31/10/20

 31/10/20.    SAT.    COOL

今朝八點就比子元叫醒咗，一個要畫班一個要補英文，我同老公就去食早餐，食完佢就接子元去Ckonter練習，我就等仲爺畫完畫苑話返屋企，睇埋空間改造王就溫書，初頭都冇嘢，出去食完嘢回來再溫，就出事啦，因為一做閱讀理解就死，閱讀又唔得，理解又唔得，咪又想死囉！唉⋯⋯子元放畫班救咗佢，要出去買嘢食，我就放生咗佢！晚上有好戲睇，雖然係打打殺殺，但又好緊張呢！

30/10/20

 30/10/20     FRI     COOL**

終於到星期五啦, 今日都係唔多想做嘢, 所以都係唔多做, 打吓機算! 早上都係咁返工返學啦, 食完蛋蛋做早餐, 又係時候打吓機, 剪埋餘下的job cert, 編埋老公個更表又係時候放飯, 飯後上咗去德福買埋麵包同雞蛋啦, 下午又係掛住打機, 加上阿姐早走, 就更加自由時間! 放工直接返屋企, 老公揍仲爺去合唱團, 我同笨元就摺埋啲衫, 夠鐘出去接番仲仲同婷豬, 去咗肉肉強食同程家一齊晚飯, 回來都沖涼休息啦, 呢排都係好攰咁!

29/10/20

 29/10/20     THU     WARM

今日都係咁返工返學啦! 早上都有啲趕呀, 仲爺慢吞吞咁, 搞到我都有啲趕呢! 返到去蒸好蛋先見到message Ivy話唔返, 咁唯有同人分咗佢啦! 跟住就係無無聊咁hea吓啦, 打機聽收音機等等, 午飯後就出去行吓, 又買咗嘢啦, 不過都係平嘢啦, 見到有間護膚品特價嘛, 買咗啲洗面奶囉, 又有一排唔洗買! 下午都係上網睇嘢同埋打吓機等放工, 今日返長沙灣所以一定係撘地鐵架啦, 龍翔又炒大車, 路面唔洗諗, 地鐵都塞到爆, 幾經辛苦先去到接仲爺, 又要等老公接完子元等等才來接我們, 去食埋米線先返屋企!

28/10/20

 28/10/20.    WED.    WARM

今朝真係差啲比仲爺玩死，行到出圖書館嗰頭先話急popo，好在有廁所處理咗佢啫，唔係都唔知點死！佢遲我又遲咗，不過都冇所謂，點都唔會遲到呢！返去食埋早餐咪開工囉，但其實都冇咩趕忙，所以都係打吓機多，有嘢埋嚟咪做囉！加上今日返半日，下午要返去溫書，所以更加冇咩動力！返去前要買埋餸，返去又食埋飯咁，所以都3點先開始溫，查實我都係冇上過堂冇讀過啫，history呢家嘢我都真係冇讀過，咪又係要教，真係好難撈！溫到差不多6點要去煮飯，老公係揍咗仲爺返嚟呀，跟住佢咪去咗瞓覺囉！我煮完飯先叫佢地，食完休息夠大家都要郁啦，但笨元開始冇動力啦，溫溫吓又話點都記唔到， 唉。。。你考唔係我考呀，教我可以教但記我幫你唔到架，頂埋明天啦！

27/10/20

 27/10/20     TUE     COOL

雖然已經星期二, 但係都係唔想返工! 朝早叫得佢地起身又要趕牛咁趕, 仲爺今日好冇精神, 全程都冇咩講嘢,

26/10/20

 26/10/20.    MON.    HOT

 今日瞓到自然醒，不過都係9點幾啫，出去荃灣食早餐，再行吓街先，其實都冇咩想買，行吓咁啦！返屋企前去咗惠康入貨，買咗好多嘢飲！下午都係先休息吓，仲仲要做埋個萬聖節裝飾！等佢玩完就同佢執埋啲衫，要換走啲唔啱嘅冬天衫，咁啱ben今日可以嚟攞埋走最好！之後要仲爺再做多份數，都係唔識架啦，唉！6點多老公出咗去買pizza，今晚barry佢地上嚟食飯吹水，等柏樂可以同仲爺佢地玩吓，大人就吹吓水講吓移英問題，讀書等等，講到差不多10點先散，大家都要瞓啦！

