30/4/25

 30/4/25     WED     HOT

今日把心一橫對付3隻小天使, 但估唔到又轉咗人, 要我去跟個year12考試, 都冇咩所謂, 又當學多樣嘢咁啦, 其實都睇到啲唔應該的東西, 但佢又收得快, 又冇第三者在場, 我都隻眼開隻眼閉, 你好做時我又好做, 困喺個房4個鐘都幾喺嘢, 咁set好架部咪做吓嘢時又打吓機囉, 搞到1點先散場, 先去放個飯, 然後就要去開工, 不過都係跟Ellie多一個鐘, 我都係keep住今日個心態, 反正又唔係咩大人物的堂, 夠鐘就走人, 先去買啲餸, 返屋企抖一陣又要出去接番仲仲, 返嚟佢食完嘢就要學唱歌, 老公今日請咗假睇子元比賽, 順手溫書喎, 由得佢啦! 跟住我又摺衫又要搞掂仲仲做SATs, 我都算係咁啦真係盡量比佢做多啲, 盡人事聽天命啦! 最後老公煮飯, 食完攤咗陣先沖涼休息!

29/4/25

 29/4/25     TUE     HOT

今日好忙呀, 又朝忙到晚, 好辛苦! 朝早先要提早起身因為仲爺有boots up class, 揍咗佢返嚟又要倒垃圾同辦吓大事咁, 已經有啲趕, 返到去今日又要跟Ellie, 佢不停挑戰你底線, 要應付佢真係好攰! 終於放學啦, 但都要快手返去, 因為book咗4:20仲仲睇牙, 最終點趕都係遲咗10分鐘, 好在講完佢都比我睇, 仲爺就例牌緊張, 最慘係要照X-ray, 又要咬住舊嘢咁, 搞到巫婆發哂脾氣, 好在最後都拔了, 但原來仲有一隻BB牙未拔, 3個月後再覆診! 最難搞係回程, 老公本來過嚟車我地好快, 點知突然間塞車, 我唔想比錢撘巴士, 咁啱哥哥回程架車到就叫仲爺上車算, 哥哥接應佢! 我就等老公嚟接我, 估唔到等咗大半個鐘, 但返到去都係差不多時間, 又要快手食啲嘢, 老公揍仲仲去踢波, 我預備好餸就要去教會, 返嚟食得飯洗完碗已經10點幾!

28/4/25

 28/4/25     MON     HOT

今朝又改咗唔係跟三隻小天使, 變咗件麻煩友, 真係好麻煩, 叫唔停比二姐出嚟鬧, 重點係好似我唔做嘢嘛, 但我已經叫咗佢十萬九千次, 佢唔停都好難搞, 個老師又遲到, 痴線! 本來我都有方法處理佢, 最慘係最尾飯桶嗰堂, 真係最難捱, 總之我準時3:15走佢冇嘢可以講, 接完仲爺返去諗住快手搞掂食吓嘢就出門口去踢波, 點知一摸個袋我冇帶key喎, 嗰吓真係顛咗咁, 打咗比老公問佢點好, 佢叫唔好去踢波, 等佢地返嚟先入屋, 但我又唔想, 一來為咗咁唔踢波唔值, 二來太熱啦喺街等個幾兩個鐘唔掂, 博一博問隔離屋, 試吓後門有冇開, 但都係唔得, 最後, 鄰居竟然肯車我去搵子元攞key, 咁樣5點前已經返到嚟, 換好衫老公返到就可以揍佢去球場, 咁我可以休息吓, 7點多先開始煮飯食!

