31/7/25

 31/7/25     THU     WARM

今日又係冇出過街啦, 太悶有時都會令人唔知點咁, 最衰係想搵外快又唔知可以點搵, 想幫補吓都冇咁! 起身食完早餐要趕仲去做功課, 我有啲無所事事咁, 到12點幾先煮午餐, 又諗唔到煮咩, 所以都係煮魚蛋米粉同餃子, 食完抖吓, 仲爺又做埋佢啲嘢, 跟住就做埋work out, 然後打吓機咁啦, 總之個人就好屈悶咁, 等老公返嚟沖完涼佢就煮晚餐, 我地就打吓Olympic咁等食飯!

30/7/25

 30/8/25     WED     WARM

今日又係冇出過屋企的一日, 出咗兩日街, 係應該閉吓關! 老公起身返工已經嘈醒咗我, 不過我都係9點先起身, 但唔知點解冇咩心情, 咩都唔多想做, 早餐都唔想煮, 但最終都煮咗個麵, 然後要摺埋啲衫先, 仲仲算合作自己跟時間表做嘢, 午餐都好lazy, 我自己想食粥, 咁佢地就焗pizza算! 食完就繼續無聊睇電視, 好悶咁都唔知點咁, 老公揍埋子元踢完波返嚟, 沖完涼佢煮飯, 食完好熱呀, 快啲上房沖涼息!

29/7/25

 29/7/25     TUE     WARM

今日約咗May佢地9點多去接佢地, 然後去食日本蛋糕, 又真係幾好食喎, 未食過佢啲包, 估唔到咁正! 跟住就去埋買今晚食的刺身, 再行埋natural natural, 佢地要返去執行李check out, 我地返去接番子元佢地就出發去食ta ka, 午餐食呢到最抵! 下一站就係去韓超, 所以係我地3個大人去, 另一架車就去玩高卡車, 子元就返咗屋企自由自在! 韓超真係好多嘢買, 咁又買咗四十幾, 可惡! 最後去埋買生蠔就回程, 然後就係咁食的晚餐, 由頭盤食到甜品呢, 生蠔刺身, 口水雞薯粉, 曼魚飯, 西瓜珍珠, 奶茶! 真係冇得輸! 佢地早啲要走啦, 所以9點幾就要走!

28/7/25

 28/7/25     MON     WARM

今日阿May佢地會過嚟玩, 但要交埋蛋糕先過嚟, 所以朝早我地都係得閒, 老公就要整咗明晚食的口水雞先, 然後就去沙灘會合, 不過都3點幾, 車咗阿哥去練波, 我地先過去, 佢地都係得番3個人, May同大嗰兩個去咗central London, 得番3個細玩沙玩水, 我地就睇住佢地玩, 到5點幾真係要走啦, 同佢地洗腳又係一大挑戰, 終於可以走人, 返屋企接埋子元就去Broadway同葉家會合, 搵吓有咩地方食嘢, 本來想食韓國嘢, 但因為冇位, 最終去咗食茶餐廳, 嘢食唔係太得, 又等得耐份量又唔多味道亦一般, 不過冇辦法啦, 其他佢地又唔啱食! 之後去埋食窩夫雪糕就回家, 明天繼續!

27/7/25

 27/7/25     SUN     WARM

今朝仲爺仲要去練波, 但11點幾要去睇戲, 係有啲趕, 搞到食唔切早餐, 又要喺戲院買貴熱狗食! 老公係都要去戲院睇恐龍, 但老實今集唔好睇, 恐龍又少打又唔多, 呃錢! 睇完去食嘢, 本來去咗荔灣, 但又要等位佢又好似冇安排唔憂做咁, 我就搵吓附近有咩食, 見到之前book mark咗一間韓國嘢行一陣唔太遠, 就去試吓啦! 最後都算幾好食, 食完買埋廢水, 行商場行到5點先走, 佢地喺uniqo買咗件衫, 子元用自己錢買咗公仔, 返屋企就要整嘢包雲吞, 之前仲爺講咗好多次想食架啦, 放暑假點都要整一次比佢, 包得嚟8點幾食得, 又係秒殺咗, 食完又繼續掛住睇電視, 11點幾先沖涼休息!  