25/10/20

 25/10/20     SUN     COOL

今朝本來都好地地，但只要一溫書，加上自己精神唔好時，我真係打到佢顛，再向住個窗大叫，差不多係掟佢落街嗰隻，計數又唔識，串字又唔識，有咩識架！我真係想死！講番今朝，出去食完早餐，幫子元買咗校冷，再入咗沙田行，老公話開咗間snoopy的珍珠奶茶鋪，不過我呢幾日都成日頭暈，雖然去到睇但都係唔多夠精神！有啲可惜！3點多返到去，休息吓就開始溫習，子元好乖自己溫，係仲爺囉，我唔暈咗喺屋企算係咁！老公去踢波就唔知時候，7點幾先喺青衣走，唔諗吓我地都冇食午餐，等佢買嘢返嚟食！

24/10/20

 24/10/20     SAT.    COOL

今朝仲仲同佢畫班，個巴士佬幾衰，啱啱一開車我截佢佢都洗走咗，搞到我哋搭地鐵又要錢又要行咁遠，真係激鬼死我！揍咗仲去畫班我就去食早餐，食完早餐仲有好多時間，又唔想周圍行，最終上咗去阿嫲屋企，坐到夠鐘先去接仲返屋企！返到去同佢對左功課，其實都差不多時間出去學音樂，所以都冇要佢溫書。過去學音樂我就去食午飯，仲仲就食咗麥當勞先去學，佢食雞個樣真係好可愛！學完返到去我就要摺衫，佢就係咁睇機，老公接咗嫲嫲過嚟，就準備大閘蟹晚餐！雖然唔係隻隻都咁多肥膏，但係都好好食！今晚老公突然之間要OT夜更，所以食完就車埋嫲嫲返去佢就返工啦！

23/10/20

 23/10/20     FRI     COOL

終於到星期五啦, 仲要有3日假期呢! 早上都係咁返工返學啦, 不過今日都有啲遲, 本來諗住買麥當勞, 但時間上有啲趕, 唯有放棄! 今日都冇咩做, 所以都係打吓機咁啦, 仲有就係研究移英啲嘢, 但始終未有好詳細的資訊, 都唔知可以準備啲咩咁, 又係睇到好迷茫! 放飯後都係出去行吓, 冇咩特別嘢睇架, 但都買咗零食! 下午主力都係等蟹嚟, 又要分貨咁啦, 本來想叫老公放工過嚟攞咗先, 但最終都係趕唔切, 唯有放工過嚟接埋我! 返去好好儲好啲蟹明天食呢! 一陣就要出門口, 去接子元再食晚餐, 今日好攰, 食完回來我就喺梳化瞓咗!

22/10/20

 22/10/20.   THU.    WARM

今日都係如常咁返工返學啦，今日早番啲出門口唔洗咁趕！返到去忍唔住買咗燒賣食，有時都要放縱吓嘛！食完早餐咪做嘢囉，都冇咩多嘢睇，但都有打吓機嘅！午飯後就出去買餸，日日都係咁過！下午回來都係邊聽收音機邊做嘢，做好囉又打機等放工！回去接更老公就出門口去球場接子元，我就先同仲爺對咗功課先再煮飯，不過今日成日都頭暈，都係失血過多架啦！抖吓就好啲！晚上冇再同子元溫書，中學啦幫唔到咁多，教就教哂佢，係要靠佢自己記！

21/10/20

 21/10/20.    WED.    WARM

又係返工返學啦，不過今日冇車，大家都好似唔記得咗咁， 子元差不多7:20先出門口，有點趕，我同仲爺都係趕，好在而家天氣涼，唔怕行得急！返到公司有啲遲，整得早餐嚟都比平時遲呢！食完早餐都做吓嘢啦，時間都算過得快！午飯後都係出去買餸，回來後都係做吓嘢又打吓機咁啦，都有啲等時間過呢！終於等到放工，回去又要煮飯又要跟仲爺功課，老公又話佢做好功課， 一對之下又甩又漏，啲男人真係信唔過，靠仲爺話做哂你就信就死得啦，我仲洗鬼對咩，真係激死我啦！

