     MON     HOT

又要返工啦, 都知道今日唔太易過, 都係咁照開工, 基本上都係咁要寫低佢做過咩衰嘢, 又掟筆又大力閂門, 第二堂用筆掟到我隻手添, 佢真係好白痴, 都唔明佢諗咩! 第三堂本來係飯桶堂, 我亦諗住放飯, 見代課老師最後都handle 到, 咁我咪去食飯囉, 因為佢地午飯後PE我更加冇可能食飯, 點知就係呢半個鐘, 佢同顛妹就打起上嚟, 所以最終午飯時比訓導組帶咗去校長室坐, 我就可以閃人, 去咗大房打佢啲罪狀, 到最尾嗰堂先去炒吓散, 夠鐘就放工, 揍埋仲仲返嚟就食啲嘢再出門口去球場, 但去到等巴士又係冇車, 都係要等老公嚟接! 去完球場返嚟又要煮飯, 好攰呀!

22/6/25

 22/6/25     SUN     HOT

今日冇出過街呀, 所以都冇咩好寫, 朝早子元同Friend去咗打羽毛球, 我地9點幾先食早餐, 無所事事, 睇咗陣電視仲仲話打機, 咁就一路打咗一日啦, 老公去子元然後去咗試腳, 點幾兩點先返嚟, 叫咗麥記食, 又準備吓晚餐, 想試過油鹽水雞翼, 所以整起咗晚飯都冇咩要煮, 食完飯食埋涼粉同榴槤就沖涼休息!

21/6/25

 21/6/25     SAT     VERY HOT

今日係夏至, 即係最長日出一日, 哥哥就有更特別的活動, 去公園打麻雀, 簡直係宣揚國綷啦, 朝早佢就出咗去做gym, 約咗1:30去到公園, 最好笑一樣嘢係, 打麻雀最重要的麻雀, 竟然冇人帶, 好在都係10分鐘車程, 我就返去攞比佢地, 呢班友仔真係要學吓點清楚溝通! 終於settle好佢地, 就去janent嗰到攞埋丁麵, 再去broadway食嘢先, 買埋嘢再去超市, 返得屋企都差不多六點, 老公又要去車番啲枱返嚟, 子元佢地就去食飯, 老公就返嚟煮飯, 我就做清潔, 今晚簡單食牛腩麵, 未執枱佢同小施子已經返到, 咁洗完碗就食埋涼粉先沖涼, 我就返番我間冷氣房啦!

20/6/25

 20/6/25     FRI     VERY  HOT

終於到星期五啦, 都仲係好熱, 今日亦都要跟個麻煩友, 其實係激係但你都可以鬧佢, 最慘係飯桶嗰堂, 因為得番兩個學生, 咁就慘啦要一對一, 又唔知佢想點, 又要同佢講嘢, 嗰個鐘過得好辛苦! 終於可以放飯, 真係要休息吓, 不過真係好熱呀! 捱到放工, 快啲走人, 返去食吓嘢抖吓, 重點係老公訂的冷風機到咗, 佢話要打造海豹天地喎, 咁有個冷風機真係差好遠, 真係開咗冷氣咁, 熱浪好似會持續成個月, 都要買架啦, 晚晚熱醒都唔係辦法! 由於晚餐大家都唔係好食, 咁就煮咗肉醬, 要配咩自己嚟! 仲爺就走埋上嚟瞓, 有冷氣嘛!

19/6/25

 19/6/25     THU     VERY HOT

今日都係好熱呀, 幾時先熱完呀, 做咗咁耐人好難想像自己原來冇冷氣係咁生活! 知道今日又要跟三隻小天使都真係好攰, 都係啲例牌嘢, 相對地係比跟Y8的兩個痴線嚟得簡單! 放工快啲返去沖個凍水涼先, 然後都係hea, 熱嘛! 最後都係睇電視, 仲仲去踢波! 哥哥呢....去咗睇演唱, 一放學就出去啦, 明天仲要考試, 其實都幾大膽咁做! 8點多開飯食炸雞翼飯!

18/6/25

 18/6/25     WED     HOT

今日繼續係好熱, 又要跟3隻小天使, 又有PE堂, 仲要三隻小天使又嘈交, 加埋Ellie冇返, 本來跟嗰個同事就嚟咗一齊揍, 不過佢又好似冇咩跟過佢地咁, 唔係好知點做! 好在今日啲學生早放, 都好啲! 但跟住就煩啦, 我琴日明明睇咗email知我跟邊個, 咁今朝就冇再check email啦, 原來今朝又再send多次, 加咗話學生放咗學就返大房開個會先放飯, 咁都算啦, 再叫咗我入房話我又喺上堂時用電話, 頂, 咁都冇嘢做, 個個學生自己畫緊畫, 唔通走埋去幫佢畫咩, 加上我都協助完佢做哂嘢啦, 睇嚟我真係要搵啲嘢放喺個枱面做先得, 唔好收收埋埋, 要光明正大仲好! 之後係咁搵人呻, 真係好火! 終於放工時見到Letty, 佢又要呻, 考ART迫住喺個好熱的細房仲要有風扇但佢坐角落頭, 唔攝衫又比人話, 佢話我都畢咗業只係喺到考試咋! 返到屋企即係沖個身食啲嘢打吓機睇吓電視呻吓, 睇劇都係好事, 入咗戲唔洗煩!