26/7/25

 26/7/25     SAT     WARM

今日好攰呀, 去咗四個場買嘢, 仲要做work out同清潔, 真係好攰! 其實都瞓到10點幾先起身食早餐, 但都12點幾先出到門口, 先去咗B&Q買咗廁所板, 再買埋餸, 返嚟比子元換廁所板, 佢又真係換到, 叻仔! 跟住我地就再去中起同Costco, 呢兩個場都好攰, 仲要塞吓車咁, 最後返得嚟都5點多, 我地先食嘢, 真係有啲遲, 食完嘢做埋清潔, 再做埋work out, 我已經好攰, 所以沖咗身就喺房開冷氣打機, 最後老公整咗炒米粉, 好味!

25/7/25

 25/7/25     FRI     WARM

今日都係冇出過街, 難道我個暑假都係要咁過! 朝早好早醒咗幾轉, 所以都唔係瞓得咁好, 跟住又9點幾先起身, 煮早餐食完仲仲都好合作跟時間表做嘢, 我就襯機做咗work out先, 又爆汗唔錯! 然後就係等埋老公返嚟叫咗雞食, 然後仲爺話要打機, 咁就打咗陣, 佢又要跟埋出去做踢波練習, 咁我就摺埋啲衫休息吓, 佢返嚟又再打多陣, 然後簡單煮咗意粉咋, 食完再打到9點幾就沖涼啦!

24/7/25

 24/7/25     THU     WARM

今日仲爺冇做日常嘢, 因為佢要去牙科覆診, 11點要到, 基本上食完早餐就要出門口, 去到仲爺仲係好驚, 但發現今日原來唔係巫婆, 即刻放鬆哂, 最終各樣嘢都好順利完成, 係咁二洗咗啲牙, book 埋期就走得! 出得嚟當然唔想咁快返屋企, 近近地不如去Broadway, 仲可以去買埋日本麵包, 正! 去埋primark買埋衫, 仲爺都要買番啲衫, 大隻咗咁多! 行到點幾先回程, 仲要去埋超市買埋餸先返去, 仲爺又要食雞麵又要煮比佢! 之後又話要打機, 咁就玩到7點煮埋飯沖涼休息!

23/7/25

 23/7/25     WED     WARM

今日全日都留喺屋企, 又唔算係咩都冇做的, 9點幾先起身煮早餐, 仲仲要跟時間表, 但佢真係太慢, 唔係好跟得上時間, 尤其數學做得慢, 都要train番快啲先得, 仲有冇咩程序點做, 唔掂! 午餐快手煮咗魚蛋米咋, 仲仲食番琴日食唔哂的炒麵, 之後再做埋另外兩項, 嗰時先發覺原來佢而家可以寫的英文都幾多吓, 係有啲意外! 佢做哂嘢就同咗葉家姐玩, 咁我就做自己嘢再做埋workout先啦, 仲有清潔埋梳化底, 葉家下星期過嚟, 都要清吓梳化位! 之後都係煮飯咁啦, 食完睇埋電視沖涼休息!

22/7/25

 22/7/25     TUE     WARM

今日正式開始放暑假, 好似仲未習慣咁, 朝早老公起身嘈一嘈醒咗我, 但好快瞓番, 不過係咁發夢, 發到9點幾一醒, 仲係矇矇吓, 運作一陣先記起今日放假但仲仲10點要學音樂, 快手起身梳洗叫佢起身, 不過佢話學完先食早餐, 咁我就唔趕啦, 慢慢煮食咗先, 然後就跟住時間表做嘢, 都叫做跟到啦, 午餐就煮粥同炒麵咋, 仲仲比子元捉咗去做繩梯, 我就襯機做work out, 做番之前做開嗰個, 真係會爆汗囉, 做到抽筋呀! 但希望肯做又食少啲可以瘦到! 食完午餐仲爺做多陣嘢就去咗同學屋企玩, 只係隔離街我試吓比佢自己行過去, 都要學吓放手架啦! 老公放工返嚟食埋嘢先接佢出去做gym, 肥豬減肥計劃! 晚飯開始要淡啲, 不過除咗豬肉繪菜都有漢堡扒同魚柳, 食完又掛住睇電視, 10點幾先沖涼!