20/10/20

 20/10/20.    TUE.    WARM+

今日都係照常咁返工返學啦，返到去蒸蛋時，比阿叔見到我攞住三隻蛋，話我一朝早食咁多蛋。做咗陣野又係時候做吓啲庇護工場工作，然後又差不多時間食飯啦，食飽就出去買餸，今晚試吓整蘿蔔豬扒。下午返去做咗一陣野，我知早收之後我哋又自由自在等放工，返到去接更，老公就去球場接子元，我就係屋企試整新菜式，不過真係好多功夫同埋都有啲手忙腳亂，再整出嚟味道都算可以。等子元踢完波返嚟差不多九點先開飯，好彩仲仲已經對好功課，係未溫書囉，不過佢溫唔溫都係咁上下㗎啦。差不多瞓之前仲爺先來我隻牙好鬆，於是老公又幫佢剝埋又要落去買雪糕搞到11點幾先瞓！

19/10/20

 19/10/20.   MON.    WARM*

又要返工啦，今朝真係唔多願起身呢！如常返工返學啦，返去食埋早餐就開工，都真係要做嘢嘅，早餐唔敢食咁多，因為午餐我地又叫樓下點心，真係好誇張呢，食得好開心呢！下午都係做嘢啦，時間都過得快，好快又放得工啦！可以直接返屋企，老公本來要考佢個試，但一來都唔會再讀埋佢，二來佢發現好多未溫，所以就唔去考呢！咁就煮飯啦，食完就對功課等等，我都唔想咁chur佢地啦，大家辛苦！不過就要同仲爺處理埋啲事務，等學校可以安排到點幫佢！

18/10/20

 18/10/20     SUN.    WARM

今朝老公同細佬去上主日學，我就瞓到差不多10點起身，煮早餐同子元一齊食完，仲催促佢快啲做功課，不過啲哎IS係好難做，所以我同佢一齊做都搵咗好耐。老公車咗仲爺回來佢就自己返上樓，老公就要去嫲嫲新屋睇吓有咩要幫手，我就喺屋企捉住佢兩個做嘢同溫習！三點幾四點就出去食個late lunch，去咗Vwalk食完野行咗個圈，返長沙灣買埋晚飯就返屋企，老公出咗去食飯，我又係管束着佢哋溫習，八點多開飯食完繼續要做，因為真係好多嘢都未溫熟，兩個都係！到九點幾先放過佢哋去沖涼休息睇吓電視！

17/10/20

 17/10/20.    SAT.    WARM

今日煮係如常的星期六啦， 朝早揍咗兩個學補習同畫班就同老公去食早餐，之後佢要車嫲嫲去新屋，所以我要喺畫室附近等仲爺放學就返屋企，睇埋空間改造王先捉仲爺去做功課，又要等老公返嚟接仲仲去學音樂，我就煮咗午餐同笨元食埋就開始要溫書，不過今日進度好慢，5點幾佢又要去畫班啦，仲爺回來到佢做功課！我諗住睇吓子元啲功課啦，點知發現佢有啲完全唔識嘅quiz，未做好嘅功課等等，知佢係唔適應架啦，總之第一次唔得，知道自己有咩不足等！去接番子元就入咗沙田ikea買咗啲嘢， 喺大圍食埋晚餐回家都10點幾，快啲沖涼瞓覺啦！

16/10/20

 16/10/20    FRI.     WARM

返埋今日又放假啦，所以今日都係冇咩心情做嘢，早上依舊都係咁返工返學啦！食埋早餐就做陣嘢，然後午飯因為冇帶飯，又想試吓新嘢， 叫咗個同事幫我去德福攞外賣，不過就有啲晏囉！同埋outback的外賣都比較細，唔多夠食！所以上去買麵包時都買咗丸子比自己！下午本來都做吓嘢，但因為阿姐4點多就閃咗，大家完全處於放縱狀態，又訂大閘蟹又吹水咁，話咁快就放工！回家hea到老公同揍仔爺回來，接埋我地就同程家會和，一齊去食肉肉強食，我地叫咗4個餐，但原來3個都有特價，$300都唔洗呢！食完老公車我地回家就返工啦！