17/6/25

 17/6/25     TUE     HOT

個heat wave要熱足一星期, 真係搞唔掂! 一早已經睇咗更表, 琴日輕鬆咗一日, 今日又要跟顛妹啦, 都係咁過啦, 佢叫做冇整啲太煩嘢出嚟就算! 不過冇人嚟替飯更, 搞到我餓到1點幾, 襯唔想上嗰堂先搵人嚟頂, 咁又上少半堂! 終於捱到放學, 快啲走人, 因為要去天天買豆腐, 先再去接仲仲, 返屋企仲要倒埋垃圾先可以休息! 繼續都係冇食麵, 只係食啲健康嘢, 都係熱到唔想郁, 等仲仲出咗去踢波就追吓劇先, 之後仲要煮飯摺衫, 食完飯洗埋碗都差不多10點, 沖洗涼都好熱!

16/6/25

 16/6/25     MON     HOT

今日一開更表出嚟我竟然跟Tara, 本來都已經舒服架啦, 佢仲要喺水飯房, 咁我就可以睇足一日小說, 梗係睇慶餘年啦, 雖然期間又要做飯更, 又要突然間去吓大房睇吓場, 所以都要行嚟行去, 不過比起原來嗰更已經好好多! 準時放工走人, 接完仲爺返去, 不久又要出門口揍仲仲去球場, 今日真係好熱呀, 撘巴士都好去熱, 所以同老公會合到可以坐有冷氣車真係差好遠! 回來其實攤一陣又要準備晚飯, 今晚又燒味飯, 不過燒肉食唔哂, 明天可以豆腐火腩飯!

15/6/25

 15/6/25     SUN     WARM

今日冇出過門口, 今朝7點幾先醒已經好啲, 仲仲點幾走上嚟話骨痛, 原來發燒, 估佢應該係發骨節, 因為佢真係高咗, 但都係要食吓藥, 跟住都係煮早餐食啦, 食完又冇咩做, 都係係咁睇電視, 有波子打機直播! 同阿媽講埋電話, 就煮埋個粥做午餐! 食完都係繼續hea, 之後搵到套韓劇睇, 好正! 7點幾煮好飯食, 仲仲開咗inside out咁就睇埋洗碗沖涼!

14/6/25

 14/6/25     SAT     HOT

今朝5點幾就醒咗, 瞓唔番, 可惡! 另外終於有機會試吓坐架替代車, 真係日本車user friendly, 食完早餐hea咗陣出去買餸了, 返嚟放低啲嘢又要再出去costco, 做到只買必需品! 不過買埋嘢食返嚟已經4點幾, 所以食完唔可以正常晚飯時間食晚餐! 我就7點幾先嚟吸塵抺地, 跟住就出事啦, 我見子元又面黑, 原來又係比人局去試腳, 本身諗住做中間人, 但最終都頂唔住, 叫埋子元出嚟講, 當然最尾都係鬧交佔咗一半, 我地兩個人講佢又唔like咁, 唉! 愈老愈固執! 最終差不多10點幾先食簡單晚餐, 黑椒漢堡扒飯咋!

13/6/25

 13/6/25     FRI     HOT

今日好熱呀, 仲要比件顛妹我, 真係好攰! 不過佢自動獻身玩出火, 判咗放飯加監, 我都要陪佢坐, 都係煩架啦, 但好過周圍行, 是但啦, 今日已經好熱, 我咩都唔想理! 有樣開心嘢就係有個英文老師請我同另一個同事食雪條, 佢北方口音好重我初頭完全聽唔到佢講咩, 好在我同事話番我知咋, 真係有啲尷尬! 終於放學啦, happy friday, 返去沖個身快啲抖吓, 又做咗隻豬, 食完就攤, 攤完又食, 完全冇動力郁!