27/4/25

 27/4/25     SUN     WARM

今日我全日都喺屋企，一心等睇金像獎，起身食早餐，之後老公帶仲爺去比賽，我就睇電視啦，點知可能好多人貝，線路分配唔到，結果好斷線情況下睇完，諗住回看可以睇番，點知最後嗰幾個獎就播唔到，可惡！咁唯有煮飯，食完要趕老公上去温書，成日懶，激死！

26/4/25

 26/4/25     SAT     WARM

今日冇咩做, 子元下午要去踢波, 但我真係唔想去, 所以朝早起身食完早餐買完餸返嚟, 捉仲爺做埋功課, 佢地就一齊出咗去, 我就hea吓然後開始做家務, 都係清潔啫但慢慢做, 做完就繼續睇吓電視煮午餐食, 不過其實都已經4點多! 食完咪繼續睇, 佢地7點多先返嚟, 但佢地都未餓, 咁就8點多先開始煮晚餐, 都係食肉醬意粉咋!

25/4/25

 25/4/25     FRI     WARM

話咁快又星期五，今日日都係輕鬆過啦，冇咩特別，係最尾PE堂個學生要跑12分鐘，我又要一齊跑，比我想像中夠力氣，不過放工返到嚟就好攰，放工去藥房攞埋藥就返去，食完嘢放題睇電視，先追埋套家族計劃，又係要等season2，跟住要摺衫嘛係時間睇番廣東話，又睇慶餘年2，咁又一日！

24/4/25

 24/4/25     THU     COOL

今日都係如常返工返學，工作正常冇特別，直情有啲悶！終於放得學了，準時走人接仲爺，返去食埋嘢都要捉仲仲做數，都係有好多唔識，教得幾多很幾多啦！然後佢地去踢波我就追吓劇，夠鐘就煮飯，又開吓戲睇！

23/4/25

 23/4/25     WED     COLD

今日係子元17歲生日呀, 不過早兩日慶祝咗, 所以今日我除咗出咗個生日post之外就冇做啲咩! 朝早如常返工返學, 今日下午要覆診, 所以請咗半日假, 都係好事, 啱啱開工唔好咁辛苦, 替埋飯更我就閃人, 返屋企放低架車再行過去GP, 都等咗一陣啦, 個醫生口音都幾重我有啲聽得辛苦, 不過叫做明, 簡單嚟講會幫我book照肝, 然後再驗多次血, 再開多咗維他命D比我食, 因為上次驗完血我唔夠維他命D! 睇完返屋企就整番熱個飯食咗先, 肚餓呀! 然後就hea到3點幾去揍仲, 返到嚟開始hea, 哥哥打完排球先返嚟, 等老公煮飯食完佢又睇吓波咁!

22/4/25

 22/4/25     TUE     COOL

今日要開工啦, 朝早起身都有啲困難, 都要啲時間! 今日只係training其實本來有啲怕, 因為會好悶, 但今日只係department training, 所以都算係唔太悶, 時間都過得快, 有嘢抄吓時間係過得快啲, 中間又放吓break咁, 食埋飯, 再聽多一轉talk, 3點就可以走人, 早咗少少我就去Lidl行咗轉先接仲爺, 返到去仲要倒垃圾, 然後快手煮嘢食, 午餐只係食咗個Pho真係唔飽! 點知之後叫仲爺快啲做埋英文同數先上唱歌堂, 條友唔識又唔出聲, 教佢時佢又趕住話上堂前要再練歌, 怪我好阻住佢, 但佢係咪應該之前就已經要練好唔係要上堂前先練呢, 激死我! 之後佢地去咗踢波, 我就睇機煮飯, 冇佢咁好氣, 真係好火! 

21/4/25

 21/4/25     MON     WARM

話咁快又假期的最後一天，都忙碌呀！朝早瞓到10 點，快手起身食啲嘢因為11點要去GP nurse check，除咗仲仲3 個都要，不過唔同時間，我去先，佢話要抽埋血，我馬上通知佢地，我就慘啦條友技術唔好抽唔到我，最終要抽手背！快手3個搞掂就12點幾，去broadway攞蛋糕，買生日臘燭等，再買埋咖啡就回程，提早食蛋糕影相慶祝子元17歲生日，時間過得好快！跟手要整埋個櫃同摺吓衫，5點要出門口，去食韓燒！90分鐘實在太短，轉吓眼已經夠鐘，咁就好滿足咁返屋企，早啲休息明天開工！