15/10/20

 15/10/20     THU.    WARM

今朝都係如常老公車我哋返工返學，返去食埋早餐就開工做吓嘢又打下機咁啦，午飯後去德福行吓，去無印幫子元買筆，下午返去入房又整口罩，咁又一個下晝，放工決定行過去界限街運動場同子元佢哋會合，原來行過去都要足足一個鐘，咪當做運動囉！過到去又要開始教仲爺做功課，都唔明咁耐點解咁多功課，做到散場都未做完。唯有食完晚餐返屋企做埋佢！很近地喺附近食咋！老公車左我哋返去佢就返工啦！返去沖完涼同啲嘢做埋啲功課趕咗佢去瞓，我又要開始摺衫呀，真係有好多衫要摺！

14/10/20

 14/10/20.   WED.    WARM

今日係14週年結婚紀念日，點都要係咁二慶祝吓，雖然都係晚餐食特別啲就算，但都係慶祝呀！早上如常老公返工，我揍仔返學，今日7點就出門口，可以慢慢返去唔洗趕，仲爺還買到早餐！我就行去南昌站，買埋早餐就返工啦，返去都係做吓嘢又打吓機咁啦！午飯後上德福買晚餐材料，難得精緻一餐嘛就去咗瑪莎買料，煮個靚西餐呢！下午就認真做吓嘢先，放工快手返去就煮大餐，老公揍咗仲爺去踢波，差不多9點先回來呢！仲爺還做了送花仔，送咗向日葵比我，18年啦，我都唔知講過幾多次，問老公幾時再送花比我，但原來要等咁耐先有呢！開得飯啦，最欣賞餐飯嘅都係笨元啦，食哂！清潔完最大工程就係仲爺做埋啲功課，做到11點幾先搞掂，佢真係做得好慢，攞我命！終於有時間同花花白酒影吓相，出咗post，可以去沖涼了！

13/10/20

 13/10/20.    TUE.    8號風球

平白得來的一日假期，昨晚已知今日有機會8號風球，所以都遇咗唔洗返工返學，不過呢樣就唔關老公事，所以佢都係要一早起身，我就閂哂啲鬧鐘再瞓，9點幾起身，仲爺又要入嚟痴一輪，搞到10點先正正經經起身煮早餐食，食完hea到11點幾就捉佢地溫書，笨元真係唔識點溫中學啲書，所以都要好長氣咁guide住佢！仲爺就好努力亦見佢進步咗，咁佢溫好明天的默書就算了！差不多3點先溫完一科geog，就叫老公回來一齊出去食嘢算！落樓順路去找找仲爺隻拖鞋，因為佢去完廁所出嚟好型咁踢隻拖鞋入房，結果直接飛咗出窗，真係好好笑，但仲爺就好傷心，上咗車之後仲喊，真係估佢唔到！好在食完嘢又冇咩，回家老公就瞓陣，我又要開工，今次溫中史，仲爺就比咗份英文佢做，因為唔睇住佢其實得佢自己溫唔到啲咩出樣！7點幾叫醒老公去接埋嫲嫲，去咗大窩口食晚飯然後上去睇埋個屋裝成點，真係細到一個點！同埋真係裝到好奇怪，咩都大大舊，算啦都唔係我住，唔理啦， 快啲睇完就回程啦，明天要返工返學呀！

12/10/20

 12/10/20     MON.    WARM

今日子元唔洗返學，所以朝早唔洗理佢，揍咗仲爺返學老公就車埋我去車站我就返工啦！返去食埋早餐就開始做吓嘢，都唔算好忙，可以吹吓水慢慢做！午飯食住個好美味的蘿蔔牛腩河，真係好正！飯後去德福買埋麵包做早餐就返去啦，下午自閉中，做住嘢又打住機又吹住水咁，喺網上吹水呢！所以時間都算過得好快！放工前大家都努力咁祈求明天8號風球順利掛到2:30後呢！回家後就有飯食啦，老公上堂前會整好餐飯呢，食完清潔完就睇功課，仲爺都算合作，尤其佢自己整咗張獎勵紙之後，真係有盡力呢！最好笑我做運動佢又要做，但個樣真係好好笑囉！沖涼休息打機，完全諗住明天唔洗返工咁！