21/7/25

21/7/25     MON     HOT

今日真係返埋就放假啦, 真暑假下午開始, 9點返到去, 啲同事已經各自各緊, 其實我都係想問車究竟邊個做邊part, 但佢地好似唔係好理咁, so far都叫做搵到自己做啲咩, 都係啲簡單嘢, 其實啲同事吹水多過做, 好在我都有人吹水, 隔離部門個香港人過嚟, 叫我幫佢手整壁佈, 反正啲同事都係吹水, 我要做的都唔難做, 佢地個個早走, 得我一個準時放工, 我恨不得佢地快啲走哂唔好阻住我一個人做嘢添呀! 1點幾ellen都要放工, 咁就做埋嗰埋算, 我去食飯佢就收工, 再返到去啲人已經走哂, 我就可以做自己嘢, 幫細佬print功課, 再攞埋文具等等, 差不多時間要走啦! 去咗natural natural買啲嘢先返去, 都係食吓嘢先, 然休息吓再幫仲爺整埋個時間表, 7點幾煮飯食, 睇吓電視沖涼瞓覺! 

20/7/25

 20/7/25     SUN     WARM

今朝瞓到完全唔知時間, 10點多仲仲叫醒我, 諗住食埋早餐揍仲爺去買生日禮物再去生日會, 但原來老公個諗法係, 全部人一齊出去喺球場等到仲爺玩完生日會, 然後再去white city睇戲, 咁生日會閒閒地都2個鐘, 咁坐喺到等咩呢, 咁多次生日會都係放低佢就走架啦, 佢今次又突然話咁樣渣車來來去去你唔明, 老實我冇渣車我梗係唔明啦, 但咁樣出咗去一日, 衫又洗唔到, 清潔又做唔到, 唔work 喎, 對佢嚟講梗係冇分別啦, 係到佢都係坐喺到打機咋嘛, 但我就已經可以做好多嘢! 最後佢講到係就你喎, 小你呀, 就咩撚嘢呀, 子元講得啱, 佢個plan比人ban咗咪發老脾囉! 我真係傷心咗好耐, 今日全日都冇心情, 就算佢地返到嚟, 我其實都唔係好想理佢地, 就算個口應個心都唔係真係想應, 我一向咩都放哂上面, 都擺明係黑面架啦, 咁客觀睇件事根本我冇錯, 反而係佢自己自私咋嘛, 佢係唔想車我地的話, 其實我同子元撘巴士過去都得架喎又唔係冇車! 

19/7/25

 19/7/25     SAT     RAIN SUN

今日好充實, 8點多起身, 食完早餐要出去買餸先, 子元出咗去做gym, 仲仲就上音樂, 我地去完Costco買斧頭扒, 再去Sainsbury's買餸, 返得屋企再出得門口已經11點多, 去gym接埋子元就出發過Bristol, 因為又約咗May佢地BBQ, 先接咗May再去中超入貨, 冇黑涼粉, 咁再去西超買埋其他肉, 最後試埋一間細中超, 買咗白涼粉, 今日整埋糖水! 結果差不多4點先返到去, 開始忙亂的廚房工作! 又要整咗炒米粉食咗先, 又要燒嘢食, 好忙碌, 最終都食得哂啲嘢, 都燒都9點幾, 開始天黑啦, 要執嘢, 老公又要去入定油先, 最後食埋糖水, 仲爺沖埋涼, 11點半回程, 都兩個鐘返得到嚟, 但老公都係勁眼瞓咁, 陰公!

18/7/25

 18/7/25     FRI     HOT

終於最後一日開工啦, 雖則下星期一都要返多一日, 但冇學生係另一回事, 所以唔緊要! 今日都係要跟顛妹, 佢繼續keep住最後一日都係態度惡劣, 同佢講道理有時都真係冇氣, 本身今日都係冇咩要管應該冇咩事架啦, 點知佢可以唔見咗學生證, 搵哂都冇咁班主任叫佢去reception叫整過張啦, 佢又怕因為要比錢阿媽會鬧, 死都唔肯去, 同佢諗解決方法佢又唔理唔聽但自己又冇辦法, 好在路過啲老師趕佢跟我行, 最終問咗根本就唔洗錢又唔好今日做, 9月開學先算! 咪解決咗囉, 我根本唔想再理佢啦! 學生走咗, 我地就要去聽校長吹水, 今年冇得快放, 所以接唔到我隻仲仲最後一日小學雞, 係有啲可惜, 好在子元都有影吓相! 返到嚟食吓嘢睇吓YT, 佢地去咗球場, 咁我就自由吓, 摺咗衫, 佢地差不多返就煮晚餐, 簡單只係整香蒜蝦仁意粉同焗魚柳咋!