20/4/25

 20/4/25      SUN      WARM

今朝佢地3個去哂踢波，我就差不多10 點起身食個早餐，見老公未返問吓，又話踢到10點嘅，最終差不多12點幾先返到，又要處理子元幅牆又要煮嘢食去開party，最終3點幾先去到，好在大家都唔係準時2點到！去到都係食同吹水，今次冇5家人，都好玩，差不多10 點先走，都夠攰了！

19/4/25

 19/4/25     SAT     WARM

今日好似好忙但又唔係好忙咁, 首先今日已經瞓得唔好, 老公又朝早同仲爺去練波, 搞到我都一早醒咗, 食完早餐老公就先要拆咗子元個櫃, 開始搞個新櫃, 油完防水層就去超市買餸, 返到嚟老公繼續整哥哥間房, 我就間中幫吓手, 又摺吓衫咁, 都要預番時間早啲食飯, 因為今晚係領洗的日子, 7點半要去教堂, 全程差不多兩個鐘, 今次好重儀式感, 完成哂全部嘢啦, 得我一個領洗真係好特別, 完咗彌撒收到好多祝, 佢地真係好吹得水, 我都係見差不多要走了!

18/4/25

 18/4/25     FRI     WARM

今朝瞓到10 點幾，但都係攰咁！不崩都要起身，子元要去個town試腳，老公叫我地一齊去行吓，都放咗咁多日假冇出去就去行吓，半個鐘車啫！本來想去咗一齊行，但時間好尷尬，最終等哥哥踢得我地就快閃，去咗high street行吓影吓相，都幾多位打吓卡！4點要去接番佢又話趕返嚟教波，條友又唔睇清楚教練最終通知咗唔洗教，好在我地喺附近買嘢可以接番佢先返家！返嚟都係煮飯食同睇埋大結局咁啦！

17/4/25

 17/4/25     THU     WARM

今日冇咩特別嘢！起身食早餐，叫仲仲去做功課，跟住就出去打籃球，玩到2點前一定要返，哥哥要出去做gym，我地就整午餐，我仲要解咗舊豬shoulder，手軟！同仲仲一齊整牛角包，好食！6點幾Barry一家嚟咗，吹水食飯咁，佢最終睇埋曼聯先走，辛苦仲仲又要揍住佢，仲爺都好叻仔！

16/4/25

 16/4/25     WED     WARM

今朝佢地又有波練，不過起身嘈醒我囉，所以我9點多睇夠機都起身整早餐食，整完佢地就返到，食完hea吓，仲仲要做數學同英文，我就去超市買吓嘢，估唔到撞到Barry一家，一齊買咗陣嘢我都走先，返去煮咗煙三文魚意粉，兩個爭住食呢！然後都係hea同夠鐘就煮飯食，今晚係睇波送飯呢！

15/4/25

 15/4/25     TUE     COOL

今朝子元要去GP覆診, 咁新GP嘛, 我都想順手去book埋, 就一齊去啦, 仲爺唔關事, 佢繼續瞓緊覺, 到我地返嚟佢都未醒! 不過佢都要起身食早餐換衫, 哥哥去攞完藥就出去練波! 我今日就有啲無無聊咁, 都冇咩做咁, 連劇都冇咩啱睇, 總之都唔知自己做咗啲咩又一日! 突然間心我喺地區group見到有個衣櫃啱哥哥嗰到裝上牆, 即日有得攞, 但要8點後, 都冇所謂啦攞咗佢再整啦, 咁就夜咗先食飯, 我又話佢知有套膠電影講射鵰佢又睇哂先沖涼!