12/6/25

 12/6/25     THU     HOT

今日咩鬼enrichment day, 都估到有改動, 但又要跟番琴日搞我燥底嗰條友, 不過好在叫做今日都唔會同顛妹有太多交集, 因為一有佢地就冇意義地對罵, 查實我係完全聽唔到佢地鬧咩, 我估都係小老母啲friend啦, 但總之就係煩又攰啦! enrichment day本身都悶架啦, 好就好在佢地早放, 我地又可以放早飯, 仲係放個長飯, 幾好, 不過我熱到要出去買雪條食, 返嚟就做埋個training, 都係上網click吓嘢就算, 夠鐘走人返去抖吓, 最終都係餓要食啲嘢, 摺埋衫咁啦, 跟住準備晚飯, 老公同仲仲踢完波返嚟先煮, 用開咗真空煲真係好方便!

11/6/25

 11/6/25     WED     WARM

今日本來諗住好好過舒舒服服過, 點知又轉咗人, 辛苦咗一日, 我簡直係身心疲憊! 除咗第一堂, 堂堂都比人趕出課室, 一係就迫我call人, 連老師都只係想趕佢出去, 難為我跟佢一日! 放學前終於比人的咗去訓導房, 我唔理啦, 夠鐘走人, 好攰! 返到去真係攰到咩都唔想做, 連嘢都唔想食, 個人亦好燥, 今日仲要教仲爺學習, 所以keep住都係燥, 之後可以攤喺到時慢慢好番啲, 食完飯再攤吓, 但其實都仲係攰!

10/6/25

 10/6/25     TUE     WARM

今日都係算不過不失啦, 返到去就比阿姐簽咗放假文件先, 跟住就開工啦, 然後都係有啲攰咁啦, 但都係易的一日, 準時食飯準時放工, 就去接仲爺啦! 返嚟又要倒垃圾, 之後都冇煮嘢食, 只係食吓其他嘢, 仲仲又要做吓練習同音樂然後去踢波, 我都咁上吓時間就要煮飯啦! 食飯時睇埋大結局, 洗完碗就沖涼休息! 

9/6/25

 9/6/25     MON     WARM

又要開工啦, 今日都知喺難捱架啦, 揍咗仲爺就返工, 返到去都係照開工, 但跟顛妹佢係可以唔理你就唔理, 都冇咩可以做, PE堂有另類活動, 但主力顛嗰班都喺到, 又出事啦, 麻鬼煩! 最終去番普通PE堂嗰邊, 是但啦我都理唔到咁多! 之後都算normal架啦! 我午餐就11點半都未夠就叫我食, 太早啦! 捱完一日準備收工, 收到EMAIL話安排咗30/6可以照ultra sound, 咁就要請假啦, 但未找到阿姐簽名! 放工返到嚟終於有一個星期一係唔洗趕, 因為老公今日去攞架替用車, 所以請咗假, 攞架又係日本車, 老公話都係日本車好渣! 攤抖完煮飯, 老公返嚟整埋個雞就開飯, 但之後追劇又追到夜咗先沖涼!

8/6/25

 8/6/25     SUN     WIND

今日主要有兩大活動, 中午要去mass, 然後哥哥香港人足球喺oxford有比賽, 所以起身食完早餐摺埋衫啱啱好, 今日12點個mass喺學校操場, 不過好大風呀, 最搞笑係大風到吹跌咗啲聖體, 搞到神父幾狼狽! 一個鐘頭車去到oxford, 路過services買包食, 跟住就係球場, 今場波比較特別, 因為係Konter三位兄弟同場, 梗係開場散場都要影相啦! 今日好大風呀, 子元都踢到唔係好舒服, 我都吹到頭痛! 之後去咗食日本嘢, 係幾好食的, 但一大班人食日本嘢唔係幾夠放囉! 食完回程沖涼休息啦, 已經好攰!

7/6/25

 7/6/25     SAT     RAIN

今朝5點幾醒過, 好在瞓得番, 醒已經係10點多, 起身食早餐, 然後就要出去, 先要去Broadway攞貨, 全部都係仲爺啲嘢, 跟住就去超市買餸, 已經有啲攰, 然後老公要買定engine oil下星期一整車時換埋, 咁就4點多先返到屋企, 老公整咗碗仔翅一齊食, 抖到咁上吓我就做埋清潔先, 然後都係等開飯, 今日簡單啲, 食燒肉叉燒雞肶飯!  

6/6/25

 6/6/25     FRI     WARM

終於捱完一個星期啦, 今日係好free呢, 因為包頭嗰班過節, 基本上得番三分一學生, 又因為咁少學生, 所以都唔係好上堂! 第一堂PE咁啱撞到Letty Holly佢地考完試, 順手比埋張卡佢地呢, 又摘吓車里子咁啦! 之後啲堂都係無所事事, 所以我又打吓機, 老師又播吓戲, 最尾嗰堂直情睇埋慶餘年小說, 唔錯! 放工直接返去就食嘢, 佢地出去練波等等, 我就喺屋企喺咁睇電視, 都有摺咗衫, 晚餐各自食, 我整咗沙典魚意粉, 睇電視睇到11點幾, 要沖涼休息, 眼瞓啦!