17/7/25

 17/7/25     THU     HOT

今日真係值得記錄, 因為真係出事, 我部戰車幾經辛苦, 終於個後軚頂唔住, 連硬軚都爛得, 就係車咗仲爺去學校, 行多咗一陣, 去到brentside已經唔可以再郁, 結果, 我要由brentside行返學校, 足足行咗一個鐘, 仲要推住架車, 仲要一路send msg返去話遲, 又要打比老公求救, 要佢搵人整軚, 再請早兩個鐘放工嚟接我! 終於返到學校, 都係要開工, 好在今日唔係太辛苦, 基本上都係睇戲, 最後一日課堂嘛! 放工老公啱啱好到, 展開長征, 因為要渣個半鐘先去到整車, 辛苦子元又要揍仲仲放學又要揍佢去球場, 整得嚟回程真係7點有多先去得到球場接佢地, 所以只係食咗麥記, 快啲返去沖涼休息啦!

16/7/25

 16/7/25     WED     WARM

今日跟顛妹, 還算可以啦, 冇咩大事已經好好! 係頭嗰堂係代課, 臨尾有啲顛, 同另一個口角又動手掉書, 但代課同我都冇出聲, 多一事不如少一事, 寫少兩隻字! PE堂打bench ball, 算係輕鬆咁執吓波就OK! 小息後英文先好笑, 因為兩個顛要分開, 結果我就要去搵個吉的課室跟飯筒安排教書, 佢真係好嘢呀, 佢啲嘢比我地做人工就佢袋! 不過我放咗半個鐘飯, 唔理咁多啦! 放飯時做好個架部打吓機咁, 最尾嗰堂數學同小木偶吹水, 講吓搵外快等等, 時間都好快過, 接埋仲爺去, 沖好涼食嘢先, 都係hea同休息吓, 簡單煮飯同雞就算!

15/7/25

 15/7/25     TUE     WARM

今日真係好攰, 三隻小天使冇事就冇事, 但有起事上嚟真係好攰, 尤其士嗰件肥妹, 佢實在係太過high need, 其實冇咩可能一揍三, 不過佢地唔會改架啦, 算啦! 今日主要幾樣煩嘢, 叻妹小息好地地玩緊game, 佢走去閂咗人地喎, 比我都黝啦, 佢仲要好委屈咁又喊, 又要人原諒佢, 話佢有講對住喎, 收皮啦, 佢呢啲, 過幾年喺街比人打死佢父母唔好怨人! 跟住全日都好煩啦, 去廁所冇問題, 去完又話要返去攞M巾, 但已經到放飯時間啦嘛, 大房又冇人, 我點分身帶人去買飯又帶佢去廁所, 跟住佢就喺到扭, 真係想打佢一身, 最終叫個同事頂一陣先, 我快去快回, 終於搞掂哂我可以放飯, 我已經好攰, 今朝PE堂又要陪打籃球, 又要呵住佢咁, 其實佢啲同學真係好大愛架啦! 放完飯返去冇改善, 照去上堂啦, 叻妹已經分枱坐, 佢就係咁想氹番人, 咁人地連望都唔願望佢, 佢又喺到喊, 我解釋佢知, 你打人一拳say sorry, 咁人地係咪會唔痛, 唔會架嘛, 佢又唔出聲咁! 到放學先煩, 佢又要同叻妹一齊行, 叻妹唔想肥妹跟住佢, 總之最後佢地分開行, 我唔知點啦, 夠鐘送哂出門口就算, 我都要返屋企做蟲蟲, 不過倒垃圾嗰時唔方做蟲蟲, 到回收籃有蟲, 我馬上掉埋佢, 嚇死我! 食完嘢, 仲爺出咗去練跑, 我就睇足咁耐電視, 7點幾先煮晚餐, 又一窩熟, 快靚正! 食完洗碗沖涼休息!