14/4/25

 14/4/25     MON     WARM

今日又冇出街，瞓醒佢地已經練完波返嚟，咁就食早餐摺衫，因為哥哥有同學嚟玩，不過教仲仲做數又教到我火起！好在客人到之前已冇事！嚟到一齊玩麻雀，教外國人打牌很奇怪！期間整吓pizza食，之後細佬打咁我就上房聽三叔，佢地都玩到6點幾，所以煮飯食得嚟都夜！

13/4/25

 13/4/25     SUN     WARM

今日冇過門口，本身應該去教堂，但瞓得唔好，醒咗兩次後再醒已經11點，趕唔切，咁就算啦慢慢食早餐做清潔，然後子元話打機，期間又食吓嘢，同嫲嫲傾吓電話，之後子元又話轉打牌，咁就齊齊打，仲可以邊打邊準備晚飯，同埋仲爺打所以好慢，但都好玩嘅！食完洗埋碗就沖涼休息！

12/4/25

 12/4/25     SAT     HOT

今朝9點未夠要起身食早餐，要去教會rehearsal，下星期六的領洗，我準時都係第一個到，得我同神父時襯機同佢講過兩年要入籍搵佢做referral ，跟住就係rehearsal，搞到差不多12點走得，咁就返屋企，老公仲未揍仲去買陣間生日會禮物，2點就去麥當勞參加生日會！襯佢去生日會時，我地就去中超買埋嘢先接番佢，然後就係hea!因為晚餐食牛腩麵，老公負責！最後睇埋三命大結局，好好睇！

11/4/25

 11/4/25     FRI     HOT

今日照常起身煮早餐食，然後老公話約到正正，仲仲可以去佢屋企玩，咁唯有叫佢快啲做埋練習，等正正媽媽嚟接佢，老公都差不多返到，咁我地先去買咗牛腩再食埋嘢就去超市買埋餸，再揍哥哥去教波，老公就接埋仲仲去踢香港人足球隊，我就做蟲蟲，不過冇摺衫，睇吓電影咁囉，等佢地買麥當勞返嚟食！

10/4/25

 10/4/25     THU     SUNNY

今日瞓到9點幾先醒, 10點幾先起身梳洗煮早餐, 幫仲嘢再清潔多次張床, 食得嚟都11點幾12點啦, 又要趕仲仲去做功課, 今日又做得好差, 唔係佢問題, 係啲問題好難咁, 一要做代數嗰啲佢就唔明, 都要教架啦, 等佢喺學校學就死得! 終於做好哂可以出去打波啦, 去到打咗一陣, 有個肥仔又嚟打, 咁我就叫仲爺叫佢one on one, 咁我就唔洗陪打, 最終玩到4點幾5點要走啦, 返去食啲嘢, 因為都冇整午餐食! 到7點幾要煮晚餐啦, 簡單今日只係食蒸雞脾就算, 已經好好食! 

9/4/25

 9/4/25     WED     WARM

今日冇咩特別嘢做，但一早醒咗，睇機到9點多，梳洗煮早餐，食完先做功課，今日仲仲又突然醒目咗咁做得好好，可能我話晏啲出去打籃球，又有得整牛角包，佢個人即刻有動力！咁做完功課同阿媽傾完電話就出去打波，返嚟食埋午餐就hea吓！繼續追吓劇先，摺埋啲衫煮飯，咁又一日了！

8/4/25

 8/4/25     TUE     WARM

今朝瞓到9點幾10點先起身啦, 整早餐食完就要倒垃圾, 之後仲要搵仲仲的英文同數學練習, 一開始叫佢做exercise就又呢樣又嗰樣, 總之就令人激氣啦, 最終都做得哂, 但又激咗我幾次囉! 食完pizza加肉丁米做午餐, 開始無所事事睇劇, 放假就是hea! 今晚要去教會, 佢地真係好吹得, 我除咗聽都冇咩做, 目標為本! 返到嚟就有飯食, 洗埋碗沖涼都已經11點!

7/4/25

 7/4/25     MON     COOL

今朝老公又唔閂鬧鐘, 可惡, 搞到我之後係咁發夢! 8點幾醒咗起身啦, 因為又要煮早餐, 然後再去costco買嘢先, 再揍仲仲去踢賓仔, 因為去到未夠鐘就比佢喺遊樂場玩咗一陣! 放低咗佢就返屋企, 都好多嘢忙呀! 先要執咗個床下底, 將仲爺啲公仔收鬼咗佢, 實在太多啦, 放喺房都唔知做咩! 跟住就吸塵抺地摺衫! 老公返嚟快手食嘢, 然後就要上駕駛改進課程, 好在係網課, 應該都冇咩問題! 咁我就睇住電視摺衫然後再煮飯, 食飯時睇三命, 又睇咗兩集已經10點幾, 要沖涼啦! 