5/6/25

 5/6/25     THU     RAIN

今日又落雨, 朝早都好大, 所以返到去都濕哂! 雖然明知道今日轉咗更要跟顛妹, 但都抱住一絲希望平平安安, 不過佢都係要令人唔安樂, 又倒水落樓又大叫, 最尾嗰堂代課, 我捉咗佢去大房, 搵機會同阿姐講等佢比人片吓, 冇辦法佢真係太顛! 我之後準時放工,  返去揍埋仲仲, 要食嘢同睇電視, 等個腦休息吓, 不過都好多公務要處理! 然後比我搵到套新劇睇, 雖然係無線劇, 但係合拍片, 不過又幾好喎, 一路睇到食完飯沖涼休息

4/6/25

 4/6/25     WED     WARM

今日都好攰呀, 精神上體力上, 都好攰, 工作上攰啦, 屋企上都攰, 我其實都唔係好想再諗一次, 再寫一次, 因為即係要自己再重覆一次個疲憊, 反正就係現實永遠都係現實, 好多嘢都好實際, 你冇得唔低頭冇得唔選擇, 尤其是錢銀, 冇就係冇唔夠就係唔夠, 有時只可以去支付最基本嗰啲, 收入唔可以大過支出係基本原則, 但點解咁多年佢都係唔明, 呢樣嘢係令到我好攰架! 而家叫做個仔大咗, 會同我一齊分擔吓個情緒, 都係安慰的, 但最終都係要返番去同另一半講同討論, 我覺得我啲EQ其實真係已經高咗好多, 最終只係同大寶咗咗堆好Emo的文字, 因為嗰吓真係好絕望吓, 唯有用文字去發洩, 都唔知咁叫做EQ高定收埋收埋, 我淨係覺得自己淪落到只可以用文字發洩已經唔係一件咁健康的事, 喊都唔敢喊出聲, 咁真係好咩, 我真係唔知, 我唯有繼續令自己堅強落去, 期待光明來臨的一日!

3/6/25

 3/6/25     TUE     RAIN

今日先至星期二, 真係開始有啲攰, 可能今日係揍Ellie, touch wood佢今日都算合作喎, 冇咩屎比我, 反而係個textile老師, 痴撚線架, 重點係又唔比你幫個學生手, 咁我攞個機出嚟睇兩眼佢又出聲, 真係好仆街! 佢呢啲係專業咁我唔係咩, 調轉你做呀! 笨實! 除咗佢其實大至上今日都OK, 係最尾嗰半個鐘要扮工, 好在比我搵到三隻小天使, 個同事直情覺得我救咗佢咁, 因為數學堂, 佢應該有份卷咁要佢地做番, 但嗰個同事數學好差, 我嚟到基本上9成做哂, 佢只抄, 梗係救佢啦! 最後準時收工, 接埋仲爺返去就實行新時間表, 希望唔好半途而廢啦! 晚上掛住打機遲咗煮飯, 雖然只係用壓力煲煮肉骨茶但都要時間架啦, 所以洗得碗嚟都9點幾10點先去沖涼呢!

2/6/25

 2/6/25     MON     WARM

今日算係唔辛苦, 第一日開工算係咁, 同埋個個都好欣喜我個頭, 唔理佢真定假, 當係真先! 朝早唔洗揍仲仲, 可以遲少少起身, 慢慢出門口! 返到去開工, 算係簡單, 都有嘢做吓, 整吓仲爺個放學時間表! 係放飯喺大房時真係幾悶, 都冇咩特別, 反而係有個history老師問我中文識講咩話, 我話廣東話普通話都得, 佢就話會問我阿姐可唔可以去幫手, 因為佢有個學生真係完全聽唔明書, 我果然有好多客仔! 放學可以直接返屋企, 快手食啲嘢要揍仲仲去球場, 佢最enjoy呢程車我傾偈! 返嚟之後做好埋仲仲個放學時間表, 佢係時候要為升中做準備! 之後都係準確煮飯啦, 明明諗住整魚柳又冇咗回事, 最後唯有烚腸仔頂上!

1/6/25

 1/6/25     SUN     WARM

今日最後一日term break啦, 明天又要開工, 但我冇出過街, 只係煮早餐, 做清潔, 摺衫, 整嘢食, 睇電視, 咁就過埋呢日假期啦, 不過有工開係好事, 唔好怨! 老公就今朝出咗去踢波, 我地齊齊喺屋企無所事事, 又冇咩電視節目好睇, 其實係有啲悶, 但都冇地方好去, 都係留喺屋企好啲! 晚飯睇緊膠戰, 睇咗十萬九千次都仲係笑死!