14/7/25

 14/7/25     MON     WIND

今日終於冇咁熱, 仲好大風, 好事嚟的, 但喺課室都仲係好焗! 返到去照常開工, 但我個學生冇返, 等咗佢一堂都未返, 點知個老師點錯名, 佢根本都冇返點咩鬼! 到第二堂個老師因為都冇咩好做就請我離開, 但返大房又係叫我返課室, 你地班仆街, 有事鍾無艷, 無事夏迎春, 真係好討厭, 都唔明我地實際工作係點, 就你自己方便就算, 鬼唔望你地行路仆街! 結果我今日就炒散咁啦, 替吓飯更hea吓咁都係好事! 放工返嚟食啲嘢, 等埋老公返嚟車我地去球場, 佢又要揍子元撞時間, 所以我要喺球場等到仲爺踢完再撘巴士屋企! 煮得飯等埋佢地返嚟食都9點幾, 真係太夜了, 洗埋碗都10點幾, 沖涼趕埋仲仲落去瞓, 天氣都涼番啦仲賴死唔走! 

13/7/25

 13/7/25     SUN     VERY HOT

今日我冇出過門口, 子元就出咗去比賽, 所以得我同仲仲喺屋企, 起身食完早餐, 12點多老公就揍子元出去, 我同仲仲繼續hea, 打咗比阿媽講電話, 然後就要做清潔, 但真係好熱呀, 所以做得好辛苦! 做完都係熱架, 仲爺話想打機, 最後都陪咗佢打, 可能熱真係咩都冇心機做, 諗諗吓仲未食嘢, 仲爺話想食意粉, 咁就整啦, 食完就要摺埋啲衫, 老公返嚟就準備煮晚餐, 食得嚟睇埋電視都10點幾, 快啲沖涼涼冷氣!

12/7/25

 12/7/25     SAT     VERY HOT

今日主要係下午去Ealing party友野餐, 不過朝早就要先食完早餐老公去接番做完GYM, 跟住去超市買餸, 返得嚟都兩點幾, 快手執埋嘢就出發, 塞吓車咁3點幾先到公園, 不過我地都係第二個家庭到, set好嘢食啲嘢先, 佢地又開始踢吓波咁, 之後炮哥Mandy佢地兩家都嚟啦, 繼續都係吹水踢波咁啦, 都係free吓咁, 最終8點多先走, 夠哂攰! 返到嚟都要食嘢, 老公整咗蝦意粉, 食埋西瓜涼粉, 飽哂, 沖涼休息!

11/7/25

 11/7/25     FRI     VERY HOT

今日好攰呀, 雖然個學生係難搞, 但攰係因為今日係charity day, 加上今日又heat wave, 所以喺課室又焗, 室外又曬, 好在行圈時我已經借定把遮, 唔係暈都似! 最尾嗰節就玩追逐然後water fight, 我都fight咗陣, 但都真係幾攰吓, 玩咗幾分鐘我就算, 所以真係好攰! 學生2點放得學, 我地就要吽到3:15先走得, 老公嚟接我, 諗住去一轉榮業買涼粉, 點知都係冇一盒盒嗰啲, 重點都唔係呢樣, 反而係回程塞到一個點, 點搵路都係會遲, 因為仲爺今日BBQ加disco放5點, 真係趕唔切, 好在托到人幫手揍住先, 但都勁唔好意思囉! 返到沖身再攤吓, 但最終都係要摺衫, 結果一路喺下層都好熱, 最終係食埋外賣先返上嚟沖涼可以涼吓!

10/7/25

 10/7/25     THU     HOT

今日又要跟顛妹, 佢又激到我起火, 因為又要同另一個麻煩友係到嘈, 口舌之爭但又要講粗口, 仲要話開拖, 叫佢停佢又衝走咗去廁所, 等佢出嚟同佢講佢又態度惡劣, 我真係著咗, 大聲鬧我唔做啦, 跟住佢又走咗去, 總之就令有個老師嚟問我有冇事, 仲有北京妹都嚟安慰我, 呢啲位係暖心的! 今日顛妹都係唔合作架啦, 幾經辛苦捱到放工啦, 又唔洗揍仲爺, 佢今日去咗主題公園玩, 7點先放, 所以我可以去咗超市買餸先, 跟住返屋企食吓嘢HEA吓, 今日竟然冇瞓著! 整定晚餐就出去揍仲爺, 返嚟都係食飯睇電視, 真係好熱, 好在我有冷氣!