6/4/25

 6/4/25     SUN     WARM

今日都有啲忙又好似好閒咁, 起身食完早餐, 要預備今日要去教堂, 跟住就去買餸, 不過之前買咗咖啡先, 做哂啲嘢返屋企都差不多4點, 咁都唔再出去costco, 明天再算! 跟住又要處理買返嚟啲餸, 又等老公整乾炒牛河食, 一碟碟炒食得嚟都6點多, 搞到晚餐都唔多想食, 所以就冇煮添啦! 一路睇chill club推介年度榜, 三個幾鐘都好好睇, 同平時啲頒獎禮都好唔同, 似show多啲, 正! 睇完都9點幾要沖涼! 

5/4/25

 5/4/25     SAT     WARM

今日我冇出過街，佢就去咗練波，因為今日送仲仲張新床嚟，基本上佢地返嚟食完嘢就開始執咗間房再砌床，佢個房真係好dirty，幾經辛苦完成哂，叫咗外賣食，已經9點多！食完仲要執埋張書枱，間房大咗好多，我都可以沖涼休息啦！

4/4/25

 4/4/25     FRI    HOT

終於返埋今日放假啦，今日仲要係最輕鬆嗰個，基本上唔洗做，咁啱佢嗰班又有香港人，咁啲時間都冇咁難捱，等啲學生走哂，我地又要staff meeting埋先，不過有嘢食都好啦！校長都醒目，講咗冇20分鐘就放人，我可以去超市行陣先接仲仲，返屋企會合再出去食嘢，去broadway食咗間泰國菜，幾好喎！再行咗就回程，返到嚟佢地又換衫出去，哥哥教波，仲仲練體能，我就喺屋企摺埋啲衫同煮晚餐！食完繼續睇三命，堅好睇！

3/4/25

 3/4/25     THU     WARM

今日終於可以輕鬆啲, 返到去就照樣開工啦, 冇咩特別, 第一堂原來唔知點解又唔係上堂, 去番form做類似討論嘢, 不過我個學生完全唔關事啦, 佢咪繼續畫公仔, 我就睇吓機咁! 今日上堂基本都係hea, 最後一個返學日啦嘛, 所以我都算係易過, 只係最尾PE堂佢地又跳just dance, 我要陪佢一齊踢咗一首已經夠我攰, 我真係完全做唔到運動咁! 終於放學準時走人, 接埋仲仲返嚟都係休息吓咁, 本來應該摺衫但冇做, 上咗房開電腦又要煮飯啦, 唯有明天先再摺啦! 食飯繼續睇套"三命", 完全估唔到係咁拍法, 勁! 

2/4/25

 2/4/25     WED     WARM

今日除咗攰我冇嘢想講，真係好攰，三隻小天使真係唔係講玩，我覺得堅係難揍，叫唔聽講唔明，痴鬼線！PE堂又係咁要跑，唉，總之就攰啦！終於放得學，快啲走，去超市shopping吓，再接仲爺返去先食個杯麵舒暢吓，再煲吓電視咁！終於有嗰套混沌少年時，睇咗唔停得！追咗兩集！

1/4/25

 1/4/25     TUE     COOL

返工嘅日子其實都幾悶，不過悶即係冇事發生，係好事！朝早有啲趕，唔記得仲仲要補課，所以冇特別早起身， 不過都趕得切！返到去開工，頭兩堂都要扮吓嘢，之後RE完全放養mood，我都好自由，只係佢地又排錯飯更，睇住佢地食飯自己又餓真係好慘，等到點幾先有飯開，食飽捱埋嗰堂收工，接埋仲仲返屋企倒埋垃圾休息，夠鐘先煮飯！