11/10/20

 11/10/20     SUN.    HOT

今日老公同重仲仲都要返主日學，所以早上佢哋出門口，我就照瞓覺，不過發夢都瞓得唔好。差不多10點老公話佢哋都返嚟一唔一齊食早餐，咁我就起身叫埋笨元梳洗出去！食完早餐又唔想返去，不如出街行吓，結果去咗旺角新世紀，活動仲仲買啲褲，因為好多長褲都唔啱着啦。行到一點多就回程去買埋餸，老公送咗我哋返屋企佢就返工啦，返到去休息吓睇吓電視先，到差不多三點幾四點先開始捉佢哋溫書，今日算係好成功，子元溫咗中文，仲仲都溫咗中默。晚飯食蘿蔔牛腩河，算係簡單快趣又方便，明天仲可以帶飯！晚飯後都係自由活動時間，明天又要返工返學！

10/10/20

 10/10/20.     SAT.    WARM

  今日星期六都係學嘢日啦！朝早一個畫班一個補英文，我地就可以食個早餐，接番兩位去萬寧買啲嘢就回家做功課， 笨元又拖， 拖咪又比人鬧囉， 激死！仲爺夠鐘就出發去音樂，都係好似平時咁囉，佢學嘢我食嘢，回家後就要做功課，子元就自己去畫班，仲爺襯我瞓鬼咗嘅時候係咁睇機，所以等我醒咗就要快啲捉佢做埋先！再出去接子元順手買飯，返到嚟樓下仲買埋功夫茶，都算幾好飲啦！食完沖涼，仲仲要做功課，子元已經入咗去打機！

9/10/20

 9/10/20     FRI.    WARM

終於等到星期五啦，返埋今日就可以放假啦！照樣揍仔返學啦，我就喺紅磡站食埋個麥當勞先返工！今日都係唔多想做嘢架啦，所以聽住收音機過日子！午飯後本來想去MegaBox，但最終同左Joey媽媽去行德福，仲買咗好多零食。諗返佢真係冇做過野打足咁耐機，等收工！直接去球場睇仲仲踢波，條友仔成日掛住玩，又唔聽指令，所以臨走前都比Miss鬧！踢完快手換衫就去食飯，嫲嫲喺度一齊等我哋啦，簡單咁去咗食丸龜烏冬，就一齊搭地鐵返屋企啦！返嚟做運動佢哋就沖涼，笨元掛住打機，種仲仲都掛住睇機，我就睇電視囉！

8/10/20

 8/10/20       THU     WARM

今日都係好早返到去啦，因為又係一早捧佢地返學嘛！食埋個早餐抖吓又開工啦！ 時間都過得好快，午飯後都係出去街街，去咗MUJI買筆比子元用！返到去就先砌生果，再入房做剪嘢，剪到5點就閃人，返出去等放工， 行過球場找仲仲佢地，先做埋功課，然後溫吓英默啦，盡咗人事架啦，反正呢刻識哂明天默又未必識！踢完去咗九龍城食嘢，又食咗六百幾但真係好好食， 夠帶埋飯呢，仲要飽到食唔落！回程時喺車瞓鬼咗，但返去都做番轉運動先，又完全冇睇佢兩個啲功課，由得仲爺自己執書包，手冊都冇簽，放吓手試一日啦，睇吓有冇甩頭甩腳！

7/10/20

 7/10/20.    WED.    WARM

又係醒早起身返學的日子啦，揍咗佢地返學再返工，真係太早，有啲蝕！返去食完早餐就開工啦，太忙又唔係，但係咁有嘢做囉，都幾攰！午飯後出去買包包，蛋蛋，下午返去又繼續做吓嘢囉！放工去球場同嫲嫲交收仲爺，原來老公同每舊上司食完飯都過來，咁就可以車我地返去！買咗飯快手食埋就睇功課，時間非常唔見用，好快又差不多十一點，攰到我死！

6/10/20

 6/10/20.   TUE.    WARM

今日叫做冇咁忙啦，但都係有嘢做架啦！朝早好早又返到去，無法啦，車咗佢地返學真係仲好早呢！返去食住早餐咁，夠鐘又開工啦，因為冇帶飯，約咗joey媽媽一齊出去食，唔想等位所以又去食super 三文治，然後就去sixty eight換埋貨，又要急急腳返去！下午都係忙吓又吹吓水聽住收音機都唔係好做到嘢，淨係對住電腦就得！放工去阿媽到接咗仲爺就回家，阿媽話唔多舒服，咁比佢休息吓！返到去就煮飯啦，子元踢埋波先返，唯有留飯比佢！點知barry揍佢一齊返喎，仲上咗嚟食嘢，真係冇遇到佢呢，唯有煮個麵啦！條友坐到我開口問佢先走呢，真係唔知佢想點呢！