9/7/25

 9/7/25     WED      HOT

今日學校sports day, 好在我分到個Tara, 基本上都係hea, 一返到去第一堂就係去草地, 因為佢嗰班有個香港人, 佢係咁同我講嘢, 有時都覺得有啲煩, 不過一日半日吹吓水都OK的, 好在之後佢地要去行圈時我就放飯, 執番身彩, 食飽到佢地食, 香港人又走嚟吹水, 最尾嗰堂要整海報等等, 佢地2點放得學, 我地就要捱到正常放學時間, 揍咗仲爺問今日sports day點佢又九唔搭八咁, 激死我, 所以返嚟佢去踢波之後, 我hea住係幾好, 但到佢返嚟佢又激我, 明天要去主題公園又好似唔執嘢咁, 都唔知點教好!

8/7/25

 8/7/25     TUE    WARM

今個星期點解過得咁慢, 我成日覺得今日已經係星期三! 本來以為今日跟year 7, 點知又轉咗, 比咗個新嘢我, 咁又試吓啦, 話難唔難話易唔易, 不過唔洗叫停唔洗發火已經好好! 5堂佢得一堂喺課室, 其他就去咗水飯房或者大房, 是但啦, 總之我又係可以準時收工就可以, 接埋好臭去完picnic的仲仲, 返去都係食啲嘢攤吓先, 而家返到嚟成日要瞓吓先有力, 仲爺去咗練波我慢慢開始郁, 終於的起心肝去煮飯, 又用壓力煲, 真係超方便! 食飯時開咗侏羅紀世界2睇番先, 老公又話想去戲院睇新嗰套!

7/7/25

 7/7/25     TUE     WARM

今日一早知道跟Ellie, 都有哂心理準備, 好在都學期尾, 都冇咩堂真係要上, 其實都係hea, 尤其士RE堂, 成堂都係睇電影, 我把握時間都瞓咗20分鐘, 即刻醒哂, 之前真係眼瞓到暈! 夠鐘送埋條妹走就可以準備收工! 老公今日請咗半日假去睇仲仲表現, 佢參加咗talent show 嘛, 佢表現佢嗰首曲詞編監的新歌, 睇得出佢緊張, 但都表現得幾好呀! 我放工就去咗天天睇吓有冇涼粉買, 最終只係買咗冰糖同炸菜, 返到去先食咗嘢, 跟住要齊齊出門口, 仲仲去踢賓仔, 我要等佢跟完自己撘巴士返去, 因為子元又有另一場7點多要踢! 不過回程都困難重重咁, 先係巴士要等啦, 跟住上咗車行咗幾個站, 又話有個人拍打倒後鏡走咗, 司機報咗警, 咁大家又要換車! 終於返到去, 喺Lidl買啲嘢明天細佬要野餐, 回家換好衫又要快手煮飯, 老公整起咗雞煲架啦, 但都要按制去煮! 煮得嚟佢地都返可以一齊食, 最後食埋西瓜, 可以沖涼休息了!

6/7/25

 6/7/25     SUN     WARM

今日除咗突然同老公嘈咗一轉, 其他都係好正咁過, 換床單買餸做清潔, 其實我都唔知鬧咩, 其實都係啲小事, 好在有子元佢調停, 最終叫埋仲爺一齊山去買餸等等, 跟住又冇事啦! 先去broadway攞咗貨先, 跟住就去買餸, 返去就做清潔, 等老公煮午餐, 炒麵係好食但太少! 最後摺埋衫休息, 睇電視等開飯!

5/7/25

 5/7/25     SAT     WARM

今日都幾多嘢做呀, 朝早起身之後食完早餐, 仲要去同仲爺整番個手機mon, 咁又冇咗50鎊, 等個過程去咗costco買斧頭扒, 真係只買咗三樣嘢, 幾好! 返到嚟收拾吓就出發, 過winnie屋企BBQ, 去到都係幫手整吓嘢先, Janet又再出咗去買嘢, 但佢返嚟前先透定爐, 一開始燒腸燒雞翼等等餵飽啲細路, 之後都係咁燒, 食得好飽呀, 真係飽到食唔落嗰隻! 8點幾收爐啦, 有一家人要天黑前走, 因為得媽媽渣車, 佢唔想天黑開車, 好搞笑! 我地都10點未夠到, 沖好涼都休息啦, 我好攰啦, 今日其實已經算好咗好多!  

4/7/25

 4/7/25     FRI     HOT

今日都係拖住疲憊的身體咁返工, 朝早要幫仲爺運埋個電子結他返去, 返到學校都知到今日係跟個輕鬆的, 但始終要行上行落真係好攰, 完全唔夠力! PE堂仲要幫手, 但又唔可以say no, 好在有個學生睇到我好似唔係幾好狀態, 主動幫手添! 之後都係悶住咁上堂啦, 放飯放足自己45分鐘, 午飯時間佢終於唔走嚟走去, 又因為冇得躲喺廁所, 所以去咗redgra嗰邊坐樹底, 咁我就同個學生吹水吹足咁耐, 都好等我可以解吓悶! 捱到放學走得, 先要去買雞翼再去攞藥, 先至返屋企食嘢, 佢地不久就已經出哂去, 我食完基本上都冇郁住, 要瞓番陣先, 之後先有啲力洗衫摺衫, 老公今日又要子元唔知去邊到踢波, 所以都冇煮晚飯, 又食麥記, 唔脂肪肝先奇, 都唯有正視吓架啦!

3/7/25

 3/7/25     THU     HOT

以為抖咗兩日都已經OK, 但原來返學用的能量比就咁喺屋企係差咁遠, 踩車返學係冇問題架, 但開始要行路啦, 就真係會行唔得快, 上樓梯更加唔洗講, 我真係有心無力! 所以個學生要movement break我堅係唔想, 不過佢今日都算生性, 都冇咩令我為難, 另外又要頂吓飯更, 仲要加個走火警, 好在唔行得遠啫! 最終都算順利收得工, 接埋仲爺返去食咗嘢抖陣又要揍佢返去學校, 因為有話劇表演, 啱啱諗住出車時老公返到, 諗住佢車佢返去就快啲, 點知塞車喎, 好在都趕得切, 跟住又要趕返去等老公煮個麵食, 6點前又要趕返去學校睇, 查實真係好山寨, 我覺得康傑仲認真! 睇咗一個鐘, 主力都係睇仲仲, 其他人真係冇咩興趣睇! 終於完場可以走啦, 返去仲要煮飯, 我又冇力啦, 大家合作啦, 叫埋子元幫手做一樣!

2/7/25

 2/7/25     WED     WARM

今日再請咗一日假, 都係要抖多日先, 不過已經好咗好多! 朝早都係要打電話學校先, 跟住起身送仲爺返學我就返屋企休息, 行平路都仲OK, 但一上樓梯就唔掂, 希望食多幾次藥會好啲! 之後除咗摺咗衫, 就係休息, 冇哂肉就煮咗粥食, 子元返嚟就自己炒吓飯咁, 我都冇理佢, 可能攤得太耐, 周身痛咁, 尤其士條腰, 之後就係頭痛, 郁番睇吓會好啲, 夠鐘就揍仲放學, 佢就慘啲, 今日要踢兩場波, 我都幫唔到佢啲咩! 佢出咗去我就繼續睇電視hea! 然後煮咗晚餐, 得我同子元食咁就食三文魚意粉! 然後都係沖個涼先!

1/7/25

 1/7/25     TUE     VERY HOT

呢兩日真係病到咩都唔記得哂, 連今日要供樓交council tax都唔記得, 朝早打緊去book GP時就收到銀行SMS, 即刻過番數就OK, 跟住就book到GP但要下午先有得睇, 都好過冇啦! 結果朝早喺屋企就休息, 當然要揍咗仲爺返學先啦, 買埋能量飲品就返去抖, 仲要摺埋啲衫, 午餐自己煮, 簡單食魚蛋米就算, 倒埋垃圾先去GP, 踩車過去快好多! 講哂啲情況比醫生知, 佢都係安排照子宮同有藥比我囉, 要等老公放工返嚟先攞到, 接埋仲爺返嚟, 齊齊上房嘆住冷氣先掂, 佢又要上音樂堂, 我地出去攞完藥就返嚟, 主要蒸咗雞腿同煮飯, 我都要喺冷氣房先掂! 簡單食雞飯就算!