5/10/20

 5/10/20     MON     RAIN

今朝真係估佢唔到， 7點多出門口時竟然落狗屎，真係大雨到你唔信嗰隻，臨出門口時個天黑到變番夜晚咁，上到車基本上已經倒水，送到子元去校門算係安全到達， 到仲爺啦校門塞就遇咗，因為校車喺門口落，啲小朋友冇遮，姨姨要一個一個運送入去，真係有排塞，我送咗仲爺入去，反正都濕，就幫手遮埋其他小朋友入去，最終我就濕到內膽都濕哂， 幾經辛苦返到公司，第一時間換衫換鞋先有時間整早餐呢，用埋風筒吹乾個人先可以做嘢呢！今日啲時間過得快到呢，因為又得番我地兩個人頂成個部門，隔離行唔係AL就病假，真係玩死我地！午飯後上咗德福主力係想買包，點知又走咗去買bra，必需品嘛都要平買！下午返去啲時間真係過得好快，轉個眼就放工，返到去就有飯食，然後都係要清潔完就教功課，小二冇得唔理， 中一更加，真係好攰， 大人細路都攰！

4/10/20

 4/10/20     SUN     HOT

假期的最後一天了, 感覺是失落, 可能呢幾日都冇咩做過嘢, 無無謂咁浪費咗掛, 但呢個環境都冇咩好做, 太矛盾了! 早上記得要出佐敦攞埋子元嗰本作業先, 唔係冇得交! 出得去就喺嗰頭食埋早餐, 本來都冇咩, 但叫咗嘢食先嚟咗個乞衣咁上吓物體, 臭到呢, 唯有快快手食完就走, 跟住就直接返屋企啦, 都幾無奈吓, 因為跟住就咩地方都冇去過, 困獸鬥喺屋企, 仲爺要溫默書, 子元好多功課未做, 真係做足一日都未做完, 抑死呀, 之前係病但好番啲都唔快快做, 今朝又掛住睇機, 咪搞到夜一夜囉! 晚飯老公接埋嫲嫲再去愉景買咗牛陣返嚟打邊爐, 咁我個假期就過咗啦, 月頭返去又忙到PK!

3/10/20

 3/10/20     SAT     HOT

今日除咗仲仲去音樂，都唔洗出去，因為笨元都係唔多舒服，都係休息吓好啲！呢個友仔真係好麻煩，少少攝親都唔得！瞓到10點幾起身煮早餐，唔想出去食，慳番啲嘛！食完就幫仲爺溫吓書，時間過得好快又要出去音樂，笨元就留喺屋企休息啦，叫佢唔好喺房瞓，空氣唔流通，出廳瞓開住風扇通風啲嘛！學完音樂返嚟又好似冇咩事，買咗個包比佢食吓！晚飯好簡單整咗果皮粥同埋用琴晚晴媽的牛腩煮粉食！之後趕番笨元入去做多樣功課啦，星期一都要返學架！做埋運動沖涼趕仲爺去瞓，佢今日叫做溫咗英文啲字啦， 希望明天仲記得！

2/10/20

 2/10/20     FRI     HOT

今日其實都算幾hea過, 瞓到十點幾仲爺嚟叫我地起身, 但我又捉佢去溫埋英默先出去食嘢, 子元又話想食啲嘢先, 咁我又好忙咁啦, 結果差不12點幾1點先出去食嘢, 子元隻腳都係好痛, 老公就話佢係發骨節, 但見佢行又行唔好咁, 都仲要咁迫佢好似唔係好啱囉! 食完嘢去咗Aeon買咗少少嘢就返去, 攞埋嘢就揍兩隻豬去咗晴晴屋企, 我就去咗買餸, 預呢幾日都喺屋企食呢! 返咗屋企吓衫休息吓, 5點幾就過去晴晴家, 其實可以唔洗咁早過去的, 不過喺屋企都冇咩做呢! 過到去都係吹吓水睇吓叫咩外賣, 等齊人8點幾先開飯呢! 仲爺又玩到唔願走啦, 但我地已經11點先散場架啦喎! 笨元都係唔舒服, 睇嚟佢真係隻腳好炎, 快啲好番啦!